Go Back

2 Akorintho Chapter 6

• 1. Na tondũ wa ũrĩa tũrĩ aruti wĩra hamwe nake, twamũthaitha ningĩ atĩ mũtikagwate Wega wa Ngai o tũhũ.
• 2. (Amu ekuuga atĩrĩ, Ihinda rĩa gwĩtĩkĩrĩka-rĩ, nĩndagũthikĩrĩirie, Naguo mũthenya wa kũhonokanio-rĩ, nĩndagũteithirie. Atĩrĩrĩi, rĩu nĩrĩo ihinda rĩu rĩa gwĩtĩkĩrĩka; atĩrĩrĩi, rĩu nĩrĩo mũthenya ũcio wa kuhonokanio).
• 3. Na tũtitũmaga hagĩe ũndũ o na ũrĩkũ ũngĩhĩnga mũndũ, nĩguo ũtungati ũcio witũ ndũkonerũo ũũru,
• 4. na tondũ wa ũrĩa tũrĩ ndungata cia Ngai, nĩtwĩgathithagia maũndũ-inĩ maitũ mothe, nĩ ũrĩa twĩtiiragia maũndũ maingĩ, tũgagĩkirĩrĩria mathĩna, na mabataro, na gũtuurio ngoro,
• 5. na tũgakirĩrĩria kũhũrũo, na kuohwo korokoro-inĩ, na kũreherũo ngũĩ, na tũkĩrutaga mawĩra ma mĩnoga, na kũraaraga twĩiguĩte, na kwaga irio;
• 6. ningĩ tondũ wa gũtũũra na ũthingu, na ũmenyo, na ũkirĩrĩria, na gũtugana, na kũgĩa na Roho Mũtheru, o na wendani ũtarĩ na ũrambu;
• 7. ningĩ tondũ wa kwaragia ũhoro ũtarĩ wa maheni, na gũteithagio nĩ hinya wa Ngai, na kũgwataga indo cia ita iria cia ũthingu na moko maitũ, kwa ũrĩo na kwa ũmotho:
• 8. ningĩ nĩ ũrĩa tũikaraga hĩndĩ ya gũtĩwo na hĩndĩ ya kũmenererio, na rĩrĩa tũgũcambio o na rĩrĩa tũkũgathĩrĩrio; ningĩ rĩrĩa tũkuonwo ta tũrĩ ahenania, ĩndĩ tũrĩ andũ a ma;
• 9. na rĩrĩa tuonagwo ta tũrĩ andũ matoĩo, ĩndĩ nĩtũũĩo mũno; na rĩrĩa tũkuonwo ta tũkiriĩ gũkua, na rĩrĩ, tũkoragwo tũrĩ o muoyo; na tũkonwo ta tũherithĩtio na tũtiũragwo;
• 10. tũkonwo ta tũrĩ atuku, ĩndĩ nĩ gũkena tũkenaga hingo ciothe; na tũkonwo ta tũrĩ ngĩa, no nĩ gũtongia tũtongagia andũ aingĩ; tũgakĩonwo ta tũtarĩ na kĩndũ, no rĩrĩ, indo ciothe no ciitũ.
• 11. Atĩrĩrĩ, Akorintho aya, tũmũtumũrĩire kanua hatarĩ ũndũ tũkũmũhitha, nacio ngoro ciitũ nĩihingũrĩtwo nĩ ũndũ wanyu.
• 12. Inyuĩ mũtihatĩkĩtwo thĩinĩ witũ, nĩ kwĩhatĩka mwĩhatĩkĩte ngoro cianyu inyuene.
• 13. Ta tũthukĩrei ta ũrĩa mũtegeirũo matega nĩ ithuĩ, nĩ gũtũhingũrĩra ngoro cianyu. (Ndamwĩra ũguo ta arĩ ciana ciakwa ngwarĩria).
• 14. Tigagai kwĩohania na arĩa matetĩkĩtie na njĩra itaagĩrĩire, ta arĩ icoki rĩmwe mwĩkĩrĩtwo nao; nĩ ũndũ-rĩ, kaĩ ũthingu ũngĩkĩiguana atĩa na waganu? Kana ũtheri na nduma-rĩ, ingĩkĩgĩa ngwatanĩro na njĩra ĩrĩkũ?
• 15. Na Kristo na Beliari maakĩhota kũiguana atĩa? O na kana mũndũ wĩtĩkĩtie angĩkĩmathithania atĩa na ũrĩa ũtetĩkĩtie?
• 16. Nayo hekarũ ya Ngai-rĩ, yakĩhota atĩa kũrĩkanĩra na mĩhianano? Amu ithuĩ nĩ ithuĩ hekarũ ya Ngai ũrĩa ũrĩ muoyo; o ta ũrĩa Ngai oigire atĩrĩ, Nĩngũtũũra thĩinĩ wao na njeerage gatagatĩ-inĩ kao; ngũgĩtuĩka Ngai wao, nao matuĩke andũ akwa.
• 17. Tondũ wa ũguo-rĩ, Umai thĩinĩ wao, mũikare mwĩamũrĩte kũrĩ o, ũguo nĩguo Mwathani oiga, Na mũtikanahutie kĩndũ kĩĩ thahu; Na niĩ nĩngũmwĩtĩkĩra,
• 18. Na nĩngũtuĩka Ithe wanyu, O na inyuĩ mũtuĩke ariũ akwa na aarĩ akwa, ũguo nĩguo Mwathani Mwene-hinya-wothe oiga.

Home