Go Back

2 Akorintho Chapter 3

• 1. ANGA nĩtũraambĩrĩria gũcoka kwĩgathĩrĩria? Kana ithuĩ twĩ na bata wa kũheo marũa ma gũtũgathĩrĩria tũgĩũka kũrĩ inyuĩ kana tũkiuma kũrĩ inyuĩ, ta ũrĩa andũ amwe me na bata?
• 2. Inyuĩ-rĩ, nĩ inyuĩ marũa maitũ maandĩkĩtwo ngoro-inĩ ciitũ, marĩa mamenyekete na magathomagwo nĩ andũ othe.
• 3. Nĩ ũndũ inyuĩ nĩmuonanĩtio atĩ nĩ inyuĩ marũa ma Kristo marĩa aandĩkithĩtie na ithuĩ, na ti marũa maandĩkĩtwo na rangi, no nĩ marũa maandĩkĩtwo na Roho wa Ngai ũrĩa wĩ muoyo, na ti kwandĩkwo maandĩkĩtwo ihengere-inĩ cia mahiga, tiga ihengere-inĩ cia ngoro cia andũ.
• 4. Ũguo noguo mwĩhoko ũtariĩ ũrĩa tũrĩ naguo harĩ Ngai nĩ ũndũ wa Kristo:
• 5. na ti atĩ tũrĩ aiganu ithuĩ ithuiki a gwĩtuĩra ũndũ ta uumĩte harĩ ithuĩ ithuene, no rĩrĩ, ũiganu witũ uumaga kũrĩ Ngai,
• 6. o ũrĩa watũtuire andũ aiganu a gũtuĩka ndungata cia kĩrĩkanĩro kĩerũ - nakĩo ti kĩa ũhoro ũrĩa mwandĩke, no nĩ kĩrĩa kĩa roho; nĩ ũndũ ũhoro ũrĩa mwandĩke nĩ kũũragana ũũraganaga, no roho-rĩ, nĩ muoyo wĩkanagĩra.
• 7. No rĩrĩ, uumbũri wa ũhoro ũcio warehire gĩkuũ, o ũcio warĩ mwandĩke ũgagĩtemwo mahiga-inĩ, wakorũo wokire wĩ na riri, o nginya ciana cia Isiraeli igĩkĩremwo nĩ gũcũthĩrĩria ũthiũ wa Musa, nĩ ũndũ wa ũrĩa ũthiũ wake warĩ na riri ũgakenga-rĩ, naguo riri ũcio ũgĩkorũo nĩwathirathiraga-rĩ,
• 8. githĩ uumbũri wa ũhoro ũrĩa wa roho to ũgĩtũũre wĩ na riri makĩria?
• 9. Nĩ ũndũ-rĩ, uumbũri wa ũhoro ũrĩa ũrehage ituĩro rĩa gũtua andũ ehia ũngĩkorũo wĩ na riri waguo-rĩ, uumbũri wa ũhoro ũrĩa wa gũtua andũ athingu no ũkĩrie mũno kũgĩa na riri.
• 10. Tondũ-rĩ, ũhoro ũcio warĩ na riri mbere, ũkĩringanio na ũyũ ũngĩ ũũkĩrĩte makĩria, nĩũtigĩte kũgĩa na riri nĩ ũndũ wa riri ũcio ũngĩ ũũkĩrĩte.
• 11. Amu-rĩ, ũhoro ũcio wathiraga ũngĩkorũo warĩ na riri waguo, ũcio ũngĩ wa gũtũũra-rĩ, no ũikarage na riri waguo makĩria.
• 12. Tũkĩrĩ na kĩĩrĩgĩrĩro kĩu-rĩ, nĩtwaragia ũhoro kiumbũro, o tũũmĩrĩirie,
• 13. na tũtiĩkaga ta Musa, ũrĩa wehumbagĩra ũthiũ na tama, nĩ getha ciana cia Isiraeli itikae gũcũthĩrĩria cione ithirĩro rĩa ũhoro ũcio warĩ wa kũninwo.
• 14. No rĩrĩ, meciria ma cio nĩ kũritio maaritirio, tondũ-rĩ, nginya o ũmũthĩ, hĩndĩ ĩrĩa Kĩrĩkanĩro kĩrĩa gĩa tene gĩgũthomwo, tama ũcio ũikaraga o ũtaguũrĩtio, gũtekũmenyeka atĩ nĩũthengetio nĩ ũhoro wa Kristo.
• 15. Na rĩrĩ, o nginya ũmũthĩ, hingo ciothe maandĩko ma Musa magĩthomwo, ngoro ciao ikoragwo ihumbĩirũo nĩ tama.
• 16. No rĩrĩ, o rĩrĩa mũndũ akagarũrũkĩra Mwathani, tama ũcio no ũthengio.
• 17. Nake Mwathani-rĩ, nĩwe Roho; naho harĩa Roho wa Mwathani arĩ, nĩho hohoranagĩrũo ũkombo.
• 18. Na ithuĩ ithuothe, tũrĩ na mothiũ matahumbĩirũo, nĩ kwenenia twenenagia ũtheri wa riri wa Mwathani ta icicio, tũgakĩgarũragwo ũrĩa tũhaana o nginya tũkaya kũgĩa na mũhianĩre o ta wake, tũkiumaga harĩ riri ũmwe, tũgakinyagĩra ũrĩa ũngĩ: naguo ũhoro ũcio wĩkithagio nĩ Mwathani, o we Roho.

Home