Go Back

2 Akorintho Chapter 12

• 1. NO mũhaka ndĩĩrahe, o na gwatuĩka gwĩka ũguo gũtirĩ na kĩguni; no rĩu ngũkinya ũhoro-inĩ wa maũndũ marĩa nyonetio nĩ Mwathani na marĩa ndanaguũrĩrio nĩwe.
• 2. Nĩnjũĩ mũndũ ũtũire thĩinĩ wa Kristo, ũrĩa woirũo na igũrũ, rĩu nĩ mĩaka ikũmi na ĩna ĩthirĩte, akĩambatio o kũrĩa gwĩtagwo igũrũ-rĩa-gatatũ, (no ndiũĩ kana aarĩ na mwĩrĩ, kana akorũo ndaarĩ naguo, hau ndiũĩ; Ngai nĩwe ũũĩ).
• 3. Njũĩ atĩ mũndũ ũcio nĩoirũo (no ndiũĩ kana aarĩ na mwĩrĩ, kana nĩaathengete mwĩrĩ-inĩ wake, hau ndiũĩ; Ngai nĩwe ũũĩ),
• 4. agĩkinyio o kũrĩa maroho ma andũ arĩa metĩkĩtie mathiaga akĩigua ciugo itangĩĩranĩka, iria mũndũ atangĩĩtĩkĩrio aarie.
• 5. Mũndũ ta ũcio nĩwe ndĩrĩĩrahaga nĩ ũndũ wake, ĩndĩ ndingĩĩtĩkĩra kwĩraha nĩ ũndũ wakwa mwene, tiga o ndĩĩrahire nĩ ũndũ wa maũndũ marĩa njagaga hinya nĩ ũndũ wamo.
• 6. No-rĩ, o na ingĩkĩenda kwĩraha-rĩ, ndingĩtuĩka kĩrimũ, amu nĩ ũhoro-wa-ma ingĩaria; no nĩngũtiga kwĩraha, mũndũ ndakae gũtua ũhoro wakwa ta ngĩrĩte ũrĩa anyonaga ndariĩ, kana ngakĩra ũrĩa aiguaga ngĩaria.
• 7. Na rĩrĩ, tondũ wa ũrĩa maũndũ macio ndanaguũrĩrio maarĩ manene ũũ, nĩguo ndikae gwĩtũũgĩria nĩ ũndũ wamo gũkĩra kwaagĩra ndarehithĩirio ũndũ ũhaana ta mũigua mũnene ũthecete mwĩrĩ wakwa, ũikarage ũrĩ mũrekio wa Shaitani a’tuukũrage, nĩ getha ndikae gwĩtũũgĩria gũkĩra kwaagĩra.
• 8. Naho ha ũhoro wa ũndũ ũcio, nĩndathaithire Mwathani mahinda matatũ atĩ aũnjehererie.
• 9. Nake ũrĩa aanjĩrire nĩ atĩrĩ, Wega wakwa nĩguo ũkũiganĩte, nĩ gũkorũo ũhoti wakwa ũiganagĩra harĩa harĩ ũhinyaru. Tondũ ũcio-rĩ, ndirĩ hingo itarĩĩrahaga nĩ ũndũ wa maũndũ marĩa njagĩte hinya nĩ ũndũ wamo, ngenete mũno, nĩ getha ũhoti wa Kristo ũikarage na niĩ.
• 10. Hakĩrĩ ũguo-rĩ, rĩrĩa ngwaga hinya, na rĩrĩa ngũrurũkwo, na rĩrĩa ’nyamarĩkĩte, na rĩrĩa ngũnyarirũo, o na rĩrĩa ngũtuurio nĩ ũndũ wa Kristo, nĩrĩo njiguaga o wega, tondũ-rĩ, hĩndĩ ĩrĩa ’hinyarĩte, nĩyo ngoragwo ndĩ na ũhoti.
• 11. Hĩ! nĩnduĩkĩte o kĩrimũ-ĩ! No nĩ inyuĩ mwaningĩrĩirie, amu nĩ kũgathĩrĩrio ingĩagathĩrĩirio nĩ inyuĩ, nĩ gũkorũo ndiakĩrĩ thutha wa atũmwo acio anene ũũ na ũndũ o na ũrĩkũ, o na ndagĩtuĩka ndĩ mũndũ ũtarĩ kĩene.
• 12. Ti-itherũ-ni maũndũ marĩa ma kũmenyithania atĩ mũndũ nĩ mũtũmwo ki nĩmekirũo kũrĩ inyuĩ na gũkirĩrĩria kũnene, gũkĩringagwo ciama, na gũgĩĩkwo morirũ o na maũndũ ma kuonania hinya.
• 13. Nĩ ũndũ ũrĩkũ mũtaaigananirio naguo na makanitha marĩa mangĩ, tiga o ũyũ wa atĩ niĩ mwene ndiigana kũmũhinyĩrĩria? Kĩnjoherei ũũru ũcio!
• 14. Rĩu-rĩ, rĩrĩ nĩrĩo rĩa gatatũ ngoretwo ndĩĩthagathagĩte njũke kwanyu; na ndikamũhinyĩrĩria, nĩ gũkorũo ti indo cianyu ngũcaria, no nĩ inyuĩ ngũcaria. Tondũ ciana ticio ciagĩrĩirũo nĩ kũigagĩra aciari a cio mũthithũ, no nĩ aciari maagĩrĩirũo nĩ kũigagĩra ciana.
• 15. Na niĩ-rĩ, ndakenio mũno nĩ gũitanga indo ciakwa, o na njitangwo niĩ mwene, nĩ getha maroho manyu magunĩke. No ndagĩkorũo nĩndĩmwendete makĩria-rĩ, githĩ niĩ no nyendagwo o hanini?
• 16. No nĩgũgĩikare o ũguo: niĩ ndirĩ ndamũhinyĩrĩria; no rĩrĩ, ngwĩrũo atĩ tondũ ndĩ mwara-rĩ, nĩndamũgwatirie na ũhinga.
• 17. Kaĩ ndĩ ndamũtwarĩrĩria na ũndũ wa mũndũ o na ũmwe wa arĩa ndanamũtũmĩra?
• 18. Tito-rĩ, nĩ niĩ ndamũringĩrĩirie athiĩ, o na mũndũ ũcio ũngĩ wa ariũ a Ithe witũ ngĩmũtũma matwarane. Kaĩ Tito arĩ ũndũ aamũtwarĩrĩirie naguo? Anga tũtiatongoragio nĩ Roho o ũmwe? Ningĩ githĩ tũtiakinyũkanagĩria o hamwe?
• 19. Ihinda rĩrĩ rĩothe no gũkorũo mũikaire mũgĩĩciria atĩ nĩ kwĩrindĩrĩra tũkwĩrindĩrĩra kũrĩ inyuĩ. Ũndũ kũrĩ no atĩ nĩ kwaria tũkwaria twĩ thĩinĩ wa Kristo, tũkĩonagwo nĩ Ngai. Na rĩrĩ, endwa akwa, maũndũ maya mothe no ma gũtũma inyuĩ muongererũo hinya.
• 20. Tondũ ngwĩtigĩra atĩ hihi, rĩrĩa ngoka, nĩngamũkora mũtatariĩ ta ũrĩa ingĩenda mũkorũo mũtariĩ, na niĩ mwene ngorũo nĩ inyuĩ ndariĩ ta ũrĩa mũtangĩenda; ndigagĩkore hihi kũrĩ na njũgitano, na ũiru, na marakara, na ngĩrano, na njambanio, na njukũ, na mwĩtũũgĩrio, o na ngũĩ.
• 21. Ngũgĩĩtigĩra atĩ hĩndĩ ĩo ngacoka gũũka, Ngai wakwa ndakanjonorithie harĩ inyuĩ, na njigue kĩeha nĩ ũndũ wa andũ aingĩ arĩa magakorũo matũire o mehagia kuuma tene, na matirĩ merira nĩ ũndũ wa maũndũ marĩa mathũku, na ma ũmaraya na ma ũũra thoni, marĩa matũire mekaga.

Home