Go Back

2 Akorintho Chapter 11

• 1. HĨ! ndakĩenda mũngirĩrĩrie ũrimũ ũrĩa ndĩ naguo mũnyinyi - ĩĩ-ni, ta kĩngirĩrĩriei!
• 2. Amu nĩ ũiru ndĩraigua nĩ ũndũ wanyu, ũiru uumĩte kwĩ Ngai: tondũ atĩrĩ, nĩndatigire kwagĩa kĩrĩko atĩ mũhikio nĩ mũthuri o ũmwe, nĩguo ngamũrũgamia mbere ya Kristo ta mũrĩ mũirĩtu mũthingu.
• 3. Ĩndĩ ndĩ na guoya gũtigatuĩke atĩ meciria manyu nĩmegũthũkio matigithanio na ũgima o na ũtheru ũrĩa ũmwagĩrĩire mũrĩ a Kristo, ta ũrĩa nyamũ-ĩrĩa-ya-thĩ yahenirie Hawa na wara wayo.
• 4. Tondũ mũndũ angĩũka aheane ũhoro wa Jesu ũngĩ, ũrĩa tũtaamũheire ũhoro wake ithuĩ, o na kana mũngĩamũkĩra roho ũngĩ, na ti ũrĩa mũraamũkĩire, o na kana ũhoro-mwega ũngĩ, tiga ũrĩa mwetĩkĩrire-rĩ, mũgĩkirĩrĩria ũhoro wake, kaĩ mweka wega-ĩ!
• 5. Amu ũrĩa nguona-rĩ, nĩ atĩ ndikĩrĩ thutha o na hanini wa atũmwo acio anene ũguo-ĩ!
• 6. No rĩrĩ, o na ingĩtuĩka ndĩ kĩrimũ gĩa kwaria, tiguo ndariĩ ũhoro-inĩ wa kũmenya maũndũ. Tũmũmenyithĩtie wega atĩ ũguo nĩguo tũtariĩ na maũndũ mothe marĩa tũtũire twĩkaga kũrĩ andũ othe.
• 7. Kana hihi nĩ kũhĩtia ndakĩhĩtirie ngĩĩnyihia nĩ getha inyuĩ mũtũũgĩre, nĩ ũndũ wa ũrĩa ndamũhunjagĩria Ũhoro-ũrĩa-Mwega wa Ngai itekũheo kĩndũ?
• 8. Nĩ gũtunya ndatunyaga makanitha mangĩ, ngaheagwo indo cia kũndiirĩrĩra nĩmo, nĩguo ’hotage kũmũtungatĩra inyuĩ.
• 9. Na rĩrĩa ndatũire kwanyu, ndaaga indo-rĩ, ndiigana kũhinyĩrĩria mũndũ o na ũmwe; nĩ ũndũ ariũ a Ithe witũ, rĩrĩa mokire moimĩte Makedonia, nĩmaa’heire cia kũigana mabataro makwa; na maũndũ-inĩ mothe nĩndegiririe kũmũhinyĩrĩria, na noguo ndĩrĩĩgiragia.
• 10. Tondũ wa ũrĩa ũhoro-wa-ma wa Kristo ũrĩ thĩinĩ wakwa-rĩ, gũtirĩ mũndũ ũkangiria ndĩĩrahage na ũndũ ũcio bũrũri wothe wa Akaia.
• 11. Nĩ ũndũ kĩ? Nĩ atĩ ndigũkĩmwenda? Hau nĩ Ngai ũũĩ.
• 12. No rĩrĩ, ũguo njĩkaga-rĩ, ngũtũũra o njĩkaga, nĩ getha ndĩmaagithie kamweke arĩa macaragia kamweke, o acio merahaga atĩ thĩinĩ wa wĩra wao maiganaine na ithuĩ.
• 13. Amu andũ ta acio nĩ atũmwo a maheni, nĩ aruti wĩra me na ũrambu, na mehaananagia na atũmwo a Kristo.
• 14. Naguo ũguo ti ũrirũ, nĩ gũkorũo Shaitani o nake nĩehaananagia na mũraika wa ũtheri.
• 15. Hakĩrĩ ũguo-rĩ, ti ũndũ mũnene ndungata ciake nacio igĩkorũo ciĩhaananĩtie na ndungata cia ũhoro wa ũthingu. Na marigĩrĩrio ma andũ acio-rĩ, makaringanio na maũndũ marĩa mekĩte.
• 16. Nguuga o rĩngĩ atĩrĩ, Mũndũ nĩatige kwĩgereria atĩ ndĩ kĩrimũ; no mũngĩkorũo noguo mũkwĩgereria, njĩtĩkĩrani, o na ndĩkĩrĩ kĩrimũ, nĩguo ndĩĩrahe hanini o na niĩ.
• 17. Ũrĩa nguuga-rĩ, ndikuuga ta arĩ ũhoro wa Mwathani, tiga ta arĩ ũrimũ ndĩ naguo ũguo ndĩreta kwĩraha.
• 18. Kuona atĩ kwĩ andũ aingĩ merahagĩra maũndũ ma ũmwĩrĩ-rĩ, niĩ na niĩ nĩngwĩraha o tao.
• 19. Inyuĩ-rĩ, tondũ mũkĩrĩ ogĩ, nĩmũkiragĩrĩria andũ arĩa matarĩ ogĩ, mũtekũigua ũũru.
• 20. Nĩ gũkorũo gũkirĩrĩria mũkiragĩrĩria mũndũ, o na angĩmũtua ngombo ciake, o na angĩrĩaga indo cianyu, o na angĩmũtwarĩrĩria, o na kana etũũgĩrie, kana amũgũthe rũthĩa.
• 21. Ndĩraaria ũguo ta ngwĩmenereria, tondũ ithuĩ tũtiigana kwĩũmĩrĩria ũguo. No rĩrĩ, ũndũ o wothe ũrĩa mũndũ angĩeta kwĩgathĩra, no njete kũwĩgathĩra o na niĩ. (Ndĩraaria ta ndĩ kĩrimũ).
• 22. Githĩ o nĩ Ahibirania? O na niĩ ndĩ o Mũhibirania. O nĩ Aisiraeli? Na niĩ ndĩ o Mũisiraeli. O nĩ njiarũa cia Iburahimu? Na niĩ ndĩ wa rũciaro rũu.
• 23. O nĩ ndungata cia Kristo? (Hĩ! ngwaria ta mũgũrũki) niĩ-rĩ, nĩndĩmakĩrĩte; ngamakĩra mũno na mawĩra marĩa ndanaruta ma hinya; na ngamakĩra mũno na kuohwo korokoro-inĩ; ningĩ na mahũra matangĩgereka, o na gũkinya kaingĩ ũgwati-inĩ wa gũkua.
• 24. Ndanahũrũo na kĩboko mahinda matano nĩ Ayahudi, o ihinda iboko mĩrongo ĩna, tiga kĩmwe.
• 25. Ndanahũrũo na thanju gatatũ, na ngĩhũrũo na mahiga rĩmwe; iria-inĩ, marikabu iria ciandwaraga ciehire gatatũ, na kwĩ hĩndĩ ndaraarire iria-inĩ, na ngĩroka gũtinda o kuo.
• 26. Ndanathiĩ ng’endo nyingĩ, na nĩ kaingĩ ndanona ũgwati ngĩringa njũĩ, na ũgwati wa atunyani, na ũgwati wa andũ a rũrĩrĩ ruitũ, na ũgwati wa andũ arĩa matarĩ Ayahudi, na ngakĩona ũgwati matũũra-inĩ, o na werũ-inĩ, o na iria-inĩ, na ningĩ ũgwati wa andũ arĩa mahenanagia atĩ nĩ ariũ a Ithe witũ,
• 27. na ndanatũũra ndutaga mawĩra ma mĩnoga na ngĩthĩnĩkaga, na ngakĩraaraga kaingĩ o ndĩiguĩte, ningĩ ngahũta na nganyota, na ngatinda kaingĩ itekũrĩa, rĩngĩ ngaikara ngĩiguaga heho na ndĩ njaga.
• 28. Na ningĩ, hamwe na maũndũ marĩa mangĩ itanagweta-rĩ, nĩharĩ ũhoro ũrĩa ũ’hinyagĩrĩria mũthenya o mũthenya, naguo nĩ wa gũtangĩkagĩra maũndũ marĩa makoniĩ makanitha mothe.
• 29. Nĩ mũndũ ũrĩkũ ũngĩkorũo aagĩte hinya niĩ na niĩ ndikorũo njagĩte hinya take? Ningĩ nĩ mũndũ ũrĩkũ ũngĩhĩngithio, na niĩ ndicinwo nĩ marakara?
• 30. Ingĩtuĩka no mũhaka ndĩĩrahe-rĩ, no ndĩĩrahire na maũndũ marĩa njagĩte hinya nĩ ũndũ wamo.
• 31. Ngai wa Mwathani Jesu na nowe Ithe, o we ũtũũraga e mũgathe tene na tene, nĩoĩ atĩ ndirahenania.
• 32. O kũrĩa Dameski, barũthi ũrĩa waathanaga kuo ithenya rĩa mũthamaki Areta nĩaarangithĩirie itũũra rĩa Adameski, nĩ getha a’nyitithie.
• 33. No rĩrĩ, ngiumĩrio ndirica, ngĩikũrũkĩrio rũthingo-inĩ ndĩ thĩinĩ wa rũgara, ngĩkĩhonoka moko-inĩ make.

Home