Go Back

1 Akorintho Chapter 9

• 1. NIĨ githĩ ndirĩ na rũtha rũa gwĩtuagĩra ũrĩa ngwĩka? O na githĩ ndirĩ mũtũmwo? Githĩ ndionire Jesu Mwathani witũ? Anga ti inyuĩ maciaro ma wĩra ũrĩa ndũire ndutagĩra Mwathani ndĩ thĩinĩ wake?
• 2. O na ingĩtuĩka ndionagwo ta ndĩ mũtũmwo nĩ andũ angĩ-rĩ, kũrĩ inyuĩ ndĩ o mũtũmwo; nĩ ũndũ inyuĩ mũtũire thĩinĩ wa Mwathani, nĩ inyuĩ rũũri rũa kuonania atĩ ndĩ mũtũmwo.
• 3. Ũhoro ũrĩa ngũcokeria arĩa mendaga kũ’haara nĩ atĩrĩ:
• 4. Ithuĩ githĩ tũtirĩ na kĩhooto gĩa gwĩtagia gĩa kũrĩa na gĩa kũnyua?
• 5. Githĩ tũtirĩ na kĩhooto mũndũ atwaranage na mũtumia wake mwĩtĩkia, o ta atũmwo arĩa angĩ, na ta ariũ a nyina na Mwathani, o na Kefa?
• 6. Kana ithuĩ na Baranaba-rĩ, no ithuĩ tũtarĩ na kĩhooto gĩa gũtiga kũrutaga wĩra na moko maitũ?
• 7. Kwĩ hĩndĩ mũthigari athiaga ita agetũũria kuo na indo ciake mwene? Gũkĩrĩ mũndũ ũhandaga mĩthabibu na ndarĩage maciaro mayo? Kana rĩrĩ, kũrĩ ũrĩithagia ũhiũ na ndanyuage iria rĩaguo?
• 8. Icio anga no ihooto cia andũ ndakĩaria? Githĩ watho o naguo nduugĩte o ũguo?
• 9. Amu watho-inĩ wa Musa nĩ haandĩke atĩrĩ, Ndũkanohe ndegwa kanua hĩndĩ ĩrĩa ĩkũranga ngano ĩkĩmĩhũra. Hau-rĩ, nĩ ndegwa Ngai aracaĩra?
• 10. Githĩ ti ithuĩ kĩũmbe ekuuga ũhoro ũcio nĩ ũndũ witũ? Ĩĩ-ni, waandĩkirũo nĩ ũndũ witũ; nĩ gũkorũo nĩkwagĩrĩire mũrĩmi mũgũnda aũrĩmage arĩ na wĩrĩgĩrĩro, nake mũhũri ngano amĩhũrage erĩgĩrĩire atĩ arĩ kĩndũ arĩrĩaga ho.
• 11. Ithuĩ akorũo nĩtwahandire mbeũ kũrĩ inyuĩ cia maũndũ ma kĩĩroho-rĩ, kaĩ akĩrĩ ũndũ mũnene tũkĩgetha indo cianyu iria cia gũtũũria mwĩrĩ?
• 12. Akorũo andũ arĩa angĩ me na kĩhooto gĩa kũgayagĩrũo ũguo nĩ inyuĩ, kaĩ ithuĩ tũtangĩkĩgĩa nakĩo kũmakĩra? No rĩrĩ, kĩhooto kĩu ithuĩ tũtiigana gũkĩhũthĩra, no nĩ gũkirĩrĩria tũtũire tũkiragĩrĩria maũndũ mothe nĩ getha tũtikae kũhĩngĩca Ũhoro-ũrĩa-Mwega wa Kristo na ũndũ o na ũmwe.
• 13. Kaĩ mũtoĩ atĩ andũ arĩa marutaga wĩra wa hekarũ marĩaga irio cia hekarũ, na atĩ arĩa maikaragia wĩra wa kĩgongona, o nao marĩ na igai rĩao rĩa indo icio cia igongona?
• 14. Nake Mwathani no taguo aathanire, akiuga atĩ andũ arĩa mahunjagia Ũhoro-ũrĩa-Mwega marĩonagĩra gĩa kũmatũũria o ũhunjia-inĩ ũcio waguo.
• 15. No niĩ ndirĩ ndakĩhũthĩra maũndũ macio o na ũmwe, o na ndiraandĩka ũhoro ũyũ atĩ njĩkwo ũndũ ta ũcio niĩ, amu niĩ-rĩ, nĩ kaba ngue kũrĩ ũndũ ũrĩa ndĩĩrahagĩra ũthahio nĩ mũndũ o na ũrĩkũ.
• 16. Nĩ gũkorũo o na ndatuĩka nĩ’hunjagia Ũhoro-ũrĩa-Mwega-rĩ, ũcio ti ũndũ ingĩhota kwĩrahĩra, amu niĩ ndirĩ hĩndĩ itabatairio nĩ kũũhunjia, na ingĩtiga kũhunjia Ũhoro-ũcio-Mwega-rĩ, kaĩ ndagĩa na haaro-ĩ!
• 17. Tondũ ingĩrutaga wĩra ũcio na kwĩendera, ndaheo ngerenwa; no ingĩkorũo ti kwĩendera gwakwa-rĩ, hĩndĩ ĩo no gũtuĩke nĩ ũramati ndĩĩhokeirũo.
• 18. Hakĩrĩ ũguo-rĩ, ngerenwa yakwa nĩ kĩ? Nĩ atĩrĩ, atĩ hĩndĩ ĩrĩa ngũhunjia Ũhoro-ũrĩa-Mwega, ngũũhunjia hatarĩ kĩndũ ũkũrutĩrũo, ngakĩrega kũrandũra kĩrĩa ndĩ na kĩhooto gĩa kũheagwo ndĩ mũhunjia wa Ũhoro-ũrĩa-Mwega.
• 19. Amu-rĩ, o na itarĩ ngombo ya mũndũ o na ũrĩkũ, nĩndetuire ngombo ya andũ othe, nĩ getha nyone aingĩ makĩria magarũrũkĩte.
• 20. Kũrĩ Ayahudi ngĩgĩikara ta ndĩ Mũyahudi, nĩ getha nyone Ayahudi magarũrũkĩte; kũrĩ andũ arĩa matongoragio nĩ watho ngĩgĩikara ta ndĩ wa gũtongoragio nĩ watho ũcio (o na ndatuĩka atĩ niĩ mwene ndiarĩ wa gũtongoragio nĩguo), nĩ getha nyone andũ acio matongoragio nĩ watho magarũrũkĩte;
• 21. na kũrĩ andũ arĩa matatongoragio nĩ watho ũcio ngĩikara na niĩ ta itarĩ wa gũtongoragio nĩguo (na ti kwaga gwathĩkĩra Ngai, no nĩ gũikara ndĩ mwathwo wa Kristo), ngĩgĩĩka ũguo nĩ getha nyone andũ acio matatongoragio nĩ watho magarũrũkĩte.
• 22. Kũrĩ andũ arĩa manyihĩtie hinya ngoro ngĩgĩikara ta itarĩ na hinya o na niĩ, nĩ getha nyone acio manyihĩtie hinya magarũrũkĩte. Ndanehaanania na andũ othe na maũndũ mao mũthemba o mũthemba, nĩguo ngeragie na njĩra ciothe gũtũma amwe mahonoke.
• 23. Na maũndũ macio mothe ndĩmekaga nĩ ũndũ wa Ũhoro-ũrĩa-Mwega, nĩ getha nduĩke ũmwe wa kũgwatanĩra ũguni waguo.
• 24. Kaĩ mũtekũmenya atĩ andũ arĩa mahĩtahĩtanaga kĩhaaro-inĩ mateng’eraga othe, na no ũmwe ũheagwo kĩheo kĩrĩa gĩkũhĩtahĩtanĩrũo? Inyuĩ-rĩ, gĩteng’ereni na mũteng’erere o ũrĩa ũngĩtũma mũgwate kĩndũ kĩu.
• 25. Na rĩrĩ, mũndũ o wothe ũtuĩkaga wa kĩhĩtahĩtano ta kĩu nĩemenyeragia kwĩhata maũndũ-inĩ mothe. Acio-rĩ, mekaga ũguo nĩ getha mekĩrũo thũmbĩ ya ngatho ĩrĩa ĩrĩcoka gũthũka, ĩndĩ ithuĩ twĩhataga ũguo nĩ getha tũgekĩrũo thũmbĩ ĩtarĩ ya gũthũka.
• 26. Nĩ ũndũ ũcio-rĩ, niĩ nditeng’eraga ta arĩ kwagaaga ngwagaaga; na ngĩhũrana-rĩ, ndiikagia ngundi tũhũ ta ngũhũra rũhuho;
• 27. no nĩ gũtuuka nduukaga mwĩrĩ wakwa ngĩũhatĩrĩria, ngaũtũma ũikarage ũrĩ ngombo yakwa; gũtikae gũgatuĩka atĩ niĩ, ndarĩkia kũhunjagĩria andũ angĩ Ũhoro-rĩ, nĩ kũregwo ngaregwo niĩ mwene.

Home