Go Back

1 Akorintho Chapter 10

• 1. AMU rĩrĩ, ariũ a Ithe witũ, ndikwenda mwage kũmenya atĩ maithe maitũ arĩa a tene, othe maaikaraga mahumbĩirũo nĩ itu rĩrĩa, na magĩtuĩkania othe maĩ-inĩ ma iria rĩrĩa;
• 2. othe magĩgĩtuĩka ta makĩbatithĩtio matuĩke andũ a Musa, marĩ itu-inĩ rĩu o na iria-inĩ rĩu;
• 3. Na magĩtũũra marĩaga irio o imwe othe, iria cia kĩĩroho,
• 4. na makanyuaga gĩa-kũnyua o kĩmwe othe, o kĩrĩa gĩa kĩĩroho; nĩ gũkorũo maanyuaga maĩ moimĩte ndũmba-inĩ ya ihiga yarĩ ya kĩĩroho ĩrĩa yarũmanagĩrĩra nao, nayo ndũmba ĩo ya ihiga nĩ Kristo.
• 5. No rĩrĩ, arĩa aingĩ mũno-rĩ, Ngai ndaigana gũkenio nĩo; amu nĩ kũng’aũranio mang’aũranĩirio nĩwe werũ-inĩ.
• 6. Rĩu-rĩ, maũndũ macio maatuĩkire ta igerekanio cia ũhoro witũ, nĩ getha ithuĩ na ithuĩ tũtikanatuĩke erirĩria a maũndũ moru ta ũrĩa andũ acio maameriragĩria.
• 7. Mũtikanagĩtuĩke ahoi mĩhianano, ta ũrĩa andũ acio amwe maatuĩkire, o ta ũrĩa haandĩkĩtwo atĩ, Andũ magĩikara thĩ makĩrĩa na makĩnyua, magĩcoka magĩũkĩra makĩina makĩrũũgarũũgaga.
• 8. Ningĩ tũtikahũrage maraya, ta ũrĩa andũ acio amwe mekire, nao magĩkĩng’aũka ngiri mĩrongo ĩĩrĩ na ithatũ, o mũthenya ũmwe.
• 9. Ningĩ-rĩ, tũmenye gũkanageria Mwathani, ta ũrĩa andũ acio amwe maamũgeririe, nao magĩkĩninwo nĩ nyamũ-cia-thĩ.
• 10. O na mũtigatete, ta ũrĩa andũ acio amwe maatetire, na magĩkĩninwo nĩ ũrĩa mũninani.
• 11. Na rĩrĩ, maũndũ macio mothe monire maarĩ ta igerekanio, na makĩandĩkwo matuĩke ma gũtũtaara ithuĩ, o ithuĩ tũkinyĩrĩirũo nĩ marigĩrĩrio ma mahinda maya ma ndũire.
• 12. Tondũ ũcio-rĩ, mũndũ ũkwĩĩra atĩ nĩehandĩte ki, nĩemenyagĩrĩre ndakae kũgũa.
• 13. Mũtirĩ mwagerio na magerio matonagwo nĩ andũ othe; na rĩrĩ, Ngai nĩ mwĩhokeku, na ndangĩĩtĩkĩra mũgerio na magerio makĩrĩte marĩa mũngĩhota gwĩtiiria; no hĩndĩ ĩrĩa mũkũgerio nĩarĩmuonagĩra njĩra ya kũhonokera, nĩ getha mũhote gwĩtiiria magerio macio.
• 14. Endwa akwa, tondũ wa maũndũ macio-rĩ, ũragĩrai ũhoro wa kũhoya mĩhianano!
• 15. Nĩ kwaria ngwaria ta arĩ andũ ogĩ ngwarĩria; inyuĩ kĩgerererei ũrĩa nguuga.
• 16. Atĩrĩ, gĩkombe gĩa kĩrathimo, kĩrĩa tũrathimaga-rĩ, anga ti kĩa ngwatanĩro ya thakame ya Kristo? Na rĩrĩ, mũgate ũrĩa twenyũraga-rĩ, anga ti wa ngwatanĩro ya mwĩrĩ wa Kristo?
• 17. Kuona atĩ mũgate ũcio nĩ ũmwe-rĩ, ithuĩ, o na gwatuĩka tũrĩ aingĩ-rĩ, tũrĩ mwĩrĩ o ro ũmwe, nĩ gũkorũo nĩ mũgate o ũcio ũmwe tũrĩaga ithuothe.
• 18. Ta kĩbarei ũhoro wa arĩa maciarĩtwo marĩ Aisiraeli: arĩa marĩaga nyama cia magongona-rĩ, githĩ matikĩgĩaga ngwatanĩro na kĩgongona kĩu?
• 19. Ũrĩa ndĩroiga hau nĩ atĩa? Nĩ kuuga nguuga atĩ nyama ihakĩirũo mũhianano nĩ kĩndũ kũrĩ? kana ngoiga atĩ mũhianano guo mwene nĩ kĩndũ kũrĩ?
• 20. Aca-ni; ũrĩa nguuga nĩ atĩrĩ, nĩ atĩ indo iria andũ a Ndũrĩrĩ marutaga cia igongona nĩ ndaimono marutagĩra, ti Ngai; na ndingĩenda inyuĩ mũgĩe ngwatanĩro na ndaimono.
• 21. Mũtingĩhota kũnyuĩra gĩkombe kĩa Mwathani o na mũnyuĩre gĩkombe kĩa ndaimono, cierĩ; na mũtingĩhota kũrĩa irio cia metha ya Mwathani o na cia metha ya ndaimono.
• 22. Kana twenda kũiguithia Mwathani ũiru? Anga tũrĩ hinya kũmũkĩra?
• 23. Nĩ atĩrĩrĩ, Kũhingwo-rĩ, gũtirĩ ũndũ ũhingĩtwo, no rĩrĩ, ti maũndũ mothe marĩ ũguno. Kũhingwo gũtirĩ ũndũ ũhingĩtwo, no ti maũndũ mothe mangĩtũma tuongerereke hinya.
• 24. Mũndũ nĩatigage gwĩcarĩria o maũndũ ma kwĩguna we mwene, tiga o marĩa mangĩguna mũndũ ũrĩa maikaraga nake.
• 25. Nyama o yothe ĩrĩa ĩkwendio thoko-inĩ-rĩ, mĩrĩagei mũtarĩ kĩũria mũkũũria nĩ ũndũ wa mwĩcuko wa thamiri,
• 26. nĩ gũkorũo thĩ nĩ ya Mwathani, o na indo iria ciiyũire kuo.
• 27. Mũndũ ũtetĩkĩtie angĩmwĩta mũkarĩe irio gwake, na mũkorũo mũkĩenda gũthiĩ-rĩ, rĩai kĩrĩa gĩothe mũrĩihũrĩrũo mũtarĩ kĩũria mũkũũria nĩ ũndũ wa mwĩcuko wa thamiri.
• 28. No rĩrĩ, mũndũ angĩmwĩra atĩrĩ, Nyama ici nĩ hako ya igongona-rĩ, tigai gũcirĩa, mũtigane nacio nĩ ũndũ wa mũndũ ũcio wamwĩra ũguo, o na ningĩ nĩ ũndũ wa mwĩcuko wa thamiri.
• 29. Na hau ti thamiri yaku ndagweta, nĩ ya mũndũ ũcio ũngĩ; tondũ atĩrĩ, niĩ rũtha rũrĩa ndĩ naruo rũa gwĩtuĩra ũrĩa ngwĩka-rĩ, ingĩgĩcirithĩrio na ũrĩa thamiri ya mũndũ ũngĩ ĩkũmwĩra nĩkĩ?
• 30. Ingĩkorũo ngĩrĩa ndĩ na ngatho-rĩ, nĩ ũndũ kĩ ngũgĩcoka gũcambĩrio kĩndũ kĩu njokeirie Ngai ngatho nĩ ũndũ wakĩo?
• 31. Tondũ ũcio-rĩ, rĩrĩa mũkũrĩa, kana rĩrĩa mũkũnyua, o na kana ũndũ ũngĩ o ũrĩkũ ũrĩa mwĩkaga-rĩ, ĩkagai maũndũ mothe mũkĩendaga kũgoocithia Ngai namo.
• 32. Tigagai gwĩka ũndũ ũngĩhĩngithia Ayahudi, kana Ayunani, o na kana kanitha wa Ngai,
• 33. o ta ũrĩa niĩ na niĩ ngeragia gũkenia andũ othe na maũndũ mothe, itegwĩcarĩria ũndũ wa kwĩguna niĩ mwene, tiga o ũrĩa ũngĩguna andũ arĩa aingĩ, nĩ getha mahonoke.

Home