Go Back

1 Akorintho Chapter 1

• 1. NĨ niĩ Paulo, o niĩ ndetirũo na kwenda kwa Ngai nduĩke mũtũmwo wa Jesu Kristo, ngũtũma ngeithi ici, tũrĩ na Sosithene mũrũ wa Ithe witũ;
• 2. twatũmĩra kanitha wa Ngai ũrĩa ũrĩ Korintho, o inyuĩ arĩa mwamũrĩtwo nĩ gũgĩikara thĩinĩ wa Kristo Jesu, mũgetwo mũtuĩke andũ aamũre; nĩ inyuĩ twatũmĩra mwĩ hamwe na andũ othe a kũndũ guothe arĩa makayagĩra rĩĩtwa rĩa Mwathani witũ Jesu Kristo, o we Mwathani wao o na witũ.
• 3. Atĩrĩrĩ: mũrogĩa na Wega, o na thayũ, ciumĩte kwĩ Ngai Ithe witũ na Mwathani Jesu Kristo.
• 4. Niĩ nĩnjokagĩria Ngai wakwa ngatho hingo ciothe nĩ ũndũ wanyu, nĩ ũndũ wa Wega wa Ngai ũrĩa mwaheirũo mwanyitanio na Kristo Jesu;
• 5. tondũ nĩmwatongirio na maũndũ mothe thĩinĩ wake, mũgĩgĩtongio ũhoro-inĩ wothe wa kũheana ũhoro o na wa kũmenya maũndũ,
• 6. kũringana na ũrĩa ũhoro wa Kristo ũrĩa mwoimbũrĩirũo wekĩrirũo hinya thĩinĩ wanyu;
• 7. mũgagĩtuĩka atĩ iheo iria Ngai aheanaga na Wega wake gũtirĩ o na kĩmwe mũtingiarĩtie, na mũgaikara o mũgĩtanyaga kũguũranĩrio kwa Mwathani witũ Jesu Kristo;
• 8. nake nĩarĩmũtũũragia mwĩ na hinya o nginya hĩndĩ ya kũrigĩrĩria, nĩguo mũgakorũo mũtarĩ na ũcuke rĩrĩa mũthenya ũrĩa wa Mwathani witũ Jesu Kristo ũgakinya.
• 9. Ngai nĩ wa kwĩhokeka, o we mwetirũo nĩwe mũtonye ngwatanĩro-inĩ ya Mũrũ wake Jesu Kristo Mwathani witũ.
• 10. Rĩu, ariũ a Ithe witũ-rĩ, ndamũthaitha nĩ ũndũ wa rĩĩtwa rĩa Mwathani witũ Jesu Kristo atĩ mwaragie ũhoro o ũmwe inyuothe, gũtige kũgĩa na nyamũkano thĩinĩ wanyu; no rĩrĩ, mũkĩiguane o wega, mũikarage mwĩ ngoro ĩmwe, mũgĩtuaga ũhoro na njĩra o ĩmwe.
• 11. Tondũ atĩrĩ, ariũ a Baba, nĩ’menyithĩtio wega ũhoro wanyu nĩ andũ a gwa Kiloe, atĩ kwanyu mwĩ na ngucanio.
• 12. Ũguo ndoiga nĩ atĩ o mũndũ wanyu oigaga atĩrĩ, Niĩ ndĩ wa Paulo, kana, Niĩ ndĩ wa Apolo, kana, Niĩ ndĩ wa Kefa, kana, Niĩ ndĩ wa Kristo.
• 13. Kaĩ Kristo akĩgayũkanĩte? Paulo-rĩ, nĩwe waambirũo mũtĩ igũrũ nĩ ũndũ wanyu? kana nĩmwabatithirio thĩinĩ wa rĩĩtwa rĩa Paulo?
• 14. Ngũcokeria Ngai ngatho nĩ ũndũ niĩ ndirĩ mũndũ wanyu o na ũmwe ndabatithirie tiga o Kirisipo na Gayo;
• 15. nĩguo mũndũ o na ũrĩkũ ndakanae kuuga atĩ mwabatithirio thĩinĩ wa rĩĩtwa rĩakwa.
• 16. Ningĩ nĩ niĩ ndabatithirie andũ a gwa Stefana; na thengia acio, ndiũĩ kana kũrĩ mũndũ ũngĩ ndabatithirie o na ũmwe.
• 17. Tondũ-rĩ, Kristo ndaandũmire atĩ ngabatithanagie; aandũmire ngahunjie Ũhoro-ũrĩa-Mwega, na ti ndĩũheanage na ũũgĩ mũnene wa kwaria, mũtharaba wa Kristo ndũkae kwagithio kĩene.
• 18. Amu, harĩ andũ arĩa marĩ njĩra ya kũũra-rĩ, ũhoro wa mũtharaba ũcio no ũrimũ; no harĩ ithuĩ tũrĩ njĩra ya kũhonokio, nĩguo hinya wa Ngai.
• 19. Nĩ gũkorũo nĩ haandĩke atĩrĩ, Ũũgĩ wa andũ arĩa ogĩ, nĩ kũũnina ngaũnina, Naguo ũmenyi wa andũ arĩa imenyi, no ndĩkĩũtue wa tũhũ.
• 20. Mũndũ ũcio mũũgĩ-rĩ, akĩrĩ ha? Arĩ ha ũrĩa mwandĩki-marũa? Arĩ ha mũciri ũrĩa ũũĩ gũcira maũndũ ma mahinda maya tũrĩ? Ũũgĩ wa gũkũ thĩ-rĩ, kaĩ Ngai ataaũrimũhirie?
• 21. Amu kuona atĩ, tondũ wa ũrĩa Ngai aatuĩte na ũũgĩ wake, kĩrĩndĩ gĩa gũkũ thĩ nĩkĩaagire kũmenyana na Ngai na njĩra ya ũũgĩ ũcio wakĩo-rĩ, we Ngai, na kwenda gwake, nĩonire arĩ wega ahonokie andũ arĩa metĩkĩtie na njĩra ya ũrimũ wa ũhoro ũrĩa ũhunjagio.
• 22. Amu Ayahudi metagia ciama, nao Ayunani macaragia ũũgĩ,
• 23. no ithuĩ-rĩ, tũhunjagia ũhoro wa Kristo arĩ mwambe mũtĩ igũrũ; naguo ũhoro ũcio nĩ mũhĩnga harĩ Ayahudi, na harĩ andũ a Ndũrĩrĩ no ũrimũ;
• 24. no kũrĩ andũ arĩa metĩtwo, Ayahudi o na Ayunani, Kristo nĩwe hinya wa Ngai na nĩwe ũũgĩ wa Ngai.
• 25. Nĩ gũkorũo ũrimũ wa Ngai ũrĩ ũũgĩ gũkĩra andũ, o naguo ũhũthũ wa Ngai nĩũrĩ hinya gũkĩra andũ.
• 26. Amu rĩrĩ, ariũ a Ithe witũ, kĩbarei mwĩtĩre ũrĩa mwetirũo naguo, muone atĩ andũ arĩa ete hatirĩ aingĩ ogĩ na ũũgĩ wa gũkũ thĩ, na hatirĩ aingĩ marĩ na hinya, na hatirĩ aingĩ marĩ na igweta;
• 27. no rĩrĩ, maũndũ marĩa monagwo ta marĩ ma ũrimũ gũkũ thĩ, nĩmo Ngai aathurire aconorithie andũ arĩa ogĩ namo, ningĩ marĩa matarĩ na hinya gũkũ thĩ, nĩmo Ngai aathurire aconorithie marĩa marĩ hinya.
• 28. Ningĩ maũndũ marĩa matarĩ bata gũkũ thĩ, o marĩa mairagwo nĩ andũ, gwata o marĩa matarĩ maũndũ kũrĩ, nĩmo Ngai aathurire nĩguo marĩa marĩ ho amatue ma tũhũ,
• 29. nĩ getha gũtikanagĩe mũndũ o na ũmwe ũkwĩraha harĩ Ngai.
• 30. No rĩrĩ, nĩ tondũ wake inyuĩ mũtuĩkĩte a gũikara thĩinĩ wa Kristo Jesu, o we watuĩkire ũũgĩ witũ uumĩte kũrĩ Ngai, na ũthingu witũ, na gũtherio, o na gũkũũrũo;
• 31. nĩguo gũtuĩke ta ũguo haandĩkĩtwo, atĩrĩ, Ũrĩa ũkwĩraha, nĩerahe no ũndũ wa Mwathani.

Home