Go Back

Atũmwo Chapter 22

• 1. ARIŨ a baba na maithe makwa, ta thikĩrĩriai icokia rĩrĩ ngũmũcokeria rĩu.
• 2. Nao maaigua akĩaria na mwarĩrie wa Ahibirania, magĩkira makĩria. Nake akĩmera atĩrĩ,
• 3. Niĩ ndĩ Mũyahudi, na ndaciarĩirũo Tariso, itũũra rĩa Kilikia; no kũrerũo ndarereirũo itũũra o rĩrĩ, ngĩthoma gĩthomo-inĩ kĩa Gamalieli, na ngĩrutwo morutani mothe marĩa merekanĩrĩire kũna na watho wa maithe maitũ, na ngatũũraga ndĩ na kĩyo maũndũ-inĩ ma Ngai, o ta ũrĩa inyuĩ inyuothe mũrĩ nakĩo ũmũthĩ.
• 4. Ningĩ ndananyarira andũ a Njĩra ĩo o nginya makaya kũũragwo, ngĩmohithagia na ngamaikia korokoro-inĩ, arũme o na andũ-a-nja.
• 5. Nake mũthĩnjĩri-Ngai ũrĩa mũnene, o na kĩama gĩothe gĩa athuri, nĩo aira akwa ũhoro-inĩ ũcio; nĩ ũndũ nĩmaa’heire marũa ma gũtwarĩra andũ aitũ arĩa matũire Dameski, ngĩgĩthiĩ kuo, nĩ getha ngarehe andũ arĩa maarĩ kuo Jerusalemu marĩ ohe, nĩguo maherithio.
• 6. Na gũgĩkinya atĩrĩ, rĩrĩa ndarĩ njĩra ngĩthiĩ, na ngĩkorũo nguhĩhĩirie Dameski-rĩ, o ta mĩaraho ũtheri mũnene ũkiuma Igũrũ o rĩmwe, ũkĩnjarĩra mĩena yothe.
• 7. Ngĩkĩgũa thĩ, ngĩigua mũgambo wanjarĩria, ũkĩnjũria atĩrĩ, Saulu, Saulu, ũ’nyariraga nĩkĩ?
• 8. Ngĩcoka ngĩũria atĩrĩ, Wee nĩwe ũ, Mwathani? Nake akĩnjĩra, Nĩ niĩ Jesu wa Nazarethi, ũrĩa ũnyariraga.
• 9. Nao andũ arĩa twarĩ nao, kuona nĩmonire ũtheri, no matiigana kũigua mũgambo wa ũrĩa wanjaragĩria.
• 10. Ngĩkĩũria atĩrĩ, Ngũgĩĩka-atĩa, Mwathani? Nake Mwathani akĩnjĩra atĩrĩ, Ũkĩra ũtonye Dameski, kũu nĩkuo ũrĩĩrĩrũo maũndũ marĩa mothe wathĩrĩirio wĩkage.
• 11. Na ndakorũo nemetwo nĩ kuona, nĩ ũndũ wa ũrĩa ũtheri ũcio warĩ mũkengu, ngĩtwarũo ngwatĩtwo moko nĩ andũ arĩa twarĩ nao ngĩgĩtonya Dameski.
• 12. Na mũndũ wetagwo Anania, ũrĩa weamũrĩire Ngai kũringana na watho, akagĩa na ngumo njega kũrĩ Ayahudi arĩa othe maatũire kuo,
• 13. agĩũka kũrĩ niĩ, na aarũgama hakuhĩ na niĩ, akĩnjĩra atĩrĩ, Saulu, mũrũ wa Awa, coka kuona. Na thaa o ro ĩo ngĩinamũra maitho harĩ we, ngĩonaga.
• 14. Nake akĩnjĩra atĩrĩ, Ngai wa maithe maitũ nĩaagwathĩrĩirie ũtuĩke wa kũmenya ũrĩa endaga gwĩkwo, na wone Ũrĩa Mũthingu, o na ũigue mũgambo uumĩte kanua gake.
• 15. Nĩ gũkorũo nĩũgũtuĩka mũira wake kũrĩ andũ othe, wa kũmoimbũrĩra maũndũ marĩa wonete na ũkaigua.
• 16. Na rĩu ũgũikara wetereire kĩ? Ũkĩra ũkabatithio, wĩthambe mehia maku ũgĩkayagĩra rĩĩtwa rĩake.
• 17. Na gũgĩkinya atĩrĩ, atĩ ndarĩkia gũcoka Jerusalemu na ndakorũo ngĩhoya hekarũ-inĩ,
• 18. ngĩikara ta ningĩtwo nĩ iringi, ngĩmuona akĩnjĩra atĩrĩ, Ndũhiũhe, uume Jerusalemu narua: nĩ gũkorũo matingĩĩtĩkĩra kuumbũrĩrũo ũhoro wakwa nĩwe.
• 19. Ngĩkĩmwĩra atĩrĩ, Mwathani, nĩmoĩ o ene atĩ nĩndaikagia korokoro-inĩ na ngahũrithagĩria thunagogi-inĩ ciothe arĩa magwĩtĩkĩtie:
• 20. na rĩrĩa Stefano mũira waku aaitirũo thakame, o na niĩ ndakorirũo ndũgamĩte ho, na ngetĩkĩra ũndũ ũcio wekagwo, o na ngaikaria nguo cia andũ arĩa maamũragire.
• 21. Nake akĩnjĩra atĩrĩ, Wĩthiĩre, nĩ gũkorũo nĩngũkũrekia kũndũ kũraya kũrĩ andũ a Ndũrĩrĩ.
• 22. Nao makĩmũthikĩrĩria nginya o kiugo o kĩu; magĩcoka makĩanĩrĩra makiuga atĩrĩ, Mũndũ ta ũyũ nĩakĩeherio, atige gũtũũra gũkũ thĩ: amu gũtiagĩrĩire arekwo atũũre muoyo.
• 23. Na rĩrĩa maanagĩrĩra na mũgambo mũnene magĩteangaga nguo ciao, na makĩhurunjaga rũkũngũ rĩera-inĩ,
• 24. mũnene ũrĩa wa mbũtũ ya athigari agĩathana atĩ atonyio nyũmba ya athigari thĩinĩ, na ahaarũo ũhoro wake wega nĩ kũmũhũra na kĩboko kĩrĩ njaaga, nĩ getha amenye gĩtũmi kĩrĩa gĩtũmĩte andũ maanĩrĩre makĩnegenaga ũguo nĩ ũndũ wake.
• 25. Nao maarĩkia kũmuoha na mĩkwa, Paulo akĩũria mũnene ũrĩa wa athigari igana warũgamĩte hau atĩrĩ, Watho nĩwĩtĩkĩrĩtie mũhũre mũndũ Mũroma na kĩboko atarĩ mũtuĩre ituĩro?
• 26. Nake mũnene ũcio wa athigari igana aaigua ũguo agĩthiĩ kũrĩ mũnene ũrĩa wa mbũtũ ĩo yothe, akĩmũũria atĩrĩ, Nĩ atĩa ũkiriĩ gwĩka? Nĩ gũkorũo mũndũ ũcio nĩ Mũroma.
• 27. Nake mũnene ũcio wa mbũtũ ĩo yothe agĩũka, akĩmũũria atĩrĩ, Ta njĩra, wee ũkĩrĩ Mũroma? Nake akiuga, Ĩĩ, nĩguo-ni.
• 28. Nake mũnene ũcio akĩmũcokeria atĩrĩ, Nĩ mbia nyingĩ mũno ndarutire nĩ getha ngatuwo Mũroma. Nake Paulo akĩmwĩra, Ĩndĩ niĩ ndaciarirũo ndĩ Mũroma.
• 29. Na kahinda o kau andũ arĩa maakiriĩ kũmũhaara ũhoro wake magĩgĩtigana nake: o nake mũnene ũcio wa mbũtũ agĩĩtigĩra rĩrĩa aamenyire atĩ nĩ Mũroma, o na tondũ nĩaamuohete.
• 30. Na mũthenya ũyũ ũngĩ, tondũ nĩendaga kũmenya o wega ma kĩrĩa gĩtũmĩte athitakwo nĩ Ayahudi, akĩmuohora, agĩatha athĩnjĩri-Ngai arĩa anene, o na athuri othe a kĩama, atĩ mongane, agĩtherera arehete Paulo, akĩmũrũgamia harĩ o.

Home