Go Back

Atũmwo Chapter 20

• 1. NAYO ngũĩ ĩo yathira-rĩ, Paulo akĩrekania atĩ arutwo magetwo, akĩmahe ũhoro wa kũmomĩrĩria, akĩmoigĩra ũhoro, agĩthiĩ Makedonia.
• 2. Na aarĩkia gũtuĩkanĩria ng’ongo ciakuo, akĩheaga andũ mohoro maingĩ ma kũmomĩrĩria, agĩcoka agĩthiĩ Ũyunani.
• 3. Na aanina mĩeri ĩtatũ kuo, nao Ayahudi maagĩkorũo marĩkanĩire mamwĩke ũndũ na wara hĩndĩ ĩrĩa aatigairie hanini athiĩ Suriata na marikabu-rĩ, agĩgĩtua atĩ no acokere Makedonia.
• 4. Na agĩthiĩ-rĩ, magĩtwarana na Sopatiro mũrũ wa Puro, mũndũ wa Beroia, na andũ a Thesalonike, aa Arisitariko na Sekundo; na Gaio, mũndũ wa Deribe, na Timotheo; o na andũ a Asia, aa Tukiko na Terofimo.
• 5. No rĩrĩ, andũ acio nĩmaathiagĩte na mbere, magĩkorũo matwetereire Teroa.
• 6. Namo matukũ maathira marĩa maarĩagwo mĩgate ĩtarĩ mĩĩkĩre ndawa ya kũimbia, tũkiuma Filipi, tũhaicĩte marikabu, tũkĩmakora kũu Teroa thutha wa matukũ matano; tũgĩikara kuo mĩthenya mũgwanja.
• 7. Naguo mũthenya wa kwambĩrĩria kiumia-rĩ, twakorũo tũũnganĩte nĩ ũndũ wa kwenyũranga mũgate, Paulo, tondũ nĩendete kũroka gũthiĩ, akĩmahe ũhoro magĩcokanĩria nao, akĩraihia ũhoro o nginya ũtukũ gatagatĩ.
• 8. Na rĩrĩ, nĩkwarĩ matawa maingĩ maakanaga thĩinĩ wa nyũmba ya igũrũ ĩrĩa twonganĩte.
• 9. Na mwanake wetagwo Eutuko nĩaaikarĩire ndirica-inĩ, akĩũmĩrũo mũno nĩ toro: nake Paulo aaraihia makĩria ũhoro ũcio aaheanaga, mwanake ũcio akĩgũa thĩ, oimĩte nyũmba ĩo yarĩ igũrũ rĩa iria ingĩ igĩrĩ, tondũ wa ũguo omĩiruo nĩ toro. Nao andũ maamuoya, makĩmũkora arĩ mũkuũ.
• 10. Nake Paulo agĩikũrũka, akĩĩgũithia harĩ we, akĩmũhĩmbĩria, akiuga atĩrĩ, Tigai gũtangĩka, arĩ o muoyo.
• 11. Nake aacoka kũhaica rĩngĩ, akĩenyũranga mũgate, agĩcoka kũrĩa irio, agĩkĩrĩrĩria gũtereta nao hĩndĩ ndaya, o nginya gũgĩkĩa, agĩgĩtigana nao agĩthiĩ.
• 12. Nao makĩrehe kamwana kau karĩ muoyo, makĩnyamarũrũo ngoro mũno.
• 13. Ĩndĩ ithuĩ nĩtwathiagĩte na mbere, tũgĩtonya marikabu, tũgĩthiĩ Aso, tũkĩenda kuoera Paulo kuo: nĩ gũkorũo ũguo nĩguo aarĩkanĩire na ithuĩ, tondũ we mwene nĩendete gũthiĩ na magũrũ.
• 14. Na twacemania nake kũu Aso, tũkĩmuoya marikabu-inĩ, tũgĩthiĩ tũgĩkinya Mitulene.
• 15. Na twoima hau, mũthenya ũyũ ũngĩ tũgĩkinya harĩa haaringaine na Kio; na mũthenya ũyũ ũngĩ wa ĩtatũ tũgĩkinya Samo, na thutha wa ũguo tũkĩroka gũkinya Mileto.
• 16. Nĩ gũkorũo Paulo nĩonete arĩ wega athiage na mbere na marikabu ahĩtũke Efeso, ndakae gũikario kũu Asia: tondũ nĩaahiũhaga, nĩ getha, kwahoteka, agakorũo akinyĩte Jerusalemu mũthenya ũrĩa wa Bendegothito.
• 17. Na rĩrĩa aarĩ Mileto akĩrekania Efeso agĩĩta athuri a kanitha moke harĩ we.
• 18. Nao maakinya, akĩmera atĩrĩ, Inyuĩ nĩmũũĩ ũhoro wa mĩthiĩre ĩrĩa ndaikaraga nayo matukũ mothe marĩa ndaikaire na inyuĩ, kuuma o mũthenya ũrĩa ndaambire gũkinya na ikinya rĩakwa gũkũ Asia:
• 19. mũgakĩmenya ũrĩa ndaikaraga ngĩtungatĩra Mwathani ndĩĩnyihĩtie mũno na ngĩitaga maithori, na ũrĩa ndaageragio na magerio nĩ ũndũ wa ũrĩa Ayahudi maanjohagĩria manjĩke ũũru:
• 20. ningĩ atĩ ndirĩ ndatithia ta ndĩ na guoya ngĩmũheaga ũhoro o na ũrĩkũ wa kũmũguna, na ngĩmũrutagĩra maũndũ harĩa andũ makoragwo monganĩte o na kwanyu mĩciĩ,
• 21. o na atĩ ndanoimbũrĩra Ayahudi o na Ayunani ũhoro wa kwĩrira mbere ya Ngai, na gwĩtĩkia Mwathani witũ Jesu Kristo.
• 22. Na atĩrĩrĩ, rĩu ndathiĩ Jerusalemu, ngĩiguaga ta ndĩ muohe ngoro-inĩ yakwa, na ndikũmenya maũndũ marĩa makangora ndĩ kuo,
• 23. tiga atĩrĩ, atĩ matũũra-inĩ marĩa mothe ’thiaga-rĩ, Roho Mũtheru nĩanyonagia atĩ ũhoro wa kuohwo na wa kũnyarirũo nĩguo ũnjetereire.
• 24. No rĩrĩ, atĩ niĩ mwene ndũũre muoyo ndikuona ta arĩ bata, ingĩkĩhota gũkinyia njĩra gĩturi ĩrĩa ndonereirio ’thiagĩre, na ’hote kũhingia ũtungatĩri ũrĩa ndaheirũo nĩ Mwathani Jesu, nĩguo wa kũhunjanagĩria Ũhoro-ũrĩa-Mwega wa Wega wa Ngai, ndĩ mũira waguo.
• 25. Na rĩrĩ, rĩu nĩnjũĩ atĩ inyuĩ inyuothe, o inyuĩ ndacangacangaga kwanyu ngĩheanaga ũhoro wa ũthamaki wa Ngai, mũtigacoka kũnyona ũthiũ rĩngĩ.
• 26. Tondũ wa ũguo nĩnguuga na ma o ũmũthĩ ũyũ, atĩ ndirĩ hingo ingĩcokererũo nĩ thakame ya mũndũ o wothe angĩũra.
• 27. Nĩ gũkorũo ndirĩ ndatithia ta ndĩ na guoya ngĩmũmenyithia maũndũ mothe marĩa Ngai aatũire aciragĩra gwĩka.
• 28. Wĩmenyagĩrĩrei inyuĩ ene, o na mũmenyagĩrĩre andũ othe a rũũru rũrĩa Roho Mũtheru aamũtuire arori aruo, nĩ getha mũrĩithagie kanitha wa Mwathani, ũrĩa egũrĩire na thakame yake mwene.
• 29. Nĩnjũĩ atĩ ndarĩkia gũthiĩ ndĩmũtige, andũ matariĩ ta njũi ndĩani nĩmarĩtonya thiritũ-inĩ yanyu, na maticayagĩre rũũru rũu.
• 30. Ningĩ gatagatĩ-inĩ kanyu nĩharĩũkĩra andũ mekwaria maũndũ ma ũtũrĩka, nĩ getha magucagĩrĩrie arutwo mamarũmagĩrĩre.
• 31. Hakĩrĩ ũguo-rĩ, ikaragai mwĩhũgĩte, mũkĩririkanaga atĩ ihinda rĩa mĩaka ĩtatũ ndirĩ ndatiga kũmũtaara o mũndũ o mũndũ mũthenya o na ũtukũ, ngĩitaga maithori.
• 32. Naguo rĩu ndamũtigĩra Ngai, na ndamũtigĩra Ũhoro ũrĩa wa Wega wake, arĩ guo ũngĩhota gũtũma mũikarage mũrũmĩte ta nyũmba yakĩtwo wega, na mũgaĩrũo igai hamwe na arĩa othe maamũrĩtwo magatherio.
• 33. Ndirĩ ndacumĩkĩra betha kana thahabu kana nguo cia mũndũ o na ũrĩkũ.
• 34. Inyuĩ nĩmũũĩ atĩ ndatũire ndutaga wĩra na moko maya makwa nĩ ũndũ wa mabata makwa mwene, na nĩ getha ngatungatagĩre andũ arĩa angĩ twarĩ nao.
• 35. Maũndũ-inĩ mothe-rĩ, nĩndamuonagĩrĩria ũrĩa mwagĩrĩirũo nĩ gwĩka, atĩ mũteithagie andũ arĩa maagĩte hinya mũkĩĩnogagia nĩ ũndũ wao, na mũririkanage ciugo cia Mwathani Jesu iria oigire we mwene atĩ, Kũheana nĩkuo kũrehage gĩkeno kũrĩ kũheo.
• 36. Na aarĩkia kwaria ũguo, agĩturia ndu, akĩhoya hamwe nao othe.
• 37. Magĩkĩrĩra mũno othe, makĩhĩmbĩria Paulo ngingo makĩmũmumunyaga,
• 38. makĩgĩa na kĩeha mũno makĩria nĩ ũndũ wa ciugo icio aaririe, atĩ matigacoka kũmuona ũthiũ rĩngĩ. Na makĩmuumagaria makĩmũkinyia marikabu-inĩ.

Home