Go Back

Johana Chapter 19

• 1. HĨNDĨ ĩo Pilato agĩgĩcoka agĩtwara Jesu, akĩmũhũrithia na kĩboko kĩĩ njaaga.
• 2. Nacio thigari igĩtuma thũmbĩ ya mĩigua, ikĩmwĩkĩra mũtwe, na ikĩmũhumba nguo ndune ya rangi ta wa ndathi;
• 3. igokaga harĩ we, ikoiga, Wĩ mũhoro, Mũthamaki wa Ayahudi! ikamũgũtha na hĩ.
• 4. Nake Pilato akiuma nja rĩngĩ, akĩmera atĩrĩ, Oneni, ngũmuumĩria haha mũrĩ, mũmenye ndikuona ngero agerete o na ĩrĩkũ.
• 5. Jesu nake agĩkiuma nja, e na thũmbĩ ĩo ya mĩigua o na nguo ĩo ndune. Nake Pilato akĩmera, Rorei, mũndũ nĩ ũyũ!
• 6. Athĩnjĩri Ngai arĩa anene o na makanga maakĩmuona, makĩrika kwanĩrĩra, makiugaga, Mwambithie mũtĩ igũrũ! mwambithie mũtĩ igũrũ! Nake Pilato akĩmera atĩrĩ, Mũtikĩmũtware inyuene, mũmwambe mũtĩ igũrũ, amu niĩ ndinona ngero agerete.
• 7. Nao Ayahudi makĩmũcokeria atĩrĩ, Ithuĩ-rĩ, twĩ na watho witũ, na tondũ wa watho ũcio nĩ kũũragwo aagĩrĩirũo nĩ kũũragwo, tondũ nĩetuire Mũrũ wa Ngai.
• 8. Pilato aakĩigua ũhoro ũcio, akĩya gwĩtigĩra kwĩ ũrĩa egwĩtigĩrĩte;
• 9. agĩtonya rĩngĩ nyũmba ĩrĩa ya gũcirĩrũo, akĩũria Jesu atĩrĩ, Ũrĩ wa kũ, wee? No rĩrĩ, Jesu ndaigana kũmũcokeria ũndũ.
• 10. Tondũ ũcio Pilato akĩmũũria, Kaĩ ũgũkĩrega kũnjarĩria? kaĩ ũtoĩ ndĩ na hinya njuge wohorũo, na ndĩ na hinya njuge wambwo mũtĩ igũrũ?
• 11. Jesu akĩmũcokeria atĩrĩrĩ, Ndũngĩrĩ na hinya ũnjĩke ũndũ o na ũrĩkũ, ũtangĩheereirũo igũrũ; na tondũ ũcio, ũrĩa wĩhĩtie mũno nĩ ũrĩa ũ’neanire kũrĩ wee.
• 12. Aaigua ũguo, Pilato akĩenda amuohore, ĩndĩ Ayahudi makĩanĩrĩra, makiuga, Wohora mũndũ ũyũ-rĩ, ndũrĩ mũrata wa Kaisari; mũndũ o wothe wĩtuaga mũthamaki nĩamenete Kaisari.
• 13. Pilato aakĩigua ũhoro ũcio, agĩtwara Jesu nja, agĩikarĩra gĩtĩ gĩa ituĩro, handũ hetagwo Harĩa-haare-Mahiga, na hakĩgwetwo na Kĩhibirania hagetwo Gabatha.
• 14. Na rĩrĩ, kwarĩ mũthenya wa Ihaarĩria rĩa Bathaka, na gũgakinya ta thaa thita. Akĩĩra Ayahudi, Nĩ ũyũ, Mũthamaki wanyu!
• 15. Nao magĩkĩanĩrĩra, makiuga, Nĩatwarũo! nĩatwarũo! mwambithie mũtĩ igũrũ! Nake Pilato akĩmoria atĩrĩ, Nyambithie Mũthamaki wanyu? Nao athĩnjĩri Ngai arĩa anene magĩcokia atĩrĩ, Tũtirĩ na mũthamaki ithuĩ, tiga o Kaisari.
• 16. Tondũ ũcio agĩkĩmanengera we akaambwo mũtĩ igũrũ. Magĩkĩnyita Jesu,
• 17. nake akiumagara ekuuĩire mũtĩ wake, agĩkinya harĩa hetagwo Handũ ha kĩbuuri, na noho hetagwo na Kĩhibirania Gologotha;
• 18. na hau makĩmwamba mũtĩ igũrũ, na makĩamba andũ angĩ erĩ mĩtĩ igũrũ hamwe nake, ũmwe mwena ũyũ na ũmwe mwena ũcio ũngĩ, Jesu e gatagatĩ.
• 19. Ningĩ Pilato akĩandĩkithia ũhoro wake kahengere-inĩ, agĩgekĩrithia mũtĩ wake igũrũ. Na ũrĩa kaandĩkĩtwo nĩ ũũ: JESU MŨNAZARI, MŨTHAMAKI WA AYAHUDI.
• 20. Nao Ayahudi magĩgĩthoma ũhoro ũcio aingĩ, nĩ gũkorũo handũ hau Jesu aambĩirũo haarĩ hakuhĩ na itũũra; na waandĩkĩtwo na Kĩhibirania, na Kĩroma na Kĩyunani.
• 21. Nao athĩnjĩri-Ngai arĩa anene a Ayahudi magĩkĩĩra Pilato atĩrĩ, Tiga kwandĩka, Mũthamaki wa Ayahudi; andĩka atĩ nĩ kuuga oigire, Nĩ niĩ Mũthamaki wa Ayahudi.
• 22. Nake Pilato agĩcokia atĩrĩ, Ũguo ndaandĩka-rĩ, nĩndaandĩka ndanina.
• 23. Nacio thigari, ciarĩkia kwamba Jesu mũtĩ igũrũ, igĩkĩoya nguo ciake, igĩcitua maringa mana, mũthigari iringa rĩake, mũthigari iringa rĩake; o na kanjũ nayo makĩmĩoya; na rĩrĩ, kanjũ ĩo ndĩarĩ na rũtumo, yarutĩtio igũrũ gũtumwo ĩrĩ o tama ũmwe ũgwataine mbarĩ ciothe.
• 24. Tondũ ũcio magĩkĩĩrana atĩrĩ, Nĩtũtige kũmĩatũra, tumĩcukĩre mĩtĩ, tũmenye ũrĩa ũgũthiĩ nayo; na nĩ getha ũhoro ũrĩa wandĩkĩtwo ũhingio, ũrĩa uugĩte atĩrĩ, Makĩgayana nguo ciakwa, Narĩo itonyo rĩakwa makĩrĩcukĩra mĩtĩ. Ũguo noguo thigari ciekire.
• 25. Na rĩrĩ, hau mũtĩ-inĩ wa Jesu nĩhaarũngiĩ nyina, na mwarĩ wa nyina na nyina, Mariamu mũtumia wa Kileopa, na Mariamu Mũmagidali.
• 26. Nake Jesu aakĩona nyina, na mũrutwo ũrĩa endete, marũngiĩ ho, akĩĩra nyina atĩrĩ, Mũtumia ũyũ, mũrũguo nĩ ũcio!
• 27. Agĩcoka akĩĩra mũrutwo ũcio atĩrĩ, Nĩ ũcio nyũkwa! Na gwata o hĩndĩ ĩo mũrutwo ũcio akĩmũtwara agatũũre gwake.
• 28. Rĩrĩ rĩngĩ, aamenya atĩ rĩu maũndũ mothe nĩ marĩku, nĩ getha ũhoro ũrĩa mwandĩke ũrĩkie gwĩkĩka, Jesu akiuga atĩrĩ, Nĩ’nyotiĩ.
• 29. Na haarĩ na nyanja yaigĩtwo ho ĩiyũire thiki; magĩgĩthecerera rũthanju rũa mũthobi thibanji ĩiyũire thiki, makĩmũtwarĩrĩra kanua-inĩ.
• 30. Nake Jesu aarĩkia gũkunda thiki ũcio, agĩkiuga atĩrĩ, Ũhoro nĩwarĩka; akĩinamia mũtwe, agĩtuĩkana.
• 31. Ningĩ tondũ nĩ mũthenya wa Ihaarĩria, ciimba itigatinde mĩtĩ igũrũ mũthenya wa thabatũ (nĩ gũkorũo thabatũ ĩo yarĩ mũthenya mũnene), Ayahudi magĩkĩhoya Pilato oige andũ acio aambe moinwo magũrũ, ciimba irutwo cieherio.
• 32. Thigari igĩgĩthiĩ ikiunanga ũrĩa wa mbere magũrũ, o na ũrĩa ũngĩ waambĩtwo nake;
• 33. no maakinya harĩ Jesu, mona nĩarĩkĩtie gũkua, magĩtiga kuuna magũrũ make;
• 34. no ningĩ, mũthigari ũmwe akĩmũtheca na itimũ mbaru, nake, o aathecwo, akiura thakame na maĩ.
• 35. Na ũrĩa wonire ũguo nĩwe mũira, naguo ũira wake nĩ wa ma; nake nĩoĩ nĩ ma ekuuga, nĩ getha o na inyuĩ mwĩtĩkie.
• 36. Amu-rĩ, gwekirũo ũguo nĩ getha ũhoro ũhingio, ũrĩa wandĩkĩtwo atĩ, Ndarĩ ihĩndĩ o na rĩmwe angiunwo
• 37. Na ningĩ ũhoro ũngĩ ũkaandĩkwo atĩrĩ, Makarora ũrĩa maathecire.
• 38. Na thutha ũcio Jusufu, wa kũrĩa gwĩtagwo Arimathea, nake aarĩ mũrutwo wa Jesu, no nĩ kũhitha aahithaga nĩ ũndũ wa gwĩtigĩra Ayahudi, ũcio akĩhoya Pilato rũtha arute mwĩrĩ wa Jesu aũtware; nake Pilato akĩmũhe rũtha. Agĩgĩthiĩ agĩtwara mwĩrĩ wake.
• 39. O na Nikodemo nake agĩthiĩ, o ũrĩa waambĩte gũthiĩ kũrĩ we ũtukũ, agĩtwara ndukanio ya manemane na thubiri ĩngĩkinya ta ratiri igana.
• 40. Magĩgĩtwara mwĩrĩ wa Jesu, makĩũthaya na matama ma gatani o hamwe na mĩnyamũ ĩo mĩnungi wega, ta mũtugo wa Ayahudi wa gũthikana.
• 41. Na rĩrĩ, handũ hau aambĩirũo mũtĩ igũrũ haarĩ mũgũnda, na mũgũnda ũcio thĩinĩ hakagĩa na muungu wa gũthikana, mwerũ, ũtarĩ waigwo mũndũ.
• 42. Handũ hau-rĩ, tondũ wa mũthenya ũcio wa Ihaarĩria rĩa Ayahudi (amu muungu ũcio warĩ hakuhĩ), nĩho maakĩigire Jesu.

Home