Go Back

Johana Chapter 15

• 1. NĨ niĩ mũthabibu ũrĩa wa ma, nake Awa nĩwe mũrĩmĩri.
• 2. Rũhonge o ruothe rũĩ thĩinĩ wakwa rũtaciaraga, nĩarũcehaga akarũeheria; na rũrĩa ruothe rũciaraga nĩ gũtheria arũtheragia, nĩguo rũciare mũno.
• 3. Inyuĩ mũrĩ atheru o na rĩu nĩ ũndũ wa ũhoro ũrĩa ndanamũhe.
• 4. Ikaragai thĩinĩ wakwa, na niĩ njikare thĩinĩ wanyu. O ta ũrĩa rũhonge rũtangĩhota gũciara maciaro rũĩ ruiki, rũtegũikara thĩinĩ wa mũthabibu-rĩ, noguo na inyuĩ mũtingĩhota, mũtegũikara thĩinĩ wakwa.
• 5. Nĩ niĩ mũthabibu, nĩ inyuĩ honge; ũrĩa ũikaire thĩinĩ wakwa, na niĩ ngaikara thĩinĩ wake, ũcio nĩaciaraga maciaro maingĩ; amu-rĩ, mũtarĩ hamwe na niĩ mũtirĩ ũndũ mũngĩhota gwĩka
• 6. Mũndũ aaga gũikara thĩinĩ wakwa, nĩ gũteo ateagwo ta rũhonge, akoma; honge icio igakĩũnganio, igaikio mwaki-inĩ, ikahĩa.
• 7. Mwaikara thĩinĩ wakwa, nacio ciugo ciakwa ciaikara thĩinĩ wanyu-rĩ, hoyagai ũndũ o ũrĩa mũkwenda, na nĩmũgekwo guo.
• 8. Ũndũ ũngĩgoocithia Awa no atĩrĩ, no mũciarage maciaro maingĩ, na nĩguo mũgĩtuĩke arutwo akwa.
• 9. O ta ũrĩa Ithe witũ anyendete, noguo ndĩmwendete inyuĩ; ikaragai o na wendo wakwa.
• 10. Mwatũũra mũmenyereire maathani makwa, mũgũikara o na wendo wakwa, o ta ũrĩa niĩ ndũire menyagĩrĩra maathani ma Awa, ngaikara o na wendo wake.
• 11. Ndamwĩra maũndũ macio, nĩ getha mũgĩe na gĩkeno kĩrĩa ndĩ nakĩo, nakĩo gĩkeno kĩanyu gĩkinyanĩre.
• 12. Rĩrĩ nĩrĩo rĩathani rĩakwa, atĩ mwendane inyuene, o ta ũrĩa niĩ ndĩmwendete.
• 13. Gũtirĩ mũndũ wĩ na wendani mũnene kũrĩ ũyũ, atĩ mũndũ arute muoyo wake nĩ ũndũ wa arata ake.
• 14. Inyuĩ mũrĩ arata akwa, mweka maũndũ marĩa ndĩmwathaga.
• 15. Ndigũcoka kũmwĩta ndungata, tondũ ndungata ndĩmenyaga ũrĩa mũmĩathi egwĩka; inyuĩ-rĩ, ndĩmũtuĩte arata, nĩ gũkorũo inyuĩ nĩndĩmũmenyithĩtie maũndũ mothe marĩa njiguĩte harĩ Awa.
• 16. Ti inyuĩ mwa’thurire niĩ, nĩ niĩ ndamũthurire inyuĩ, ngĩmwamũra, nĩ getha mũthiĩ mũciare maciaro, namo maciaro manyu matũũre; nĩguo ũndũ o wothe mũkahoya Ithe witũ na rĩĩtwa rĩakwa, akamũhe.
• 17. Ndĩramwatha ũguo nĩ getha mwendanage.
• 18. Kĩrĩndĩ gĩa gũkũ thĩ kĩamũthũũra, menyai nĩkĩambĩte gũ’thũũra niĩ mbere yanyu.
• 19. Mũngĩrĩ a gũkũ thĩ, arĩa a gũkũ thĩ nĩ kwenda mangĩenda arĩa ao; no tondũ mũtirĩ a gũkũ thĩ, tondũ niĩ nĩ kũmũthura ndamũthurire thĩinĩ wa arĩa a gũkũ thĩ, nĩkĩo kĩrĩndĩ gĩa gũkũ thĩ kĩmũthũire.
• 20. Ririkanagai kiugo kĩrĩa ndĩmwĩrire, atĩ, Ngombo ti nene kwĩ mũmĩathi. Ongorũo niĩ nĩmaa’thĩnirie, inyuĩ na inyuĩ nĩmakamũthĩnia; na ongorũo uuge wakwa nĩmaaũmenyereire, wanyu naguo no makaũmenyerera.
• 21. No kaĩ maũndũ macio mothe makamwĩka nĩ ũndũ wa rĩĩtwa rĩakwa, nĩ ũndũ matimenyaine na ũrĩa wandekirie.
• 22. Itangĩagĩũkire ngĩmahe ũhoro, matingĩagĩire na wĩhia; no rĩu matingĩona kĩĩgwatio nĩ ũndũ wa wĩhia wao.
• 23. Ũrĩa ũ’thũire niĩ, athũire Awa o nake.
• 24. Itangĩagĩĩkire maũndũ kwao matarĩ mekwo nĩ mũndũ ũngĩ, matingĩagĩire na wĩhia; no rĩu kuona nĩmatuonete o na gũthũũra magatũthũũra, niĩ o na Awa ithuerĩ.
• 25. No rĩrĩ, gũtuĩkĩte ũguo nĩ getha ũhoro ũhingio ũrĩa wandĩkĩtwo watho-inĩ wao, atĩrĩ, Nĩmaa’thũũrire tũhũ.
• 26. No rĩrĩ, Mũteithia aarĩkia gũũka, ũrĩa ngarekia oke kũrĩ inyuĩ oimĩte gwĩ Ithe witũ, o we Roho ũrĩa wa ma, ũrĩa uumanaga na Ithe witũ, we nĩagatuĩka mũira wakwa;
• 27. O na inyuĩ mũrĩ o aira, nĩ ũndũ mũtũire na niĩ gwata kĩambĩrĩria.

Home