Go Back

Luka Chapter 5

• 1. NA gũgĩkinya atĩrĩ, hĩndĩ ĩmwe rĩrĩa kĩrĩndĩ kĩamũhatĩkaga gĩkĩigua Ũhoro wa Ngai-rĩ, Jesu aakorirũo arũgamĩte rũtere-inĩ rũa iria rĩa Genesareti;
• 2. nake akĩona marikabu igĩrĩ ciikaire rũtere-inĩ rũa iria rĩu; no atahi a ciũngũyũ nĩmoimĩte marikabu-inĩ, na nĩ gũthambia maathambagia ngara ciao cia ndigi.
• 3. Nake agĩtonya marikabu ĩmwe yarĩ ya Simoni, akĩmũthaitha amĩtwaratware hanini, yume rũtere-inĩ. Agĩcoka agĩikara thĩ, akĩruta kĩrĩndĩ ũhoro, arĩ marikabu-inĩ.
• 4. Na aatiga kwaria, akĩĩra Simoni atĩrĩ, Ta twaratwara marikabu harĩa hariku, mũikũrũkie ngara cianyu cia ndigi iria-inĩ mũtahe ciũngũyũ.
• 5. Nake Simoni akĩmũcokeria akĩmwĩra atĩrĩ, Mũnene witũ, nĩtũrutire wĩra wa hinya ũtukũ wothe, na tũtinagwatia kĩndũ o na kĩ: no rĩrĩ, nĩ ũndũ wa kiugo kĩu gĩaku nĩngũikũrũkia ngara iria cia ndigi.
• 6. Nao maarĩkia gwĩka ũguo, magĩtaha ciũngũyũ nyingĩ ma; nacio ngara ciao cia ndigi igĩtuĩkatuĩka;
• 7. nao makĩheneria arĩa maarutithanagia wĩra nao, marĩ marikabu-inĩ ĩrĩa ĩngĩ, atĩ moke mamateithie. Magĩgĩũka makĩiyũria marikabu icio cierĩ ki, nacio ikĩenda kũhorokera maĩ-inĩ.
• 8. Nake Simoni Petero ona ũguo, akĩinamĩrĩra maru-inĩ ma Jesu, akiuga atĩrĩ, Ta njeherera, Mwathani, nĩ gũkorũo ndĩ mũndũ mwĩhia.
• 9. Nĩ ũndũ we, o na andũ othe arĩa maarĩ hamwe nake, nĩmaagĩĩtwo nĩ kĩgeganio nĩ ũndũ wa ciũngũyũ icio nyingĩ maatahĩte;
• 10. o na gwata Jakubu na Johana, ariũ a Zebedi, arĩa maarutithanagia wĩra na Simoni. Nake Jesu akĩĩra Simoni atĩrĩ, Tiga gwĩtigĩra, nĩ ũndũ kuuma rĩu nĩũrĩtahaga andũ.
• 11. Nao maarĩkia gũtwara marikabu ciao rũtere-inĩ, magĩtiga indo ciao ciothe, makĩmũrũmĩrĩra.
• 12. Na gũgĩkinya atĩrĩ, hĩndĩ ĩrĩa aarĩ itũũra rĩmwe, hagĩkorũo harĩ mũndũ warĩ na mangũ mwĩrĩ wothe: nake ona Jesu, agĩĩturumithia ũthiũ thĩ, akĩmũthaitha akiuga atĩrĩ, Mwathani, ũngĩenda-rĩ, wahota kũ’honia ’there.
• 13. Nake agĩtambũrũkia guoko akĩmũhutia, akiuga atĩrĩ, Nĩngwenda; honio ũthere. Na kahinda o kau mangũ makĩmũtiga, agĩthera.
• 14. Nake agĩcoka akĩmwatha atĩ ndakere mũndũ o na ũmwe: no kũmwĩra aamwĩrire atĩrĩ, Thiĩ ũkeyonanie kũrĩ mũthĩnjĩri-Ngai, na ũkarutĩre Ngai indo cia ũguo watherio, o ta ũrĩa Musa aathanire, ituĩke kĩmenyithia kũrĩ andũ.
• 15. No rĩrĩ, ngumo yake ĩgĩkĩria gũtambũka mũno: nao andũ, kĩrĩndĩ kĩingĩ ma, makĩũngana maigue ũhoro, na mahonio mĩrimũ yao.
• 16. Nowe akĩehera hau, agĩthiĩ werũ-inĩ ahoyagĩre Ngai kuo.
• 17. Na matukũ macio gũgĩkinya atĩ mũthĩ ũmwe nĩ kũrutana aarutanaga; na rĩrĩ, hagĩkorũo he Afarisai na arutani a watho wa Ngai, arĩa moimĩte matũũra mothe ma Galili na Judea o na Jerusalemu, maikaire thĩ o hakuhĩ na hau aarĩ: naguo hinya wa Mwathani warĩ nake, nĩguo ahonanie.
• 18. Na rĩrĩ, andũ makĩrehe mũndũ warĩ na mũrimũ wa gũkua ciĩga akuuĩtwo na gĩtanda: na magĩcaria ha kũmũtonyeria thĩinĩ, mamũige o harĩ we.
• 19. Nao maaga ũrĩa mangĩmũtonyia nĩ ũndũ wa kĩhatĩkano kĩa andũ, makĩhaica nyũmba igũrũ, makĩmũikũrũkia na gĩtanda gĩake o gatagatĩ ka andũ, matharĩtie matubarĩ, makĩmũiga o harĩ Jesu.
• 20. Nake ona ũrĩa metĩkĩtie, akiuga atĩrĩ, Mũndũ ũyũ, nĩwoherũo mehia maku.
• 21. Nao aandĩki-marũa na Afarisai magĩitĩka gwĩciria, makiuga atĩrĩ, Kaĩ ũyũ arĩ ũ, ũkũruma Ngai? Nũ ũngĩhota kuohanĩra mehia, tiga o Ngai we wiki?
• 22. Nowe Jesu akĩmenya meciria mao, akĩmacokeria akĩmera atĩrĩ, mũgwĩciria atĩa ngoro-inĩ cianyu?
• 23. Ũndũ ũrĩa ũtarĩ hinya nĩ ũrĩkũ? Nĩ kwĩra mũndũ, Nĩwoherũo mehia maku, kana nĩ kũmwĩra, Ũkĩra, wĩtware?
• 24. No rĩrĩ, nĩ getha mũmenye atĩ Mũrũ wa Mũndũ arĩ na hinya gũkũ thĩ wa kuohanĩra mehia (agĩcoka akĩĩra mũndũ ũcio warĩ na mũrimũ wa gũkua ciĩga), Ndakwĩra atĩrĩ, Ũkĩra, woe gĩtanda gĩaku, ũinũke gwaku.
• 25. Na kahinda o kau agĩũkĩra o hau maarĩ, akĩoya kĩrĩa aakomeire, akĩinũka gwake akĩgoocaga Ngai.
• 26. Nao othe makĩgwatwo nĩ kĩgeganio makĩgooca Ngai; magĩkĩigua guoya ma, makiuga atĩrĩ, Kaĩ ũmũthĩ nĩtuonete maũndũ marĩa tũtarĩ twona-ĩ!
• 27. Na rĩrĩ, maũndũ macio maathira, akiuma hau aarĩ, akĩona mũndũ warĩ mwĩtia mbia cia igoti wetagwo Lawii, aikaire thĩ handũ harĩa haarutagĩrũo mbia cia igoti, akĩmwĩra atĩrĩ, Nũmĩrĩra.
• 28. Nake agĩtiga indo ciake ciothe, agĩũkĩra akĩmũrũmĩrĩra.
• 29. Nake Lawii akĩmũrugĩra iruga rĩnene nyũmba-inĩ yake: na nĩhaarĩ andũ gĩkundi kĩnene, etia mbia cia igoti o na andũ angĩ, maikaire thĩ makĩrĩa irio hamwe nao.
• 30. Nao Afarisai o na aandĩki-marũa ao magĩtetia arutwo ake, makĩmoria atĩrĩ, Nĩ kĩ gĩtũmaga mũrĩanĩre na etia mbia cia igoti o na andũ ehia, na mũnyuanĩre nao?
• 31. Nake Jesu akĩmacokeria akĩmera atĩrĩ, Andũ arĩa agima matibataragio nĩ mũthondekani, no arĩa arũaru.
• 32. Ndiokire gwĩta andũ arĩa athingu, no arĩa ehia, nĩ getha merire.
• 33. Nao makĩmwĩra atĩrĩ, Arutwo a Johana nĩmehingaga kũrĩa irio hĩndĩ nyingĩ, magathaithaga Ngai; nao arutwo a Afarisai nĩmekaga o ũguo; no arutwo aku-rĩ, nĩmarĩaga na makanyuaga.
• 34. Nake Jesu akĩmera atĩrĩ, Githĩ mwakĩhota gũtũma andũ a kĩhikanio-inĩ mehinge kũrĩa irio rĩrĩa mũhikania arĩ hamwe nao?
• 35. Ĩndĩ matukũ nĩmagoka rĩrĩa mũhikania agathengio kũrĩ o, na hĩndĩ ĩo nĩmakehinga kũrĩa irio, o matukũ macio.
• 36. Ningĩ akĩmera na ngerekano atĩrĩ, Gũtirĩ mũndũ ũngĩtehũra nguo njerũ yume ndamĩ, arate nguo ngũrũ nayo; nĩ ũndũ angĩĩka ũguo, aakorũo atembũrĩte ĩrĩa njerũ, na ningĩ ndamĩ ĩo ya nguo njerũ na nguo ĩrĩa ngũrũ itingĩaganĩrĩra.
• 37. Na gũtirĩ mũndũ ũngĩĩkĩra ndibei ya mũhihano mondo ngũrũ; nĩ gũkorũo angĩmĩĩkĩra, ndibei ĩo ya mũhihano yaya gũtembũra mondo icio, nayo ĩitĩke thĩ, nacio mondo ciũre.
• 38. No rĩrĩ, ndibei ya mũhihano yagĩrĩirũo nĩ gwĩkĩrũo mondo njerũ.
• 39. Na gũtirĩ mũndũ wananyua ndibei ngũrũ ũngĩcoka kwenda ĩrĩa ya mũhihano: tondũ nĩekuuga atĩrĩ, ĩrĩa ngũrũ nĩyo njega.

Home