Go Back

Luka Chapter 21

• 1. NAKE agĩtiira maitho, akĩona andũ arĩa itonga magĩĩkĩra iheo ciao harĩa hekagĩrũo kĩgĩĩna.
• 2. Agĩkĩona mũtumia wa ndigwa, warĩ mũthĩni, agĩĩkĩra tũthendi twĩrĩ o ho thĩinĩ.
• 3. Akiuga atĩrĩ, Ngũmwĩra atĩrĩ na ma, atĩ mũtumia ũyũ wa ndigwa mũthĩni nĩekĩra nyingĩ gũkĩra arĩa angĩ othe:
• 4. nĩ gũkorũo acio othe nĩmekĩrire mbia ciao mĩhothi-inĩ nĩ ũrĩa maingĩhĩtie: no ũcio-rĩ, nĩekĩra indo ciake iria oima nacio ciothe, nĩ ũrĩa akĩarĩte.
• 5. Na rĩrĩa andũ amwe maaragia ũhoro wa hekarũ, ũrĩa yagemetio na mahiga mathaka, na iheo iria andũ maarutĩire Ngai, akiuga atĩrĩ,
• 6. Ha ũhoro wa indo ici mũkuona-rĩ, matukũ nĩmagoka rĩrĩa hatagatigario ihiga o na rĩmwe rĩikarĩte igũrũ rĩa rĩrĩa rĩngĩ, rĩtagũithĩtio.
• 7. Nao makĩmũũria atĩrĩ, Mũrutani, rĩrĩa maũndũ macio magagĩkinya nĩ rĩ? Na kĩmenyithia kĩa rĩrĩa maũndũ macio magatua gũkinya nĩ kĩrĩkũ?
• 8. Nake akiuga atĩrĩ, Wĩmenyagĩrĩrei mũtikanahĩtithio: nĩ gũkorũo andũ aingĩ nĩmagoka magĩĩtuaga rĩĩtwa rĩakwa, makiugaga atĩrĩ, Niĩ nĩ niĩ we: na makoiga atĩrĩ, Ihinda nĩrĩkiriĩ gũkinya: mũtikanamarũmĩrĩre.
• 9. Na rĩrĩa mũkaigua ũhoro wa mbaara, na wa ngũĩ, mũtikanetigĩre: nĩ gũkorũo maũndũ macio matirĩ hingo matagakinya o mbere; ĩndĩ ithirĩro ti rĩa ihinda o ro rĩu.
• 10. Hĩndĩ ĩo akĩmera atĩrĩ, O rũrĩrĩ nĩrũgokĩrĩra rũrĩa rũngĩ, na o ũthamaki ũũkĩrĩre ũrĩa ũngĩ:
• 11. na nĩgũkagĩa ithingithia nene; o na kũndũ na kũndũ nĩgũkagĩa na ng’aragu, o na mĩrimũ mĩũru ĩrĩa ĩrehage mũthiro; na nĩgũkagĩa na imakania cia gũtua andũ nda, o na ciama nene ciumĩte matu-inĩ.
• 12. No maũndũ macio matanakinya-rĩ, andũ nĩmakamũnyita na mamũnyarire, makĩmũneanaga mũtwarũo thunagogi-inĩ na korokoro-inĩ; na nĩmũgatwarũo kũrĩ athamaki na aathani nĩ ũndũ wa rĩĩtwa rĩakwa.
• 13. Narĩo ihinda rĩu rĩgatuĩka ihinda rĩanyu rĩa ũira.
• 14. Hakĩrĩ ũguo-rĩ, tuai na ngoro cianyu atĩ mũtigeciria o mbere ũrĩa mũgacokia ũhoro:
• 15. nĩ gũkorũo niĩ nĩngamũhe mĩario o na ũũgĩ, iria thũ cianyu ciothe itakahota gwĩtiiria kana gũkararia.
• 16. No rĩrĩ, mũkaneanwo nĩ andũ, o gwata aciari anyu, o na arĩa mũrĩ a nyina ũmwe nao, na arĩa a mĩhĩrĩga yanyu, o na arata anyu; na amwe anyu nĩmakamoragithia.
• 17. Na nĩmũgathũũrũo nĩ andũ othe nĩ ũndũ wa rĩĩtwa rĩakwa.
• 18. No rĩrĩ, o na rũcuĩrĩ rũanyu rũa mũtwe, gũtirĩ rũkora.
• 19. Nĩ gũkirĩrĩria kwanyu gũgatũma mũhonokie mĩoyo yanyu.
• 20. No rĩrĩ, rĩrĩa mũkona Jerusalemu kũrigicĩirio nĩ ita cia mbaara, hĩndĩ ĩo menyai atĩ gũthuthwo gwakuo kwĩ hakuhĩ.
• 21. Hingo ĩo arĩa marĩ Judea nĩmorĩre irĩma-inĩ; nao arĩa marĩ itũũra thĩinĩ, nĩmoinĩke methiĩre; nao arĩa magakorũo marĩ mĩgũnda-inĩ matikarĩtonye.
• 22. Nĩ gũkorũo matukũ macio nĩmo ma kũrĩhanĩrio, nĩ getha maũndũ mothe marĩa maandĩkĩtwo mahingio.
• 23. Nao arĩa magakorũo marĩ na mahu, o na arĩa magakorũo makĩongithia twana matukũ macio, kaĩ nĩmakagĩa na haaro ĩ! Nĩ gũkorũo nĩgũkagĩa kĩnyarirano kĩnene bũrũri ũyũ, o na marakara kũrĩ andũ aya.
• 24. Nao nĩmakoragwo na hiũ cia mbaara, na matahwo matwarũo mabũrũri-inĩ ma ndũrĩrĩ ciothe: narĩo itũũra rĩa Jerusalemu nĩrĩkarangĩrĩrio nĩ andũ a Ndũrĩrĩ, o kinya rĩrĩa mahinda marĩa Ndũrĩrĩ icio ituĩrĩirũo makahingio.
• 25. Na nĩgũkagĩa imenyithia riũa-inĩ, na mweri-inĩ, na njata-inĩ; nakuo gũkũ thĩ ndũrĩrĩ nĩikanyarirĩka, ikĩrigagwo nĩ ũrĩa iria rĩrĩa inene rĩkarurumaga, rĩĩ na makũmbĩ manene.
• 26. Nao andũ nĩmakaringagwo nĩ iringi nĩ ũndũ wa gũtubunyĩka, o magĩetagĩrĩra maũndũ marĩa magakinya gũkũ thĩ; nĩ gũkorũo mahinya ma kũrĩa igũrũ nĩmakenyenyio.
• 27. Na hĩndĩ ĩo nĩguo makona Mũrũ wa Mũndũ agĩũka na itu, arĩ na hinya na riri mũingĩ.
• 28. No rĩrĩ, hĩndĩ ĩrĩa maũndũ macio makarika gũkinya-rĩ, rorai na igũrũ, na mũtiire mĩtwe yanyu; nĩ gũkorũo hingo yanyu ya gũkũũrũo mĩĩkuhĩhiirie.
• 29. Nake akĩmera ũhoro na ngerekano atĩrĩ: Ta rorai mũkũyũ na mĩtĩ ĩrĩa ĩngĩ yothe.
• 30. Yakorũo ĩthundũrĩte-rĩ, nĩmuonaga mũkamenya inyuĩ ene atĩ rĩu ihinda rĩa riũa rĩĩ hakuhĩ.
• 31. O ũguo taguo na inyuĩ, mwona maũndũ macio magĩkinya, menyai atĩ ũthamaki wa Ngai wĩ hakuhĩ.
• 32. Ngũmwĩra atĩrĩ na ma, Rũciaro rũrũ rũtigathira o nginya rĩrĩa maũndũ mothe magakorũo mahingĩtio.
• 33. Igũrũ na thĩ nĩgũgathira: no ciugo ciakwa itirĩ hĩndĩ igathira.
• 34. Ĩndĩ wĩmenyagĩrĩrei arĩ inyuĩ, nĩ getha ngoro cianyu itikanakorũo ititikithĩtio ũrĩi, na ũrĩu, na mĩhang’o ya muoyo ũyũ, naguo mũthenya ũcio ũmũhobanĩrie narua ta arĩ mũtego:
• 35. nĩ gũkorũo nĩũkahobanĩria andũ arĩa othe magakorũo matũire gũkũ thĩ guothe.
• 36. No rĩrĩ, ikaragai mwĩiguĩte mahinda mothe, mũkĩhoyaga Ngai nĩ getha mũkahota kũhonoka maũndũ-inĩ macio mothe magoka, na mũhote kũrũgama mbere ya Mũrũ wa Mũndũ.
• 37. Na mĩthenya yothe aatindaga akĩrutana hekarũ thĩinĩ, na o ũtukũ akoimaga itũũra, agathiĩ kũraara kĩrĩma-inĩ kĩrĩa gĩĩtagwo kĩa Mĩtamaiyũ.
• 38. Nao andũ othe makarokaga harĩ we rũcinĩ tene, o hau hekarũ-inĩ, mamũigue.

Home