Go Back

Luka Chapter 2

• 1. NA matukũ macio gũgĩĩkwo atĩrĩ, gũgĩathanwo nĩ Kaisari Augusuto atĩ andũ a mabũrũri mothe makeandĩkithie.
• 2. Nakuo nĩkuo kwandĩkwo kũrĩa kwa mbere kwandĩkirũo rĩrĩa Kuirinio aathanaga Suriata.
• 3. Nao andũ othe magĩthiĩ kwĩandĩkithia, o mũndũ itũũra rĩake kĩũmbe.
• 4. Nake Jusufu akiuma Galili, o itũũra rĩa Nazarethi, agĩthiĩ Judea, o itũũra rĩrĩa rĩa Daudi rĩĩtagwo Bethi-lehemu, nĩ ũndũ we aarĩ wa nyũmba o na wa mbarĩ ya Daudi;
• 5. nake aathiire kũu nĩ getha makeandĩkithie hamwe na Mariamu mũirĩtu ũrĩa orĩtie, nake aarĩ mũritũ.
• 6. Na gũgĩkinya atĩrĩ, hĩndĩ ĩrĩa maaikarĩte kũu, mũthenya wake wa gũciara ũgĩkinya.
• 7. Nake akĩrigithatha kahĩĩ, agĩkarigicĩria tama wa ciana, agĩgakomia mũharatĩ ũrĩa warĩagĩrũo nĩ ũhiũ, tondũ nĩmaagĩte ha kũraara nyũmba ya ageni thĩinĩ.
• 8. Nakuo kũu bũrũri ũcio nĩkwarĩ arĩithi maaikarĩte werũ-inĩ, magaikaragia ũhiũ wao ũtukũ.
• 9. Nao makiumĩrĩrũo nĩ mũraika wa Mwathani, o na riri wa Mwathani ũgĩkenga igũrũ rĩao mĩena-inĩ yothe; magĩgĩĩtigĩra mũno.
• 10. Nake mũraika ũcio akĩmera atĩrĩ, Tigai gwĩtigĩra; tondũ rĩrĩ, nĩndamũrehere ũhoro mwega wa gĩkeno kĩnene ũrĩa ũgatuĩka wa andũ othe:
• 11. nĩ gũkorũo ũmũthĩ nĩmũciarĩirũo Mũhonokia o itũũra-inĩ rĩa Daudi, nake nĩwe Kristo ũrĩa Mwathani.
• 12. Na rĩrĩ, kĩrĩa kĩrĩmũmenyithia ũndũ ũcio nĩ gĩkĩ; nĩmũrĩona gakenge karigicĩirio tama wa ciana, na gakometio mũharatĩ-inĩ.
• 13. Na o kahinda kau-rĩ, hamwe na mũraika ũcio hakĩonwo haagĩa o rĩmwe araika aingĩ a Igũrũ gĩtutu kĩnene, makĩgooca Ngai makiugaga atĩrĩ,
• 14. Ngai arokumagio Igũrũ o Igũrũ, Naguo thayũ ũrogĩa gũkũ thĩ kũrĩ andũ arĩa akenagĩra.
• 15. Na gũgĩkinya atĩrĩ, rĩrĩa araika maatiganire nao macoke Igũrũ, arĩithi acio makĩĩrana atĩrĩ, Thiĩi tũthiĩ o rĩu tũkinye o Bethi-lehemu, tũkone ũhoro ũyũ ũkinyĩte, ũcio Mwathani atũmenyithĩtie.
• 16. Nao magĩthiĩ mahiũhĩte, magĩkora Mariamu na Jusufu, o erĩ, o na gakenge kau gakometio mũharatĩ-inĩ.
• 17. Na maakona, makĩheana ũhoro wa ciugo iria maarĩirio ũndũ wa kaana kau.
• 18. Nao andũ othe arĩa maaũiguire makĩgega nĩ ũndũ wa maũndũ marĩa maarĩirio nĩ arĩithi acio.
• 19. Nowe Mariamu agĩikara na maũndũ macio mothe, akamacũranagia na ngoro yake.
• 20. Nao arĩithi acio makĩhũndũka, makĩgoocaga Ngai na makĩmũkumagia nĩ ũndũ wa maũndũ marĩa mothe maaiguire na marĩa monire, o ta ũrĩa merĩtwo.
• 21. Na matukũ manana maahinga ma kũruithia kaana kau, gagĩtuwo JESU, o rĩĩtwa rĩrĩa gaatuirũo nĩ mũraika o mbere, gatarĩ karagĩwo ihu.
• 22. Na matukũ mao ma gũtherio thutha wa gũciara maahinga, o ta ũrĩa gwaathanirũo nĩ Musa-rĩ, makĩambata Jerusalemu magakanengere Mwathani,
• 23. (O ta ũrĩa kwandĩkĩtwo Maandĩko-inĩ ma irĩra cia Mwathani atĩrĩ, O kahĩĩ karĩa gakarigithathwo gagatuwo kaana gatheru ka Mwathani)
• 24. na ningĩ marute ihaki o ta ũrĩa gũtuĩtwo Maandĩko-inĩ ma irĩra cia Mwathani atĩrĩ, Nĩ ndirahũgĩ igĩrĩ, kana tũtutura twĩrĩ.
• 25. Na rĩrĩ, nĩkwarĩ mũndũ watũire Jerusalemu wetagwo Simeoni; nake aarĩ mũthingu na mũigua-Ngai, na nĩaatanyĩte hĩndĩ ĩrĩa Aisiraeli makanyamarũrũo: na Roho Mũtheru aarĩ hamwe nake.
• 26. Na mũndũ ũcio nĩaaguũrĩirio nĩ Roho Mũtheru atĩ ndagakua atonete Kristo ũrĩa wa Mwathani.
• 27. Nake agĩtonya hekarũ ya Ngai arĩ na Roho Mũtheru: na rĩrĩa aciari a kaana kau, Jesu, maagatwarire hekarũ ya Ngai thĩinĩ, nĩ getha magageke kũringana na mũtugo wa watho-rĩ,
• 28. hĩndĩ ĩo Simeoni agĩkaiyũkia moko-inĩ make, akĩgatha Ngai akiuga atĩrĩ,
• 29. Rĩu Mwathani nĩ hĩndĩ ũkũnjugĩra ũhoro, niĩ ngombo yaku, ’thiĩ na thayũ o ta ũrĩa wanjĩrire;
• 30. Nĩ gũkorũo maitho makwa nĩmonete ũhonokio waku,
• 31. Ũrĩa wathondekire mbere ya irĩndĩ ciothe;
• 32. Nĩguo ũtheri wa kũguũrĩrio andũ a Ndũrĩrĩ, O na riri wa andũ aku Aisiraeli.
• 33. Nao ithe na nyina nĩmaagegaga nĩ ũndũ wa maũndũ marĩa maaririo nĩ ũndũ wako;
• 34. nake Simeoni akĩmarathima, akĩĩra Mariamu, nyina, Atĩrĩrĩ, kaana gaka nĩgatuĩtwo ga kũgũithia o na gũũkĩria andũ aingĩ a Isiraeli; ningĩ gatuĩke kĩmenyithia kĩrĩa kĩrĩtendagwo;
• 35. o na rĩrĩ, rũhiũ rũa mbaara nĩrũgagũtũrĩkia ngoro wee mwene, nĩguo meciria ma ngoro nyingĩ maguũke.
• 36. Na nĩkwarĩ mũtumia mũnabii wetagwo Anna, mwarĩ wa Fanueli wa mũhĩrĩga wa Asheri, (nake aarĩ mũkũrũ mũno; aaikarire na mũthuriwe mĩaka mũgwanja kuuma aahika,
• 37. na nĩaatũire arĩ wa ndigwa mĩaka ĩngĩ mĩrongo ĩnana na ĩna); mũtumia ũcio rĩ, ndoimaga hekarũ, no aatũire aturagĩria Ngai ndu akamũhoyaga ũtukũ na mũthenya akĩĩhingaga kũrĩa irio, na akĩmũthaithaga.
• 38. Nake agĩkinya o ro hĩndĩ ĩo, akĩgatha Ngai, akĩheana ũhoro wa kaana kau kũrĩ arĩa othe maatũire matanyaga hĩndĩ ĩrĩa Jerusalemu gũgakũũrũo.
• 39. Nao maahingia maũndũ marĩa mothe maathanĩtwo irĩra-inĩ cia Mwathani, magĩcoka Galili, makĩinũka itũũra rĩao rĩa Nazarethi.
• 40. Nako kaana kau gagĩkũra, gakĩgĩa na hinya, gakĩiyũrũo nĩ ũũgĩ; naguo Wega wa Ngai watũire nako.
• 41. Nao aciari ake nĩmaathiaga Jerusalemu, o mwaka, hĩndĩ ya gĩathĩ kĩa Bathaka.
• 42. Na rĩrĩa Jesu aahingirie mĩaka ikũmi na ĩĩrĩ, makĩambata nake gĩathĩ-inĩ kĩu kũringana na mũtugo.
• 43. Nao maanina matukũ ma gĩathĩ, rĩrĩa maainũkaga kwao, kamwana kau, Jesu, gagĩikara kũu Jerusalemu; nao aciari ake matimenye ũguo.
• 44. Nao magĩthiĩ rũgendo rũa mũthenya mũgima, makĩĩgeragĩria atĩ e gĩkundi-inĩ kĩa andũ a kwao; thutha wa ũguo makĩmũcaria kũrĩ andũ a mũhĩrĩga wao o na arĩa maamenyanĩte nao:
• 45. nao maamwaga-rĩ, makĩhũndũka Jerusalemu, makĩmũcaragia.
• 46. Na gũgĩkinya atĩrĩ, matukũ matatũ maathira, makĩmũkora hekarũ ya Ngai thĩinĩ aikarĩte thĩ kũrĩ arutani, agĩthikagĩrĩria ũrĩa moigaga, o na akĩmoragia maũndũ:
• 47. na andũ arĩa othe maamũiguaga makĩgega nĩ ũndũ wa ũũgĩ wake, o na ũrĩa aacokagia ũhoro orio maũndũ.
• 48. Nao aciari ake maamuona makĩgega mũno; nake nyina akĩmwĩra atĩrĩ, Mũrũ wakwa, ũtwĩkĩte ũũ nĩkĩ? Rĩu rĩ, ithuĩ na thoguo tũgũcarĩtie twĩ na kĩeha ma.
• 49. Nake akĩmoria atĩrĩ, Nĩ kĩ gĩtũmĩte mũnjarie? Kaĩ mũtoĩ atĩ ndirĩ hingo itarĩkoragwo ndĩ nyũmba ya Baba?
• 50. Nao matiamenyire gĩtũmi gĩa ciugo icio aamerire.
• 51. Nake agĩtherera nao, magĩkinya Nazarethi; na nĩaathĩkaga nĩo: nake nyina nĩaaigaga mohoro macio mothe ngoro-inĩ yake.
• 52. Nake Jesu agĩkũra, akĩũhĩgaga na akĩnenehaga, akĩendagwo nĩ Ngai o na andũ.

Home