Go Back

Mariko Chapter 1

• 1. KĨAMBĨRĨRIA kĩa Ũhoro-ũrĩa-Mwega wa Jesu Kristo, Mũrũ wa Ngai.
• 2. O ta ũrĩa ũhoro wandĩkĩtwo marũa-inĩ ma Isaia ũrĩa mũnabii, atĩrĩ, Onei, ngũtũma mũrekio wakwa athiĩ mbere yaku, Athondeke kĩng’aratua gĩaku wega;
• 3. Mũgambo wa mũndũ ũkwanĩrĩra werũ-inĩ, akoiga, Thondekai kĩng’aratua kĩa Mwathani, Rũngariani njĩra ciake;
• 4. noguo Johana okire, ũrĩa wabatithanagĩria werũ-inĩ, na akaheanaga ũhoro atĩ kũbatithagio arĩa merirĩte nĩguo marekerũo mehia mao.
• 5. Na kĩrĩndĩ gĩothe kĩa Judea kĩoimagaraga gĩgathiĩ kũrĩ we, o na andũ othe a Jerusalemu, na makabatithio nĩwe thĩinĩ wa rũũĩ rũa Jorodani, makiumbũraga mehia mao.
• 6. Nake Johana nĩehumbaga nguo ya guoya wa ngamĩra, na akeoha kamũkwa njohero, na akarĩaga ngigĩ na ũũkĩ wa hako.
• 7. Na nĩaaheanaga ũhoro, akoiga atĩrĩ, Nĩkũrĩ ũgũũka thutha wakwa ũrĩa wĩ na hinya kũrĩ niĩ, itaigaine niĩ nyinamĩrĩre njohore mĩkwa ya iratũ ciake.
• 8. Niĩ ndĩmũbatithĩtie na maĩ; ũcio akamũbatithia na Roho Mũtheru.
• 9. Na nĩgwekirũo atĩrĩ, matukũ macio, Jesu agĩũka oimĩte Nazarethi, itũũra rĩa Galili, akĩbatithio nĩ Johana thĩinĩ wa rũũĩ rũa Jorodani.
• 10. Na kahinda o kau oimĩra maĩ-inĩ, akĩona Igũrũ rĩemũkĩte, na akĩona Roho akĩmũikũrũkĩrĩra atariĩ ta ndutura:
• 11. ningĩ mũgambo ũkiuma Igũrũ ũkiuga atĩrĩ, Wee nĩwe Mũrũ wakwa nyendete mũno, nĩngenaga nĩ ũndũ waku.
• 12. Ihinda o rĩu Roho akĩmũtwara werũ-inĩ na hinya.
• 13. Akĩnina matukũ mĩrongo ĩna kũu werũ-inĩ akĩgeragio nĩ Shaitani; na aarĩ hamwe na nyamũ cia gĩthaka-inĩ; nao araika nĩmaamũtungatagĩra.
• 14. Na rĩrĩ, Johana aarĩkia kũnyitwo, thutha ũcio Jesu agĩkinya bũrũri wa Galili akiumbũraga Ũhoro-ũrĩa-Mwega wa Ngai, akiugaga atĩrĩ,
• 15. Hingo nĩĩhingĩte, naguo ũthamaki wa Ngai nĩũkuhĩhĩirie: wĩrirei, na mwĩtĩkie Ũhoro-ũyũ-Mwega.
• 16. Na rĩrĩa aathiaga na rũtere rũa iria rĩa Galili nĩonire Simoni, na Andarea, nĩwe mũrũ wa nyina na Simoni, akĩmona makĩrekia rũgara rũnene rũa ndigi iria-inĩ; amu maarĩ atahi a ciũngũyũ.
• 17. Nake Jesu akĩmera atĩrĩ, Ũkai mũnyume thutha, na nĩngatũma mũtuĩke atahi a andũ.
• 18. Nao magĩtiga ngara ciao cia ndigi o ihinda o rĩu, makĩmuuma thutha.
• 19. Ningĩ aathianga hanini, akĩona Jakubu wa Zebedi na mũrũ wa nyina wetagwo Johana, marĩ marikabu thĩinĩ o nao, magĩthondeka ngara ciao harĩa ciatuĩkĩte.
• 20. O rĩmwe akĩmeta: nao magĩtiga ithe wao Zebedi kũu marikabu thĩinĩ hamwe na ndungata iria cia wĩra, makĩmuuma thutha.
• 21. Magĩthiĩ Kaperinaumu, nake o mũthenya wa thabatũ wakinya agĩtonya thunagogi akĩgwata kũruta andũ ũhoro.
• 22. Nao makĩgega nĩ ũhoro ũrĩa aarutanaga: tondũ aamarutaga ta mũndũ wathanaga, na ti ta aandĩki-marũa.
• 23. Na ihinda o rĩu kũu thunagogi yao gũgĩkorũo kwĩ na mũndũ wĩ na ngoma thũku; nake akĩgũũthũka, akiuga,
• 24. Ũhoro witũ nawe ũkĩrĩ ũrĩkũ, wee Jesu wa Nazarethi? nĩũũkĩte gũtũnina? nĩngũũĩ, nĩwe ũrĩa Mũtheru wa Ngai.
• 25. Nake Jesu akĩmĩkaania, akiuga, Kira, na uume thĩinĩ wake.
• 26. Nayo ngoma ĩo thũku, yamũthiora na yakaya na mũgambo mũnene, ĩkiuma thĩinĩ wake.
• 27. Andũ othe magĩkĩgega, magĩitĩka kũũrania atĩrĩ, Ũguo nĩ atĩa-i? nĩ ũhoro mwerũ-ni ũyũ! ngoma thũku o nacio aciathaga na hinya, na ikamũigua.
• 28. Nayo ngumo yake o hingo ĩo ĩkĩhunja guothe, ĩkĩiyũra bũrũri wothe wa Galili mwena ũcio.
• 29. Ningĩ o hĩndĩ ĩo moima thunagogi, magĩthiĩ na Jakubu na Johana magĩtonya nyũmba ya Simoni na Andarea.
• 30. Na rĩrĩ, nyina wa mũtumia wa Simoni agĩkorũo akomete e mũrũaru mũrimũ wa kũhiũha mwĩrĩ makĩhe Jesu ũhoro wake o oka;
• 31. nake agĩthiĩ akĩmũnyita guoko, akĩmũũkĩria; naguo mũrimũ ũkĩmũtiga, agĩitĩka kũmatungatĩra.
• 32. Ningĩ hwaĩ-inĩ, riũa rĩgĩthũa, akĩreherũo arĩa maarĩ arũaru othe, o na arĩa maarĩ na ndaimono.
• 33. Na andũ othe a itũũra makĩũngana hau mũromo-inĩ wa nyũmba.
• 34. Nake akĩhonia andũ aingĩ arĩa maarũarĩte mĩrimũ mĩthemba mĩingĩ, o na ndaimono nacio nyingĩ agĩtũma ciume andũ; na ndangĩĩtĩkĩria ndaimono ciarie, tondũ nĩciamũũĩ.
• 35. Ningĩ rũcinĩ, gũtigairie ihinda inene gũkĩe, agĩũkĩra akiumagara, agĩthiĩ handũ hataathiagwo nĩ andũ, akĩhoera Ngai ho.
• 36. Nake Simoni na arĩa angĩ maarĩ nao makĩmũkinyĩra;
• 37. makĩmũkora, makĩmwĩra atĩrĩ, Nĩũracario nĩ andũ othe.
• 38. Nake akĩmera atĩrĩrĩ, Nĩtuume gũkũ tũthiĩ mĩciĩ ĩrĩa ĩngĩ, ngaheane ũhoro o nakuo; amu nĩkĩo ndokire.
• 39. Agĩthiĩ agĩtonyaga thunagogi ciao kũu Galili guothe, akĩheanaga ũhoro na akĩrutaga andũ ndaimono.
• 40. Na kwĩ mũndũ wamũkorire warũarĩte mangũ; agĩũka akĩmũthaithaga, akĩmũturĩria ndu, akĩmwĩra atĩrĩ, Ũngĩenda-rĩ, wahota kũ’honia there.
• 41. Nake agĩkĩringwo nĩ tha, agĩtambũrũkia guoko, akĩmũhutia, akĩmwĩra atĩrĩ, Nĩngwenda; gĩtherio.
• 42. Na kahinda o kau agĩthirũo nĩ mangũ, agĩthera.
• 43. Nake akĩmũkaania na hinya, agĩcoka o hĩndĩ ĩo akĩmwĩra oime,
• 44. ningĩ akĩmwĩra atĩrĩ, Menya ũkera mũndũ no wĩthiĩre, ũkeyonanie kwĩ mũthĩnjĩri-Ngai, na ũrute indo cia ũguo watherio, o iria Musa aathanire, ituĩke kĩmenyithia kũrĩ andũ.
• 45. No we agĩĩthiĩra akĩrika kuumbũra mũno na kũmemerekia ũhoro ũcio, Jesu agĩkĩremwo nĩ gũcoka gũtonya itũũra thĩinĩ akĩonagwo nĩ andũ, agaikaraga o kũrĩa gũtaarĩ mĩciĩ, kũrĩa gũtaathiagwo: nao andũ makamũkora kuo moimĩte o kũndũ guothe.

Home