Go Back

Mathayo Chapter 9

• 1. AGĨGĨTONYA marikabu, akĩringa mũrĩmo, akĩinũka itũũra rĩao.
• 2. Na rĩrĩ, andũ makĩmũtwarĩra mũndũ warĩ na mũrimũ wa gũkua ciĩga, akomeire gĩtanda: nake Jesu ona ũrĩa metĩkĩtie, akĩĩra mũndũ ũcio warĩ na mũrimũ wa gũkua ciĩga, Mũrũ wakwa, ũmĩrĩria; nĩwoherũo mehia maku.
• 3. Na atĩrĩ, andĩki-marũa amwe makĩĩra na ngoro, Mũndũ ũyũ ekũruma Ngai.
• 4. Nake Jesu, tondũ nĩamenyete ũrĩa meciragia, akĩmoria atĩrĩ, Nĩ kĩ gĩgũtũma mwĩcirie ũũru na ngoro cianyu?
• 5. Nĩ ũndũ-rĩ, ũndũ ũrĩa ũtarĩ hinya nĩ ũrĩkũ, nĩ kwĩra mũndũ, Nĩwoherũo mehia maku; kana nĩ kũmwĩra, Ũkĩra, wĩtware?
• 6. No nĩ getha mũmenye atĩ Mũrũ wa Mũndũ nĩarĩ na hinya gũkũ thĩ wa kuohanĩra mehia (agĩcoka akĩĩra mũndũ ũcio warĩ na mũrimũ wa gũkua ciĩga), Ũkĩra, woe gĩtanda gĩaku, ũinũke gwaku.
• 7. Nake agĩũkĩra, akĩinũka gwake.
• 8. Na kĩrĩndĩ kĩona ũguo, gĩgĩkĩmaka, gĩkĩgooca Ngai ũrĩa waheete andũ wathani ta ũcio.
• 9. Nake Jesu akiuma hau aarĩ, agĩthiathia, akĩona mũndũ wetagwo Mathayo, aikaire thĩ handũ harĩa haarutagĩrũo mbia cia igoti, akĩmwĩra, Nũmĩrĩra. Nake agĩũkĩra, akĩmũrũmĩrĩra.
• 10. Na gũgĩkinya atĩrĩ, rĩrĩa Jesu aaikaire thĩ nyũmba akĩrĩa irio, etia mbia cia igoti aingĩ, o na andũ ehia, magĩũka, magĩikara thĩ hamwe nake na arutwo ake.
• 11. Na Afarisai mona ũguo, makĩũria arutwo ake atĩrĩ, Mũrutani wanyu arĩanagĩra na etia mbia cia igoti na andũ ehia nĩ ũndũ kĩ?
• 12. Nake aigua ũguo, akiuga atĩrĩ, Andũ agima matibataragio nĩ mũthondekani, no arĩa arũaru.
• 13. Thiĩi mũkerute gĩtũmi gĩa ciugo ici, Ũrĩa nyendaga nĩ tha, no ti igongona; nĩ gũkorũo ndiũkĩte gwĩta andũ arĩa athingu, no arĩa ehia.
• 14. Hĩndĩ ĩo arutwo a Johana nĩmokire kũrĩ we, makĩmũũria, Nĩ kĩ gĩtũmaga ithuĩ na Afarisai twĩhingage kaingĩ kũrĩa irio, no arutwo aku matiĩhingaga kũrĩa?
• 15. Nake Jesu akĩmoria atĩrĩ, Kaĩ andũ a kĩhikanio-inĩ mangĩhota kũigua kĩeha hĩndĩ ĩrĩa mũhikania arĩ hamwe nao? No matukũ nĩmagoka marĩa mũhikania agakorũo athengetio kũrĩ o, na hĩndĩ ĩo nĩmakehinga kũrĩa.
• 16. Gũtirĩ mũndũ ũngĩrata nguo ngũrũ na ndamĩ ya tama mwerũ; nĩ ũndũ ndamĩ ĩo ĩmĩratĩte yamĩgucia, nguo ĩo nĩĩgũtembũka makĩria.
• 17. Ningĩ andũ matingĩĩkĩra ndibei ya mũhihano mondo ngũrũ; nĩ gũkorũo mangĩĩkĩra, mondo ciatembũka, na ndibei ĩitĩke, o na mondo ciũre; no mekagĩra ndibei ya mũhihano mondo njerũ, nacio cierĩ igaikario.
• 18. Rĩrĩa aameraga mohoro macio, atĩrĩ, hagĩũka mũthuri ũmwe wĩ mũnene, akĩmũturĩria ndu, akĩmwĩra atĩrĩ, Mwarĩ wakwa nĩateithũkana o rĩu; no gĩũke ũkamũigĩrĩre guoko, na nĩegũcoka muoyo.
• 19. Nake Jesu agĩũkĩra, akĩmuuma thutha me na arutwo ake.
• 20. Na atĩrĩrĩ, mũtumia watũire oiraga thakame mĩaka ikũmi na ĩĩrĩ, agĩũka na thutha wake, akĩhutia ciohe cia ndigi cia nguo yake:
• 21. nĩ ũndũ eĩraga, Ingĩhutia o nguo yake, ndahona.
• 22. Nake Jesu akĩĩhũgũra, akĩmuona, akĩmwĩra atĩrĩ, Mwarĩ ũyũ, ũmĩrĩria; gwĩtĩkia gwaku nĩkuo gwatũma ũhone. Nake mũtumia ũcio akĩhona kuuma o thaa ĩo.
• 23. Nake Jesu, aatonya nyũmba ya mũnene ũcio, akĩona ahuhi mĩtũrirũ, na andũ gĩkundi makĩronja,
• 24. akiuga, Eherai: nĩ ũndũ kairĩtu ti gakuũ, no toro karĩ. Nao makĩmũthekerera.
• 25. Na rĩrĩ, gĩkundi kĩu kĩarĩkia kuumio nja, agĩtonya, agĩkanyita guoko; nako kairĩtu gagĩũkĩra.
• 26. Nayo ngumo ya ũhoro ũcio ĩkĩhunja bũrũri ũcio wothe.
• 27. Na rĩrĩa Jesu oimaga kũu, agĩthiaga-rĩ, atumumu erĩ makĩmuuma thutha makĩanagĩrĩra, makĩmwĩraga atĩrĩ, Tũiguĩre tha, Wee Mũrũ wa Daudi.
• 28. Na aatonya nyũmba, atumumu acio magĩũka kũrĩ we: nake Jesu akĩmoria atĩrĩ, Nĩmũgwĩtĩkia atĩ ndahota gwĩka ũũ? Nao makĩmwĩra, Ĩĩ-ni, Mwathani.
• 29. Hĩndĩ ĩo agĩkĩmahutia maitho, akĩmera, Mũroekwo o ta ũrĩa mwĩtĩkĩtie.
• 30. Namo maitho mao makĩhingũka. Nake Jesu akĩmakania mũno, akĩmera, Menyai mũmenyithie mũndũ.
• 31. No rĩrĩ, makiuma hau, magĩthiĩ makĩhunjia ngumo yake bũrũri ũcio wothe.
• 32. Na rĩrĩa moimaga hau, akĩreherũo mũndũ ũtahotaga kwaria na arĩ na ndaimono.
• 33. Na ndaimono yaingatwo, mũndũ ũcio agĩcoka kwaria; nakĩo kĩrĩndĩ gĩkĩgega, gĩkiuga atĩrĩ, Ũũ, ndũrĩ wonwo Isiraeli, o na rĩ.
• 34. No Afarisai makiuga atĩrĩ, Aingataga ndaimono na hinya wa mũnene wa ndaimono.
• 35. Nake Jesu agĩcanga matũũra-inĩ mothe na mĩciĩ-inĩ yothe, akĩrutanaga thunagogi-inĩ ciao, o akĩhunjagia Ũhoro-ũrĩa-Mwega wa ũthamaki, na akĩhonanagia mĩrimũ yothe, o na ndũari ciothe.
• 36. Na rĩrĩa onire mĩrũrũngano ya andũ, akĩmaiguĩra tha, nĩ ũndũ nĩmaanyamarĩkĩte, na makahurunjũka ta mbũri itarĩ na mũrĩithi.
• 37. Hĩndĩ ĩo akĩĩra arutwo ake atĩrĩ, Ti-itherũ magetha nĩ maingĩ, no aruti wĩra nĩ anyinyi.
• 38. Nĩ ũndũ ũcio thaithai Mwathani mwene magetha atĩ arekie aruti wĩra mathiĩ magetha-inĩ make.

Home