Go Back

Mathayo Chapter 8

• 1. NA aaikũrũka kĩrĩma, kĩrĩndĩ kĩingĩ gĩkĩmuuma thutha.
• 2. Na atĩrĩrĩ, mũndũ warĩ na mangũ agĩthiĩ kũrĩ we, akĩmũturĩria ndu, akĩmwĩra atĩrĩ, Mwathani, ũngĩenda-rĩ, wahota kũhonia there.
• 3. Nake agĩtambũrũkia guoko, akĩmũhutia, akiuga atĩrĩ, Nĩngwenda; honio, ũthere; na kahinda o kau akĩhonio mangũ make, agĩthera.
• 4. Ningĩ Jesu agĩcoka akĩmwĩra atĩrĩ, Menya ũkere mũndũ; no wĩthiĩre, ũkeyonanie kwĩ mũthĩnjĩri-Ngai, na ũrute kĩrĩa Musa oigire kĩrutagwo, gĩtuĩke gĩa kũmenyithia andũ.
• 5. Na aarĩkia gũtonya Kaperinaumu, mũnene wa athigari igana agĩũka kũrĩ we, akĩmũthaitha
• 6. akĩmwĩra atĩrĩ, Mwathani, ndungata yakwa nĩĩkomete nyũmba ĩrũarĩte mũrimũ wa gũkua ciĩga, na nĩĩhĩirũo mũno.
• 7. Nake akĩmwĩra atĩrĩ, Nĩngũka ndĩmĩhonie.
• 8. Na mũnene ũcio wa athigari igana akĩmũcokeria akĩmwĩra atĩrĩ, Mwathani, ndiagĩrĩire atĩ ũtonye nyũmba yakwa: no kiuge kiugo, na ndungata yakwa nĩĩkũhona.
• 9. Nĩ ũndũ o na niĩ ndĩ mũndũ wathagwo, na ndĩ na athigari njathaga: na ndera ũmwe, Thiĩ, nĩathiaga; o na ndera ũngĩ, Ũka, nĩokaga; na ningĩ ndera ngombo yakwa, Ĩka ũũ, noguo ĩkaga.
• 10. Nake Jesu aaigua ũguo, akĩgega, akĩra arĩa maamumĩte thutha, Ngũmwĩra atĩrĩ na ma, Ndirĩ ndona gwĩtĩkia kũnene ũũ, o na Isiraeli guothe.
• 11. No ngũmwĩra atĩrĩ, andũ aingĩ nĩmakoima kũrĩa irathĩro-inĩ, na kũrĩa ithũĩro-inĩ, maikare thĩ hamwe na Iburahimu, na Isaaka, o na Jakubu, ũthamaki-inĩ wa Igũrũ:
• 12. no ciana cia ũthamaki ũcio nĩ gũikio igaikio na nja nduma-inĩ: na kũu nĩkuo gũkagĩa kĩrĩro na kũhagarania magego.
• 13. Nake Jesu akĩĩra mũnene ũcio wa athigari igana, Wĩthiĩre; ũroekwo o ta ũguo wĩtĩkĩtie. Nayo ndungata yake ĩkĩhona o ro thaa ĩo.
• 14. Nake Jesu aatonya nyũmba ya Petero, agĩkora nyina wa mũtumia wake akomete, arũarĩte mũrimũ wa kũhiũha mwĩrĩ.
• 15. Akĩmũhutia guoko, naguo mũrimũ ũkĩmũtiga; agĩũkĩra, akĩmũtungatĩra.
• 16. Na gwatua gũtuka, makĩmũtwarĩra andũ aingĩ arĩa maarĩ na ndaimono; nake agĩtũma ndaimono ciume andũ na kuga o kiugo, na akĩhonia arĩa othe marũarĩte;
• 17. nĩguo atĩ ciugo iria cia mũnabii Isaia ihingio, rĩrĩa oigire, We mwene nĩoire wonju witũ, na akĩeheria mĩrimũ itũ.
• 18. Nake Jesu ona athĩũrũrũkĩirio nĩ kĩrĩndĩ kĩingĩ, agĩathana atĩ maringe mũrĩmo.
• 19. Na mwandĩki-marũa ũmwe agĩũka kũrĩ we, akĩmwĩra atĩrĩ, Mũrutani, nĩndĩrĩkũrũmagĩrĩra o kũrĩa guothe ũrĩthiaga.
• 20. Nake Jesu akĩmwĩra atĩrĩ, Mbwe nĩirĩ marima, na nyoni cia rĩera-inĩ nĩirĩ na itara; no Mũrũ wa Mũndũ ndarĩ na handũ o na ha kũigĩrĩra mũtwe.
• 21. Na mũrutwo ũngĩ wake akĩmwĩra atĩrĩ, Mwathani, njĩtĩkĩria nyambe thiĩ ngathike awa.
• 22. Nowe Jesu akĩmwĩra atĩrĩ, Nũmĩrĩra, ũtige arĩa akuũ methikagĩre akuũ ao ene.
• 23. Na aarĩkia gũtonya marikabu, arutwo ake makĩmũrũmĩrĩra.
• 24. Na atĩrĩ, gũkĩgĩa kĩhuhũkanio kĩnene kũu iria-inĩ, na marikabu ĩkĩenda kũhumbwo nĩ makũmbĩ ma maĩ: nowe aarĩ toro.
• 25. Magĩthiĩ kũrĩ we, makĩmũkĩria, makĩmwĩra atĩrĩ, Mwathani, tũhonokie, nĩtũkũũra.
• 26. Nake akĩmera, Nĩ kĩ gĩgũtũma mũgĩe na guoya, inyuĩ mwĩtĩkĩtie o hanini? Agĩũkĩra, agĩkania rũhuho na iria; gũgĩkĩhorera o kũhorera.
• 27. Na andũ acio makĩgega, makiuga, Kaĩ mũndũ ũyũ atariĩ atĩa, kuona atĩ o na rũhuho na iria nĩimũiguaga?
• 28. Na aarĩkia gũkinya mũrĩmo, bũrũri wa Agadari-rĩ, agĩtũngwo nĩ andũ erĩ marĩ na ndaimono, moimĩte mbĩrĩra-inĩ, na magũrũkĩte mũno, gũtakĩrĩ mũndũ ũngĩahotire kũgera njĩra ĩo.
• 29. Na atĩrĩ, makĩmwanĩrĩra, makiuga, Tũrĩ na ũhoro ũrĩkũ ithuĩ nawe, Mũrũ wa Ngai? Kaĩ woka haha ũtũnyarire hĩndĩ ĩtanakinya?
• 30. Na kwarĩ rũũru rũnene rũa ngũrũe rũarĩithagio haraya na hau.
• 31. Nacio ndaimono ikĩmũthaitha, ikiuga atĩrĩ, Akorũo nĩũgũtũingata-rĩ, tũtũme tũtonye rũru-inĩ rũrĩa rũa ngũrũe.
• 32. Nake agĩciĩra, No gĩthiĩi. Nacio ikiuma, igĩtonya ngũrũe: na atĩrĩ, rũũru ruothe rũgĩkĩhanyũka kĩgaragaro-inĩ, rũkĩgũa iria-inĩ, rũkĩũrĩra maĩ-inĩ.
• 33. Nao arĩithi makĩũra, magĩthiĩ magĩtonya itũũra, makĩheana ũhoro ũcio wothe, gwata wa ũrĩa andũ acio maarĩ na ndaimono monire.
• 34. Na atĩrĩ, andũ othe a itũũra makiumũrũrũka, magatũnge Jesu: na maamuona, makĩmũthaitha oime kwao.

Home