Go Back

Mathayo Chapter 6

• 1. MWĨMENYEREREI mũtigekage ciĩko cianyu iria njega mbere ya andũ, nĩ getha muonagwo nĩo: nĩ gũkorũo, mweka ũguo, mũtirĩ na ngatho mũkona harĩ Ithe wanyu wĩ Igũrũ.
• 2. Nĩ ũndũ ũcio, rĩrĩa ũgwĩka ciĩko cia tha, tiga kũhuhithia coro mbere yaku, o ta ũrĩa hinga ciĩkaga thunagogi-inĩ, o na njĩra-inĩ, nĩ getha ikumagio nĩ andũ. Ngũmwĩra atĩrĩ na ma, atĩ, Nĩirĩkĩtie kũgwata mũcara wacio.
• 3. Nowe-rĩ, rĩrĩa ugwĩka ciĩko cia tha, ndũkamenyithie o na guoko gwaku kwa ũmotho ũrĩa guoko gwaku kwa ũrĩo gũgwĩka:
• 4. nĩ getha ciĩko ciaku cia tha ituĩke cia hitho-inĩ: na Thoguo ũrĩa wonaga hitho-inĩ nĩagakũhe ngatho.
• 5. Na hĩndĩ ĩrĩa mũkũhoya, mũtigatuĩke ta hinga; tondũ cio nĩciendaga kũhoya irũgamĩte thunagogi-inĩ na magomano-inĩ ma njĩra, nĩ getha cionagwo nĩ andũ. Ngũmwĩra atĩrĩ na ma, atĩ, Nĩirĩkĩtie kũgwata mũcara wacio.
• 6. No hĩndĩ ĩrĩa ũkũhoya, tonya nyũmba yaku thĩinĩ, na warĩkia gwĩtiirĩria, ũhoe Thoguo ũrĩa wĩ hitho-inĩ, nake Thoguo ũrĩa wonaga hitho-inĩ nĩagakũhe ngatho.
• 7. Na ningĩ mũkĩhoya-rĩ, tigai kũhũhũtaga ta ũrĩa andũ arĩa a Ndũrĩrĩ mekaga: nĩ gũkorũo o megeragĩria atĩ nĩmekũiguwo nĩ ũndũ wa kũraihia ũhoro wao mũno.
• 8. No inyuĩ-rĩ, tigai gũtuĩka tao: nĩ gũkorũo Ithe wanyu nĩoĩ maũndũ marĩa mamũbatairie mũtanamũhoya.
• 9. Nĩ ũndũ ũcio-rĩ, inyuĩ hoyagai ũũ: Ithe witũ wĩ Igũrũ, Rĩĩtwa rĩaku nĩrĩamũrũo.
• 10. Ũthamaki waku ũũke. O ũrĩa wendete Wee, nĩwĩkagwo gũkũ thĩ, o ta ũrĩa wĩkagwo kũu Igũrũ.
• 11. Tũhe ũmũthĩ irio ciitũ cia gũtũigana.
• 12. Na ũtũrekere mathirĩ maitũ, o ta ũrĩa ithuĩ tũrekagĩra arĩa marĩ na mathirĩ maitũ.
• 13. Na ndũgatũtware magerio-inĩ, no kũhonokia ũtũhonokagie ũũru-inĩ. [Nĩ ũndũ ũthamaki nĩ waku, o na hinya, o na kũgoocwo, tene na tene, Amen.]
• 14. Nĩ ũndũ akorũo inyuĩ nĩmuohagĩra andũ angĩ mehia mao, nake Ithe wanyu wĩ Igũrũ nĩarĩmuohagĩra inyuĩ.
• 15. No akorũo mũtiohagĩra andũ angĩ mehia mao, nake Ithe wanyu ndarĩmuohagĩra mehia manyu.
• 16. Ningĩ rĩrĩa mũkwĩhinga kũrĩa irio, mũtigatukie mothiũ, ta hinga: tondũ cio nĩitukagia mothiũ, nĩ getha cionagwo nĩ andũ atĩ nĩciĩhingĩte kũrĩa irio. Ngũmwĩra atĩrĩ na ma, atĩ, Nĩirĩkĩtie kũgwata mũcara wacio.
• 17. Nowe-rĩ, rĩrĩa ũkwĩhinga kũrĩa irio, wĩhake maguta mũtwe, na wĩthambe ũthiũ;
• 18. nĩ getha ndũkae kuonwo nĩ andũ atĩ nĩwĩhingĩte kũrĩa irio, no wonwo nĩ Thoguo ũrĩa wĩ hitho-inĩ: nake Thoguo ũrĩa wonaga hitho-inĩ nĩagakũhe ngatho.
• 19. Tigagai kwĩigĩra ũtonga gũkũ thĩ, kũrĩa indo irĩagwo nĩ memenyi, na irotaga, na kũrĩa aici matũrĩkagia makaiya;
• 20. no mwĩigagĩrei ũtonga Igũrũ, kũrĩa indo itarĩagwo nĩ memenyi, na itarotaga, na kũrĩa gũtarĩ aici matũrĩkagia makaiya;
• 21. tondũ-rĩ, o kũrĩa ũtonga waku ũrĩ, nĩkuo ngoro yaku nayo ĩkoragwo ĩrĩ.
• 22. Tawa wa mwĩrĩ nĩguo riitho: nĩ ũndũ ũcio ũngĩkorũo riitho rĩaku nĩ rĩgima, mwĩrĩ waku wothe no ũiyũrũo nĩ ũtheri.
• 23. No rĩrĩ, ũngĩkorũo riitho rĩaku nĩ rĩthũku, mwĩrĩ waku wothe no ũiyũrũo nĩ nduma. Nĩ ũndũ ũcio ongorũo ũtheri ũrĩa wĩ thĩinĩ waku no nduma, nduma ĩo nĩ nene atĩa!
• 24. Gũtirĩ mũndũ ũngĩhota gũtungatĩra aathani erĩ: nĩ ũndũ no kinya athũũre ũmwe, ende ũrĩa ũngĩ; kana eiguithanie na ũmwe, anyarare ũrĩa ũngĩ. Mũtingĩhota gũtungatĩra Ngai o na ũtonga.
• 25. Nĩ ũndũ ũcio ngũmwĩra atĩrĩ, Tigagai gũtangĩkĩra mĩoyo yanyu, o kĩrĩa mũrĩrĩaga, kana o kĩrĩa mũrĩnyuaga; o na kana mũtangĩkĩre mĩĩrĩ yanyu o kĩrĩa mũrĩĩhumbaga. Kaĩ muoyo ũtakĩrĩte irio, o na mwĩrĩ ũgakĩra nguo?
• 26. Ta rorai nyoni cia rĩera-inĩ, atĩ itihandaga, kana ikagetha, kana igaita makũmbĩ; na Ithe wanyu wĩ Igũrũ nĩaciheaga irio. Githĩ inyuĩ mũtikĩrĩ bata mũnene kũrĩ icio?
• 27. Na inyuĩ-rĩ, nũ wanyu ũngĩhota kwĩongerera kĩũga gĩake mũkono ũmwe nĩ ũndũ wa gwĩtangĩkĩra?
• 28. Na nĩ kĩ gĩtũmaga mũtangĩkĩre nguo? Taranagiai ũhoro wa itoka cia gĩthaka, ũrĩa ikũraga; itiĩnogagia ikĩruta wĩra, kana ikogotha ndigi:
• 29. no ngũmwĩra atĩ Solomoni, arĩ na mwago wake wothe, ndaagemete ta kĩmwe gĩacio.
• 30. Atĩrĩrĩ, inyuĩ mwĩtĩkĩtie o hanini, akorũo Ngai nĩagemagia ũguo nyeki ya gĩthaka, ĩrĩa ĩgũtinda ho ũmũthĩ, na rũciũ ĩkaroka gũikio icua-inĩ, githĩ ndangĩkĩria mũno kũmũhumba nguo inyuĩ?
• 31. Tondũ ũcio-rĩ, tigagai gwĩtangĩkĩra, mũkiugaga atĩrĩ, Tũkũrĩa kĩ? kana, Tũkũnyua kĩ? o na kana, Tũkwĩhumba kĩ?
• 32. Nĩ ũndũ indo icio ciothe nĩcio imathagwo nĩ andũ a Ndũrĩrĩ; tondũ Ithe wanyu wĩ Igũrũ nĩoĩ atĩ nĩmũbataragio nĩ indo icio ciothe.
• 33. No ambai mũcarie ũthamaki wa Ngai o na ũthingu wake, nacio indo icio ciothe nĩmũrĩkĩragĩrĩrio.
• 34. Nĩ ũndũ ũcio-rĩ, tigagai gwĩtanga nĩ ũndũ wa rũciũ: nĩ gũkorũo rũciũ nĩrũgetangĩkĩra ruo rũene. O mũthenya nĩũiganagwo nĩ ũũru waguo mwene.

Home