Go Back

Mathayo Chapter 3

1. MATUKŨ macio-rĩ, gũgĩũka Johana ũrĩa Mũbatithania akĩhunjagia ũhoro werũ-inĩ wa Judea, akiugaga atĩrĩ,
2. Mwĩrirei, tondũ ũthamaki wa Igũrũ nĩũkuhĩhĩirie.
3. Nĩ ũndũ-rĩ, ũcio nĩwe wagwetirũo nĩ Isaia ũrĩa mũnabii, rĩrĩa oigire, He mũgambo wa mũndũ ũkwanĩrĩra werũ-inĩ, akoiga, Thondekai kĩng’aratua kĩa Mwathani; Rũngariani njĩra ciake.
4. Nake Johana we mwene ehumbaga nguo ya guoya wa ngamĩra, na nĩeohaga kamũkwa njohero, ningĩ irio ciake no ngigĩ, na ũũkĩ wa hako.
5. Na hĩndĩ ĩo andũ a Jerusalemu, o na andũ a Judea guothe, o na a bũrũri wothe ũrĩa ũrĩ hakuhĩ na Jorodani, makiuma kwao, magĩthiĩ kũrĩ we,
6. nao makĩbatithio nĩwe thĩinĩ wa rũũĩ rũa Jorodani, makiumbũraga mehia mao.
7. No rĩrĩa onire Afarisai o na Asadukai aingĩ magĩũka kĩbatithanio-inĩ gĩake, akĩmoria atĩrĩ, Ciana ici cia nduĩra, nũ wamũkinyĩirie inyuĩ ũhoro atĩ mũũrĩre marakara marĩa magoka?
8. Nĩ ũndũ ũcio ciarai maciaro maringaine na kwĩrira,
9. na mũtikeĩrage na ngoro cianyu atĩ, Ithe witũ nĩ Iburahimu. Nĩ gũkorũo ngũmwĩra atĩ, Ngai aahota gũtũma ciana cia Iburahimu ciume mahiga-inĩ maya.
10. Na rĩu ithanwa nĩrĩrĩkĩtie kũigwo itina-inĩ cia mĩtĩ; tondũ wa ũguo mũtĩ o wothe ũtaciaraga maciaro mega nĩ gũtemwo ũtemagwo, ũgaikio mwaki-inĩ.
11. Niĩ-rĩ, ndĩmũbatithagia na maĩ nĩguo mwĩrire; no rĩrĩ, Ũrĩa ũgũũka thutha wakwa arĩ na hinya kũrĩ niĩ, na ndiigaine niĩ ndĩmũkuuĩre iratũ ciake; Ũcio-rĩ, nĩakamũbatithia na Roho Mũtheru, o na mwaki.
12. Gĩtarũrũ gĩake arĩ nakĩo guoko, na nĩagatheria o wega kĩhuhĩro gĩake; na acokererie ngano ikũmbĩ rĩake, na acine mũũngũ na mwaki ũrĩa ũtangĩhoreka.
13. Hĩndĩ ĩo Jesu nĩoimire Galili, agĩthiĩ Jorodani kũrĩ Johana, akabatithio nĩwe.
14. Nake Johana nĩendaga kũmũgiria, akĩmũũria, Niĩ-rĩ, nĩnjagĩrĩirũo nĩ kũbatithio nĩwe, nawe ũgũũka kũrĩ niĩ, atĩa?
15. Nake Jesu akĩmũcokeria akĩmwĩra atĩrĩ, Njĩtĩkĩria rĩu, tondũ ũguo nĩguo twagĩrĩirũo nĩ kũhingia maũndũ mothe marĩa merekanĩrĩire na ũthingu. Hĩndĩ ĩo akĩmwĩtĩkĩria.
16. Nake Jesu aarĩkia kũbatithio, akiumĩra o rĩmwe maĩ-inĩ, na atĩrĩrĩ, Igũrũ rĩkĩhingũka, akĩona Roho wa Ngai agĩikũrũka ta ndutura, akĩũmba igũrũ rĩake.
17. Na atĩrĩrĩ, mũgambo ũkiuma Igũrũ, ũkiuga, Ũyũ nĩwe Mũrũ wakwa nyendete mũno, nĩngenaga nĩ ũndũ wake.

Home