Go Back

Mathayo Chapter 27

• 1. NA rũcinĩ, o gwathera-rĩ, athĩnjĩri-Ngai arĩa anene na athuri a kĩrĩndĩ makĩgĩa ndundu nĩ ũndũ wa Jesu, mamũũragithie:
• 2. makĩmuohithia, makĩmũtwara, makĩmũneana kwĩ Pilato ũrĩa barũthi.
• 3. Hĩndĩ ĩo Judasi ũrĩa wamũkunyanĩire ona atĩ nĩaatuĩrũo ituĩro rĩũru, akĩhera, agĩcokeria athĩnjĩri-Ngai arĩa anene na athuri mbia icio cia betha mĩrongo ĩtatũ,
• 4. akiuga atĩrĩ, Nĩnjĩhĩtie, nĩ gũkorũo nĩndĩraneanire thakame ĩrĩa ĩtarĩ o na kaũũru. Nao magĩcokia makĩmũũria atĩrĩ, Kaĩ ũcio akĩrĩ ũhoro witũ, menya arĩ wee ũrĩa ũgwĩka.
• 5. Nake agĩikania mbia icio thĩ kũu hekarũ thĩinĩ, agĩĩthiĩra; agĩthiĩ, akĩĩita.
• 6. Nao athĩnjĩri-Ngai arĩa anene makĩoya mbia icio makiuga, Gũtiagĩrĩire ciĩkĩrũo ithandũkũ rĩa mũhothi, nĩ ũndũ ciumĩte thakame.
• 7. Na magĩthiĩ ndundu, makĩgũra gĩthaka kĩrĩa kĩa mũũmbi nacio, gĩtuĩke gĩa gũthikagwo ageni.
• 8. Nĩ ũndũ ũcio gĩthaka kĩu gĩĩtagwo Gĩthaka gĩa thakame, o nginya ũmũthĩ.
• 9. Hĩndĩ ĩo nĩyo ciugo iria cia mũnabii Jeremia ciahingirio, iria oigire, Nao nĩmoire mbia iria mĩrongo ĩtatũ, o iria mũndũ ũcio oimire cio, o we watuĩrĩirũo thogora nĩ andũ amwe a ciana cia Isiraeli;
• 10. nao magĩcineana ikagũre gĩthaka kĩrĩa kĩa mũũmbi, o ta ũrĩa Mwathani aanjathire gwĩkwo.
• 11. Na rĩrĩ, Jesu akĩrũgama mbere ya barũthi: nake barũthi akĩmũũria atĩrĩ, Wee nĩwe mũthamaki wa Ayahudi? Nake Jesu akĩmũcokeria akĩmwĩra atĩrĩ, Wee nĩwoiga.
• 12. Na rĩrĩa aathitakirũo nĩ athĩnjĩri-Ngai arĩa anene na athuri, ndaigana gũcokia ũndũ.
• 13. Hĩndĩ ĩo Pilato akĩmũũria, Kaĩ ũtegũkĩigua ũrĩa maũndũ maingĩhĩte marĩa mekuumbũra atĩ nĩwĩkĩte?
• 14. Nake ndaigana kũmũcokeria kiugo o na kĩmwe: na tondũ ũcio barũthi agĩkĩgega mũno.
• 15. Na rĩrĩ, hĩndĩ ya gĩathĩ kĩu barũthi nĩohoragĩra kĩrĩndĩ mũndũ ũmwe wa arĩa ohe, o ũrĩa mangĩĩendera.
• 16. Na hĩndĩ ĩo maarĩ na mũndũ muohe woĩo mũno, wetagwo Baraba.
• 17. Nĩ ũndũ ũcio, rĩrĩa monganĩte, Pilato akĩmoria atĩrĩ, Mũkwenda ndĩmuohorere ũ? Nĩ Baraba, kana nĩ Jesu, ũrĩa wĩtagwo Kristo?
• 18. Nĩ ũndũ nĩoĩ atĩ nĩmaamũneanĩte nĩ ũndũ wa ũiru.
• 19. Na hĩndĩ ĩo aaikarĩire gĩtĩ kĩrĩa gĩa ciira, mũtumia wake akĩmũrekeria mũndũ akĩmwĩra atĩrĩ, Menya wĩke mũndũ ũcio mũthingu ũndũ: nĩ gũkorũo nĩ’thĩnĩtio mũno ũmũthĩ na kĩroto nĩ ũndũ wake.
• 20. Nao athĩnjĩri-Ngai arĩa anene na athuri makĩringĩrĩria kĩrĩndĩ atĩ gĩĩtie Baraba, na kĩũragithie Jesu.
• 21. Nowe barũthi agĩcokia ũhoro akĩmoria atĩrĩ, Mũkwenda ndĩmuohorere ũrĩku wa acio erĩ? Nao makiuga, Tũkwenda Baraba.
• 22. Nake Pilato akĩmoria atĩrĩ, Nake Jesu ũrĩa wĩtagwo Kristo-rĩ, ngũkĩmwĩka atĩa? Nao othe makiuga, Nĩaambwo mũtĩ igũrũ!
• 23. Nake akĩmoria, Nĩkĩ, kaĩ ekĩte ũũru ũrĩkũ? Nao makĩrũmanĩria kũgũũthũka, makiugaga, Nĩaambwo mũtĩ igũrũ!
• 24. Na rĩrĩa Pilato onire atĩ nĩekũũmĩrũo, na makĩria nĩ ngũĩ ĩraneneha, akĩoya maĩ agĩĩthamba moko hau mbere ya kĩrĩndĩ kĩu, akiuga, Niĩ-rĩ, ndirĩ ho mũgĩita thakame ya mũndũ ũcio mũthingu: menyai arĩ inyuĩ ũrĩa mũgwĩka.
• 25. Nao andũ othe magĩcokia makĩmwĩra atĩrĩ, Thakame yake ĩrotũcokerera ithuĩ ene o na ciana ciitũ.
• 26. Hĩndĩ ĩo agĩkĩmohorera Baraba: nowe Jesu-rĩ, akĩmũhũrithia na kĩboko kĩrĩ njaaga, akĩmũneana akaambwo mũtĩ igũrũ.
• 27. Hĩndĩ ĩo athigari a barũthi magĩtwara Jesu nyũmba-inĩ ĩrĩa ya gũciirĩrũo, makĩũngania mbũtũ yao yothe.
• 28. Na makĩmũruta nguo ciake, makĩmũhumba nguo ĩngĩ ndune.
• 29. Magĩtuma thũmbĩ ya mĩigua, makĩmwĩkĩra mũtwe, makĩmũnengera kamũrangi guoko-inĩ kwa ũrĩo; makĩmũturĩria ndu makĩmũnyũrũria, makĩmũũria, Ũkĩrĩ mũhoro, Mũthamaki wa Ayahudi?
• 30. Na makĩmũtuĩra mata, makĩoya kamũrangi kau makĩmũringa nako mũtwe.
• 31. Na maarĩkia kũmũnyũrũria, makĩmũruta nguo ĩo, makĩmũhumba nguo ciake mwene, makĩmuumagaria makamwambe mũtĩ igũrũ.
• 32. Na rĩrĩa moimagaraga, magĩkora mũndũ Mũkurene wetagwo Simoni: makĩmũringĩrĩria na hinya athiĩ nao amũkuuĩire mũtharaba wake.
• 33. Na rĩrĩa maakinyire handũ hetagwo Gologotha, naguo ũguo nĩ ta kuuga, Handũ ha kĩbuuri,
• 34. makĩmũnengera ndibei ĩtukanĩtio na maĩ ma nyongo anyue: nake aamĩcama, akĩrega kũnyua.
• 35. Na maarĩkia kũmwamba mũtĩ igũrũ, makĩgayana nguo ciake na gũcicukĩra mĩtĩ: [nĩ getha ũhoro ũhingio ũrĩa waaririo nĩ mũnabii, akiuga atĩrĩ, Magwete kũgayana nguo ciakwa, itonyo rĩakwa makarĩcukĩra mĩtĩ.]
• 36. Na magĩikara thĩ ho, makĩmwĩrorera.
• 37. Na igũrũ rĩa mũtwe wake magĩĩkĩra irũa rĩandĩkĩtwo ũndũ ũrĩa aathitakĩirũo, atĩrĩ, ŨYŨ NĨWE JESU MŨTHAMAKI WA AYAHUDI.
• 38. Hĩndĩ ĩo atunyani erĩ makĩambwo mĩtĩ igũrũ hamwe nake, ũmwe mwena wake wa ũrĩo, na ũrĩa ũngĩ mwena wake wa ũmotho.
• 39. Na andũ arĩa maahĩtũkagĩra ho makamũrumaga, makĩinagia mĩtwe yao,
• 40. makiugaga atĩrĩ, Wee ũtharagia hekarũ, ũkamĩaka na mĩthenya ĩtatũ, ndũkĩĩhonokie: angĩkorũo wee nĩwe Mũrũ wa Ngai-rĩ, ta kiume mũtĩ-inĩ.
• 41. Ũguo no taguo athĩnjĩri-Ngai arĩa anene o nao magĩkĩmũnyũrũria, marĩ na aandĩki-marũa na athuri, makiugaga,
• 42. Nĩaahonokagia andũ angĩ; na ndangĩhota kwĩhonokia we mwene. Nĩwe Mũthamaki wa Isiraeli: ta nĩakiume rĩu mũtĩ-inĩ, na nĩtũkũmwĩtĩkia.
• 43. Nĩehokaga Ngai-ĩ; nĩakĩmũhonokie rĩu, akorũo nĩamwenda: tondũ nĩoigire, Ndĩ Mũrũ wa Ngai.
• 44. Nao atunyani arĩa maambĩtwo mĩtĩ igũrũ hamwe nake o nao makĩmũruma o ũguo.
• 45. Na rĩrĩ, kuuma thaa thita nginya thaa kenda bũrũri wothe ũkĩgĩa nduma.
• 46. Na ta thaa kenda Jesu akĩgũũthũka na mũgambo mũnene akiuga atĩrĩ, Elii, Elii, lama sabakithani? Naguo ũguo nĩ ta kuuga atĩrĩ, Ngai wakwa, Ngai wakwa, ũndiganĩirie nĩkĩ?
• 47. Nao andũ arĩa maarũngiĩ ho, amwe ao maaigua ũguo makiuga atĩrĩ, Mũndũ ũyũ areta Elija.
• 48. Na kahinda o kau ũmwe wao agĩteng’era akĩoya thibonji, akĩmĩnyuithia thiki ĩkĩiyũra, agĩthecerera kamũrangi akĩmũkundia.
• 49. Nao andũ arĩa angĩ makiuga, Ta tiga; tũrore kana Elija nĩegũgĩũka kũmũhonokia.
• 50. Nake Jesu aagũũthũka rĩngĩ na mũgambo mũnene, agĩtuĩkana.
• 51. Na atĩrĩ, gĩtama kĩrĩa kĩa hekarũ gĩgĩatũkana njatũ igĩrĩ, gwata igũrũ nginya thĩ; nayo thĩ ĩgĩthingitha; nacio ndwaro cia mahiga igĩatũka;
• 52. nacio mbĩrĩra ikĩhingũka; na ciimba nyingĩ cia andũ aamũre arĩa maakomete ikĩriũkio;
• 53. nake Jesu aarĩkia kũriũka, makiuma mbĩrĩra-inĩ magĩtonya itũũra rĩrĩa rĩtheru, makiumĩrĩra andũ aingĩ.
• 54. Nake mũnene ũrĩa wa athigari igana na andũ arĩa maarĩ nake makĩĩrorera Jesu, rĩrĩa monire gĩthingithia kĩu gĩa thĩ na maũndũ marĩa mekĩkire, magĩkĩmaka mũno makiuga, Kaĩ ti-itherũ, ũyũ oima Mũrũ wa Ngai-ĩ!
• 55. Na nĩhaarĩ atumia aingĩ meroragĩra marĩ haraya arĩa maarũmĩrĩire Jesu moimĩte Galili makĩmũtungatagĩra;
• 56. nao amwe nĩ aa Mariamu Mũmagidali, na Mariamu nyina wa Jakubu na Jose, na nyina wa ariũ a Zebedi.
• 57. Na hwaĩ-inĩ wakinya-rĩ, hagĩũka mũndũ warĩ gĩtonga wa itũũra rĩa Arimathea, wetagwo Jusufu, nake we mwene aarĩ mũrutwo wa Jesu:
• 58. ũcio agĩthiĩ kwĩ Pilato, akĩhoya aheo mwĩrĩ wa Jesu. Hĩndĩ ĩo Pilato agĩathana atĩ ũkaneanwo.
• 59. Nake Jusufu agĩkuua mwĩrĩ, akĩũthaya na taama mũtheru wa gatani,
• 60. akĩũiga mbĩrĩra yake njerũ ĩrĩa enjithĩtie rũaro-inĩ rũa ihiga ta muungu: na akĩgaragarĩria mũromo wa mbĩrĩra ĩo ihiga rĩnene, agĩĩthiĩra.
• 61. Nake Mariamu Mũmagidali aarĩ ho o na Mariamu ũrĩa ũngĩ, maikaire thĩ mang’etheire mbĩrĩra.
• 62. Na mũthĩ ũyũ ũngĩ, nĩguo ũrĩa wa thutha wa Ihaarĩria, athĩnjĩri-Ngai arĩa anene na Afarisai makĩroka kũũngana kwa Pilato,
• 63. makĩmwĩra atĩrĩ, Mũthuri ũyũ, nĩtwaririkana atĩ rĩrĩa mũhenania ũcio aarĩ muoyo nĩoigire atĩ, Matukũ matatũ maathira, nĩngariũka.
• 64. Nĩ ũndũ ũcio-rĩ, athana atĩ mbĩrĩra ĩgaikario nginya mũthenya wa gatatũ, nĩ getha arutwo ake matikae gũũka mamũiye, na mere andũ atĩ, Nĩariũkĩte akoima kũrĩ arĩa akuũ: namo maheni ma kũrigĩrĩria matuĩke moru gũkĩra macio ma mbere.
• 65. Nake Pilato akĩmera atĩrĩ, Mũrĩ na athigari a kũrangĩra: thiĩi mũkamĩikarithie o ta ũrĩa mũngĩhota.
• 66. Magĩgĩthiĩ, magĩikarithia mbĩrĩra, na magĩĩkĩra ihiga rĩu rũũri rũa mũhũra, athigari a kũrangĩra marĩ ho.

Home