Go Back

Mathayo Chapter 23

• 1. HĨNDĨ ĩo Jesu akĩarĩria kĩrĩndĩ o na arutwo ake,
• 2. akĩmera atĩrĩ, Andĩki-marũa o na Afarisai nĩmaikaragĩra gĩtĩ kĩa Musa:
• 3. nĩ ũndũ ũcio maũndũ marĩa mothe mamwĩraga mwĩke, mekagei na mũmarũmagie: no tigagai gwĩka ta ũrĩa mekaga o ene; nĩ ũndũ o moigaga, na matiĩkaga.
• 4. Na nĩmohaga mĩrigo mĩritũ, ĩrĩa ĩtitikagwo na hinya, makamĩigĩrĩrithia ciande cia andũ; no-o ene-rĩ, o na kĩara matingĩmĩhutia nakĩo.
• 5. Na rĩrĩ, ciĩko ciao ciothe, maciĩkaga nĩguo monagwo nĩ andũ: nĩ ũndũ nĩmaaramagia ithitũ ciao, na nĩmaraihagia ciohe cia ndigi cia nguo ciao,
• 6. na nĩmendaga gũikara handũ harĩa ha gũtĩo maruga-inĩ, na gũikarĩra itĩ cia mbere thunagogi-inĩ,
• 7. na kũgeithio nĩ andũ ing’ang’a-inĩ, o na gwĩtagwo nĩ andũ, Rabii.
• 8. No inyuĩ-rĩ, mũtikanetwo Rabii: nĩ gũkorũo ũmwe nĩwe Mũrutani wanyu, o na inyuĩ inyuothe mũrĩ a Ithe ũmwe.
• 9. Ningĩ mũtikanete mũndũ o na ũmwe ithe wanyu gũkũ thĩ: nĩ gũkorũo ũmwe nĩwe Ithe wanyu, o ũrĩa wĩ Igũrũ.
• 10. Ningĩ mũtikanetwo atongoria: nĩ gũkorũo ũmwe nĩwe Mũtongoria wanyu, nĩwe Kristo.
• 11. No rĩrĩ, harĩ inyuĩ ũrĩa mũnene nĩatuĩke ndungata yanyu.
• 12. Na mũndũ o wothe wĩtũũgagĩria, nĩakanyihio; na mũndũ o wothe wĩnyihagia, ũcio nĩagatũũgĩrio.
• 13. No kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo nĩmũhingagĩra andũ ũthamaki wa Igũrũ: tondũ inyuĩ ene mũtitonyaga, o na kana mũkareka arĩa megũtonya matonye.
• 14. [Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo nĩmũnyamaragia nyũmba cia atumia a ndigwa, o mũkĩhoyaga mahoya maraya nĩguo mũhenanie: tondũ wa ũguo nĩmũgatuĩrũo ituĩro rĩa kũherithio makĩria.]
• 15. Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo mũringaga iria rĩrĩa inene na mũkorũra bũrũri, nĩguo mũgatũme mũndũ ũmwe atuĩke mũrũmĩrĩri wanyu, nake aatuĩka ũguo, mũgatũma acoke gũtuĩka mũrũ wa Jehanumu amũkĩrĩtie inyuĩ ene maita merĩ.
• 16. Kaĩ mũrĩ na haaro-ĩ, inyuĩ atongoria atumumu! O inyuĩ muugaga, Mũndũ o wothe ũkwĩhĩta na hekarũ, ũguo ti ũndũ; no mũndũ o wothe ũkwĩhĩta na thahabu ĩrĩa ya hekarũ, ũcio nĩwe wĩohete.
• 17. Inyuĩ irimũ ici na atumumu! Nĩ ũndũ-rĩ, nĩ kĩrĩkũ kĩnene, nĩ thahabu ĩo, kana nĩ hekarũ ĩrĩa ĩtũmĩte thahabu yamũrũo?
• 18. Na ningĩ muugaga, Mũndũ o wothe ũkwĩhĩta na kĩgongona, ũguo ti ũndũ; no mũndũ o wothe ũkwĩhĩta na kĩndũ kĩrĩa kĩrĩ ho kĩrute, ũcio nĩwe wĩohete.
• 19. Inyuĩ atumumu aya! Nĩ ũndũ-rĩ, nĩ kĩrĩkũ kĩnene, nĩ kĩndũ kĩrĩa kĩrute, kana nĩ kĩgongona kĩrĩa gĩtũmĩte kĩndũ kĩu kĩrute kĩamũrũo?
• 20. Tondũ ũcio-rĩ, ũrĩa ũkwĩhĩta na kĩgongona, nĩehĩtĩte nakĩo kĩene, gwata indo ciothe iria irĩ ho.
• 21. Nake ũrĩa ũkwĩhĩta na hekarũ, nĩehĩtĩte nayo nyene, gwata Ũrĩa ũtũire thĩinĩ wayo.
• 22. Nake ũrĩa ũkwĩhĩta na Igũrũ, nĩehĩtĩte na gĩtĩ-gĩa-ũthamaki kĩa Ngai, gwata Ũrĩa ũgĩikarĩire.
• 23. Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo nĩmũhothaga gĩcunjĩ gĩa ikũmi gĩa terere na bithari, na thuu; no rĩrĩ, maũndũ ma watho marĩa marĩ bata makĩria, nĩmo gũtua ciira na kĩhooto, o na kũiguanĩra tha, o na gwĩtĩkia, macio-rĩ, mũtimekaga: ĩndĩ nĩmo mwaagĩrĩirũo nĩ gwĩkaga, o na mũtikaage gwĩkaga macio mangĩ.
• 24. Inyuĩ atongoria atumumu! O inyuĩ mũkeeraga rũmuru, na mũkameria ngamĩra.
• 25. Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo mũtheragia gĩkombe na thani na igũrũ; no thĩinĩ-rĩ, ciiyũire ũtunyani na ũhahanyi.
• 26. Wee Mũfarisai ũyũ mũtumumu! Amba ũtherie gĩkombe na thani na thĩinĩ, nĩ getha o na igũrũ nakuo gũtuĩke gũtheru.
• 27. Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo mũhaanaine na mbĩrĩra cierũhĩtio na mũũnyũ, iria cionagwo irĩ thaka na igũrũ, no thĩinĩ ciiyũrĩte mahĩndĩ ma andũ akuũ, na gĩko kĩa mĩthemba yothe.
• 28. No taguo o na inyuĩ muonagwo na igũrũ athingu mũrĩ, no thĩinĩ mũiyũrĩtwo nĩ ũhinga na waganu.
• 29. Kaĩ mũrĩ na haaro-ĩ, inyuĩ aandĩki-marũa na Afarisai, hinga ici-ĩ! Nĩ gũkorũo mwakaga mbĩrĩra cia anabii na mahiga, na mũkagemia mahiga ma kĩririkano kĩa andũ arĩa athingu, ningĩ mũkoiga atĩrĩ,
• 30. Tũngĩarĩ muoyo ithuĩ matukũ ma maithe maitũ, tũtingĩagwatanĩire nao magĩitithia thakame ya anabii.
• 31. Ũguo nĩguo mwĩumbũraga atĩ nĩ inyuĩ ariũ a arĩa moragire anabii.
• 32. No kĩiyũrĩrĩriei kĩgeri kĩrĩa kĩa maithe manyu.
• 33. Inyuĩ nyamũ-cia-thĩ! Njiaro cia ndwĩra! Mũkahonoka atĩa mũtigatuĩrũo ituĩro rĩa Jehanumu?
• 34. Nĩ ũndũ ũcio-rĩ, ngũmũrekeria anabii, na andũ ogĩ, na aandĩki-marũa: na amwe ao rĩmũkamoraga, na mũmaambithie mĩtĩ igũrũ; na amwe nĩmũkamahũrithĩria thunagogi-inĩ cianyu na iboko irĩ njaaga, na mũmanyarire kuuma itũũra-inĩ rĩmwe kinya itũũra rĩrĩa rĩngĩ:
• 35. nĩguo atĩ inyuĩ mũcokererũo nĩ thakame ya andũ othe athingu ĩrĩa yanaitwo thĩ, gwata thakame ya Habili ũrĩa mũthingu, nginya thakame ya Zakaria mũrũ wa Barakia, ũrĩa mworagĩire gatagatĩ ka Handũ harĩa Hatheru na kĩgongona.
• 36. Ngũmwĩra atĩrĩ na ma, atĩ maũndũ macio mothe nĩmagakinyĩrĩra rũciaro rũrũ.
• 37. Atĩrĩrĩ, Jerusalemu, Jerusalemu! Wee ũũragaga anabii, na ũkahũra na mahiga arĩa marekagio kũrĩ wee! Nĩ mahinda maigana atĩa ndanenda gũcokanĩrĩria ciana ciaku hamwe, o ta ũrĩa ngũkũ ĩcokanagĩrĩria tũcui twayo nguruĩ ya mathagu mayo, na mwanarega?
• 38. Atĩrĩrĩ, nyũmba yanyu nĩ ndige ĩrĩ thuthĩku.
• 39. Nĩ ũndũ ngũmwĩra atĩrĩ, Kuuma rĩu, mũtigacoka kũnyona, nginya rĩrĩa mũkoiga atĩrĩ, Kũrathimwo-rĩ, nĩ ũrĩa ũgũũka na rĩĩtwa rĩa Mwathani.

Home