Go Back

Mathayo Chapter 17

1. NA matukũ matandatũ maathira-rĩ, Jesu agĩtwara Petero na Jakubu na mũrũ wa nyina Johana, akĩmakinyia kĩrĩma-inĩ kĩraya handũ hataarĩ andũ:
2. na hau mbere yao akĩgarũrũka ũrĩa aahaanaga: na ũthiũ wake ũkĩara ta riũa, nacio nguo ciake ikĩerũha o ta ũtheri.
3. Na atĩrĩrĩ, makiumĩrĩrũo nĩ Musa na Elija, makĩaranĩria nake.
4. Nake Petero agĩcokia ũhoro akĩĩra Jesu, Mwathani, nĩtwagĩrĩirũo nĩ gũikara gũkũ; ũngĩkĩenda-rĩ, nĩngwaka ithũnũ ithatũ gũkũ; kĩmwe gĩaku, na kĩmwe kĩa Musa, na kĩmwe kĩa Elija.
5. O akĩaragia-rĩ, hagĩũka itu rĩkengu, rĩkĩmahumbĩra: na atĩrĩ, mũgambo ũkiuma itu-inĩ, ũkiuga atĩrĩ, Ũyũ nĩwe Mũrũ wakwa ũrĩa nyendete mũno, nĩngenaga mũno nĩwe; mũiguagei.
6. Nao arutwo maaigua ũguo, makĩinamĩrĩra, magĩturumithia mothiũ thĩ, metigĩrĩte mũno.
7. Nake Jesu agĩũka akĩmahutia, akĩmera, Ũkĩrai, na mũtigetigĩre.
8. Nao maatiira maitho, matiigana kuona mũndũ, tiga o Jesu wiki.
9. Na rĩrĩa maaikũrũkaga makiuma kĩrĩma-inĩ, Jesu akĩmaatha akĩmera atĩrĩ, Tigai kwĩra mũndũ o na ũrĩkũ ũndũ ũcio mwona, nginya hĩndĩ ĩrĩa Mũrũ wa Mũndũ akariũka oime kũrĩ arĩa akuũ.
10. Nao arutwo ake makĩmũũria atĩrĩ, Nĩ kĩ gĩtũmaga aandĩki-marũa moige atĩ no mũhaka Elija aambe oke?
11. Nake akĩmacokeria akĩmera, Ti-itherũ Elija nĩ wa kwamba gũũka, na erũhie maũndũ mothe:
12. no ngũmwĩra atĩrĩ, atĩ Elija nĩarĩkĩtie gũũka, na andũ matiamũmenyire, no kũmwĩka maamwĩkire o ũrĩa meendeire. O ũguo noguo nake Mũrũ wa Mũndũ agathĩnio nĩo.
13. Hĩndĩ ĩo arutwo magĩkĩmenya atĩ nĩaamaaragĩria ũhoro wa Johana Mũbatithania.
14. Na maakinya harĩa kĩrĩndĩ kĩarĩ, mũndũ umwe agĩũka kũrĩ we, akĩmũturĩria ndu akĩmwĩra atĩrĩ,
15. Mwathani, iguĩra mũrũ wakwa tha: nĩ ũndũ e na mũrimũ wa kũng’irang’ira na nĩanyagitĩkaga mũno: tondũ kaingĩ nĩagũaga mwaki-inĩ, o na kaingĩ maĩ-inĩ.
16. Na ndĩramũrehire kũrĩ arutwo aku, nao mararemwo nĩ kũmũhonia.
17. Nake Jesu agĩcokia, akiuga atĩrĩ, Rũciaro rũrũ rũtetĩkĩtie na rũtũrĩku, ngũtũũra na inyuĩ nginya hĩndĩ ĩ? O na ngũtũũra ndĩmũkiragĩrĩria nginya hĩndĩ ĩ? Mũrehei haha harĩ niĩ.
18. Nake Jesu agĩkaania ndaimono, nayo ĩkĩmuuma: na kahĩĩ kau gakĩhona gwata o thaa ĩo.
19. Hĩndĩ ĩo arutwo magĩũka kũrĩ Jesu keheri-inĩ, makĩmũũria atĩrĩ, Tũraremirũo nĩ kũmĩingata nĩkĩ?
20. Nake akĩmera, Nĩ ũndũ wĩtĩkio wanyu nĩ mũnyinyi: tondũ ngũmwĩra atĩrĩ na ma, Mũngĩkorũo mũrĩ na wĩtĩkio ũiganaine na kahĩndĩ ga karatarĩ-rĩ, mũngĩkera kĩrĩma gĩkĩ, Ehera haha ũthiĩ harĩa, na no gĩkehera; na gũtirĩ ũndũ ũkamũrema.
21. [No rĩrĩ, mũthemba ũcio nduumaga na njĩra ĩngĩ, tiga o kũhoya Ngai na kwĩhinga kũrĩa irio.]
22. Na rĩrĩa maaikarĩte Galili Jesu akĩmera atĩrĩ, Mũrũ wa Mũndũ nĩakaneanwo moko-inĩ ma andũ:
23. nao nĩmakamũũraga, na mũthenya wa gatatũ nĩakariũkio. Nao makĩigua kĩeha mũno.
24. Na maakinya Kaperinaumu, arĩa metagia nuthu ya cekeri magĩũka kũrĩ Petero, makĩmũũria atĩrĩ, Kaĩ mũrutani wanyu atarutaga nuthu ya cekeri?
25. Akiuga, Ĩĩ-ni, nĩarutaga. Na rĩrĩa aatonyire nyũmba, Jesu akĩmũhĩta na kwaria, akĩmũũria atĩrĩ, Rĩu-rĩ, ũgwĩciria atĩa, Simoni? Nĩ andũ arĩkũ mahothithagio mũhothi, kana magetio igoti nĩ athamaki a gũkũ thĩ, nĩ andũ ao ene, kana arĩa matarĩ ao?
26. Nake oiga atĩ, Nĩ arĩa matarĩ ao, Jesu akĩmwĩra, Tondũ ũcio andũ ao nĩ arekere.
27. No rĩrĩ, nĩ getha tũtikamahĩngithie, thiĩ iria-inĩ, ũgaikie ndwano kuo, na woe kĩũngũyũ kĩrĩa kĩrĩamba kũnyitwo: na rĩrĩ, wagĩtumũra kanua, nĩũkuona cekeri: mĩrute ũmane, ĩtuĩke nĩ ũndũ witũ nawe.

Home