Go Back

Mathayo Chapter 11

1. NA gũgĩkinya atĩrĩ, Jesu aarĩkia gwatha arutwo ake acio ikũmi na erĩ, akiuma hau, agĩthiĩ kũrutana, na kũheana ũhoro, matũũra-inĩ ma kũu.
2. Na rĩrĩa Johana aaiguĩrĩire korokoro-inĩ ũhoro wa maũndũ marĩa Kristo ekaga, akĩmũrekeria arutwo ake,
3. makamũũrie atĩrĩ, Wee nĩwe ũrĩa ũgũũka, kana tweterere ũngĩ?
4. Nake Jesu akĩmacokeria akĩmera atĩrĩ, mwĩthiĩrei, mũkere Johana ũhoro wa maũndũ marĩa mũiguaga, na marĩa muonaga:
5. atĩ atumumu nĩmacokete kuona, na arĩa mathuaga magacoka gwĩtwara wega, na arĩa marĩ na mangũ makahonio magathera, na arĩa mataiguaga magacoka kũigua, na arĩa makuĩte makariũkio, o na arĩa athĩni makahunjagĩrio Ũhoro-ũrĩa-Mwega.
6. Na gũkena-rĩ, nĩ ũrĩa ũtonaga ũndũ wa kũmũhĩngithia nĩ ũndũ wakwa.
7. Nao maathiĩ-rĩ, Jesu agĩitĩka kwaria ũhoro wa Johana, akĩũria kĩrĩndĩ kĩrĩa kĩarĩ ho, Atĩrĩrĩi, mwoimagarire mũgĩthiĩ werũ-inĩ mũkerorere kĩ? Anga nĩ kamũrangi kainainagio nĩ rũhuho?
8. No rĩrĩ, mwoimagarire mũgĩthiĩ kuona kĩ? Hihi nĩ mũndũ wĩhumbĩte nguo horo? Atĩrĩrĩ, arĩa mehumbĩte nguo horo maikaraga nyũmba-inĩ cia athamaki
9. No rĩrĩ, mwoimagarire mũgĩthiĩ nĩ ũndũ kĩ? Nĩ kuona mũnabii? Ĩĩ-ni, na ngũmwĩra atĩrĩ, o na nĩ ũrĩa ũkĩrĩte mũno mũnabii.
10. Ũcio nĩwe ũhoro ũyũ wandĩkĩtwo nĩ ũndũ wake, ũũ: Atĩrĩrĩ, nĩngũtũma mũrekio wakwa athiĩ mbere yaku, Ũrĩa ũgũgũthondekera njĩra mbere yaku.
11. Ngũmwĩra atĩrĩ na ma, atĩ, Kũrĩ arĩa maanaciarũo nĩ andũ-a-nja, gũtirĩ kwagĩa mũnene kũrĩ Johana Mũbatithania: no rĩrĩ, ũrĩa wĩ mũnyinyi ũthamaki-inĩ wa Igũrũ nĩ mũnene kũrĩ we.
12. Na gwata matukũ ma Johana Mũbatithania nginya rĩu, ũthamaki wa Igũrũ nĩũgiginyanagĩrũo, na arĩa agiginyani nĩo mawĩgwatagĩra na hinya.
13. Nĩ ũndũ anabii othe, o na watho-rĩ, o nĩmaatũire marathaga ũhoro nginya hĩndĩ ya Johana.
14. Na mũngĩkĩenda gwĩtĩkĩra, ũcio nĩwe Elija ũrĩa weranĩirũo atĩ nĩagoka.
15. Mũndũ ũrĩa wĩ na matũ ma kũigua nĩakĩigue.
16. No rĩrĩ, rũciaro rũrũ ngũrũgerekania na kĩ? Rũhaana ta twana twĩ kĩng’ang’a-inĩ, tũgaikara tũgĩĩtaga tũrĩa tũngĩ,
17. tũgatwĩra atĩrĩ, Tũmũhuhĩire mũtũrirũ, na mũtinaina rũĩmbo; twamũcakaithia, na mũtinetugutania.
18. Nĩ gũkorũo Johana okire atekũrĩa kana kũnyua, na andũ makoiga, Arĩ na ndaimono.
19. Nake Mũrũ wa Mũndũ okire akĩrĩaga na akĩnyuaga, nao makoiga, Onei mũndũ mũrĩi na mũnyui wa ndibei, na mũrata wa etia mbia cia igoti, na wa ehia! Ĩndĩ ũũgĩ nĩũmenyekaga kĩhooto kĩaguo nĩ ũndũ wa ciĩko ciaguo.
20. Hĩndĩ ĩo agĩitĩka gũtetia matũũra marĩa maaringĩirũo ciama ciake iria nyingĩ, nĩ ũndũ andũ akuo matiigana kũhera. Akiuga atĩrĩ,
21. Wee, Korazini, kaĩ wĩ na haaro-ĩ! O nawe Bethisaida, kaĩ wĩ na haaro-ĩ! Nĩ ũndũ ciama iria ciaringĩirũo kwanyu ingĩaringĩirũo Turo na Sidoni, andũ akuo nĩmangĩaherire tene, mehumbĩte makũnia, na makehurĩria mũhu mĩtwe.
22. No ngũmwĩra atĩrĩ, atĩ Turo na Sidoni nĩgũkagĩa murũ mũthenya ũrĩa wa cira, gũkĩra inyuĩ.
23. Nawe, Kaperinaumu, ũũĩ nĩ gũtũũgĩrio ũgatũũgĩrio ũkinye Igũrũ? He! Nĩ kũharũrũkio ũkaharũrũkio ũkinye kwa-ngoma: nĩ ũndũ ciama iria ciaringĩirũo gwaku ingĩaringĩirũo Sodomu, nĩkũngĩtũire o na ũmũthĩ.
24. No ngũmwĩra atĩrĩ na ma, atĩ bũrũri ũrĩa wa Sodomu nĩũkagĩa murũ, mũthenya ũcio wa cira, gũkĩra wee.
25. Hĩndĩ ĩo Jesu agĩcoka akiuga atĩrĩ, Awa, Mwathani wa Igũrũ o na thĩ, ndakũgatha nĩ ũndũ nĩũhithĩte andũ arĩa ogĩ na imenyi maũndũ macio, ũkamaguũrĩria tũkenge:
26. noguo, Awa, nĩ gũkorũo ũguo nĩguo wonire wagĩrĩire.
27. Nĩ nengeretwo maũndũ mothe nĩ Awa: na gũtirĩ mũndũ ũũĩ Mũriu tiga Ithe witũ: ningĩ gũtirĩ mũndũ ũũĩ Ithe witũ tiga o Mũriũ, o na ũrĩa o wothe Mũriũ endaga kũmũguũrĩria.
28. Ũkai kũrĩ niĩ inyuothe anogu, na inyuĩ mũtitikĩte mĩrigo mĩnene, na nĩngũmũhurũkia.
29. Oyai icoki rĩakwa mwĩĩkĩre, na mwĩrute na niĩ: nĩ ũndũ ndĩ mũhoreri, na mwĩnyihia ngoro-inĩ: nacio ngoro cianyu nĩikũhurũkio.
30. Nĩ gũkorũo icoki rĩakwa nĩ rĩnyoroku, o na mũrigo wakwa nĩ mũhũthũ.

Home