Go Back

Ndari Chapter 7

• 1. Na gũgĩkinya atĩrĩ, atĩ mũthenya ũrĩa Musa aarĩkirie kũhanda gĩikaro kĩu, na gũgĩitĩrĩria maguta, agĩkĩamũra agĩgĩtheria, hamwe na indo ciakĩo ciothe cia gwĩkĩrũo thĩinĩ wakĩo, o na kĩgongona, na indo ciakĩo ciothe, aakĩrĩkia gũitĩrĩria indo icio ciothe maguta agĩciamũra agĩcitheria-rĩ,
• 2. atongoria a Isiraeli, arĩa maarĩ anene a nyũmba cia maithe mao, magĩtwara indo ciao cia kũrutĩrũo Jehova; nao nĩo maarĩ atongoria a mĩhĩrĩga ya Isiraeli, o acio maaroraga arĩa maatarirũo;
• 3. magĩgĩtwara indo ciao cia kũrutwo mbere ya Jehova, nacio ciarĩ ngari ithathatũ ihumbĩtwo na ciandarũa igũrũ, o na ndegwa ikũmi na igĩrĩ; nayo ngari o ĩmwe ĩmwe ĩkĩrutwo nĩ anene erĩ erĩ, nayo ndegwa o ĩmwe ĩmwe ĩkĩrutwo nĩ mũnene ũmwe magĩgĩcitwara magĩciiga hau mbere ya gĩikaro.
• 4. Nake Jehova akĩarĩria Musa, akĩmwĩra atĩrĩ,
• 5. Oya indo icio marutĩte, nĩ getha ituĩke cia kũrutaga wĩra wa hema-ya-gũtũnganwo, ũcoke ũcinengere Alawii, ũmagayanie o ta ũrĩa wĩra wao ũtariĩ.
• 6. Musa agĩkĩoya ngari ĩcio, o na ndegwa, agĩcinengera Alawii.
• 7. Ngari igĩrĩ, o na ng’ombe inya-rĩ, akĩnengera ariũ a Gerishoni, o ta ũrĩa wĩra wao watariĩ,
• 8. nacio ngari inya, o na ndegwa inyanya, akĩnengera ariũ a Merari o ta ũrĩa mawĩra mao maatariĩ marĩa maarutaga makĩroragwo nĩ Ithamaru wa Haruni, mũthĩnjĩri-Ngai.
• 9. No rĩrĩ, ariũ a Kohathu ndaigana kũmahe kĩndũ o na kĩmwe, nĩ ũndũ wĩra wao warĩ wa handũ harĩa haamũre, na indo ciaho ciarĩ o cia gũkuuagwo na ciande ciao.
• 10. Ningĩ atongoria acio makĩruta indo ciao cia kwamũra kĩgongona, gĩtherio nacio, o mũthenya ũcio gĩaitĩrĩirio maguta; anene acio magĩgĩtwara indo ciao magĩciiga o ro hau mbere ya kĩgongona kĩu.
• 11. Jehova agĩkĩĩra Musa atĩrĩ, Indo ciao iria mekũndutĩra-rĩ, nĩmacirute o mũndũ mũthenya wake, ituĩke cia kwamũra kĩgongona gĩtherio.
• 12. Na rĩrĩ, mũndũ ũrĩa wakĩrutire indo ciake mũthenya wa mbere nĩ Nahashoni wa Aminadabu, wa mũhĩrĩga wa Juda;
• 13. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtatũ gĩgĩthimwo, na mbakũri ya betha ya cekeri mĩrongo mũgwanja, o ta ũrĩa cekeri ya handũ harĩa haamũre yaiganaga ĩgĩthimwo; nacio cierĩ ciaiyũrĩte mũtu mũhinyu mũno ũtukanĩtio na maguta, ũtuĩke ihaki rĩa mũtu;
• 14. na gĩciko kĩmwe gĩa thahabu gĩa cekeri ikũmi kĩiyũrĩte ũbumba;
• 15. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 16. na thenge ĩmwe ĩtuĩke igongona rĩa mehia;
• 17. nacio indo cia kũrutwo ikoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Nahishoni wa Aminadabu.
• 18. Naguo mũthenya wa kerĩ Nethaneli wa Zuaru, mũtongoria wa mũhĩrĩga wa Isakaru, akĩruta indo ciake;
• 19. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtatũ gĩgĩthimwo, na mbakũri ya betha ya cekeri mĩrongo mũgwanja o ta ũrĩa cekeri ya handũ harĩa haamũre yaiganaga ĩgĩthimwo; nacio cierĩ ciaiyũrĩte mũtu mũhinyu mũno ũtukanĩtio na maguta, ũtuĩke ihaki rĩa mũtu;
• 20. na gĩcĩko kĩmwe gĩa thahabu gĩa cekeri ikũmi kĩiyũrĩte ũbumba;
• 21. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 22. na thenge ĩmwe ĩtuĩke igongona rĩa mehia;
• 23. nacio indo cia kũrutwo ikoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Nethaneli wa Zuaru.
• 24. Naguo mũthenya wa gatatũ Eliabu wa Heloni, mũtongoria wa ciana cia Zebuluni, akĩruta indo ciake;
• 25. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtatũ gĩgĩthimwo, na mbakũri ya betha ya cekeri mĩrongo mũgwanja, o ta ũrĩa cekeri ya handũ harĩa haamũre yaiganaga ĩgĩthimwo; nacio cierĩ ciaiyũrĩte mũtu mũhinyu mũno ũtukanĩtio na maguta, ũtuĩke ihaki rĩa mũtu;
• 26. na gĩciko kĩmwe gĩa thahabu gĩa cekeri ikũmi kĩiyũrĩte ũbumba;
• 27. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 28. na thenge ĩmwe ĩtuĩke igongona rĩa mehia;
• 29. nacio indo cia kũrutwo ikoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Eliabu wa Heloni.
• 30. Naguo mũthenya wa kana Elizuru wa Shedeuru, mũtongoria wa ciana cia Reubeni, akĩruta indo ciake;
• 31. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtatũ gĩgĩthimwo; na mbakũri ya betha ya cekeri mĩrongo mũgwanja, o ta ũrĩa cekeri ya handũ harĩa haamũre yaiganaga ĩgĩthimwo; nacio cierĩ ciaiyũrĩte mũtu mũhinyu mũno ũtukanĩtio na maguta, ũtuĩke ihaki rĩa mũtu;
• 32. na gĩciko kĩmwe gĩa thahabu gĩa cekeri ĩkũmi kĩiyũrĩte ũbumba;
• 33. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 34. na thenge ĩmwe ĩtuĩke igongona rĩa mehia;
• 35. nacio indo cia kũrutwo ikoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Elizuru wa Shedeuru.
• 36. Naguo mũthenya wa gatano Shelumieli wa Zurishadai, mũtongoria wa ciana cia Simeoni, akĩruta indo ciake;
• 37. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ wa cekeri igana rĩa mĩrongo ĩtatũ gĩgĩthimwo, na mbakũri ya betha ya cekeri mĩrongo mũgwania o ta ũrĩa cekeri ya handũ harĩa haamũre yaiganaga ĩgĩthimwo; nacio cierĩ ciaiyũrĩte mũtu mũhinyu mũno ũtukanĩtio na maguta, ũtuĩke ihaki rĩa mũtu
• 38. na gĩcĩko kĩmwe gĩa thahabu gĩa cekeri ĩkũmi kĩiyũrĩte ũbumba;
• 39. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 40. na thenge ĩmwe ĩtuĩke igongona rĩa mehia;
• 41. nacio indo cia kũrutwo ĩkoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Shelumieli wa Zurishadai.
• 42. Naguo mũthenya wa ĩtandatũ Eliasafu wa Deueli, mũtongoria wa ciana cia Gadi, akĩruta indo ciake;
• 43. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtatũ gĩgĩthimwo; na mbakũri ya betha ya cekeri mĩrongo mũgwanja, o ta ũrĩa cekeri ya handũ harĩa haamũre yaiganaga ĩgĩthimwo; nacio cierĩ ciaiyũrĩte mũtu mũhinyu mũno ũtukanĩtio na maguta, ũtuĩke ihaki rĩa mũtu;
• 44. na gĩcĩko kĩmwe gĩa thahabu gĩa cekeri ikũmi kĩiyũrĩte ũbumba;
• 45. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 46. na thenge ĩmwe ĩtuĩke igongona rĩa mehia;
• 47. nacio indo cia kũrutwo ikoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Eliasafu wa Deueli.
• 48. Naguo mũthenya wa mũgwanja Elishama wa Amihudu, mũtongoria wa ciana cia Efiraimu, akiruta indo ciake;
• 49. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtatũ gĩgĩthamwo, na mbakũri ya betha ya cekeri mĩrongo mũgwanja, o ta ũrĩa cekeri ya handũ harĩa haamũre yaiganaga ĩgĩthimwo; nacio cierĩ ciaiyũrĩte mũtu mũhinyu mũno ũtukanĩtio na maguta ũtuĩke ihaki rĩa mũtu;
• 50. na gĩcĩko kĩmwe gĩa thahabu gĩa cekeri ĩkũmi kĩiyũrĩte ũbumba;
• 51. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 52. na thenge ĩmwe ĩtuĩke igongona rĩa mehia;
• 53. nacio indo cia kũrutwo ĩkoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Elishama wa Amihudu.
• 54. Naguo mũthenya wa ĩnana Gamalieli wa Pedazuru, mũtongoria wa ciana cia Manase, akĩruta indo ciake;
• 55. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtatũ gĩgĩthimwo, na mbakũri ya betha ya cekeri mĩrongo mũgwanja, o ta ũrĩa cekeri ya handũ harĩa haamũre yaiganaga ĩgĩthimwo; nacio cierĩ ciaiyũrĩte mũtu mũhinya mũno ũtukanĩtio na maguta, ũtuĩke ihaki rĩa mũtu;
• 56. na gĩciko kĩmwe gĩa thahabu gĩa cekeri ĩkũmi kĩiyũrĩte ũbumba;
• 57. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 58. na thenge ĩmwe ĩtuĩke igongona rĩa mehia;
• 59. nacio indo cia kũrutwo ĩkoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Gamalieli wa Pedazuru.
• 60. Naguo mũthenya wa kenda Abidani wa Gideoni, mũtongoria wa ciana cia Benjamini, akĩruta indo ciake;
• 61. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtatũ gĩgĩthimwo, na mbakũri ya betha ya cekeri mĩrongo mũgwanja, o ta ũrĩa cekeri ya handũ harĩa haamũre yaiganaga ĩgĩthimwo; nacio cierĩ ciaiyũrĩte mũtu mũhinyu mũno ũtukanĩtio na maguta, ũtuĩke ihaki rĩa mũtu;
• 62. na gĩciko kĩmwe gĩa thahabu gĩa cekeri ikũmi kĩiyũrĩte ũbumba;
• 63. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 64. na thenge ĩmwe ĩtuĩke igongona rĩa mehia;
• 65. nacio indo cia kũrutwo nĩ ũndũ wa magongona ma ũiguano, ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Abidani wa Gideoni.
• 66. Naguo mũthenya wa ĩkũmi Ahiezeri wa Amishadai, mũtongoria wa ciana cia Dani, akĩruta indo ciake;
• 67. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtarũ gĩgĩthimwo, na mbakũri ya betha ya cekeri mĩrongo mũgwanja o ta ũrĩa cekeri ya handũ harĩa haamũre yaiganaga ĩgĩthimwo;
• 68. nacio ciaiyũrĩte mũtu mũhinyu mũno ũtukanĩtio na maguta, ũtuĩke ihaki rĩa mũtu; na gĩcĩko kĩmwe gĩa thahabu gĩa cekeri ikũmi kĩiyũrĩte ũbumba;
• 69. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 70. na thenge ĩmwe ĩtuĩke igongona rĩa mehia;
• 71. nacio indo cia kũrutwo ikoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Ahiezeri wa Amishadai.
• 72. Naguo mũthenya wa ĩkũmi na ũmwe Pagieli wa Okirani, mũtongoria wa ciana cia Asheri, akĩruta indo ciake;
• 73. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtatũ gĩgĩthimwo, na mbakũri ya betha ya cekeri mĩrongo mũgwanja o ta ũrĩa cekeri ya handũ harĩa haamũre yaiganaga ĩgĩthimwo; nacio cierĩ ciaiyũrĩte mũtu mũhinyu mũtu ũtukanĩtio na maguta, ũtuĩke ihaki rĩa mũtu;
• 74. na gĩcĩko kĩmwe gĩa thahabu gĩa cekeri ikũmi kĩiyũrĩte ũbumba;
• 75. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 76. na thenge ĩmwe ĩtuĩke igongona rĩa mehia;
• 77. nacio indo cia kũrutwo ikoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Pagieli wa Okirani.
• 78. Naguo mũthenya wa ikũmi na ĩĩrĩ Ahira wa Enani, mũtongoria wa ciana cia Nafitali, akĩruta indo ciake;
• 79. nacio indo iria aarutire nĩ gĩthani kĩmwe kĩnene kĩa betha, naguo ũritũ wakĩo warĩ cekeri igana rĩa mĩrongo ĩtatũ gĩgĩthimwo, na mbakũri ya betha ya cekeri mĩrongo mũgwanja, o ta ũrĩa cekeri ya handũ harĩa haamũre yaiganaga ĩgĩthimwo, nacio cierĩ ciaiyũrĩte mũtu mũhinyu mũno ũtukanĩtio na maguta, ũtuĩke ihaki rĩa mũtu;
• 80. na gĩciko kĩmwe gĩa thahabu gĩa cekeri ĩkũmi kĩiyũrĩte ũbumba;
• 81. ningĩ akĩruta ndegwa ĩmwe ĩtarĩ ngũrũ, na ndũrũme ĩmwe, o na gatũrũme gatakĩrĩtie mwaka ũmwe, ituĩke ihaki rĩa njino;
• 82. na thenge ĩmwe ĩtuĩke ĩgongona rĩa mehia;
• 83. nacio indo iria cia kũrutwo ikoniĩ magongona ma ũiguano ciarĩ ndegwa igĩrĩ, na ndũrũme ithano, na thenge ithano, na tũtũrũme tũtano tũtakĩrĩtie mwaka ũmwe; icio nĩcio indo iria ciarutirũo nĩ Ahira wa Enani.
• 84. Indo icio nĩcio ciakĩrutirũo nĩ atongoria acio a Isiraeli, ituĩke cia kwamũra kĩgongona gĩtherio nacio, mũthenya o ro ũcio gĩaitĩrĩirio maguta; gwakĩrutirũo thani nene ĩkũmi na igĩrĩ cia betha, na mbakũri ikũmi na igĩrĩ cia betha, na iciko ikũmi na igĩrĩ cia thahabu;
• 85. nacio thani ciothe, o thani, ũritũ wayo warĩ cekeri igana rĩa mĩrongo ĩtatũ ĩgĩthimwo; nacio mbakũri ciothe, o mbakũri, ũritũ wayo warĩ cekeri mĩrongo mũgwanja ĩgĩthimwo; naguo ũritũ wa indo icio ciothe cia betha, warĩ cekeri ngiri igĩrĩ cia magana mana igĩthimwo, o ta ũrĩa cekeri ya handũ harĩa haamũre yaiganaga ĩgĩthimwo;
• 86. na gũkĩrutwo iciko ikũmi na igĩrĩ cia thahabu ciiyũrĩte ũbumba, naguo ũritũ wa gĩcĩko, o gĩcĩko, warĩ cekeri ikũmi, o ta ũrĩa cekeri ya handũ harĩa haamũre yaiganaga ĩgĩthimwo; naguo ũritũ wa iciko icio ciothe cia thahabu warĩ cekeri igana rĩmwe rĩa mĩrongo ĩĩrĩ:
• 87. ningĩ gũkĩrutwo ndegwa icio ciothe cia mahaki ma njino, nacio ciarĩ ikũmi na igĩrĩ; o nacio ndũrũme ciarĩ ikũmi na igĩrĩ, natuo tũtũrũme tũrĩa tũtakĩrĩtie mwaka ũmwe twarĩ ikũmi na twĩrĩ, o na ningĩ gũkĩrutwo mahaki mamo ma mũtu; ningĩ gũkĩrutwo thenge cia igongona rĩa mehia ĩkũmi na igĩrĩ;
• 88. naho ha ũhoro wa magongona ma ũiguano, gũkĩrutwo ndegwa mĩrongo ĩĩrĩ na inya, na ndũrũme mĩrongo ĩtandatũ, na thenge mĩrongo ĩtandatũ, na tũtũrũme tũtakĩrĩtie mwaka ũmwe mĩrongo ĩtandatũ. Indo icio nĩcio ciakĩrutirũo cia kwamũra kĩgongona gĩtherio nacio, thutha wa kĩarĩkia gũitĩrĩrio maguta.
• 89. Na rĩrĩ, rĩrĩa Musa aatonyire hema-inĩ-ya-gũtũnganwo akaarie na Jehova-rĩ, agĩkĩigua Mũgambo ũkĩmwarĩria uumĩte igũrũ rĩa gĩikaro-gĩa-tha, o kĩrĩa kĩarĩ igũrũ rĩa ithandũkũ rĩa ũira, naguo Mũgambo ũcio woimaga gatagatĩ-inĩ ka makerubi macio merĩ maarĩ ho; Jehova agĩkĩaria nake.

Home