Go Back

Ndari Chapter 24

• 1. Na rĩrĩ, hĩndĩ ĩrĩa Balaamu onire atĩ Jehova nĩendete kũrathima Aisiraeli o kũmarathimĩ, ndaigana kuonwo akĩgeria gũtuĩria mohoro na ũndũ wa nyoni iria arĩona, ta ũrĩa ekaga mahinda macio mangĩ, no nĩ kũroria aaroririe ũthiũ wake werũ-inĩ.
• 2. Nake Balaamu akĩinamũra maitho make na igũrũ, akĩona Aisiraeli maikarĩte o ta ũrĩa mĩhĩrĩga yao yatariĩ; nake Roho wa Ngai akĩmũkora, akĩgĩa nake,
• 3. agĩgĩitĩka kwaria na thimo akiuga atĩrĩ, Ciugo ici nĩcio cia Balaamu wa Beoru, O ũcio warĩ mũhingaru maitho,
• 4. Na nĩwe ũikaraga aiguĩte ciugo cia Ngai, Agũĩte thĩ maitho make marĩ o mahingũku, Agaikara ta arĩ kuona onete kĩoneki kĩa Ngai Mwene-Hinya-Wothe; Mũndũ ũcio nĩwe woiga ũũ:
• 5. Kaĩ hema ciaku, wee Jakubu, nĩciagĩrĩire-ĩ! O nacio ciikaro ciaku, wee Isiraeli, kaĩ nĩciagĩrĩire-ĩ!
• 6. Tondũ igucũkĩte o ta cianda, Igaikara ta mĩgũnda ĩrĩ hũgũrũrũ-inĩ cia rũũĩ, Na ikahaana ta thubiri ihandĩtwo nĩ Jehova, O na ta mĩtarakwa ĩrĩ hũgũrũrũ-inĩ cia maĩ.
• 7. Ndoo ciake ĩkaiyũra maĩ o nginya maitĩke, O nayo mbeũ yake ĩtũũre handũ he maĩ maingĩ, Na mũthamaki wake atũũgĩrio, akĩre Agagi, O naguo ũthamaki wake ũnenehio mũno.
• 8. Ngai aramũrehe amũrutĩte Misiri; Hinya ũrĩa arĩ naguo ũtariĩ o ta wa mbogo: Nacio ndũrĩrĩ iria irĩ ũthũ nake nĩ kũrĩa agacirĩa, acinine biũ, Namo mahĩndĩ ma cio, amoinange tũcunjĩ, O na acirathange na mĩguĩ yake.
• 9. Nĩ gwĩthuna ethunire, agĩkoma thĩ o ta mũrũthi wa njamba, O na ta mũrũthi wa mũgoma; nũ ũngĩkĩmwarahũra? Kũrathimwo-rĩ, nĩ ũrĩa wothe ũgakũrathima, O nake ũrĩa wothe ũgakũruma-rĩ, ũcio arogwatwo nĩ kĩrumi!
• 10. Balaki agĩgĩcinwo nĩ marakara mũno nĩ ũndũ wa Balaamu, agĩkĩhũra hĩ, agĩkĩĩra Balaamu atĩrĩ, Ngwĩtire ũũke gũkũ nĩguo ũ’numĩre thũ ciakwa; na rĩrĩ, rĩu ũgũgĩcirathima o gũcirathima biũ mahinda maya matatũ.
• 11. Tondũ ũcio rĩu gĩũkĩre ũũre. Ndĩrecirĩtie atĩ nĩngũgũtũũgĩria ũtĩĩke; no rĩrĩ, Jehova nĩakũgirĩtie ũtĩĩke.
• 12. Nake Balaamu akĩĩra Balaki atĩrĩ, Githĩ o na niĩ ndiaaririe na arekio aku arĩa wandekeirie, ngĩmera atĩrĩ,
• 13. O na Balaki angĩ’he nyũmba yake ĩiyũrĩtio betha na thahabu-rĩ, ndingĩhota kwagarara kiugo kĩa Jehova, atĩ nĩguo njĩke ũndũ mwega kana mũũru na ũhoro wakwa niĩ mwene; ũndũ ũrĩa Jehova akanjĩra, noguo ngaaria?
• 14. Na rĩrĩ, rĩu nĩndethiĩra njoke gwitũ. Ta ũka ngũmenyithie ũrĩa andũ aya mageka andũ aku matukũ marĩa magoka.
• 15. Agĩgĩitĩka kwaria na thimo, akiuga atĩrĩ, Ciugo ici nĩcio cia Balaamu wa Beoru, O ũcio warĩ mũhingaru maitho,
• 16. Na nĩwe ũikaraga aiguĩte ciugo cia Ngai, Agũĩte thĩ, maitho make marĩ o mahingũku, O na agaikara o ta arĩ kĩoneki onete kĩa Ngai ũrĩa Mwene-Hinya-Wothe; Mũndũ ũcio nĩwe woiga ũũ:
• 17. Atĩrĩrĩ! kuona nĩngũmuona, no ti rĩu; Na gũcũthĩrĩria nĩndĩmũcũthĩrĩirie, no ndirĩ hakuhĩ nake: He njata ĩkoima he Jakubu, O naruo rũthanju rũa ũnene ruume Isiraeli, Rũthece mĩthia ya Amoabi, Nacio ciana ciothe iria irehithagie ngũĩ, rũcinine biũ.
• 18. O nakuo Edomu nĩgũkegwatĩrũo gũtuĩke gwake, Nakuo Seiru, kũrĩa kwarĩ gwa thũ ciake kwĩgwatĩrũo gũtuĩke gwake, O nake Isiraeli nĩageka maũndũ ma ũcamba.
• 19. Thĩinĩ wa Jakubu nĩho hakoima mũndũ ũrĩa ũgathamaka, Nake nĩakanina andũ arĩa matigarĩte itũũra-inĩ biũ.
• 20. Ningĩ aarora Amaleki, agĩitĩka kwaria na thimo, akiuga ũũ: Amaleki nĩwe warĩ mũtongoria thĩinĩ wa ndũrĩrĩ: No rĩrĩ, ũhoro wake wa kũrigĩrĩria-rĩ, nĩ kũninwo akaninwo.
• 21. Ningĩ aarora Akeni, agĩitĩka kwaria na thimo, akiuga ũũ: Gĩikaro gĩaku kĩrĩa ũikarĩte nĩ kĩrũmu mũno, Nakĩo kĩmamo gĩaku kĩigĩtwo rũaro-inĩ rũa ihiga.
• 22. No rĩrĩ, Kaini nĩ kũnyaagio akanyaagio O nginya hĩndĩ ĩrĩa Ashuri magakũgwata mĩgwate.
• 23. Ningĩ agĩitĩka kwaria na thimo, akiuga atĩrĩ, Hĩ! Nũ ũkahonoka atũũre, rĩrĩa Ngai ageka maũndũ macio?
• 24. No rĩrĩ, marikabu nĩ gũũka igoka ciumĩte ngiki-inĩ cia Kitimu, Nacio nĩikanyarira Ashuri, o na inyarire Eberi, O nginya o nao maninwo biũ.
• 25. Nake Baalamu agĩũkĩra, agĩĩthiĩra, akĩinũka kwao. O nake Balaki agĩĩthiĩra.

Home