Go Back

Ndari Chapter 22

• 1. Ningĩ ciana cia Isiraeli ikĩgwata rũgendo ikĩamba hema ciacio werũ wa Moabi, mũrĩmo ũrĩa wa Jorodani, o kũu Jeriko.
• 2. Nake Balaki wa Ziporu, akĩona maũndũ mothe marĩa Aisiraeli mekĩte Aamori.
• 3. Nao Amoabi magĩĩtigĩra andũ acio mũno, nĩ gũkorũo maarĩ aingĩ, magĩgĩtangĩka mũno nĩ ũndũ wa ciana cia Isiraeli.
• 4. Amoabi acio magĩkĩĩra athuri a Midiani atĩrĩ, Rĩu kĩrĩndĩ gĩkĩ kĩingĩ ũũ nĩgĩkũng’aria indo ciothe iria irĩ gũkũ gwitũ, gĩcinine biũ o ta ũrĩa ndegwa ĩhukagia nyeki werũ ĩgathira biũ. Nake Balaki ũcio wa Ziporu nĩwe warĩ mũthamaki wa Amoabi matukũ macio.
• 5. Agĩkĩrekereria Balaamu wa Beori andũ makinye Pethori, gũkuhĩ na Rũũĩ rũa Farati, bũrũri wa ciana cia andũ ao, makamwĩte, mamwĩre ũũ: Athĩrĩ, nĩharĩ andũ haha-ĩ, na moimĩte Misiri; na rĩrĩ, maiyũrĩte gũkũ thĩ guothe, nao maikarĩte mang’ethanĩire na niĩ;
• 6. tondũ ũcio ndagũthaitha ũũke ũ’numĩre andũ aya magwatwo nĩ kĩrumi, tondũ me na hinya kũngĩra; na hihi ndirĩ hinya ngĩhootana, nĩ getha tũmahũre, na nĩguo ’hote kũmarutũrũra moime bũrũri ũyũ; nĩ ũndũ nĩnjũĩ atĩ mũndũ ũrĩa wee ũrathimĩte, nĩarathimĩkaga, na ũrĩa ũrumĩte, nĩagwatagwo nĩ kĩrumi.
• 7. Athuri acio a Amoabi, o na athuri a Amidiani, magĩgĩthiĩ makuuĩte indo cia nduhi nĩ ũndũ wa ũgo; magĩgĩkinya kwĩ Balaamu, makĩmũhe ũhoro wa ũrĩa Balaki oigĩte.
• 8. Nake agĩkĩmera atĩrĩ, Raarai gũkũ ũtukũ ũyũ, na nĩngũroka kũmũcokeria ũhoro, o ta ũrĩa Jehova arĩnjĩra; nao anene acio a Amoabi magĩkĩraarania na Balaamu.
• 9. Nake Ngai agĩkora Balaamu, akĩmũũria atĩrĩ, Andũ aya nĩ arĩkũ mwĩ nao?
• 10. Nake Balaamu agĩcokeria Ngai atĩrĩ, Nĩ Balaki wa Ziporu, mũthamaki wa Moabi, ũndekeirie andũ, akoiga ũũ:
• 11. Atĩrĩrĩ, andũ arĩa moimĩte Misiri nĩmaiyũrĩte gũkũ thĩ guothe; na rĩu gĩũke ũ’numĩre andũ acio, na hihi ndirĩ hinya ngĩhũrana nao ndĩmarutũrũre.
• 12. Ngai agĩkĩĩra Balaamu atĩrĩ, Aca, ndũngĩthiĩ nao; ningĩ ndũngĩruma andũ acio, nĩ ũndũ nĩ arathime.
• 13. Nake Balaamu akĩroka gũũkĩra rũcinĩ tene, akĩĩra anene acio a Balaki atĩrĩ, Wĩinũkĩrei mũcoke bũrũri wanyu; nĩ gũkorũo Jehova nĩaregete kũnjĩtĩkĩria tũthiĩ na inyuĩ.
• 14. Nao anene acio a Amoabi magĩgĩũkĩra, magĩkinya kwĩ Balaki, makĩmwĩra atĩrĩ, Balaamu nĩaarega kũrehane na ithuĩ.
• 15. Ningĩ Balaki akĩrekia anene angĩ, aingĩ makĩria, o na marĩ igweta kũrĩ acio a mbere.
• 16. Nao magĩgĩkinya kwĩ Balaamu, makĩmwĩra atĩrĩ, Balaki wa Ziporu oiga ũũ: Ndagũthaitha hatikagĩe ũndũ o na ũrĩkũ wa kũgiria ũũke kũrĩ niĩ;
• 17. nĩ ũndũ nĩngũgũtũũgĩria ũtĩĩke mũno, o naguo ũndũ o wothe ũrĩa ũngĩnjĩra, nĩngũwĩka; tondũ ũcio ndagũthaitha ũũke ũ’numĩre andũ aya.
• 18. Nake Balaamu agĩcokia, akĩĩra ndungata icio cia Balaki atĩrĩ, O na Balaki angĩ’he nyũmba yake ĩiyũrĩte betha na thahabu-rĩ, ndingĩhota kwagarara kiugo kĩa Jehova Ngai wakwa, atĩ njĩke ũndũ o na ũrĩkũ wa gũkĩnyihia, kana wa gũkĩongerera.
• 19. Tondũ ũcio ndamũthaitha mũraare gũkũ ũtukũ ũyũ o na inyuĩ, nĩguo nyambe ’menye ũhoro ũrĩa Jehova ekũnjĩra makĩria.
• 20. Nake Ngai agĩgĩkora Balaamu ũtukũ, akĩmwĩra atĩrĩ, Kũngĩkorũo andũ acio nĩmokĩte gũgwĩta-rĩ, ũkĩra ũthiĩ nao; no rĩrĩ, ũndũ ũrĩa ngakwĩra wĩke, noguo wiki ũgeka.
• 21. Balaamu agĩkĩroka gũũkĩra rũcinĩ, agĩtandĩka ndigiri yake, agĩthiĩ na anene acio a Amoabi.
• 22. Nake Ngai agĩcinwo nĩ marakara mũno nĩ ũndũ wa Balaamu gũthiĩ nao, mũraika wa Jehova agĩkĩrũgama handũ njĩra-inĩ amũgirie ahĩtũke. Na rĩrĩ, nĩ kũhaica aahaicĩte ndigiri ĩo yake, na aarĩ na aanake erĩ, arĩa maarĩ ndungata ciake.
• 23. Nayo ndigiri ĩgĩkĩona mũraika wa Jehova arũgamĩte njĩra-inĩ, anyitĩte rũhiũ rũake rũa njora rũĩ rũcomore; ndigiri ĩo ĩgĩgĩkerũra na mwena ĩgĩthiĩ mũgũnda; nake Balaamu akĩmĩgũtha nĩguo ĩcoke njĩra-inĩ.
• 24. Ningĩ mũraika wa Jehova akĩrũgama handũ mũriko-inĩ gatagatĩ ka mĩgũnda ĩĩrĩ ya mĩthabibu handũ hairige mwena ũyũ o na mwena ũrĩa ũngĩ.
• 25. Nayo ndigiri ĩo ĩkĩona mũraika wa Jehova, ikĩĩhatĩrĩria rũirigo-inĩ ĩkĩhihinyanĩria kũgũrũ kwa Balaamu na rũirigo rũu; nake Balaamu agĩkĩmĩgũtha rĩngĩ.
• 26. Ningĩ mũraika wa Jehova agĩthiathia kabere, akĩrũgama handũ hakunderu, hatangĩgarũrũkĩka na mwena wa ũrĩo, kana wa ũmotho.
• 27. Nayo ndigiri ĩo ĩkĩona mũraika wa Jehova, ĩgĩkoma thĩ, Balaamu arĩ o igũrũ rĩayo; Balaamu agĩgĩcinwo nĩ marakara, akĩmĩgũtha na rũthanju rũake.
• 28. Nake Jehova agĩtumũra ndigiri ĩo kanua, ĩgĩkĩũria Balaamu atĩrĩ, Kaĩ ngwĩkĩte atĩa, atĩ nĩkĩo ũkũngũtha mahinda maya matatũ?
• 29. Nake Balaamu akĩĩra ndigiri ĩo atĩrĩ, Nĩ ũndũ nĩũningĩte itherũ ihunyũku. Na ingiuma na rũhiũ rũa njora guoko-rĩ, nĩingĩkũũragĩte rĩu.
• 30. Ningĩ ndigiri ĩo ĩkĩĩra Balaamu atĩrĩ, Githĩ niĩ ti niĩ ndigiri yaku ĩrĩa ũtũire ũhaicaga matukũ maku mothe, o nginya ũmũthĩ? Ndĩ ndamenyera gũgwĩka ũguo, o na rĩ? Agĩkiuga, Aca.
• 31. Hĩndĩ ĩo Jehova agĩkĩhingũra Balaamu maitho, akĩona mũraika wa Jehova arũgamĩte njĩra-inĩ, anyitĩte rũhiũ rũa njora na guoko rũĩ rũcomore; agĩkĩĩnamia mũtwe, agĩturumithia ũthiũ thĩ.
• 32. Nake mũraika ũcio wa Jehova akĩmũũria atĩrĩ, Wagũtha ndigiri yaku mahinda macio matatũ nĩ ũndũ kĩ? Atĩrĩrĩ, njũkĩte gũkũgiria ũhĩtũke, nĩ gũkorũo nĩnyonete mĩthiĩre yaku ĩrĩ ya ũremi;
• 33. nayo ndigiri ĩno nĩ kuona ĩnyonire, yakerũra yanjeherera mahinda macio matatũ; na tiga ĩkerũrire yanjeherera-rĩ, ti-itherũ rĩu nĩingĩkũũragĩte, noyo ndĩmĩhonokie ndĩmĩtige ĩrĩ muoyo.
• 34. Balaamu agĩkĩĩra mũraika ũcio wa Jehova atĩrĩ, Nĩnjĩhĩtie; nĩ ũndũ ndikũũĩ atĩ nĩũrũgamĩte njĩra-inĩ, nĩguo ũngirie ’thiĩ; na tondũ ũcio, kũngĩkorũo ũguo njĩkĩte nĩũgũgĩkũiguithia ũũru-rĩ, nĩngũhũndũka.
• 35. Mũraika wa Jehova agĩkĩĩra Balaamu atĩrĩ, Thiĩi na andũ acio; no rĩrĩ, ũhoro ũrĩa ngakwĩra warie, noguo wiki ũkaaria. Tondũ ũcio Balaamu agĩgĩthiĩ na anene acio a Balaki.
• 36. Nake Balaki aaigua atĩ Balaamu nĩokĩte, akiumagara akamũthaganie itũũra-inĩ rĩa Moabi rĩrĩa rĩrĩ mũhaka-inĩ o kũu Arinoni, rĩrĩa riarigĩrĩria o mũhaka-inĩ ũcio.
• 37. Nake Balaki agĩkĩũria Balaamu atĩrĩ, Githĩ ndiagĩkũrekeirie andũ na kĩyo mũno nĩguo moke magwĩte? Wakĩregire gũũka nĩ ũndũ kĩ? Githĩ ndũũĩ atĩ ti-itherũ ndahota gũgũtũũgĩria ũtĩĩke?
• 38. Nake Balaamu akĩĩra Balaki atĩrĩ, Rĩu nĩndagĩũka; no rĩrĩ, kaĩ ndĩkĩrĩ na hinya o na ũrĩkũ wa kuuga ũndũ o na ũmwe wakwa niĩ mwene? Ũhoro ũrĩa Ngai akanjĩkĩra kanua-inĩ gakwa-rĩ, noguo wiki ngaaria.
• 39. Nake Balaamu magĩgĩtwarana na Balaki, magĩgĩkinya Kiriathu-huzothu.
• 40. Nake Balaki agĩthĩnjithia ndegwa o na mbũri cia igongona, agĩtwarithĩria Balaamu o na anene arĩa maarĩ hamwe nake nyama ciacio.
• 41. Na gũgĩkinya atĩrĩ, atĩ rũcinĩ rũrũ rũngĩ Balaki akĩroka kuoya Balaamu, akĩmũtwara igũrũ kũndũ gũtũũgĩru matĩri-inĩ ma Baali, nake akĩona andũ acio monganĩte nginya o arĩa maarigĩtie mũthia-inĩ wao.

Home