Go Back

Ndari Chapter 19

• 1. NINGĨ Jehova akĩarĩria Musa na Haruni, akĩmera atĩrĩ,
• 2. Gĩkĩ nĩ kĩrĩra kĩa watho wa kũrũmĩrĩrũo gĩathanĩtwo nĩ Jehova, akoiga atĩrĩ, Aria na ciana cia Isiraeli, ũciĩre ikũrehere mori ngunũ ĩtarĩ ũcuke, na ĩtarĩ na kaũũgũ, na ĩtarĩ yekĩrũo mũtĩ wa ngingo;
• 3. mũmĩnengere Eleazaru, mũthĩnjĩri-Ngai, nake athiĩ nayo, amĩtware na kũu gĩthaka-inĩ mbarĩ ĩrĩa ĩngĩ ya kĩraaro, nayo ĩthĩnjĩrũo nĩ mũndũ o hau mbere yake;
• 4. nake Eleazaru, ũcio mũthĩnjĩri-Ngai, oe thakame yayo na kĩara, aminjaminje thakame ĩo amĩroretie mwena wa na mbere wa hema-ya-gũtũnganwo maita mũgwanja;
• 5. nayo mori ĩo ĩcinwo nĩ mũndũ Eleazaru akĩĩonagĩra, acine rũũa rũayo, na nyama ciayo, na thakame yayo, o na tatha wayo hamwe nacio.
• 6. Nake mũthĩnjĩri-Ngai acoke oe kamũtĩ ka mũtarakwa, o na mũthobi, o na ndigi cia rangi wa gakarakũ, aciikie mwaki-inĩ o hau mori ĩo ĩkũhĩĩra.
• 7. Thutha wa ũguo mũthĩnjĩri-Ngai athambie nguo ciake, na ethambe mwĩrĩ na maĩ, atonye kĩraaro-inĩ; nake mũthĩnjĩri-Ngai ũcio atinde e na thahu nginya o hwaĩ-inĩ.
• 8. O nake mũndũ ũcio ũcinĩte mori ĩo athambie nguo ciake na maĩ, na ethambe mwĩrĩ wake na maĩ, na atinde e na thahu nginya o hwaĩ-inĩ.
• 9. Na mũndũ ũngĩ ũtarĩ na thahu ahakũre mũhu wa mori ĩo, aũige handũ hatheru na kũu gĩthaka-inĩ mbarĩ ĩrĩa ĩngĩ ya kĩraaro, naguo mũhu ũcio ũigwo nĩ ũndũ wa kĩrĩndĩ gĩa ciana cia Isiraeli, ũtuĩke wa gũthondeka maĩ marĩa maamũre ma gũthahũrana; tondũ mũhu ũcio nĩguo wa gũthahũrana.
• 10. Nake mũndũ ũrĩa ũkũhakũra mũhu ũcio wa mori ĩo athambie nguo ciake, na atinde e na thahu nginya o hwaĩ-inĩ: naguo ũhoro ũcio ũtuĩke kĩrĩra kĩa watho wa kũrũmĩrĩrũo tene na tene nĩ ciana cia Isiraeli, o na mũgeni ũrĩa ũtũũranagia nacio.
• 11. Na rĩrĩ, mũndũ ũrĩa ũkahutia kĩimba kĩa mũndũ o na ũrĩkũ, agaikara mĩthenya mũgwanja arĩ na thahu;
• 12. mũndũ ũcio-rĩ, nĩetherie na maĩ macio mũthenya wa ĩtatũ, naguo mũthenya wa mũgwanja agakorũo e mũthahũku; no rĩrĩ, angĩaga gwĩtheria mũthenya wa ĩtatũ, o naguo mũthenya wa mũgwanja ndakonwo e mũthahũku.
• 13. Mũndũ o wothe ũrĩa ũkahutia kĩimba kĩa mũndũ o na ũrĩkũ, na aage gwĩtheria, nĩ gũthahia egũthahia gĩikaro kĩa Jehova; nake mũndũ ũcio nĩakaingatwo athengio kũrĩ andũ Aisiraeli; na aikare o na thahu nĩ ũndũ wa ũrĩa ataminjaminjĩirio maĩ macio maamũre ma gũthahũrana. Thahu wake arĩ o naguo; ndũmũthirĩte.
• 14. Atĩrĩrĩ, ũyũ nĩguo watho wa kũrũmĩrĩrũo mũndũ angĩkorũo akuĩrĩire hema thĩinĩ; mũndũ o wothe ũrĩa ũgatonya hema ĩo thĩinĩ, o na ũrĩa wothe ũgakoragwo kuo thĩinĩ, nĩmakagwatwo nĩ thahu mĩthenya mũgwanja.
• 15. Nakĩo kĩrĩa gĩothe gĩgakoragwo gĩkunũrĩtwo, gĩkaaga gũkunĩkwo biũ, kĩĩ na thahu.
• 16. Ningĩ mũndũ o wothe ũrĩa ũkahutia kĩimba kĩa mũndũ ũũragĩirũo na rũhiũ rũa njora na kũu gĩthaka-inĩ, kana ahutie kĩimba o na kĩrĩkũ kĩa mũndũ, kana ihĩndĩ rĩa mũndũ, o na kana mbĩrĩra-rĩ, agaikara e na thahu matukũ mũgwanja.
• 17. Naho ha ũhoro wa mũndũ ũcio ũgwatĩtwo nĩ thahu, andũ makoya mũhu wa harĩa mori ĩo ya igongona rĩa gũthahũrana ĩcinĩirũo, namo maĩ ma mũtahano matahĩtwo handũ megũtherera maitĩrĩrũo mũhu-inĩ ũcio wĩ kiuga;
• 18. na mũndũ ũmwe ũtarĩ na thahu oe mũthobi, aũtobokie maĩ-inĩ macio, aminjaminjĩrie hema, na indo ciayo ciothe, o na andũ arĩa marĩ ho, o na aminjaminjĩrie mũndũ ũrĩa wahutirie ihĩndĩ rĩu, kana kĩimba kĩa mũndũ mũũrage, kana kĩa ũrĩa ũkuĩte o ro ũguo, o na kana mbĩrĩra;
• 19. na rĩrĩ, mũthenya wa ĩtatũ, o na wa mũgwanja, nĩguo mũndũ ũcio ũtarĩ na thahu akaminjaminjĩria ũrĩa wĩ na thahu maĩ; naguo mũthenya ũcio wa mũgwanja nĩguo akamũthahũra biũ; nake ũcio ũthahũrĩtwo athambie nguo ciake, na ethambe na maĩ, naguo hwaĩ-inĩ wa mũthenya ũcio atuwo atĩ nĩaathahũka biũ.
• 20. No rĩrĩ, mũndũ ũrĩa ũkagwatwo nĩ thahu, na aage gwĩtheria-rĩ, nĩakaingatwo athengio harĩ kĩrĩndĩ-inĩ kĩa Aisiraeli, nĩ ũndũ nĩathahĩtie handũ harĩa haamũre ha Jehova; mũndũ ũcio ndaminjaminjĩirio maĩ macio maamũre ma gũthahũrana; akĩrĩ o na thahu.
• 21. Naguo ũndũ ũyũ ũtuĩke kĩrĩra kĩa watho wa gũtũũra ũrũmagĩrĩrũo nĩo, atĩ mũndũ ũrĩa ũkũminjaminjanĩria maĩ macio maamũre ma gũthahũrana athambie nguo ciake, nake mũndũ ũrĩa ũkũhutia maĩ macio maamũre no agwatwo nĩ thahu nginya o hwaĩ-inĩ wa mũthenya ũcio.
• 22. Ningĩ kĩrĩa gĩothe gĩkahutio nĩ mũndũ ũcio wĩ na thahu nĩgĩkagwatwo nĩ thahu; o nake mũndũ ũrĩa ũkahutia kĩndũ kĩu nĩakagwatwo nĩ thahu ũcio, nginya o hwaĩ-inĩ wa mũthenya ũcio.

Home