Go Back

Ndari Chapter 15

• 1. NINGI Jehova akĩarĩria Musa, akĩmwĩra atĩrĩ,
• 2. Aria na ciana cia Isiraeli ũciĩre ũũ: Mwakinya bũrũri ũrĩa mũgatũũra, o ũcio ngũmũhe,
• 3. na mũkorũo nĩmũkwenda kũrutĩra Jehova ihaki rĩa gũcinwo na mwaki, kũngĩkorũo nĩ ihaki rĩa njino, kana igongona rĩa kũhingia mwĩhĩtwa, kana hihi gũkorũo nĩ igongona rĩa indo iria mũrutaga na kwĩedera, kana hĩndĩ ĩrĩa mũigĩte ciathĩ cianyu, atĩ nĩguo ituĩke mũtararĩko ũrĩa ũnungaga wega wa kũiguwo nĩwe, wa ũhiũ wa ng’ombe, kana wa mbũri-rĩ,
• 4. mũndũ ũcio ũkũruta kĩndũ gĩake gĩa kũrutĩrũo Jehova nĩakirutanagĩrie na ihaki rĩa mũtu, naguo ũtuĩke gacunjĩ ga ĩkũmi ka eba ng’ima ya mũtu ũrĩa mũhinyu mũno ũtukanĩtio na hini ĩmwe ya maguta;
• 5. ningĩ ũthondekage ndibei ĩtuĩke kĩndũ kĩrĩa kĩrutagwo gĩa kũnyuwo nĩ ũndũ wa gatũrũme o gatũrũme, nayo ĩtuĩke gacunjĩ ka inya ka hini ĩmwe, na ĩrutanĩrio na ihaki rĩu rĩa njino, kana igongona rĩu.
• 6. Kana hihi kũngĩkorũo nĩ ndũrũme ĩkũrutwo-rĩ, ũmĩrutanagĩrie na ihaki rĩa mũtu, naguo ũtuĩke icunjĩ igĩrĩ cia ikũmi cia eba ng’ima ya mũtu ũrĩa mũhinyu mũno, ũtukanĩtio na gacunjĩ ga gatatũ ka hini ĩmwe ya maguta;
• 7. ningĩ kĩrĩa ũkaruta nĩ ũndũ wa igongona rĩa indo cia kũnyuwo, nĩ gĩcunjĩ gĩa gatatũ kĩa hini ya ndibei, ĩtuĩke mũtararĩko ũrĩa ũnungaga wega wa kũiguwo nĩ Jehova.
• 8. Ningĩ ũkĩruta ndegwa ĩtuĩke ya ihaki rĩa njino, kana igongona rĩa kũhingia mwĩhĩtwa, kana ĩkorũo nĩ ya kũrutĩrũo Jehova magongona ma ũiguano-rĩ,
• 9. mũndũ ũrĩa ũkũruta magongona macio nĩarutanagĩrie na ndegwa ĩo icunjĩ ithatũ cia ikũmi cia eba ng’ima ya mũtu ũrĩa mũhinyu mũno, ũtukanĩtio na nuthu ya hini ĩmwe ya maguta.
• 10. Ningĩ kĩrĩa ũkũruta kĩa igongona rĩa indo cia kũnyuwo-rĩ, nĩ nuthu ya hini ĩmwe ya ndibei, ĩtuĩke ihaki rĩa gũcinwo na mwaki rĩa gũtũma mũtararĩko ũrĩa ũnungaga wega ũiguwo nĩ Jehova.
• 11. Ũguo nĩguo gũgekwo nĩ ũndũ wa ndegwa o ndegwa, kana ndũrũme o ndũrũme, kana gatũrũme o gatũrũme, o na kana kori o kori, hĩndĩ ĩrĩa ikũrutwo.
• 12. O ta ũguo nyamũ iria mũkũruta ciigana-rĩ, ũguo noguo mũrĩciĩkaga o ĩmwe ĩmwe, o ta ũrĩa ciigana.
• 13. Nao andũ othe arĩa maaciarĩirũo kwanyu nĩmekage maũndũ macio, o ta ũguo matariĩ, makĩruta ihaki rĩa gũcinwo na mwaki rĩa gũtũma mũtararĩko ũrĩa ũnungaga wega ũiguwo nĩ Jehova.
• 14. Ningĩ kũngĩkorũo kwĩ mũgeni ũtũũranĩtie na inyuĩ, kana mũndũ o wothe ũrĩa ũgakorũo okĩte gũtũũrania na inyuĩ njiaro-inĩ cianyu ciothe, nake hihi akorũo nĩekwenda kũruta ihaki rĩa gũcinwo na mwaki rĩa gũtũma mũtararĩko ũrĩa ũnungaga wega ũiguwo nĩ Jehova-rĩ, o ta ũguo inyuĩ mwĩkaga, ũguo noguo nake arĩĩkaga.
• 15. Kĩrĩra kĩa watho wa kũrũmĩrĩrũo kĩrĩtuĩkaga o ro kĩmwe gĩkoniĩ ũũngano wanyu wothe, o na mũgeni ũrĩa ũrĩtũũraga thĩinĩ wanyu; nakĩo kĩrĩra kĩu kĩa watho ũcio gĩtũũre kĩrũmagĩrĩrũo njiaro-inĩ cianyu tene na tene; o ta ũrĩa muonagwo mũtariĩ nĩ Jehova-rĩ, o ũguo noguo mũgeni wanyu arĩonagwo atariĩ nĩwe.
• 16. Watho ũrĩtuĩkaga o ro ũmwe, o naguo mũtugo ũrĩa ũruĩtwo ũrũmagĩrĩrũo ũtuĩkage o ro ũmwe, nĩ ũndũ wanyu, o na ũndũ wa mũgeni ũrĩa ũtũũrĩte thĩinĩ wanyu.
• 17. Nake Jehova akĩarĩria Musa, akĩmwĩra atĩrĩ,
• 18. Aria na ciana cia Isiraeli, ũciĩre ũũ: Hĩndĩ ĩrĩa mũgakinya bũrũri ũrĩa ngũmũtwara-rĩ,
• 19. nĩgũgatuĩka atĩrĩ, atĩ hĩndĩ ĩrĩa mũkũrĩa mũgate mwĩ bũrũri ũcio, nĩmũkarutĩra Jehova igongona rĩa kũiyũkio na igũrũ.
• 20. Thĩinĩ wa kĩmere kĩanyu kĩa mbere-rĩ, nĩmũkaruta mũgate ũtuĩke kĩndũ gĩa kũiyũkio na igũrũ o ta ũrĩa mwĩkaga mũkĩrutĩra igongona rĩa kũiyũkio na igũrũ kĩhuhĩro-inĩ kĩa irio-rĩ, ũguo noguo mũgakĩiyũkia na igũrũ.
• 21. Kĩmere kĩanyu kĩa mbere mũgakĩheaga Jehova, gĩtuĩke kĩndũ kĩa igongona rĩa kũiyũkio na igũrũ njiaro-inĩ cianyu ciothe.
• 22. Na rĩrĩ, hĩndĩ ĩrĩa mũngĩhĩtanĩrũo mwage kũrũmĩrĩra mawatho macio mothe Jehova aaririe na Musa ũhoro wamo,
• 23. namo nĩ maũndũ mothe marĩa Jehova aamwathire akĩĩra Musa mũmekage, o gwata mũthenya ũrĩa Jehova aathanire maũndũ macio, o na thutha ũcio njiaro-inĩ cianyu ciothe-rĩ,
• 24. nĩgũgakinya atĩrĩ, atĩ ũndũ ũcio ũngĩĩkwo gũtekũmenyũo atĩ nĩ ũũru, nakĩo kĩrĩndĩ kĩu gĩothe gĩkorũo gĩtimenyete ũhoro ũcio, hĩndĩ ĩo kĩrĩndĩ kĩu gĩothe gĩkaruta gategwa ka ihaki rĩa njino rĩa gũtũma mũtararĩko ũrĩa ũnungaga wega ũiguwo nĩ Jehova, nako karutanĩrio na ihaki rĩako rĩa mũtu, o na igongona rĩako rĩa kĩndũ kĩrĩa kĩrutagwo gĩa kũnyuwo, o ta ũrĩa mũtugo wa kũrũmĩrĩrũo ũtuĩtwo, hamwe na thenge ĩmwe ya igongona rĩa mehia.
• 25. Nake mũthĩnjĩri-Ngai ahoroherie kĩrĩndĩ kĩu gĩothe gĩa ciana cia Isiraeli, nakĩo nĩgĩkoherũo ũndũ ũcio nĩ gũkorũo ũndũ ũcio wekĩtwo gũtekũmenyũo atĩ nĩ ũũru, nakĩo gĩgĩtwara indo ciakĩo cia kũrutĩrũo Jehova, nacio nĩcio ihaki rĩa gũcinwo na mwaki, na igongona rĩakĩo rĩa mehia;
• 26. nakĩo kĩrĩndĩ gĩothe gĩa ciana cia Isiraeli nĩgĩkoherũo, o na mũgeni ũrĩa ũtũũrĩte thĩinĩ wakĩo, nĩ gũkorũo ha ũhoro wa andũ acio othe, ũndũ ũcio wekirũo ũtekũmenyũo atĩ nĩ mũũru.
• 27. Na rĩrĩ, kũngĩtuĩka nĩ mũndũ wĩhĩtie atekũmenya atĩ nĩ ũũru egwĩka-rĩ, mũndũ ũcio akaruta kaharika ka mwaka ũmwe gatuĩke igongona.
• 28. Nake mũthĩnjĩri-Ngai akĩhoroherie mũndũ ũcio ũhĩtĩtie mbere ya Jehova angĩkorũo ehirie atekũmenya nĩ ũũru; akĩmũhoroherie, na nĩakoherũo.
• 29. Mũrĩgĩaga na watho o ro ũmwe ũkoniĩ mũndũ ũrĩa ũngĩhĩtia atekũmenya atĩ ũrĩa egwĩka nĩ ũũru, o na angĩkorũo aaciarĩirũo kwanyu thĩinĩ wa ciana cia Isiraeli, kana akorũo nĩ mũgeni ũtũũranĩtie na inyuĩ.
• 30. No rĩrĩ, mũndũ ũrĩa ũgeka ũndũ na rũtũrĩko, o na angĩkorũo aaciarĩirũo kwanyu, kana akorũo nĩ mũgeni-rĩ, mũndũ ũcio nĩ kũruma arumĩte Jehova, na nĩ kũingatwo akaingatwo athengio kũrĩ andũ ao.
• 31. Tondũ nĩamenete uuge wa Jehova, na akehia rĩathani rĩake, mũndũ ũcio nĩ kũingatwo akaingatwo biũ athengio kũrĩ andũ ao, na nĩagacokererũo nĩ ũũru wake.
• 32. Na rĩrĩ, hĩndĩ ĩo ciana cia Isiraeli ciakĩrĩ o kũu werũ-inĩ nĩciakorire mũndũ akĩũngania tũkũ mũthenya wa thabatũ.
• 33. Nao acio maamũkorire akĩũngania tũkũ, makĩmũtwara kwĩ Musa na Haruni, o na kũrĩ kĩrĩndĩ gĩothe.
• 34. Nao makĩmũrangithĩria, nĩ ũndũ ũhoro ndwatuĩtwo ũrĩa egwĩkwo.
• 35. Jehova agĩkĩĩra Musa atĩrĩ, Mũndũ ũcio tiitherũ ndarĩ hingo atekũũragwo kĩrĩndĩ gĩothe nĩkĩmũhũrĩre na mahiga nyuguto na kũu gĩthaka-inĩ mbarĩ ĩrĩa ĩngĩ ya kĩraaro.
• 36. Nakĩo kĩrĩndĩ kĩu gĩothe gĩkĩmũtwara na kũu gĩthaka-inĩ mbarĩ ĩrĩa ĩngĩ ya kĩraaro gĩkĩmũhũra na mahiga nyuguto, nake agĩkua, o ta ũrĩa Jehova aathĩte Musa gwĩkwo.
• 37. Ningĩ Jehova akĩarĩria Musa, akĩmwĩra atĩrĩ,
• 38. Aria na ciana cia Isiraeli ũciĩre itũũre ciĩkagĩra ciohe cia ndigi mĩthia-inĩ ya nguo ciacio njiaro-inĩ ciacio ciothe, na itumagĩrĩre igũrũ rĩacio karũkwa ka rangi wa bururu.
• 39. Naho ha ũhoro wa ndigi icio-rĩ, ituĩke ũndũ wa kũmũririkanagia maathani mothe ma Jehova mwaciona, nĩguo mũmekage, nĩ getha mũtĩkeriragĩrie maũndũ ma ngoro cianyu inyuene, na marĩa monagwo na maitho manyu inyuene, o ta ũrĩa mwatũire mwĩriragĩria tene;
• 40. nĩ getha mũririkanage, o na mũrũmagĩrĩre maathani makwa mothe, na mũtuĩke andũ aamũre, maamũrĩirũo Ngai wanyu.
• 41. Niĩ nĩ niĩ Jehova Ngai wanyu, ũrĩa wamũrutire bũrũri wa Misiri, nĩguo nduĩke Ngai wanyu niĩ nĩ niĩ Jehova Ngai wanyu.

Home