Go Back

Ndari Chapter 10

• 1. Nake Jehova akĩarĩria Musa, akĩmwĩra atĩrĩ,
• 2. Wĩthondekere tũrumbeta twĩrĩ twa betha; ũtũthondeke twĩ twa gũturũo, ũtũtue twa gwĩtaga kĩrĩndĩ gĩa ciana cia Isiraeli kĩũngane, o na twa gwĩtaga andũ me hema-inĩ ciao rĩrĩa mekũgwata rũgendo.
• 3. Na rĩrĩ, tũrumbeta tũu twerĩ twahuhwo, kĩrĩndĩ kĩu gĩothe gĩgecokanĩrĩria harĩ wee hau mũromo-inĩ wa hema-ya-gũtũnganwo.
• 4. No rĩrĩ, kaahuhwo o kamwe, hĩndĩ ĩo atongoria na anene a mĩhĩrĩga ya Isiraeli, magecokanĩrĩria harĩ wee.
• 5. Ningĩ mwahuha na mũgambo mũnene mũno, andũ a iraaro cia mwena wa irathĩro magwate rũgendo rũao.
• 6. Ningĩ mwahuha na mũgambo ũcio mũnene mũno hĩndĩ ya kerĩ, andũ a iraaro cia mwena wa gũthini magwate rũgendo rũao. Tũrumbeta nĩ kũhuhwo tũrĩhuhagwo na mũgambo ũcio mũnene mũno rĩrĩa mekũgwata ng’endo ciao.
• 7. No rĩrĩ, hĩndĩ ĩrĩa kĩrĩndĩ gĩa ciana cia Isiraeli gĩgũcokanĩrĩrio hamwe-rĩ, nĩmũkahuhaga tũrumbeta, no mũtigatũhuhage na mũgambo mũnene mũno.
• 8. Nao ariũ a Haruni acio athĩnjĩri-Ngai nĩo makahuhaga tũrumbeta tũu; naguo ũndũ ũcio ũtuĩke kĩrĩra kĩa watho wa kũrũmĩrĩrũo nĩ inyuĩ njiaro-inĩ cianyu ciothe tene na tene.
• 9. Na rĩrĩ, hĩndĩ ĩrĩa mũgũthiĩ ita mũkarũe na thũ cianyu iria imũhinyagĩrĩria o kũu bũrũri wanyu-rĩ, mũkahuhaga tũrumbeta na mũgambo mũnene mũno; na hĩndĩ ĩo nĩmũkaririkanwo nĩ Jehova Ngai wanyu, mũhonokio harĩ thũ cianyu.
• 10. Ningĩ mĩthenya yanyu ya gĩkeno, o na ya ciathĩ cianyu iria ciathanĩtwo, o na tũrũgamo-inĩ twa mĩeri yanyu, nĩmũkahuhaga tũrumbeta tũu mahaki-inĩ manyu ma njino, o na magongona-inĩ manyu ma ũiguano; natuo nĩtũgatũma mũririkanwo nĩ Ngai wanyu. Niĩ nĩ niĩ Jehova Ngai wanyu.
• 11. Na gũgĩkinya atĩrĩ, atĩ mwaka wa ĩĩrĩ, o mweri wa kerĩ, mũthenya wa mĩrongo ĩĩrĩ wa mweri ũcio, itu rĩu rĩkĩĩyoya na igũrũ, rĩkĩehera gĩikaro-inĩ kĩu kĩa ũira.
• 12. Nacio ciana cia Isiraeli ikĩgwata rũgendo rũacio, o ta ũrĩa matĩĩna ma ng’endo ciacio maatariĩ, nacio ikiuma werũ-inĩ wa Sinai, o nginya itu rĩu rĩkĩrũgama werũ-inĩ wa Parani.
• 13. Nacio igĩkĩambĩrĩria kũgwata rũgendo o ta ũrĩa watho wa Jehova ũrĩa Musa aaciathĩte watariĩ.
• 14. Ciakĩgwata rũgendo-rĩ, andũ a kĩraaro gĩa kĩbebero gĩa ciana cia Juda magĩtongoria, o ta ũrĩa mbũtũ ciao ciarũmanĩrĩire; nake Nahashoni wa Aminadabu nĩwe warĩ mũtongoria wa mbũtũ ĩo.
• 15. Nake Nethaneli wa Zuaru nĩwe warĩ mũtongoria wa mbũtũ ya mũhĩrĩga wa ciana cia Isakaru.
• 16. Nake Eliabu wa Heloni nĩwe warĩ mũtongoria wa mbũtũ ya mũhĩrĩga wa ciana cia Zebuluni.
• 17. Nakĩo gĩikaro kĩa Jehova gĩgĩakũrũo; nao ariũ a Gerishoni, o na a Merari, arĩa maagĩkuuaga, makĩgwata njĩra.
• 18. Nao andũ a kĩbebero gĩa kĩraaro kĩa andũ a Reubeni magĩkũũra o ta ũrĩa mbũtũ ciao ciarũmanĩrĩire; nake Elizuru wa Shedeuru nĩwe warĩ mũtongoria wa mbũtũ ĩo.
• 19. Nake Shelumieli wa Zuriahadai nĩwe warĩ mũtongoria wa mbũtũ ya mũhĩrĩga wa ciana cia Simeoni.
• 20. Nake Eliasafu wa Deueli nĩwe warĩ mũtongoria wa mbũtũ ya mũhĩrĩga wa ciana cia Gadi.
• 21. Nao Akohathu magĩkũũra makuuĩte indo cia handũ harĩa haamũre; nao acio angĩ nĩo maahandaga gĩikaro kĩu Akohathu magĩgakinya.
• 22. Nao andũ a kĩbebero gĩa kĩraaro gĩa ciana cia Efiraimu magĩkũũra o ta ũrĩa mbũtũ ciao ciarũmanĩrĩire; nake Elishama wa Amihudu nĩwe warĩ mũtongoria wa mbũtũ ĩo.
• 23. Nake Gamalieli wa Pedazuru nĩwe warĩ mũtongoria wa mbũtũ ya mũhĩrĩga wa ciana cia Manase.
• 24. Nake Abidani wa Gideoni nĩwe warĩ mũtongoria wa mbũtũ ya mũhĩrĩga wa ciana cia Benjamini.
• 25. Nao andũ a kĩbebero gĩa kĩraaro gĩa ciana cia Dani, arĩa maarigagia o thutha wa andũ a iraaro ciothe, magĩkũũra, o ta ũrĩa mbũtũ ciao ciarũmanĩrĩire; nake Ahiezeri wa Amishadai nĩwe warĩ mũtongoria wa mbũtũ ĩo.
• 26. Nake Pagieli mũrũ wa Okirani nĩwe warĩ mũtongoria wa mbũtũ ya mũhĩrĩga wa ciana cia Asheri.
• 27. Nake Ahira wa Enani nĩwe warĩ mũtongoria wa mbũtũ ya mũhĩrĩga wa ciana cia Nafitali.
• 28. Ũguo nĩguo ciana cia Isiraeli ciaaranagio ng’endo-inĩ ciacio.
• 29. Nake Musa akĩĩra Hobabu, mũrũ wa Reueli, Mũmidiani ũcio warĩ mũthoniwe, atĩrĩ, Tũgwete rũgendo tũthiĩ tũkinye kũndũ kũrĩa Jehova aatwĩrire ũhoro wakuo, ũũ: Nĩngamũhe kũndũ kũu. Rĩu-rĩ, gĩũke tũthiĩ nawe, na nĩtũgũkũguna; nĩ gũkorũo Jehova nĩeranĩire atĩ nĩageka Isiraeli maũndũ mega.
• 30. Agĩkĩmũcokeria atĩrĩ, Aca, ndingĩthiĩ; no nĩngũcoka nyinũke bũrũri witũ, o na kũrĩ andũ a nyũmba iitũ.
• 31. Nake Musa akĩmwĩra atĩrĩ, Ndagũthaitha menya ũtũtige, nĩ gũkorũo wee nĩwe ũngĩmenya kũndũ kũrĩa tũngĩamba hema ciitũ gũkũ werũ-inĩ, ningĩ nĩwe ũgũtuĩka ta arĩ wee maitho maitũ.
• 32. Na nĩgũgakinya atĩrĩ, atĩ watwarana na ithuĩ-rĩ, maũndũ marĩa mothe mega Jehova agatwĩka, nomo na ithuĩ tũgagwĩka.
• 33. Nao magĩgĩtheca njĩra, moimĩte hau kĩrĩma-inĩ kĩu kĩa Jehova, magĩthiĩ rũgendo rũa mĩthenya ĩtatũ; narĩo ithandũkũ rĩa kĩrĩkanĩro kĩa Jehova rĩgĩthiĩ rĩmatongoretie rũgendo-inĩ rũu rũa mĩthenya ĩtatũ, nĩguo rĩkamacaragĩrie handũ ha kũhurũka.
• 34. Narĩo itu rĩa Jehova rĩaikaraga igũrũ rĩao mũthenya, o hĩndĩ ĩrĩa maatheca njĩra moimĩte kĩraaro-inĩ.
• 35. Na gũgĩkinya atĩrĩ, atĩ o hĩndĩ ĩrĩa ithandũkũ rĩu rĩaitĩka kuoyũo rĩmatongorie, Musa akoiga atĩrĩ, Jehova, arahũka, nacio thũ ciaku ironyaagio, nao arĩa magũthũũrĩte marokũũrĩra.
• 36. Na hĩndĩ ĩrĩa rĩkũigwo thĩ akoiga atĩrĩ, Jehova, cokerera ciana ici cia Isiraeli ngiri maita ngiri ĩkũmi.

Home