Go Back

Malaki Chapter 1

• 1. ŨYŨ NĨGUO ũhoro ũrĩa mũritũ ũrĩa Jehova aaheire Aisiraeli na kanua ka Malaki.
• 2. Jehova ekuuga atĩrĩ, Inyuĩ nĩndĩmwendete. No inyuĩ mũũragia atĩrĩ, Ũtwendete atĩa? Nake Jehova agacoka akamũũria atĩrĩ, Githĩ Esau ndaarĩ mũrũ wa nyina na Jakubu? No nĩ Jakubu ndendete,
• 3. na Esau ngamũthũũra, ngagĩtũma ng’ongo ciake ikire ihooru, narĩo igai rĩake ngarĩhe mbwe cia werũ-inĩ.
• 4. Na rĩrĩ, o na Aedomu mangiuga atĩrĩ, Ti-itherũ tũrĩ aite mũito, no tũtirĩ hingo tũtagacoka gwaka kũndũ kũrĩa kwanangĩkĩte-rĩ, Jehova Mũnene wa Ita ekuuga ũũ: Gwaka nĩmagaaka, no niĩ nĩ gwakũra ngaakũra; nao metwo Bũrũri wa waganu, ningĩ metwo Andũ athũgũtĩre nĩ Jehova tene na tene.
• 5. Na inyuĩ nĩmũkeyonera ũhoro ũcio, na muuge atĩrĩ, Jehova arotũũra atũũgĩrĩtio na kũu mbere ya mĩhaka ya Isiraeli.
• 6. Ningĩ Jehova Mũnene wa Ita ekũmwĩra ũũ, inyuĩ athĩnjĩri-Ngai mũmenagĩrĩria rĩĩtwa rĩakwa: Atĩrĩrĩ, githĩ mwanake ti gũtĩa atĩaga ithe, o nayo ndungata ĩgatĩa mũmĩathi? No rĩrĩ, o na ndakorũo ndĩ mũciari-rĩ, gĩtĩo gĩakwa gĩkĩrĩ ha? Ningĩ ndagĩkorũo ndĩ mwathani-rĩ, gwĩtigĩrũo gwakwa gũkĩrĩ kũrĩkũ? No inyuĩ mũũragia atĩrĩ, Tũmenereirie rĩĩtwa rĩaku atĩa?
• 7. Githĩ mũtindutagĩra irio irĩ thahu kĩgongona-inĩ gĩakwa? Na mũgacoka kũnjũria atĩrĩ, Tũkũgwatĩtie thahu na kĩ? Githĩ ti gũtua mũtuĩte atĩ metha ya Jehova nĩ nyararĩku?
• 8. Tondũ rĩrĩa mũndutagĩra nyamũ ndumumu ituĩke cia ihaki, muugaga Hatirĩ ũũru! o na rĩrĩa mũkũndutĩra nyamũ iria ithua, o na iria ndũaru, muugaga Hatirĩ ũũru! Mũngĩrutĩra barũthi wanyu mahaki ta macio-rĩ, aamũkenera hihi? Kana hihi aamwamũkĩra? Ũguo nĩguo Jehova Mũnene wa Ita ekũmũũria.
• 9. Na rĩu ndakĩmũthaitha mũthathaiye Ngai, nĩguo atũtugage. Aakĩhota atĩa kũmwĩtĩkĩra mũmũrutĩire indo ta icio? Ũguo nĩguo Jehova Mũnene wa Ita ekũũria.
• 10. Na arĩ korũo he mũndũ wanyu ũngĩmũhingĩra mĩrango, mũtigaakie mwaki kĩgongona-inĩ gĩakwa tũhũ! Niĩ-rĩ, ndikenetio nĩ inyuĩ o na atĩa, o na hatirĩ hingo ingĩamũkĩra indo iria mũndutagĩra na moko manyu. Ũguo nĩguo Jehova Mũnene wa Ita ekuuga.
• 11. Tondũ kuuma o rĩrĩa riũa rĩkũratha nginya o rĩgĩthũa-rĩ, rĩĩtwa rĩakwa rĩgatinda rĩgĩkumio nĩ andũ matarĩ Ayahudi, nao manjinagĩre ũbumba kũndũ guothe, na marutagĩre rĩĩtwa rĩakwa magongona matheru; tondũ rĩĩtwa rĩu rĩakwa rĩgakumio mũno nĩ andũ matarĩ Ayahudi. Ũguo nĩguo Jehova Mũnene wa Ita ekuuga.
• 12. No rĩrĩ, inyuĩ nĩ gũthahia mũthahagia rĩĩtwa rĩakwa, mũkiugaga atĩrĩ, Metha ya Jehova nĩ ngwatie thahu, o na irio iria irĩ ho, o irio ciake mwene, nĩ nyararĩku o nacio.
• 13. O na ningĩ muugaga ũũ: Atĩrĩrĩ, kaĩ ũhoro ũcio wake wĩ mĩnoga-ĩ! mũkaũthiorera mĩromo. Ũguo nĩguo Jehova Mũnene wa Ita ekuuga. Ningĩ mũcokaga kũrehe nyamũ itunyanĩtwo na ũhinya, o na iria igũthua, na iria ndũaru; mahaki marĩa mũndehagĩre-rĩ, ũguo noguo matariĩ. Nĩkĩo Jehova ekũmũũria atĩrĩ, Ndakĩhota atĩa kwamũkĩra mahaki ta macio harĩ inyuĩ?
• 14. Atĩrĩrĩ, mũndũ mũhenania arogekwo, o we ũrĩa ũkwĩhĩta mwĩhĩtwa arĩ o na njamba ĩngĩrutwo rũũru-inĩ rũake, no ekũrutĩra Jehova nyamũ ĩrĩ na ũũgũ. Tondũ niĩ ndĩ mũthamaki mũnene, ningĩ rĩĩtwa rĩakwa nĩrĩĩtigagĩrũo mũno nĩ andũ arĩa matarĩ Ayahudi. Ũguo nĩguo Jehova Mũnene wa Ita ekuuga.

Home