Go Back

Zakaria Chapter 6

• 1. Ningĩ ndĩracoka ndĩratiira maitho rĩngĩ, ndĩracũthĩrĩria ndĩrona ngari cia ita inya ikiuma gatagatĩ-inĩ ka irĩma igĩrĩ; nacio irĩma icio ciarĩ cia gĩcango.
• 2. Nayo ngari ya mbere ĩragucĩtio nĩ mbarathi ndune, nayo ya kerĩ ĩkagucio nĩ mbarathi njirũ,
• 3. nayo ya gatatũ ĩkagucio nĩ mbarathi nyange, nayo ya kana ĩkagucio nĩ mbarathi ĩrĩ mbuu.
• 4. Na niĩ ndĩracokeria mũraika ũhoro, ũcio tũraaranagĩria nake, ndĩramũũria atĩrĩ, Ĩ Mwathi wakwa, nĩ cia kĩ ici?
• 5. Nake mũraika ũcio aranjokeria atĩrĩ, Ici nĩcio huho iria inya cia matu-inĩ, nacio irahuhũkania ciumĩte harĩ Mwathi wa thĩ yothe.
• 6. Nayo ngari ĩrĩa ĩgucĩtio nĩ mbarathi iria njirũ yerekeire bũrũri wa gathigathini, nacio mbarathi iria nyange ikamĩrũmĩrĩra, nacio iria irĩ mbuu ikerekera bũrũri wa gũthini;
• 7. no rĩrĩ, iria ndune iroimagara, ironwo ta ciendete gũcanga thĩ yothe. Nake araciĩra atĩrĩ, Oyai magũrũ mũthiĩ mũcange thĩ yothe. Nacio iragwata gũcanga o ro ũguo thĩ yothe.
• 8. Nake aranyanĩrĩra, aranjĩra atĩrĩ, Ta rora, iria cierekeire bũrũri wa gathigathini nĩciahoria marakara makwa, Roho wakwa ahorerio bũrũri-inĩ ũcio wa gathigathini.
• 9. Na rĩrĩ, ndũmĩrĩri ya Jehova ĩkĩnginyĩrĩra ngĩĩrũo atĩrĩ,
• 10. Ũkĩra woe indo harĩ andũ acio matũire marĩ atahe, nao nĩ aa Helidai, na Tobija, na Jedaia; ũũkĩre o ro ũmũthĩ ũtonye nyũmba ya Josia wa Zefania, tondũ kũu nĩkuo andũ acio moimĩte Babuloni maikarĩte;
• 11. ũkĩoe thahabu na betha, ũthondeke tanji, ũmĩĩkĩre mũtwe wa Joshua wa Jehozadaku, mũthĩnjĩri-Ngai ũrĩa mũnene,
• 12. na ũmwarĩrie ũmwĩre ũũ, Jehova Mũnene wa Ita ekuuga atĩrĩrĩ, Onei, ũyũ nĩwe mũndũ ũrĩa wĩtagwo Thuuna, tondũ nĩwe ũgokĩra athundũkĩre handũ hake, nake nĩwe ũgaaka hekarũ ya Jehova;
• 13. ĩĩ, ti-itherũ nĩwe ũgaaka hekarũ ya Jehova, na aheo rũgooco, na aikarĩre gĩtĩ gĩake kĩa ũnene, atuĩke mwathani; ningĩ hau gĩtĩ-inĩ gĩake hagĩe mũthĩnjĩri-Ngai ũmwe, ũrĩa marĩrĩaga ndereti cia ũhoreri nake.
• 14. Ningĩ tanji ĩo ĩcoke ĩigwo nyũmba ya Jehova, nĩguo ĩtuĩke ya kũririkanagia andũ ũhoro wa aa Helemu, na Tobija, na Jedaia, o na Heni, mũrũ wa Zefania.
• 15. Ningi andũ arĩa matũire kũraya nĩmagoka gwakithia hekarũ ya Jehova, na inyuĩ nĩmũkamenya atĩ Jehova Mũnene wa Ita nĩwe ũndũmĩte harĩ inyuĩ. Ũguo noguo gũgatuĩka mũngĩathĩkĩra uuge wa Jehova Ngai wanyu na kĩyo.

Home