Go Back

Hagai Chapter 2

• 1. Na atĩrĩrĩ, mũthenya wa mĩrongo ĩĩrĩ na ũmwe wa mweri wa mũgwanja-rĩ, Hagai, ũcio mũnabii, agĩkinyĩrĩrũo nĩ ndũmĩrĩri ya Jehova, akĩĩrũo atĩrĩ,
• 2. Arĩria Zerubabeli wa Shealitieli, barũthi wa Juda, na Joshua wa Jehozadaki, mũthĩnjĩri-Ngai ũrĩa mũnene, o na andũ arĩa othe matigarĩte kuo, ũmere atĩrĩ,
• 3. Nĩ andũ arĩkũ matigarĩte thĩinĩ wanyu arĩa monire nyũmba ĩno yakwa rĩrĩa yarĩ na riri wayo wa mbere? Na rĩu mũrakĩmĩona ĩhaana atĩa? Githĩ rĩu mũtigũkĩmĩona atĩ ĩhaana o ta kĩndũ gĩtarĩ kĩene?
• 4. No rĩrĩ, Jehova ekũmwĩra ũũ: Wee Zerubabeli, wĩũmĩrĩrie! Ningĩ o nawe Joshua wa Jehozadaki, mũthĩnjĩri-Ngai ũrĩa mũnene-rĩ, wĩũmĩrĩrie! Ningĩ Jehova ekũmwĩra inyuĩ andũ a bũrũri ũyũ, Wĩũmĩrĩriei na mũrutage wĩra; tondũ niĩ ndĩ hamwe na inyuĩ. Ũguo nĩguo Jehova Mũnene wa Ita ekũmwĩra.
• 5. Tũũrai mũririkaine kĩrĩkanĩro kĩrĩa twarĩkanĩire na inyuĩ rĩrĩa mwoimire Misiri, o rĩrĩa Roho wakwa aatũire thĩinĩ wanyu, na mũtige gwĩtigĩra.
• 6. Nĩ gũkorũo Jehova Mũnene wa Ita ekũmwĩra atĩrĩ, Ndigairie hanini ndehe gĩthingithia; nĩ hanini mũno ndigairie ’thingithie igũrũ na thĩ, na ’thingithie iria o na thĩ nyũmũ.
• 7. Nĩngatũma andũ a ndũrĩrĩ ciothe magagaĩrũo nĩ thĩ, nacio indo iria ciĩriragĩrio mũno nĩ ndũrĩrĩ icio irehwo, nayo nyũmba ĩno yakwa ndĩmĩiyũrie riri mũingĩ. Ũguo nĩguo Jehova Mũnene wa Ita ekuuga.
• 8. Tondũ-rĩ, betha nĩ ciakwa, o na thahabu nĩ ciakwa o nacio. Ũguo nĩguo Jehova Mũnene wa Ita ekuuga.
• 9. Ningĩ riri ũrĩa nyũmba ĩno ĩkagĩa naguo nĩũkaneneha, ũingĩhe gũkĩra ũrĩa yarĩ naguo tene. Ũguo nĩguo Jehova Mũnene wa Ita ekuuga. Nakuo kũndũ gũkũ nĩkuo ngaheanagĩra thayũ; ũguo nĩguo Jehova Mũnene wa ita ekuuga.
• 10. Ningĩ-rĩ, mũthenya wa mĩrongo ĩĩrĩ na ĩna wa mweri wa kenda wa mwaka ũcio wa kerĩ wa gũthamaka kwa Dario-rĩ, Hagai ũcio mũnabii agĩkinyĩrĩrũo nĩ ndũmĩrĩri ya Jehova, akĩĩrũo atĩrĩ,
• 11. Jehova Mũnene wa Ita egũkwĩra atĩrĩ, Ta hoya athĩnjĩri-Ngai kĩrĩra, ũmorie atĩrĩ,
• 12. Rĩu-rĩ, mũndũ angĩkorũo akuuĩte nyama nyamũre na ruuno rũa nguo yake, naruo rũhutie mũgate, kana irio cia ngimo, kana ndibei, kana maguta, o na kana rũhutie irio o na irĩkũ-rĩ, kĩndũ kĩu gĩagĩtuĩka ta kĩrĩ kĩamũre? Nao athĩnjĩri-Ngai acio makĩmũcokeria, makiuga, Aca.
• 13. Ningĩ Hagai akĩmoria atĩrĩ, Ĩ mũndũ angĩkorũo e na thahu nĩ ũndũ wa kũhutia kĩimba kĩa mũndũ, na acoke ahutie kĩndũ o na kĩmwe kĩa indo icio-rĩ, kĩndũ kĩu gĩagĩtuĩka ta kĩgwatĩtio thahu? Nao athĩnjĩri-Ngai acio makĩmũcokeria, makĩmwĩra atĩrĩ, No kĩgĩe na thahu.
• 14. Nake Hagai akĩmacokeria ũhoro, akiuga atĩrĩ, Jehova egũkĩmwĩra atĩrĩ, Ũguo noguo andũ aya matariĩ, o na rũrĩrĩ rũrũ ruothe noguo rũtariĩ rũkĩonwo nĩ niĩ; ningĩ mawĩra mothe ma moko mao no taguo matariĩ; na ningĩ mahaki ma igongona marĩa marutagĩra hau me na thahu.
• 15. Na rĩu ndamũthaitha mwĩcũranie ũrĩa mũtũire mũhaana nginya ũmũthĩ, na mwĩcũranie ũrĩa mwatariĩ tene, o rĩrĩa gũtaarĩ ihiga o na rĩmwe rĩigĩtwo igũrũ rĩa rĩrĩa rĩngĩ hekarũ-inĩ ya Jehova.
• 16. Ihinda-inĩ rĩu rĩothe-rĩ, hĩndĩ ĩrĩa mũndũ aakinya hĩba-inĩ ya ngano ya ibaba mĩrongo ĩĩrĩ, aakoraga o ibaba ikũmi; ningĩ aathiĩ gĩtumbĩ-inĩ kĩrĩa kĩnene kĩa ndibei erĩgĩrĩire atĩ egũtaha ndahi mĩrongo ĩtano, agataha o mĩrongo ĩĩrĩ.
• 17. Nĩ kũherithia ndamũherithirie nĩ kũmũhĩhithĩria irio rũhuho rũhiũ, na gũciragathia, na kũmuurĩria mbura ya mbembe, nĩ getha mawĩra mothe ma moko manyu matikaagĩrĩre; no rĩrĩ, mũtiigana kũnjokerera. Ũguo nĩguo Jehova ekũmwĩra.
• 18. No rĩrĩ, ndamũthaitha mũgwate gwĩcũrania ũrĩa kũrĩhaana kuuma ũmũthĩ, o kuuma mũthenya ũyũ wa mĩrongo ĩĩrĩ na ĩna wa mweri wa kenda; kuuma o hĩndĩ ĩrĩa gĩtina kĩa hekarũ ya Jehova kĩaambĩrĩirie gwakwo ta mwĩcũranie ũhoro.
• 19. Nĩhakĩrĩ mbeũ ndigaru ikũmbĩ? Ningĩ mĩthabibu na mĩkũyũ na mĩkomamanga na mĩtamaiyũ ndĩrĩ ĩrathundũra o na rĩu? No rĩrĩ, kuuma ũmũthĩ nĩngũcoka kũmũrathima.
• 20. Ningĩ mũthenya ũcio wa mĩrongo ĩĩrĩ na ĩna wa mweri o ro ũcio, Hagai agĩcoka agĩkinyĩrĩrũo nĩ ndũmĩrĩri ya Jehova hĩndĩ ya kerĩ, akĩĩrũo atĩrĩ,
• 21. Arĩria Zerubabeli, barũthi wa Juda, ũmwĩre atĩrĩ, Nĩngathingithia igũrũ na thĩ,
• 22. ng’aũranie itĩ-cia-ũnene cia mothamaki ma thĩ, njoke ’nine hinya wa mothamaki macio ma ndũrĩrĩ, na ng’aũranie ngari cia ita hamwe na acihaici, o na ndungumanie mbarathi hamwe na arĩa mathiaga macihaicĩte; o na ningĩ mũndũ o wothe wao ndĩmũkurumanie thĩ na rũhiũ rũa mbaara rũa mũrũ wa nyina.
• 23. No rĩrĩ, Jehova Mũnene wa Ita egũkwĩra ũũ: Wee Zerubabeli wa Shealitieli, o wee mũtungati wakwa, mũthenya ũcio-rĩ, wee nĩngakwamũkĩra; ũguo nĩguo Jehova egũkwĩra. Ningĩ nĩngagũtua ta gĩcũhĩ gĩakwa gĩa kĩara, o kĩrĩa gĩkurure rũũri rũakwa; ũguo noguo ngagwĩka, nĩ ũndũ wee nĩwe ndĩĩthurĩire. Ũguo nĩguo Jehova Mũnene wa Ita ekuuga.

Home