Go Back

Zefania Chapter 1

• 1. ĨNO NĨYO ndũmĩrĩri ya Jehova ĩrĩa yakinyĩrĩire Zefania, mũrũ wa Kushi, wa Gedalia, wa Amaria, wa Hezekia, matukũ marĩa Josia, mũrũ wa Amoni, aathamakaga Juda.
• 2. Atĩrĩrĩ, Jehova ekuuga ũũ: Nĩ kũnina nganina indo ciothe ithire biũ kũndũ guothe thĩ,
• 3. ’nine andũ, o na nyamũ; njoke ’nine nyamũ iria irĩ mathagu cia rĩera-inĩ, o na ciũngũyũ cia iria-inĩ rĩrĩa inene, o na ’nine andũ arĩa aaganu hamwe na indo ciao iria ihĩngithanagia; na ng’ũrie andũ mehere kũndũ guothe thĩ; ũguo nĩguo Jehova ekuuga.
• 4. Nakuo guoko gwakwa ngagũtambũrũkĩria Juda, o na andũ othe arĩa matũũraga Jerusalemu, ’ninũkie mĩhianano ya Baali ĩrĩa ĩtigarĩte kuo o na rĩu, na ’huure marĩĩtwa ma athĩnjĩri-ngai icio cia mĩhianano, o na ma athĩnjĩri-Ngai arĩa angĩ, mariganĩre biũ.
• 5. O na ’ninũkie andũ arĩa mainamagĩrĩra makahoya mbũtũ ya matu-inĩ me nyũmba ciao igũrũ, hamwe na arĩa mainamagĩrĩra makahoya Jehova, o na makehĩta makĩmũgwetanagĩria na Milikomu;
• 6. o na ’ninũkie arĩa macokaga na thutha magatiga kũrũmĩrĩra Jehova, o na arĩa matarongoragia Jehova, o na kana magatuĩria ũhoro harĩ we.
• 7. Wĩkiragĩrei ki o ro ũguo mwĩ mbere ya Mwathani Jehova, nĩ ũndũ mũthenya wa Jehova; wĩ hakuhĩ; nĩ gũkorũo Jehova nĩathondekithĩtie igongona, na agathagathaga ageni ake arĩa etĩte, akamaamũra.
• 8. Na nĩgũgakinya atĩrĩ, atĩ mũthenya wa igongona rĩu rĩa Jehova, nĩ kũherithia ngaherithia atongoria, na ariũ a mũthamaki, o na andũ othe arĩa mehumbaga nguo itarĩ cia ndũire.
• 9. Ningĩ mũthĩ ũcio ’herithie atagarari othe a hingĩro cia nyũmba, o acio maiyũragia nyũmba ya mwathi wao indo iria matunyanĩte na ũhinya o na uungumania.
• 10. O na ningĩ Jehova ekuuga atĩrĩ, Mũthenya ũcio-rĩ, mũgambo wa kĩrĩro nĩũkaiguwo ũkiuma kĩhingo-inĩ kĩrĩa gĩĩtagwo Kĩhingo gĩa Ciũngũyũ, o nakuo kũrĩra na kĩgi kuume itũũra-inĩ rĩrĩa rĩakĩtwo ica-ikuhĩ, o nacio ithũngũri ciiyũkĩrĩrie kayũ kanene.
• 11. Ta rĩrai na kĩgi, inyuĩ andũ arĩa mũtũũraga Makiteshi, nĩ gũkorũo onjorithia othe a Kanaani matirĩ ho rĩu, nao arĩa mehayagĩra betha nĩ aninũkie.
• 12. Na nĩgũgakinya atĩrĩ, ihinda rĩu, atĩ kũu Jerusalemu ngacarĩrĩria andũ na matawa, ngaherithie andũ arĩa meriganĩirie kuo magatuĩka ta kĩnyita kĩrĩa gĩĩkeerete gĩkarika o gĩtina-inĩ kĩa ndibei, o acio moigaga na ngoro ciao atĩrĩ, Jehova ndarĩ ũndũ mwega o na kana mũũru ageka.
• 13. Ũtonga wao nĩ gũtahwo ũgatahwo, na nyũmba ciao cianangĩke; ĩĩ, ti-itherũ gwaka nĩmagaaka nyũmba, no matigacitũũra; na mahande mĩgũnda ya mĩthabibu, no matikanyua ndibei yayo.
• 14. Amu mũthenya ũrĩa mũnene wa Jehova nĩũkuhĩhĩirie, ũgagĩkuhĩhĩria mũno na ũkehĩka, naguo nĩguo mũthenya ũrĩa mũgambo wa Jehova ũkaiguwo, na nĩguo andũ arĩa marĩ hinya makarĩra maithori kuo mũno.
• 15. Mũthenya ũcio-rĩ, nĩ mũthenya wa mang’ũrĩka, na mũthenya wa thĩna, na wa mĩnyamaro; nĩ mũthenya mũkiru ihooru, o na mwanangĩku, mũthenya wĩ nduma ũrĩa andũ makonaga na mairia; ningĩ nĩ mũthenya wĩ matu, o na nduma ndumanu;
• 16. na nĩ mũthenya wa kũhuhwo karumbeta, o na wa mbugĩrĩrio, gũgĩtharĩkwo matũũra marĩa mairige, hamwe na ihingo iria ciakĩtwo ndaya na igũrũ.
• 17. Nĩ kũrehithie ngarehithĩrie andũ mĩnyamaro, o nginya mathiage makĩhambatagĩria ta atumumu, nĩ ũndũ nĩmehĩtie Jehova; nayo thakame yao ĩgaitwo thĩ ta rũkũngũ, o nacio nyama cia mĩĩrĩ yao iteo o ta rũrua.
• 18. Betha ciao o na kana thahabu ciao itikahota kũmahonokia mũthenya ũcio wa marakara ma Jehova; no rĩrĩ, thĩ yothe nĩ kũrĩo ĩkarĩo nĩ mwaki wa wĩĩ ũrĩa wa Jehova na ĩninwo biũ; nĩ ũndũ nĩ kũnina akaninana; ĩĩ, ti-itherũ akaninana ininana rĩa gũũka na kĩguũ, rĩa kũnina andũ othe arĩa matũũraga bũrũri ũyũ.

Home