Go Back

Habakuku Chapter 3

• 1. RĨRĨ nĩrĩo ihoya rĩa Habakuku, ũrĩa mũnabii, rĩa kũinwo ta thaburi.
• 2. Atĩrĩrĩ, Jehova, nĩnjiguĩte ũhoro wa ngumo yaku, ngagwatwo nĩ guoya. Atĩrĩrĩ, Jehova, rurumũkia wĩra waku o matukũ maya tũrĩ, mĩaka ĩtanathira, Ũmenyithanie ũhoro waguo ica-ikuhĩ, mĩaka ĩtanathirĩrĩkĩra. O na harĩa ũgwatĩtwo nĩ matũkũya-rĩ, menya ũkariganĩrũo nĩ kũiguanĩra tha.
• 3. Ngai nĩ gũũka okire oimĩte Temani, Nake Ũrĩa Mũtheru akiuma kĩrĩma kĩa Parani; Riri wake ũkĩhumba matu marĩa mairũ, Nayo thĩ ĩkĩiyũra rũgooco rũake.
• 4. Gũthererũka kũrĩa aathererũkĩte kwahaanaga o ta ũtheri, Naguo ũtheri woimaga guoko-inĩ gwake ta mĩrũri ya riũa; Naho hau nĩho hinya wake waikaraga ũhithĩtwo.
• 5. Mũthiro nĩguo wamũthiaga mbere, Naguo mwaki ũkamuuma thutha o makinya-inĩ make.
• 6. Kũrĩa aakinyaga-rĩ, thĩ nĩ gũthingitha yathingithaga, Na rĩrĩa aacũthangĩrĩria-rĩ, ndũrĩrĩ ikahurunjũka, Nacio irĩma iria itũũraga tene na tene ikahurunjanio, Nacio ithũngũri iria itũũraga mĩndĩ na mĩndĩ ikainama. Mĩthiĩre ĩo yake noyo ĩrĩa atũire nayo kuuma o tene na tene.
• 7. Nĩ kuona ndonire andũ arĩa matũire hema cia Kushani magwatĩtwo nĩ mĩnyamarĩko, Nao arĩa meyakagĩra nyũmba na ciandarũa o kũu bũrũri wa Midiani makagwata gũtetema nĩ guoya.
• 8. Anga Jehova nĩaarakarĩire njũĩ? Anga nĩwendaga gũũkĩrĩra njũĩ na matũkũya maku, O na kana ũũkĩrĩre iria rĩrĩa inene na mang’ũrĩka maku, Kuona atĩ nĩwathiaga ũhaicĩte mbarathi ciaku, Ũgathiĩ wĩ ngari-inĩ ciaku cia ita iria cia kũhonokania?
• 9. Ũta waku nĩwaũrutĩte ũkawoya na igũrũ, Kũringana na ũrĩa wehĩtĩte ũkĩĩra mĩhĩrĩga ya Isiraeli. Wee nĩwe waatũranganirie thĩ na njũĩ,
• 10. Nacio irĩma igĩkuona, igĩĩtigĩra; Gũgĩgĩcoka gũkiura mbura nene ya kĩboboto, Namo maĩ ma kũndũ kũrĩa kũriku makĩiyũkĩrĩria mĩgambo yamo, Makĩambararia makũmbĩ mamo na igũrũ ta arĩ moko.
• 11. Riũa na mweri ikĩrũgama o ro ũguo ki ũtũũro-inĩ wacio, Nĩ ũndũ wa ũtheri wa mĩguĩ yaku ĩrĩa yakengaga ĩgĩthiĩ, O na ũndũ wa ũkengi wa itimũ rĩaku rĩkĩhenia.
• 12. Nĩ kũgera wagerire thĩ kũndũ guothe wĩ mũng’ũrĩku, Nacio ndũrĩrĩ ũgĩcirangĩrĩria thĩ na marakara.
• 13. Wee-rĩ, woimagarire nĩ getha ũkahonokie andũ aku, Ũkĩhonokie andũ aku arĩa aitĩrĩrie maguta; Ũkĩhehenja kĩongo kĩa ũrĩa mũnanu e kwao mũciĩ, Nĩ gũtharia ũtharĩtie nyũmba yake o nginya itina-inĩ ciayo.
• 14. Wee wathecangire njamba ciakuo na mĩcengi yacio cio nyene, O iria ciokire itũnyaagie itariĩ ta rũhuho rũa kĩhuhũkanio, Na nĩ cio ciekenagĩra ta iraninũkia mũthĩni na hitho.
• 15. Wee nĩ gũkinya wakinyire iria-inĩ igũrũ na mbarathi ciaku, O kũu kũhaicanĩtio maĩ, magatuĩka makũmbĩ manene.
• 16. Nĩ kũigua ndaiguire ũndũ ũcio, ngĩtuĩka nda, Ngĩgĩikara o ngĩinainaga mĩromo ndaigua mũgambo ũcio, Woru ũkĩndonya o mahĩndĩ-inĩ makwa, ngĩgĩikara o harĩa ndĩ ngĩinainaga, Njetereire o ro ũguo nginya rĩrĩa mũthenya wa mathĩna ũgakinya, O hĩndĩ ĩrĩa tũgakorũo tũtharĩkĩirũo nĩ ita cia ũrĩa ũgatũhithũkĩra.
• 17. Nĩ ũndũ-rĩ, o na mũkũyũ ũngĩtuĩka ndũkũruta kĩro, O na kana mĩthabibu ĩciare maciaro; Naguo wĩra ũrĩa ũrutĩirũo mũtamaiyũ wage uumithio, Nayo mĩgũnda yage gũciara irio ciayo; Ningĩ rũũru rũa mbũri rũninwo, kiugũ gĩtigwo ũtheri, O nacio ciugũ cia ng’ombe ciage ng’ombe irĩ kuo;
• 18. O na kũngĩtuĩka nĩ ũguo-rĩ, niĩ no gũkena ngakenera Jehova, Njanjamũke ngoro nĩ ũndũ wa Ngai wa ũhonokio wakwa.
• 19. Jehova Mwathani nĩwe hinya wakwa, Nĩwe wĩkagĩra magũrũ makwa ihenya ta marĩ ma mũgoma wa thwariga, Akandũũgĩria ngerage kũndũ gwakwa kũrĩa gũtũũgĩru. (Rũĩmbo rũu nĩ rũa kũneo mũtongoria wa nyimbo, rũa kũinagwo na inanda cia mũgeo.)

Home