Go Back

Nahumu Chapter 3

• 1. Hĩ! Kaĩ itũũra rĩrĩa rĩitithagia thakame rĩrĩ na haaro-ĩ! Tondũ rĩiyũire maheni na ũtunyani, na ũtahani ndũtĩragĩrio.
• 2. Nĩkuo kũraiguwo mwanũko wa mĩcarica, o na mũrurumo wa magũrũ ma ngari magĩkiinyana, na gũkaiyũra mbarathi igũcimbica, o na ngari ikũrũũgarũũga,
• 3. o na mũhũgahũgo wa andũ magĩthiĩ mahaicĩte mbarathi; ningĩ gũkaiyũra mũhenahenio wa hiũ cia njora na wa matimũ; o na gũkaiyũra kĩrĩndĩ kĩingĩ kĩa andũ moragĩtwo, o na hĩba nene cia ciimba itangĩtarĩka, nao andũ makahĩngagwo nĩ ciimba iria ciiyũrĩte kuo.
• 4. Maũndũ macio mothe-rĩ, nĩmo moimanĩte na ũrĩa ũmaraya ũingĩhĩte mũno wa mũmaraya ũcio mũthaka mũno, na nĩwe ũtũmaga andũ manyue mũrĩria nĩ ũndũ wake, na agatũma ndũrĩrĩ iria itharanagia nake ciendio ũkombo-inĩ nĩ ũndũ wake, o na agathũkia mĩtũũrĩre ya mbarĩ nyingĩ cia andũ na ũrogi wake.
• 5. Atĩrĩrĩ, Jehova Mũnene wa Ita ekuuga ũũ: Nĩngũũkĩrĩire, na nĩngakũheta nguo ikũhumbe ũthiũ, njoke ngũguũrie wonwo njaga nĩ ndũrĩrĩ, o na ngũconorithie harĩ andũ a kũndũ kũrĩa gũthamakagwo nĩ athamaki.
• 6. Na nĩngagũikĩria maũndũ moru me magigi, ndũme ũthahe, na ũkũũragĩrũo maitho.
• 7. Ningĩ nĩgũgakinya atĩrĩ, atĩ andũ othe arĩa magakuona nĩ kũũra magakũũrĩra, na moige atĩrĩ, Hĩ! Kaĩ Nineve nĩ ikiru ihooru-ĩ! Nũ ũgakĩrĩrĩrĩra? Ningĩ ngũrĩcarĩria ahorerania a kũrĩkiria maithori na kũ?
• 8. Anga wee nĩwe mwega gũkĩra No-amoni, itũũra rĩrĩa rĩaakĩtwo gatagatĩ-inĩ ka njũĩ, o rĩu rĩarigicĩirio nĩ maĩ na ndwere ciothe, ningĩ rĩkairigĩrũo nĩ rũũĩ rũa Nili, naruo rũthingo rũarĩo rũgatuĩka nĩ maĩ maingĩ?
• 9. Kushi na Misiri-rĩ, nĩmo maarĩ hinya warĩo, ũrĩa ũtaahwererekagĩra; ningĩ Putu na Lubimu nĩmo maarĩteithagia.
• 10. Ĩndĩ-rĩ, o na gwatuĩka nĩ ũguo-rĩ, nĩrĩarindũranirũo, nao andũ arĩo magĩtahwo, o natuo twana twarĩo tũrĩa tũnini tũkĩbacanĩrio na thĩ magomano-inĩ mothe ma njĩra iria njariĩ; nao andũ arĩo arĩa atĩĩku magĩcukĩrũo mĩtĩ, nao arĩa anene makĩohwo na mĩnyororo.
• 11. Wee nawe nĩ kũrĩwo ũgakorũo ũrĩĩtwo, na wĩhithe; ningĩ ũcarie mwĩgito nĩ ũndũ wa thũ ciaku.
• 12. No rĩrĩ, ihingo ciaku ciothe cia hinya nĩigatuĩka o ta mĩkũyũ ĩrĩ ngũyũ iria ciambĩte kwĩrua; tondũ ĩngĩinainio, ikagũa o kanua-inĩ ka mũcirĩi.
• 13. Atĩrĩrĩ, andũ aku arĩa marĩ thĩinĩ waku mahaana o ta andũ-a-nja, nacio ihingo cia bũrũri waku nĩ kũhingũrũo ihingũrĩirũo thũ ciaku o kũhingũrũo biũ, nayo mĩgĩĩko yacio nĩĩninĩtwo nĩ mwaki.
• 14. Wĩtahĩre maĩ nĩguo ũgakorũo namo hĩndĩ ĩrĩa ũkarigicĩrio, nacio ihingo ciaku cia hinya ũcirũmie wega; thiĩ rĩũmba-inĩ ũrangarange ndaka, o narĩo icinĩro-inĩ rĩa matubarĩ, ũrĩĩkĩre hinya.
• 15. No rĩrĩ, hau nĩho mwaki ũgakũrambia biũ, o naruo rũhiũ rũa njora rũgũtemenge ũthire biũ; nĩ kũrĩa rũgakũrĩa o ta ũkũrĩo nĩ itono, o na ũngĩĩyorerera ũingĩhe o ta itono icio, o na kana wĩyorerere ũingĩhe o ta ngigĩ.
• 16. Onjorithia aku nĩ kũingĩhia ũmaingĩhĩtie magakĩra njata cia igũrũ, no itono-rĩ, cio itirĩ hingo itarĩanaga, cianangane, na icoke ciĩũmbũkĩre.
• 17. Anene aku arĩa mehumbaga tanji maingĩhĩte o ta ngigĩ, nao anene aku a ita makaingĩha o ta mĩrumbĩ ya ngigĩ iria ciũmbaga njirigo-inĩ mũthenya wa heho; no riũa rĩaara ikombũka igathiĩ, na kũndũ gwacio gũtingĩmenyeka na kũrĩa kuo.
• 18. Atĩrĩrĩ, wee mũthamaki wa Ashuri, arĩithi aku nĩ akomu toro, nao andũ aku arĩa marĩ igweta nĩ ahurũku; andũ aku mahurunjĩirũo irĩma igũrũ, na matirĩ na mũmacokereria.
• 19. Itihia rĩrĩa ũtĩhĩtio rĩtirĩ na gĩa kũrĩhonia; nguraro ĩrĩa ũgurarĩte nĩ theeu mũno, nao andũ othe arĩa maraigua ũhoro waku ũkĩheanwo nĩ kũhũra marahũra hĩ magĩgũkenerera; nĩ ũndũ-rĩ, nĩ mũndũ ũrĩkũ wee ũtaakoragia waganu waku hĩndĩ ciothe?

Home