Go Back

Mika Chapter 6

• 1. RĨU ta thikĩrĩriai ũrĩa Jehova ekuuga: Arahũka wĩrũĩrĩre harĩ irĩma, o nacio ithũngũri ũciiguithie mũgambo waku.
• 2. Ta iguai ngarari ya Jehova, inyuĩ irĩma, o na inyuĩ itina cia thĩ iria itũũraga tene na tene; nĩ ũndũ Jehova e na ngarari na andũ ake, na nĩekũrũithia Isiraeli.
• 3. Atĩrĩrĩ, andũ akwa, kaĩ ndĩmwĩkĩte atĩa? Kaĩ ndĩmũnogetie na kĩ? Ta nyumbũrĩrai!
• 4. Nĩ ũndũ-rĩ, nĩndakwambatirie ngĩkũruta bũrũri wa Misiri, na ngĩgũkũũra ngĩkũruta nyũmba ya ũkombo; ngĩcoka ngĩrekia Musa agũtongorie, me na Haruni na Miriamu.
• 5. Atĩrĩrĩ, andũ akwa, ta ririkanai ũrĩa Balaki, mũthamaki wa Moabi, aahoire kĩrĩra, na ũrĩa aacokeirio nĩ Balaamu, mũrũ wa Beori; ningĩ mũririkane ũrĩa gwatuĩkire gwata rĩrĩa mwoimire Shitimu o nginya rĩrĩa mwakinyire Giligali, nĩ getha mũmenye ciĩko cia ũthingu iria Jehova aaneka.
• 6. Ngũgĩthiĩ mbere ya Jehova na kĩ, ndĩĩinamĩrĩrie mbere ya Ngai ũrĩa wĩ igũrũ mũno? Hihi ndagĩthiĩ mbere yake na mahaki ma njino, kana ndĩ na njaũ cia mwaka ũmwe?
• 7. Anga Jehova aakenio nĩ ndũrũme ngiri nyingĩ, o na kana ekenere nĩ maguta maingĩhĩte ta maĩ ma njũĩ ngiri ikũmi? Kana hihi ndaruta irigithathi rĩakwa nĩ ũndũ wa ũhoro wakwa wa kwagarara watho? Kana ndute maciaro ma mũthimo wakwa nĩ ũndũ wa mehia ma ngoro-inĩ yakwa?
• 8. Atĩrĩrĩ, wee mũndũ ũyũ, githĩ Jehova ndakuonetie maũndũ marĩa mega? Naguo ũndũ ũrĩa egwathaga wĩke-rĩ, nĩ ũrĩkũ, tiga o wĩkage maũndũ marĩa maagĩrĩire, na ningĩ atĩ wendage ũhoro wa kũiguanĩra tha, o na ũthiage na mĩthiĩre ya kwĩnyihĩria Ngai wĩgwatanĩtie nake?
• 9. Nĩ mũgambo wa Jehova ũraanĩrĩra itũũra, nake mũndũ ũrĩa mũũgĩ no etigĩre rĩĩtwa rĩaku: Atĩrĩrĩ, iguai rũthanju, o na mũthikĩrĩrie ũrĩa ũrũgwete.
• 10. Anga uumithio ũrĩa wonekete na ũndũ wa waganu no mũhae nyũmba cia andũ arĩa aaganu, o na eba ya gũthima nayo ĩtarĩ ya kĩhooto, o ĩrĩa ĩĩ thahu?
• 11. Anga ndonwo ta ndĩ mũtheru ndĩ na ratiri cia waganu, o na ndĩ na mondo ĩiyũrĩtio mahiga ma gũthima namo ma maheni?
• 12. Nĩ ũndũ-rĩ, itonga ciarĩo ciiyũrĩtwo nĩ maũndũ ma ũhinya, nao atũũri kuo makaaria ndeto cia maheni, nacio nĩmĩ ii tũnua twao nĩ kũhenania ihenanagia.
• 13. Tondũ ũcio nĩngũgurarĩtie nguraro njũru mũno, na ngatũma ũkire ihooru nĩ ũndũ wa mehia maku.
• 14. Kũrĩa nĩũkarĩa, no ndũkahũna, naguo wathima ũingĩhe o kũu thĩinĩ waku; nawe nĩũgathamia indo ciaku, no ndũrĩ kĩndũ ũgathiĩ nakĩo hatarĩ ũgwati; tondũ rĩrĩ, indo ciaku cia thama nĩngacineana ininwo na rũhiũ rũa njora.
• 15. Kũhanda nĩũkahanda, no ndũkagetha; ningĩ kũhũra nĩũkahũra ndamaiyũ, no ndũkehaka maguta ma cio; o na ũhihe thabibu, no ndũrĩ ndibei ũkanyua.
• 16. Nĩ ũndũ irĩra cia watho iria mũrũmagĩrĩra nĩ iria ciaathanirũo nĩ Omuri, o na mawĩra manyu mothe no marĩa maarutagwo nĩ nyũmba ya Ahabu, na mũgakĩrũmĩrĩra kĩrĩra kĩayo; na nĩkĩo ndĩrĩmwanangithia, o nao andũ arĩa matũũraga kwanyu ndũme ũhoro wao wario gũkiugagwo hi-i-i! na inyuĩ mũcokererũo nĩ rũmena rũrĩa rũgakorerera andũ akwa.

Home