Go Back

Jona Chapter 1

• 1. ATĨRĨRĨ, ndũmĩrĩri ya Jehova nĩyakinyire harĩ Jona, mũrũ wa Amitai, akĩĩrũo atĩrĩ,
• 2. Ũkĩra, ũthiĩ Nineve, itũũra rĩrĩa inene, wanĩrĩre ũkĩrĩgũũthũkagĩra; amu ũũru wa ene rĩo wambatĩte ũgakinya o harĩ niĩ.
• 3. Nake Jona no gũũkĩra okĩrire athiĩ akorĩre Tarishishi nĩguo oime ũthiũ-inĩ wa Jehova; agĩgĩikũrũka Jopa agĩkorerera marikabu yathiaga Tarishishi: agĩũka o akĩrĩha ta ũrĩa ene yo maarĩhagia, agĩkĩmĩingĩra, nĩ getha atwarane nao Tarishishi nĩguo oime ũthiũ-inĩ wa Jehova.
• 4. No rĩrĩ, Jehova akĩhurutithania rũhuho rũnene iria-inĩ, gũgĩkĩgĩa kĩhuhũkanio kĩnene kũu iria-inĩ, marikabu ĩo ĩgĩtigaria hanini ĩtharũke.
• 5. Na hĩndĩ o ĩo atwari ayo makĩmaka, magĩkaĩra o mũndũ ngai yake, o mũndũ ngai yake; magĩcoka magĩikia indo iria ciarĩ thĩinĩ wa marikabu iria-inĩ, nĩ getha ĩhũthĩrũo. No Jona nĩaaikũrũkĩte agatonya kũu marikabu o thĩinĩ; agĩkorũo akomete na akagonia toro.
• 6. Tondũ ũcio mũnene wa marikabu agĩthiĩ harĩ we, akĩmũũria atĩrĩ, Ũreka atĩa, wee, tondũ ũrĩ o toro? Ndũũkĩre ũkaĩre Ngai waku; no gũkorũo Ngai nĩegũtwĩhũgũrĩra, tũtige gũgĩthira.
• 7. Magĩitĩka kwĩrangana o mũndũ na ũrĩa ũngĩ atĩrĩ, Ũkai, tũcuke mĩtĩ, nĩguo tũmenye ũrĩa ũtũmĩte ũũru ũyũ ũtũkinyĩre. Magĩgĩcuka mĩtĩ, mũtĩ ũkĩgũĩra Jona.
• 8. Hĩndĩ o ĩo magĩkĩmwĩra atĩrĩ, Ta twĩre nĩ ũndũ wa ũ ũtũmĩte ũũru ũyũ ũtũkinyĩre; wee-rĩ, ũrutaga wĩra ũrĩkũ? ningĩ uumĩte kũ? kwanyu nakuo nĩ kũ? na ũkĩrĩ wa rũrĩrĩ rũrĩkũ?
• 9. Nake akĩmera atĩrĩ, Niĩ ndĩ Mũhibirania; na ndĩ mwĩtigĩri Jehova, Ngai wa igũrũ, ũrĩa wombire iria rĩrĩ inene o na thĩ kũrĩa kũniaru.
• 10. Hĩndĩ ĩo andũ acio magĩkĩmaka o kũmaka, makĩmũũria atĩrĩ, Nĩ atĩa ũguo wĩkĩte? nĩ amu-rĩ, andũ acio nĩmaamenyete atĩ nĩ kũũra orĩte akoima ũthiũ-inĩ wa Jehova, nĩ tondũ we nĩaamerĩte.
• 11. Magĩcoka makĩmũũria atĩrĩ, Nĩ atĩa tũgũgwĩka nĩ getha tũhorererũo nĩ iria? Amu iria no rĩakĩragĩrĩria kũhurutithanio o mũno mũno.
• 12. Nake akĩmera atĩrĩ, Njoyai mũnjikie iria-inĩ, na hĩndĩ ĩo nĩmũkũhorererũo nĩ iria: amu nĩnjũĩ nĩ ũndũ wakwa ũtũmĩte kĩhuhũkanio gĩkĩ kĩnene ũũ kĩmũkore.
• 13. No ningĩ andũ acio magĩcoka o kũgucagia marikabu na hinya nĩ getha mamĩcokie rũtere-inĩ; na makĩremwo: tondũ iria nĩrĩakĩragĩrĩria kũhurutithanio o mũno mũno rĩkamagiria.
• 14. Tondũ ũcio magĩgĩkaĩra Jehova makiuga atĩrĩ, Twagũthaitha, Jehova, twagũthaitha, nĩtũtige kũninwo nĩ ũndũ wa muoyo wa mũndũ ũyũ; tiga gũtũcokereria thakame yake ta arĩ ya ũrĩa ũtehĩtie: amu wee Jehova nĩwe wĩkĩte o ta ũrĩa wĩendeire.
• 15. Magĩcoka magĩkĩoya Jona, makĩmũikia iria-inĩ: namo maĩ ma iria magĩtiga kwĩnyugutania.
• 16. Hĩndĩ ĩo andũ acio magĩĩtigĩra Jehova o mũno; magĩkĩrutĩra Jehova igongona, na makĩĩhĩta mĩĩhĩtwa.
• 17. Nake Jehova nĩaathĩrĩirie kĩũngũyũ kĩnene mũno gĩkamerie Jona; nake Jona akĩgĩta nda ya kĩũngũyũ kĩu mĩthenya ĩtatũ na matukũ mene.

Home