Go Back

Maũndũ Ma Alawii Chapter 6

• 1. Nake Jehova akĩarĩria Musa, akĩmwĩra atĩrĩ,
• 2. Mũndũ o na ũrĩkũ angĩĩhia, aagarare watho wa Jehova, ahenie mũndũ ũrĩa ũngĩ thĩinĩ wa indo iria amũigĩire, kana thĩinĩ wa karĩko karĩa maarĩkanĩire, kana amũtunye kĩndũ, kana ahinyĩrĩrie mũndũ ũrĩa ũngĩ;
• 3. kana akorũo nĩonete kĩndũ kĩrĩa kĩorĩte, na acoke ahenie mwene kĩo, na ehĩte na maheni-rĩ, ha ũhoro wa ũndũ o na ũrĩkũ wa maũndũ macio mothe mũndũ angĩĩhia akĩmeka-rĩ,
• 4. gũgagĩtuĩka ũũ: atĩ angĩkorũo ehirie, na akĩonwo e mũhĩtia, nĩagacokia kĩrĩa aathiire nakĩo gĩa ũtunyani, kana kĩrĩa aathiire nakĩo kĩa ũhahami, kana kĩa indo iria ciaigĩtwo kũrĩ we, kana kĩndũ kĩrĩa kĩũrĩte nake agakĩona,
• 5. o na kana thĩinĩ wa kĩndũ o na kĩ kĩrĩa ehĩtĩte na maheni ũhoro-inĩ wakĩo; nĩ gũcokia agagĩcokia gĩothe biũ, o na akĩongerere gĩcunjĩ kĩngĩ gĩa gatano, akĩnengere mwene kĩo mũthenya o ro ũcio akonwo e mwĩhia.
• 6. Ningĩ atwarĩre mũthĩnjĩri-Ngai kĩndũ gĩake gĩa kũrutĩrũo Jehova igongona rĩa rĩĩhia, nakĩo gĩtuĩke ndũrũme ĩtarĩ na kaũũgũ yumĩte rũũru-inĩ, o ta ũrĩa wee ũgatua thogora wayo ĩkĩgũrũo, nĩ ũndũ wa igongona rĩa ihĩtia.
• 7. Nake mũthĩnjĩri-Ngai ũcio amũhoroherie mbere ya Jehova, na nĩakoherũo ũndũ ũcio ekĩte ũgatũma onwo e mwĩhia.
• 8. Nake Jehova akĩarĩria Musa, akĩmwĩra atĩrĩ,
• 9. Atha Haruni na ariũ ake, ũmere atĩrĩ, Watho wa ihaki rĩa njino nĩguo ũyũ: ihaki rĩu rĩa njino rĩrĩraaraga riiko rĩkĩhĩa rĩrĩ kĩgongona-inĩ igũrũ o nginya rũcinĩ; naguo mwaki ũcio wa kĩgongona ũraarage o ũgĩakana ho.
• 10. Nake mũthĩnjĩri-Ngai ehumbe nguo yake ya gatani, o nayo thuruarĩ yake ya gatani ehumbe mwĩrĩ, acoke oe mũhu wa nyamũ ĩo ĩcinĩirũo na mwaki kĩgongona-inĩ igũrũ, ya ihaki rĩa njino, akaũige mwena-inĩ wa kĩgongona.
• 11. Thutha wa ũguo ehumbũrie nguo icio ciake, ehumbe ĩngĩ, acoke oe mũhu ũcio, aũtware na kũu gĩthaka-inĩ mbarĩ ĩrĩa ĩngĩ ya hau kĩraaro-inĩ aũite handũ hatarĩ gĩko.
• 12. Naguo mwaki ũrĩa ũrĩ igũrũ rĩa kĩgongona ũikare o ũgĩakanaga ho, na ndũkanahore; nake mũthĩnjĩri-Ngai awĩkagĩre ngũ o rũcinĩ hĩndĩ ciothe, nacio nyama cia ihaki rĩa njino acitandayagie wega igũrũ rĩa ngũ icio, o namo maguta ma magongona ma ũhoreri amacinagĩre ho igũrũ.
• 13. Mwaki ũgũtũũra wakanaga kĩgongona-inĩ igũrũ hĩndĩ ciothe, na ndũkanahore.
• 14. Naguo watho wa ihaki rĩa mũtu nĩ ũyũ: ariũ a Haruni marĩũrutagĩra mbere ya Jehova o hau mbere ya kĩgongona.
• 15. Naguo mũtu ũcio mũhinyu mũno wa ihaki rĩu, awĩrũmĩre rũhĩ rũgima, na maguta maguo, o na ubani wothe ũrĩa wĩ igũrũ rĩa mũtu ũcio wa ihaki rĩu, acicinĩre kĩgongona-inĩ kĩu igũrũ, ũtũme mũtararĩko ũrĩa ũnungaga wega ũiguwo, nĩguo ũtuĩke ũndũ wa gũtũma andũ maririkanwo nĩ Jehova.
• 16. Nakĩo kĩrĩa kĩrĩtigara kĩaguo, kĩrĩo nĩ Haruni na ariũ ake, kĩrĩĩrũo handũ hatheru, o na gĩtigekĩrũo ndawa ya kũimbia; makĩrĩĩre o hau nja ya hema-ya-gũtũ-nganwo.
• 17. Matigari macio matikanarugwo na ndawa ya kũimbia. Kĩndũ kĩu-rĩ, nĩ niĩ ndĩmaheete gĩtuĩke gĩcunjĩ kĩao kĩa mahaki ma gũcinwo na mwaki marĩa ndutĩirũo; nakĩo nĩ kĩamũre mũno mũno, o ta igongona rĩa mehia, o na ta igongona rĩa ihĩtia.
• 18. Mũndũ mũrũme o wothe thĩinĩ wa ariũ a Haruni nĩagakĩrĩaga gĩtuĩke gĩcunjĩ kĩanyu kĩrĩa mwagĩrĩirũo nĩ kũheagwo tene na tene njiaro-inĩ cianyu ciothe, kiumĩte mahaki-inĩ ma Jehova ma gũcinwo na mwaki marĩa arutĩirũo; matigari macio-rĩ, mũndũ o wothe ũrĩa ũkamahutia nĩagatuĩka mwamũre.
• 19. Ningĩ Jehova akĩarĩria Musa, akĩmwĩra atĩrĩ,
• 20. Kĩndũ kĩrĩa Haruni na ariũ ake makarutĩra Jehova mũthenya o ro ũcio egũitĩrĩrio maguta nĩ gĩkĩ; nĩ gĩcunjĩ gĩa ikũmi kĩa eba ng’ima ya mũtu ũrĩa mũhinyu mũno gĩa gũtuĩka ihaki rĩa mũtu, naguo ũtũũre ũrutagwo o ta ũguo, nuthu ĩmwe yaguo ĩrutagwo rũcinĩ, nayo ĩrĩa ĩngĩ ĩrutagwo hwaĩ-inĩ.
• 21. Naguo ũkarangĩrũo rũgĩo-inĩ na maguta; na wahuhuiyo nĩ maguta wega nĩguo ũrĩũrehage, narĩo ihaki rĩu rĩa mũtu ũrĩrutage rĩrĩ cienyũ ngarange, rĩtuĩke rĩa mũtararĩko ũrĩa ũnungaga wega wa kũiguwo nĩ Jehova.
• 22. Nake mũthĩnjĩri-Ngai ũrĩa ũitĩrĩirio maguta agacoka ithenya rĩake thĩinĩ wa ariũ ake-rĩ, nĩwe ũrĩrĩrutaga; kĩndũ kĩu kĩrĩcinagĩrũo Jehova gĩothe biũ, naguo ũndũ ũcio ũtuĩke kĩrĩra kĩa watho wa kũrũmagĩrĩrũo tene na tene.
• 23. Narĩo ihaki o rĩothe rĩa mũtu rĩa mũthĩnjĩri-Ngai nĩ gũcinwo rĩrĩcinagwo rĩothe biũ, na rĩtikanarĩo.
• 24. Ningĩ Jehova akĩarĩria Musa, akĩmwĩra atĩrĩ,
• 25. Arĩria Haruni na ariũ ake, ũmere ũũ: Ũyũ nĩguo watho wa igongona rĩa mehia, atĩ o handũ harĩa ihaki rĩa njino rĩthĩnjagĩrũo, noho igongona rĩa mehia rĩrĩthĩnjagĩrũo mbere ya Jehova; igongona rĩu nĩ rĩamũre mũno mũno.
• 26. Mũthĩnjĩri-Ngai ũrĩa ũkũhorohanĩria mehia narĩo nĩwe ũkarĩrĩa, rĩrĩĩrũo handũ hatheru, o hau nja thĩinĩ hema-inĩ-ya-gũtũnganwo.
• 27. Nakĩo kĩndũ o gĩothe kĩrĩa gĩkahutia nyama yakĩo nĩgĩkaamũrũo, na nguo o na ĩrĩkũ ĩngĩkaminjũkĩrũo nĩ thakame yayo, nguo ĩo-rĩ, hau ĩminjũkĩirũo nĩũkahathambĩria handũ hatheru.
• 28. No rĩrĩ, nyũngũ o na ĩrĩkũ ya rĩũmba ĩrĩa nyama ya igongona rĩu ĩrugĩtwo thĩinĩ wayo nĩyũragwo; no ĩngĩkorũo ĩrugĩtwo na nyũngũ ya gĩcango-rĩ, nĩĩgakumuthwo ĩcoke yagagio maĩ.
• 29. Mũndũ mũrũme o wothe thĩinĩ wa athĩnjĩri-Ngai nĩakarĩaga nyama ciarĩo; igongona rĩu nĩ rĩamũre mũno mũno.
• 30. No rĩrĩ, gũtirĩ igongona o na rĩrĩkũ rĩa mehia, rĩrĩa thakame yarĩo ĩtwarĩtwo hema-inĩ-ya-gũtũnganwo thĩinĩ nĩguo ĩkahoroherie andũ handũ hau haamũre, rĩngĩrĩo, no rĩcinwo na mwaki.

Home