Go Back

Maũndũ Ma Alawii Chapter 27

• 1. NINGĨ Jehova akĩarĩria Musa, akĩmwĩra atĩrĩ,
• 2. Aria na ciana cia Isiraeli, ũciĩre ũũ: Hĩndĩ ĩrĩa mũndũ ekũhingia mwĩhĩtwa wa ũrĩa ekwamũrĩra Jehova andũ-rĩ, cekeri iria irĩrutagwo nĩ ũndũ wao irĩiganaga o ta ũrĩa wee ũgatua.
• 3. Nakuo gũtua gwaku, kũngĩkorũo gũkoniĩ mũndũ mũrũme wa kuuma mĩaka mĩrongo ĩĩrĩ nginya o mĩrongo ĩtandatũ, gũtua gwaku gũtuĩke cekeri mĩrongo ĩtano cia betha, o ta ũrĩa cekeri cia handũ harĩa haamũre ciiganaga igĩtarũo.
• 4. Na kũngĩkorũo nĩ mũndũ-wa-nja, gũtua gwaku gũtuĩke cekeri mĩrongo ĩtatũ.
• 5. Ningĩ kũngĩkorũo mũndũ ũcio nĩ wa mĩaka ĩtano nginya mĩrongo ĩĩrĩ-rĩ, gũtua gwaku kũrĩa gũkoniĩ mũndũ mũrũme gũtuĩke cekeri mĩrongo ĩĩrĩ, na kũrĩa gũkoniĩ mũndũ-wa-nja gũtuĩke cekeri ikũmi.
• 6. Ningĩ-rĩ, kũngĩkorũo nĩ mweri ũmwe nginya mĩaka ĩtano-rĩ, gũtua gwaku kũrĩa gũkoniĩ kahĩĩ gũtuĩke cekeri ithano cia betha; na kũrĩa gũkoniĩ kairĩtu gũtuĩke cekeri ithatũ.
• 7. O na ningĩ kũngĩkorũo mũndũ ũcio nĩ wa mĩaka mĩrongo ĩtandatũ na ĩgakĩra-rĩ, gũtua gwaku kũrĩa gũkoniĩ mũndũ mũrũme gũtuĩke cekeri ikũmi na ithano, na kũrĩa gũkoniĩ mũndũ-wa-nja gũtuĩke cekeri ikũmi.
• 8. No rĩrĩ, kũngĩtuĩka mũruti cekeri nĩ mũthĩni gũkĩra ũrĩa gũtua gwaku gũtariĩ-rĩ, nĩatwarũo mbere ya mũthĩnjĩri-Ngai, nake mũthĩnjĩri-Ngai akĩmũtuĩre cekeri iria ekũruta; na rĩrĩ, o ta ũrĩa hinya wa kũruta wa mũndũ ũrĩa wĩhĩtĩte mwĩhĩtwa ũtariĩ-rĩ, ũguo noguo mũthĩnjĩri-Ngai akamũtuĩra.
• 9. Na rĩrĩ, kũngĩkorũo nĩ nyamũ ya mũthemba ũrĩa andũ marutagĩra Jehova igongona ĩkũrutwo, nyamũ o yothe ĩrĩa mũndũ aheete Jehova ya mũthemba ũcio-rĩ, nĩ nyamũre.
• 10. Mũndũ ũcio ndangĩcoka kũmĩkũũrania, kana amĩgarũranie aige njega ithenya rĩa ĩrĩa njũru, kana aige njũru ithenya rĩa ĩrĩa njega; no rĩrĩ, angĩkũũrania nyamũ ĩo na ĩngĩ o na atĩa-rĩ, nyamũ icio cierĩ, ĩo ya mbere, o na ĩo ĩgũkũũranio nayo, no mũhaka ciamũrĩrũo Jehova.
• 11. Na rĩrĩ, kũngĩkorũo nĩ nyamũ o na ĩrĩkũ ya iria irĩ mũgiro iria andũ matarutagĩra Jehova cia igongona, nĩagakĩiga nyamũ ĩo mbere ya mũthĩnjĩri-Ngai;
• 12. nake mũthĩnjĩri-Ngai atue thogora wayo wa ũrĩa yagĩrĩte kana ũrĩa ĩthũkĩte; na rĩrĩ, o ta ũrĩa wee, mũthĩnjĩri-Ngai, ũgatua thogora wayo, ũguo noguo ũgatuĩka.
• 13. No rĩrĩ, angĩkorũo nĩacirĩire kũmĩkũũra-rĩ, cekeri iria ĩtuĩrĩirũo nĩagaciongerera gĩcunjĩ kĩngĩ gĩa gatano.
• 14. Na rĩrĩ, mũndũ angĩamũra nyũmba yake, amĩtue nyamũrĩre Jehova, hĩndĩ ĩo mũthĩnjĩri-Ngai nĩagatua thogora wayo wa ũrĩa yagĩrĩte kana ũrĩa ĩthũkĩte; na rĩrĩ, o ta ũrĩa mũthĩnjĩri-Ngai agatua thogora wayo-rĩ, ũguo noguo ũgatuĩka.
• 15. Na atĩrĩrĩ, mũndũ ũcio ũmĩamũrĩte angĩenda gũkũũra nyũmba ĩo yake, nĩakongerera gĩcunjĩ kĩngĩ gĩa gatano gĩa cekeri icio wee ũtuĩte nĩ ũndũ wayo, nayo ĩgĩcoke ĩtuĩke yake.
• 16. Ningĩ-rĩ, mũndũ angĩkaamũrĩra Jehova gĩcigo kĩa mũgũnda gĩthaka-inĩ kĩrĩa egwatĩire gĩgĩtuĩka gĩake, nĩũgatua thogora wakĩo o ta ũrĩa mbeũ iria ingĩhandwo ho ciigana; cairi ya kĩbaba kĩmwe kĩrĩa gĩĩtagwo omeri ĩngĩkorũo nĩyo ĩngĩhandwo gĩcigo kĩu, yatũma thogora wakĩo ũtuĩke cekeri mĩrongo ĩtano cia betha.
• 17. Mũndũ ũcio angĩgĩkorũo aamũrĩire Jehova mũgũnda wake aambĩrĩirie o mwaka wa jubili-rĩ, gũtua kũu gwaku gũgatuĩka o ro ũguo.
• 18. No rĩrĩ, angĩkaamũrĩra Jehova mũgũnda wake thutha wa jubili ĩo, mũthĩnjĩri-Ngai akamũtarĩra cekeri cia kũrutwo o ta ũrĩa mĩaka ĩtariĩ ĩrĩa ĩtigarĩte mũira wa mwaka wa jubili ũkinye, nacio cekeri icio wee ũtuĩte atĩ nĩcio ikũrutwo inyihanyihagio.
• 19. Na rĩrĩ, mũndũ ũcio waamũrĩte mũgũnda, angĩkorũo nĩacirĩire kũũkũũra-rĩ, nĩakongerera gĩcunjĩ kĩngĩ gĩa gatano gĩa cekeri icio wee ũtuĩte atĩ nĩcio ikũrutwo nĩ ũndũ waguo, ũgĩcoke ũtuĩke wake ki.
• 20. No rĩrĩ, angĩtuĩka ndegũkũũra mũgũnda ũcio, kana akorũo nĩendeirie mũndũ ũngĩ, mũgũnda ũcio ndũgacoka gũkũũrĩka o na atĩa;
• 21. no rĩrĩ, hĩndĩ ya jubili, rĩrĩa mũgũnda ũcio ũkagathũka, nĩũgatuwo mũgũnda mũtheru wamũrĩirũo Jehova; na thutha wa ũguo mũgũnda ũcio ũgĩtuĩke wa mũthĩnjĩri-Ngai.
• 22. Na rĩrĩ, mũndũ angĩkaamũrĩra Jehova mũgũnda ũrĩa agũrĩte, na ti mũgũnda wa kũndũ kũrĩa egwatĩire gũgĩtuĩka gwake-rĩ,
• 23. mũthĩnjĩri-Ngai nĩakamũtarĩra cekeri cia kũrutwo ciigana o ta ũrĩa wee ũtuĩte irutwo nginya o mwaka wa jubili; nake mũndũ ũcio arute cekeri icio ũmũtuĩrĩire mũthenya o ro ũcio, ituĩke kĩndũ gĩtheru kĩrutĩirũo Jehova.
• 24. Na rĩrĩ, mwaka wa jubili wakinya, mũgũnda ũcio nĩũgacokerio mũndũ ũrĩa wawendetie, naguo ũguo nĩ ta kuuga mwene gĩthaka kĩu ũrĩa wakĩĩgwatĩire gĩgĩtuĩka gĩake.
• 25. Na rĩrĩ, gũtua gwaku guothe gũgatuĩka o ta ũrĩa cekeri ya handũ hau haamũre ĩigana ĩgĩtarũo; naguo ũguo nĩ ta kuuga cekeri ĩmwe ĩigananage na gera mĩrongo ĩĩrĩ.
• 26. No rĩrĩ, irigithathi riiki thĩinĩ wa nyamũ norĩo rĩtakaamũrĩrũo Jehova nĩ mũndũ o na ũrĩkũ, tondũ marigithathi nĩ ma Jehova; o na rĩrĩ rĩa ng’ombe kana rĩa mbũri-rĩ, nĩ rĩa Jehova.
• 27. Na rĩngĩkorũo nĩ rĩa nyamũ ĩrĩ mũgiro-rĩ, nĩ gũkũũra akarĩkũũra o ta ũrĩa wee ũgatua thogora warĩo, na arĩongerere gĩcunjĩ kĩngĩ gĩa gatano; kana hihi rĩngĩaga gũkũũrũo, rĩendĩo o ta ũrĩa wee ũgatua thogora warĩo.
• 28. No rĩrĩ, gũtirĩ kĩndũ o na kĩ kĩa indo iria mũndũ e nacio, kĩrĩa kĩamũrĩirũo Jehova na njĩra gĩtangĩkũũrĩka, gĩgacoka kwendio, kana gĩkũũrũo, o na kĩngĩkorũo nĩ mũndũ, kana nyamũ, o na kana mũgũnda wa kũndũ kũrĩa aagwatire gũgĩtuĩka gwake; kĩndũ o gĩothe kĩrĩa kĩamũrĩtwo na njĩra ĩo nĩkĩamurĩirũo Jehova tene na tene.
• 29. Gũtirĩ mũndũ o na ũrĩkũ waamũrirũo nĩ andũ na njĩra ĩo ũgakũũrũo; ti-itherũ ũcio no mũhaka oragwo.
• 30. Ningĩ-rĩ, indo ciothe cia bũrũri wanyu, o na ingĩkorũo nĩ mbeũ ciaguo, kana maciaro ma mĩtĩ yaguo, gĩcunjĩ gĩa ikũmi gĩacio nĩ kĩa Jehova; kĩu nĩ kĩamũrĩre Jehova.
• 31. Na rĩrĩ, mũndũ angĩtuĩka nĩegũkũũra kĩndũ o na kĩ thĩinĩ wa gĩcunjĩ kĩu arutaga gĩa ikũmi-rĩ, nĩ kuongerera akongerera gĩcunjĩ kĩngĩ gĩa gatano gĩa thogora wakĩo.
• 32. Na rĩrĩ, gĩcunjĩ gĩothe gĩa ikũmi kĩa rũũru rũa ng’ombe kana mbũri-rĩ, nyamũ o yothe ya kũhingia ikũmi ĩkĩhĩtũkĩra rũthanju-inĩ rũa mwene agĩcitara-rĩ, icio nĩcio ikarutĩrũo Jehova ituĩke gĩcunjĩ gĩa ikũmi.
• 33. Na rĩrĩ, mũndũ ndakanatuĩrie ĩrĩa njega, kana njũru, kana akũũranie; na angĩkamĩkũũrania o na atĩa, icio cierĩ, ĩo ĩkũũanĩtio nayo, o na ĩo ĩngĩ, nĩigatuĩka nyamũre harĩ Jehova; icio itĩgakũũrĩka o na atĩa.
• 34. Macio nĩmo maathani marĩa Jehova aathire Musa makoniĩ ciana cia Isiraeli o kũu kĩrĩma-inĩ gĩa Sinai.

Home