Go Back

Maũndũ Ma Alawii Chapter 25

• 1. NAKE Jehova akĩarĩria Musa o kũu kĩrĩma-inĩ gĩa Sinai, akĩmwĩra atĩrĩ,
• 2. Aria na ciana cia Isiraeli, ũciĩre ũũ: Hĩndĩ ĩrĩa mũgakinya bũrũri ũrĩa ndĩmũheaga-rĩ, bũrũri ũcio nĩũkagĩaga na thabatũ ĩkoniĩ Jehova.
• 3. Mũkahandaga mĩgũnda yanyu mĩaka ĩtandatũ, o nayo mĩgũnda yanyu ya mĩthabibu mũmĩcehage mĩaka ĩtandatũ, mũgĩcokagĩrĩria maciaro mayo;
• 4. no rĩrĩ, mwaka wa mũgwanja ũgatuĩka mwaka wa thabatũ ya kũhurũkia bũrũri ũcio ki, naguo ũguo nĩ ta kuuga thabatũ yamũrĩirũo Jehova; mwaka ũcio ndũkanahande mũgũnda waku, kana ũcehe mũgũnda waku wa mĩthabibu.
• 5. Irio iria itigarĩte mũgũnda mũkĩgetha ndũkanacoke gũcigetha mũcirĩe, o nacio thabibu cia mũthabibu waku ũcio ũtacehetwo ndũkanacitue ũcicokererie; mwaka ũcio ũgatuĩka wa kũhurũkia bũrũri ũcio ki.
• 6. Na rĩrĩ, irio cia maitĩka cia bũrũri wanyu ihinda rĩu rĩa thabatũ nĩcio ikamũtũũria, wee mwene, mwĩ na ndungata yaku ya mũndũ mũrũme, o na ya mũndũ-wa-nja, o na ndungata yaku ya mũcara, o na mũndũ wa kũngĩ ũrĩa mũikaranĩtie nake;
• 7. ningĩ nocio igatuĩka irio cia ũhiũ waku, o na cia nyamũ iria ingĩ irĩ bũrũri waku.
• 8. Nawe nĩũgatara mĩaka ĩo ya thabatũ mũgwanja, o ĩo ya kũhurũka ki, naguo ũguo nĩ ta kuuga ihinda rĩa mĩaka mũgwanja maita mũgwanja; nĩguo ihinda rĩa mĩaka ĩo mũgwanja ya thabatũ ĩhinge mĩaka mĩrongo ĩna na kenda.
• 9. Hĩndĩ ĩo nĩũkahuhithia coro mũno mũthenya wa ikũmi wa mweri wa mũgwanja; o mũthenya ũcio wa kũhorohanĩria-rĩ, nĩguo ũkahuhithia coro ũiguwo kũndũ guothe bũrũri waku.
• 10. Naguo mwaka ũcio wa mĩrongo ĩtano mũwamũrĩre Jehova, na mũheane ũhoro bũrũri wanyu kũndũ guothe, harĩ andũ othe, wa atĩ ũhoro wa kuohoranwo nĩ mũkinyu; naguo mwaka ũcio mũũtue wa jubili; nao andũ othe, mũndũ o mũndũ wanyu, ahũndũke, acoke kũrĩa aagwatĩte igai rĩake, na mũcoke mũndũ o mũndũ kũrĩ andũ ao.
• 11. Mwaka ũcio wa mĩrongo ĩtano-rĩ, nĩguo mũgatua wa jubili; mũtĩkanahande irio, kana mũgethe irio iria igũtigwo mũgũnda mũkĩgetha, kana mũcokererie thabibu cia mĩthabibu ĩo ĩtacehetwo.
• 12. Nĩ gũkorũo mwaka ũcio nĩguo wa jubili; na nĩũkonagwo wĩ mwamũre nĩ inyuĩ; irio cia maitĩka-rĩ, nocio mũkarĩaga.
• 13. Mwaka ũcio wa jubili-rĩ, andũ othe mũndũ o mũndũ wanyu nĩacoke kwao kũrĩa aagwatire igai.
• 14. Na rĩrĩ, ũngĩkenderia mũndũ ũrĩa ũngĩ gĩthaka, kana ũgũre gĩthaka harĩ mũndũ ũrĩa ũngĩ-rĩ, mũtikanahenanie o mũndũ na mũndũ ũrĩa ũngĩ;
• 15. no atĩ o ta ũrĩa mĩaka ĩgakoragwo ĩthirĩte thutha wa jubili, ũguo noguo ũgatua thogora hĩndĩ ya kũgũra gĩthaka kĩa mũndũ ũrĩa ũngĩ; o na ningĩ o ta ũrĩa imera cia kũhanda irio igakorũo itigarĩte-rĩ, ũguo noguo mũndũ ũrĩa ũngĩ agatua thogora hĩndĩ ĩrĩa egũkwenderia mũgũnda.
• 16. O ta ũrĩa mĩaka ĩgakorũo ĩingĩhĩte-rĩ, ũguo noguo ũkongerera thogora wa mũgũnda ũcio ũkwendio; ningĩ o ta ũrĩa mĩaka ĩgakorũo ĩnyihĩte-rĩ, ũguo noguo ũkanyihia thogora waguo; nĩ gũkorũo egũkwenderia mũgũnda nĩ ũndũ wa magetha marĩa ũkagetha, o na me maingĩ kana manyinyi.
• 17. Mũtikanahenanie, no wĩtigagĩre Ngai waku, nĩ gũkorũo niĩ nĩ niĩ Jehova Ngai wanyu.
• 18. Tondũ ũcio tũũrai mũrũmĩtie irĩra cia watho wakwa wa kũrũmĩrĩrũo, o na mũrũmie matuĩro makwa ma cira, mwĩkage o ta ũrĩa matariĩ, na nĩmũgatũũra bũrũri ũcio ndĩmũheaga mũtarĩ ũũru ũkũmũkora.
• 19. Naguo bũrũri ũcio nĩũgaciara maciaro maguo, na inyuĩ mũmarĩe mũhũne, na mũikare kuo mũtarĩ ũũru ũkũmũkora.
• 20. Na rĩrĩ, mũngĩkoria ũũ: Atĩrĩrĩ, mwaka wa mũgwanja-rĩ, tũkarĩa kĩ, kuona atĩ gũtirĩ irio tũkahanda, kana tũcokererie magetha o na marĩkũ?
• 21. Menyai atĩ nĩngatũma kĩrathimo gĩakwa kĩmũkinyĩre mwaka wa ĩtandatũ, na mwaka ũcio irio cia kũigana mĩaka ĩtatũ nĩikoneka.
• 22. Mwaka wa ĩnana nĩguo mũgacoka kũhanda irio; na mũrĩage maciaro ma mũgũnda ma mũthithũ wanyu ũrĩa mweigĩire mbere ĩo, o nginya mwaka wa kenda rĩrĩa maciaro maguo magacoka kuoneka.
• 23. Nacio ithaka itikendagio o kwendio biũ; nĩ ũndũ bũrũri ũcio nĩ wakwa; nĩ gũkorũo inyuĩ mũũtũũraga ta mũrĩ ageni akwa, o na ta mũrĩ ahoi a gũtũũrania na niĩ.
• 24. Na rĩrĩ, bũrũri wothe ũrĩa mwĩgwatĩire ũgatuĩka wanyu-rĩ, nĩmũrĩĩtĩkagĩra atĩ ithaka icokage gũkũũrũo.
• 25. Na rĩrĩ, mũrũ wa thoguo angĩkĩara, nake endie gĩcigo gĩa gĩthaka kĩrĩa aagwatire, gĩgĩtuĩka gĩake-rĩ, mũndũ wa nyũmba yao ũrĩa makuhanĩrĩirie nake nĩoke akũũre gĩthaka kĩu mũrũ wa ithe endetie.
• 26. Na rĩrĩ, hihi mũndũ angĩkorũo atarĩ na mũndũ wao ũngĩhota gũgĩkũũra, nake we mwene acoke atonge, one indo ciiganĩte cia gũgĩkũũra,
• 27. nĩatare mĩaka ĩrĩa ĩhĩtũkĩte gwata hĩndĩ ĩrĩa kĩendirio; agĩcokerie mũndũ ũrĩa endeirie gĩthaka kĩu indo ciiganĩire mĩaka ĩrĩa ĩtigarĩte mwaka wa jubili ũgĩgakinya; agĩcoke gũtũũra gĩthaka kĩu kĩarĩ gĩake.
• 28. No rĩrĩ, angĩkorũo ndangĩhota kuona ũndũ wa gwĩka wa gũtũma kĩmũcokerere-rĩ, hĩndĩ ĩo gĩthaka kĩu endirie kĩrĩtũũraga kĩrĩ o kĩa mũndũ ũrĩa wakĩgũrire o nginya hĩndĩ ĩrĩa mwaka wa jubili ũgakinya; nayo jubili yakinya nĩguo gĩkagathũka, mũndũ ũcio agĩcoke gĩthaka kĩu kĩarĩ gĩake.
• 29. Na rĩrĩ, mũndũ angĩendia nyũmba ya gũtũũrũo nĩ andũ, ĩrĩ itũũra-inĩ inene rĩirigĩtwo, aahota kũmĩkũũra mwaka ũmwe ũtanathira kuuma hĩndĩ ĩrĩa yendirio; ihinda rĩa mwaka mũgima norĩo nyũmba ĩo ĩngĩkũũrĩka nĩ mũndũ ũcio.
• 30. Nayo nyũmba ĩo ĩrĩ itũũra-inĩ rĩu inene rĩirigĩtwo ĩngĩaga gũkũũrũo ihinda rĩu rĩa mwaka mũgima, ĩgatũũra ĩrĩ ya mũndũ ũcio wamĩgũrire ĩtuĩke yake biũ, njiaro-inĩ ciake ciothe; o na jubili yakinya-rĩ, nyũmba ĩo ndĩkagathũka.
• 31. No rĩrĩ, nyũmba cia tũtũũra tũrĩa tũtairigĩtwo, ũhoro wacio ũkahaanana na wa mĩgũnda ĩrĩa ĩrĩ ithaka-inĩ cia andũ; icio nĩigakũũragwo, na hĩndĩ ya jubili nĩikagathũkaga.
• 32. No rĩrĩ, ha ũhoro wa matũũra ma Alawii-rĩ, nyũmba cia matũũra marĩa megwatĩire magatuĩka mao, Alawii acio maahota gũcikũũra o hĩndĩ ĩrĩa yothe mangĩenda.
• 33. Na rĩrĩ, mũndũ angĩgũra nyũmba harĩ Mũlawii, nyũmba ĩo yendetio ĩrĩ itũũra-inĩ rĩrĩa rĩaheirũo Alawii, nĩĩkagathũka hĩndĩ ya jubili; nĩ gũkorũo nyũmba iria irĩ thĩinĩ wa matũũra ma Alawii, nĩcio igai rĩrĩa maagaĩirũo thĩinĩ wa ciana cia Isiraeli.
• 34. No rĩrĩ, ithaka cia ũrĩithio iria irigicĩirie na kũu matũũra-inĩ mao, no mũhaka itikanendio nĩ ũndũ kũndũ kũu nĩkuo maaheirũo gũtũũre gwĩ kwao tene na tene.
• 35. Na rĩrĩ, mũndũ wa rũrĩrĩ rũanyu angĩkĩara, ahinyare o kũhinyara mwĩ hamwe nake, mũtiiragĩrĩre; na atũũranie nawe ta arĩ mũgeni waku, na ta arĩ mũthami waku.
• 36. Ndũkanamwĩtie uumithio wa mbia iria ũkũmũteithia nacio, kana ũmwĩre aciongerere; no rĩrĩ, wĩtigagĩre Ngai waku, nĩ getha mũrũ wa thoguo atũũranagie nawe.
• 37. Ningĩ ndũkanamuohorere mbia ciaku nĩguo wonage uumithio wacio, kana ũmũhe irio ciaku nĩguo agacicokia ciongereirũo.
• 38. Niĩ nĩ niĩ Jehova Ngai wanyu, ũrĩa wamũrutire bũrũri wa Misiri ndĩmũhe bũrũri wa Kanaani, nĩ getha nduĩke Ngai wanyu.
• 39. Na rĩrĩ, mũndũ wa rũrĩrĩ rũanyu angĩkĩara mwĩ hamwe nake, eyendie harĩ wee, ndũkanamũrutithie wĩra ta arĩ ngombo;
• 40. no nĩagatũũrania nawe ta ndungata yaku ya mũcara, o na ta mũthami waku; nake atũũre akũrutagĩra wĩra nginya o mwaka wa jubili;
• 41. na hĩndĩ ĩo agakiuma gwaku, we mwene, o na ciana ciake irĩ hamwe nake, agĩcoke harĩ andũ a nyũmba yao, o na acoke kũndũ kũrĩa maithe maagwatire gũgĩtuĩka kwao.
• 42. Nĩ gũkorũo andũ aya nĩ ndungata ciakwa, iria ndarutire bũrũri wa Misiri, nao matirĩ hingo makendio ta marĩ ngombo.
• 43. Ndũkanamwathe ũmũhinyĩrĩirie, no nĩũgetigagĩra Ngai waku.
• 44. Ningĩ ha ũhoro wa ngombo ciaku cia arũme, o na cia andũ-a-nja iria ũkagĩa nacio, ũkagũraga ngombo icio cia arũme, o na cia andũ-a-nja harĩ ndũrĩrĩ iria ĩkũrigicĩirie.
• 45. O na ningĩ mũkagũraga ngombo harĩ ciana cia andũ a kũngĩ arĩa matũũranĩtie na inyuĩ, o na harĩ andũ a nyũmba ciao arĩa matũũranĩtie na inyuĩ, o arĩa maciarĩirũo nĩo bũrũri wanyu, nao andũ acio matuĩke anyu,
• 46. a gũgatigĩrũo ciana cianyu iria igoka thutha wanyu ta marĩ igai rĩacio, magatuĩke a cio. Andũ acio nĩo mũgatũũra mũrutaga ngombo cianyu harĩ o tene na tene; no rĩrĩ, mũtikanetue aathani a gwatha ciana cia Isiraeli, o icio mũrĩ a ithe ũmwe nacio, atĩ nĩguo mũndũ aathage mũndũ ũrĩa ũngĩ wanyu amũhinyĩrĩirie.
• 47. Na rĩrĩ, mũndũ wa kũngĩ ũrĩa ũtũũrĩte bũrũri wanyu, kana mũthami wanyu, angĩtonga, nake mũndũ wa rũrĩrĩ rũanyu ũmwe ũrĩa ũikaranĩtie nake athĩne, na eyendie kwĩ mũndũ ũcio wa kũngĩ, kana ũcio mũthami wanyu, kana kũrĩ andũ a rũciaro rũa nyũmba ya mũndũ ũcio wa kũngĩ-rĩ,
• 48. mũndũ ũcio wa rũrĩrĩ rũanyu aahota gũcoka gũkũũrũo thutha wa aarĩkia kwendio; nake mũndũ ũrĩa ũngĩmũkũũra nĩ ũmwe wa ariũ a ithe,
• 49. kana ithe mũnyinyi, o na kana mũriũ; acio maahota kũmũkũũra; kana mũndũ wa nyũmba yao ũrĩa makuhanĩrĩirie nake aahota kũmũkũũra; kana hihi mũndũ ũcio ũthĩnĩte angĩcoka gũtonga-rĩ, aahota gwĩkũũra we mwene.
• 50. Nake mũndũ ũcio na ũcio ũngĩ wamũgũrĩte matare mĩaka ĩrĩa ĩrĩ ho kuuma mwaka ũrĩa eyendirie harĩ we, nginya mwaka wa jubili; nacio mbia cia kũmũkũũra iringane na ũrĩa mĩaka ĩo ĩtariĩ, ituĩke o ta iria mũndũ wa mũcara angĩheo.
• 51. Kũngĩkorũo mĩaka nĩĩtigarĩte mĩingĩ, o ta ũrĩa mĩaka ĩo ĩtariĩ-rĩ, ũguo noguo mũndũ ũcio weyendirie agacokia mbia cia gwĩkũũra ciumĩte thĩinĩ wa iria aagũrĩtwo nacio.
• 52. Ningĩ kũngĩkorũo nĩgũtigarĩte mĩaka mĩnyinyi mwaka wa jubili ũgĩgakinya, mũndũ ũcio, me na ũcio ũngĩ, matare mĩaka ĩo, nake acokie mbia cia gwĩkũũra nacio o ta ũrĩa mĩaka ĩo ĩtariĩ.
• 53. O ta ũrĩa ndungata ya mũcara ĩikaraga mwaka o mwaka-rĩ, ũguo noguo agaikara na mũndũ ũcio wamũgũrire; na ndũkanareke amĩathe amĩhinyĩrĩirie ũkĩonaga.
• 54. Nake angĩaga gũkũũrũo na njĩra o na ĩmwe ya icio, nĩagakĩrekwo ethiĩre, we mwene na ciana ciake hamwe nake, mwaka wa jubili wakinya.
• 55. Nĩ gũkorũo ciana cia Isiraeli nĩ ndungata ciakwa; icio nĩcio ndungata ciakwa iria ndarutire bũrũri wa Misiri; niĩ nĩ niĩ Jehova Ngai wanyu.

Home