Go Back

Maũndũ Ma Alawii Chapter 23

• 1. NINGĨ Jehova akĩarĩria Musa, akĩmwĩra atĩrĩ,
• 2. Arĩria ciana cia Isiraeli, ũciĩre ũũ: Ciathĩ cia Jehova iria ciathanĩtwo, o iria mũkahunjanĩria ũhoro wacio wa atĩ nĩ itũngano nyamũre-rĩ, ciathĩ icio nĩ niĩ ndĩciathanĩte.
• 3. Wĩra ũkarutagwo mĩthenya ĩtandatũ; no rĩrĩ, mũthenya wa mũgwanja nĩ thabatũ ya kũhurũka o kũhurũka ki, na ũtuĩke wa gĩtũngano kĩamũre; mũthenya ũcio mũtikaruta wĩra wa mũthemba o na ũrĩkũ; tondũ nĩ thabatũ ĩtuĩtwo ya Jehova kũndũ kũrĩa guothe mũtũũrĩte.
• 4. Ici nĩcio ciathĩ iria ciathanĩtwo cia Jehova; naguo ũguo nĩ ta kuuga itũngano nyamũre iria mũkahunjanĩria ũhoro wacio ihinda rĩacio rĩrĩa rĩathanĩtwo rĩakinya.
• 5. Mweri wa mbere, mũthenya wa ikũmi na ĩna waguo, hwaĩ-inĩ gũtanatuka-rĩ, nĩguo Bathaka ya Jehova ĩkaambĩrĩrio.
• 6. Naguo mũthenya wa ikũmi na ĩtano, wa mweri o ro ũcio, nĩguo wa gĩathĩ kĩa Jehova kĩa mĩgate ĩtarĩ mĩimbie; mĩgate ĩo ĩtarĩ mĩimbie mũkamĩrĩaga mĩthenya mũgwanja.
• 7. Na rĩrĩ, mũthenya wa mbere nĩmũkagĩa na gĩtũngano kĩamũre, na mũtikaruta wĩra o na ũrĩkũ ũrĩa wa ndũire.
• 8. Nĩ kũruta mũkarutagĩra Jehova ihaki rĩa gũcinwo na mwaki mĩthenya mũgwanja, naguo mũthenya wa mũgwanja mũgĩe na gĩtũngano kĩngĩ kĩamũre, na mũtikanarute wĩra o na ũrĩkũ ũrĩa wa ndũire.
• 9. Nake Jehova akĩarĩria Musa, akĩmwĩra atĩrĩ,
• 10. Arĩria ciana cia Isiraeli, ũciĩre atĩrĩ, Mwakinya bũrũri ũrĩa ndĩmũheaga, na mũgethe magetha maguo-rĩ, nĩmũgatwara gĩtĩa kĩa mbere kĩa ngano ĩrĩa mũkagetha harĩ mũthĩnjĩri-Ngai;
• 11. nake athũngũthĩrie gĩtĩa kĩu mbere ya Jehova, nĩguo gĩĩtĩkĩrĩke nĩ ũndũ wanyu; rũciũ rũrũ rũngĩ thutha wa thabatũ nĩguo mũthĩnjĩri-Ngai agagĩthũngũthia.
• 12. Na rĩrĩ, mũthenya ũrĩa mũgathũngũthia gĩtĩa kĩu, nĩmũkarutĩra Jehova gatũrũme ka mwaka ũmwe gatarĩ na kaũũgũ, gatuĩke ihaki rĩa njino.
• 13. O narĩo ihaki rĩa mũtu wa kũrutanĩrio narĩo, rĩtuĩke icunjĩ igĩrĩ cia ikũmi cia eba ng’ima cia mũtu ũrĩa mũhinyu mũno, ũtukanĩtio na maguta, naguo ũtuĩke ihaki rĩa Jehova rĩa gũcinwo na mwaki rĩa gũtũma mũtararĩko ũrĩa ũnungaga wega ũiguwo nĩwe; nacio indo ciarĩo iria irutagwo cia kũnyuwo cia igongona ituĩke gĩcunjĩ gĩa kana kĩa hini ĩmwe ya ndibei.
• 14. Na rĩrĩ, mũtikanarĩe ngano ya mũhando, o na ĩngĩkorũo nĩ mũgate, kana ngano hĩhie, kana ĩrĩa njigũ ĩrĩ magira-inĩ, o nginya mũthenya ũcio kĩũmbe, mwarĩkia kũrutĩra Ngai wanyu kĩndũ kĩu; naguo ũndũ ũcio ũtuĩke kĩrĩra kĩa watho wa kũrũmĩrĩrũo tene na tene njiaro-inĩ cianyu ciothe kũndũ kũrĩa guothe mũgatũũra.
• 15. Na rĩrĩ, gwata rũciũ rũrũ rũngĩ thutha wa thabatũ ĩo mwarutĩte gĩtĩa kĩu kĩa igongona rĩa gũthũngũthio, nĩmũgetarĩra thabatũ ingĩ ihinge mũgwanja,
• 16. naguo ũguo nĩ ta kuuga mwĩtarĩre matukũ mĩrongo ĩtano, rũciũ rũrũ rũngĩ rũa thabatũ ya mũgwanja rũĩ ho, mũgĩcoke mũrutĩre Jehova igongona rĩngĩ rĩa mũtu wa ngano ya mũhando.
• 17. Na rĩrĩ, ciikaro-inĩ cianyu kũrĩa mũikarĩte nĩmũkaruta mĩgate ĩĩrĩ ya gũthũngũthio, ĩthondekwo na mũtu mũhinyu mũno, ũthimĩtwo icunjĩ igĩrĩ cia ikũmi cia eba ng’ima, ũrugĩtwo na ndawa ya kũimbia, ĩtuĩke irio cia maciaro ma mbere cia kũrutĩrũo Jehova.
• 18. Nayo mĩgate ĩo ĩrutanĩrio o hamwe na tũtũrũme mũgwanja tũtakĩrĩtie mwaka ũmwe, tũtarĩ na kaũũgũ, o na ndegwa ĩmwe ĩtarĩ ngũrũ, na ndũrũme igĩrĩ; nacio icio ituĩke ihaki rĩa njino rĩa kũrutĩrũo Jehova, hamwe na ihaki rĩarĩo rĩa mũtu, o na igongona rĩa indo ciarĩo iria irutagwo cia kũnyuwo, naguo ũguo nĩ ta kuuga ihaki rĩa gũcinwo na mwaki rĩa gũtũma mũtararĩko ũrĩa ũnungaga wega ũiguwo nĩ Jehova.
• 19. Ningĩ mũrute thenge ĩmwe ĩtuĩke igongona rĩa mehia, na tũtũrũme twĩrĩ, tũtakĩrĩtie mwaka ũmwe twa kũrutwo magongona ma ũiguano.
• 20. Nake mũthĩnjĩri-Ngai acithũngũthanĩrie hamwe na mĩgate ĩo ya irio cia maciaro ma mbere, ituĩke igongona rĩa gũthũngũthĩrio mbere ya Jehova, hamwe na tũtũrũme tũu twerĩ, nacio indo icio ciothe ciamũrĩrũo Jehova, icoke ituĩke cia mũthĩnjĩri-Ngai.
• 21. Ningĩ mũthenya o ro ũcio ũhoro ũhunjanĩrio atĩ kũgĩe gĩtũngano kĩamũre, na mũthenya ũcio mũtikaruta wĩra o na ũrĩkũ wa ndũire; naguo ũndũ ũcio ũtuĩke kĩrĩra kĩa watho wa kũrũmĩrĩrũo njiaro-inĩ cianyu ciothe kũndũ kũrĩa guothe mũgatũũra.
• 22. Na rĩrĩ, hĩndĩ ĩrĩa mũkũgetha irio cia bũrũri wanyu, ndũkanagethe ndere-inĩ cia mũgũnda waku ũninũkĩrĩrie, kana ũũnganie rũitĩki rũa magetha rũrĩa rũngĩhaarĩka; rũu nĩruo ũgatigĩria mũthĩni, o na mũũki; niĩ nĩ niĩ Jehova Ngai waku.
• 23. Ningĩ Jehova akĩarĩria Musa, akĩmwĩra atĩrĩ,
• 24. Arĩria ciana cia Isiraeli, ũciĩre ũũ: Mweri wa mũgwanja, o mũthenya wa mbere waguo, nĩmũkaũtua wa kũhurũka o kũhurũka ki, naguo ũtuĩke wa gũtũma mũririkanwo na ũndũ wa kũhuha tũrumbeta, na ningĩ mũthenya ũcio kũgĩe gĩtũngano kĩamũre.
• 25. Mũthenya ũcio-rĩ, mũtikaruta wĩra o na ũrĩkũ wa ndũire, na nĩmũkarutĩra Jehova ihaki rĩa gũcinwo na mwaki.
• 26. Nake Jehova agĩcoka akĩarĩria Musa, akĩmwĩra ũũ:
• 27. Ningĩ mũthenya wa ikũmi wa mweri o ro ũcio wa mũgwanja-rĩ, nĩguo mũthenya wa horohio, na no mũkagĩa na gĩtũngano kĩamũre na mũthenya ũcio mwĩhinge kũrĩa irio na mũrutĩre Jehova ihaki rĩa gũcinwo na mwaki.
• 28. Naguo mũthenya ũcio mũtikaruta wĩra wa mũthemba o na ũrĩkũ, nĩ gũkorũo nĩ mũthenya wa horohio ya kũmũhoroheria mbere ya Jehova, Ngai wanyu.
• 29. Nĩ gũkorũo mũndũ o wothe ũrĩa ũtakehinga kũrĩa irio mũthenya ũcio, nĩakaingatwo athengio kũrĩ andũ ao.
• 30. Na ningĩ mũndũ o wothe ũrĩa ũkaruta wĩra wa mũthemba o na ũrĩkũ mũthenya ũcio, mũndũ ũcio nĩ kũnina ngamũnina ndĩmweherie kũrĩ andũ ao.
• 31. Mũtikaruta wĩra wa mũthemba o na ũrĩkũ; kĩu nĩkĩo kĩrĩra kĩa watho wa kũrũmĩrĩrũo tene na tene njiaro-inĩ cianyu ciothe, kũndũ kũrĩa guothe mũgatũũra.
• 32. Naho ha ũhoro wanyu-rĩ, mũthenya ũcio ũgatuĩka thabatũ ya kũhurũka o kũhurũka ki, na wa kwĩhinga kũrĩa irio; hwaĩ-inĩ wa mũthenya wa kenda wa mweri o ro ũcio-rĩ, nĩguo mũkaambĩrĩria kũmenyerera thabatũ ĩo yanyu, kuuma hwaĩ-inĩ o ro ũcio nginya o hwaĩ-inĩ wa rũciũ rũrũ rũngĩ.
• 33. Ningĩ Jehova akĩarĩria Musa, akĩmwĩra atĩrĩ,
• 34. Aria na ciana cia Isiraeli, ũciĩre ũũ: Mũthenya wa ikũmi na ĩtano wa mweri o ro ũcio wa mũgwanja nĩguo gũkagĩa gĩathĩ kĩa Jehova gĩa ithũnũ mĩthenya mũgwanja.
• 35. Mũthenya wa mbere wayo ũgatuĩka wa gĩtũngano kĩamũre, na mũtikaruta wĩra o na ũrĩkũ wa ndũire.
• 36. Nĩ mĩthenya mũgwanja mũkarutagĩra Jehova mahaki ma gũcinwo na mwaki; naguo mũthenya wa ĩnana mũgĩe na gĩtũngano kĩngĩ kĩamũre; ningĩ mũthenya ũcio mũrutĩre Jehova ihaki rĩa gũcinwo na mwaki; mũthenya ũcio nĩguo ũgatuĩka wa gĩathĩ gĩa kũrigĩrĩria, na mũtikaruta wĩra o na ũrĩkũ wa ndũire.
• 37. Icio nĩcio ciathĩ iria ciathanĩtwo cia Jehova, iria mũkahunjanĩria ũhoro wacio wa atĩ nĩ itũngano nyamũre cia kũrutĩra Jehova mahaki ma gũcinwo na mwaki; naguo ũguo nĩ ta kuuga ihaki rĩa njino, na ihaki rĩa mũtu, na rĩa thĩnjo, o na igongona rĩa indo iria irutagwo cia kũnyuwo, o igongona mũthenya warĩo.
• 38. Ningĩ hamwe na ciathĩ icio mũririkanage thabatũ cia Jehova, na iheo cianyu iria mũrutaga, na mĩĩhĩtwa yanyu yothe ĩrĩa mwĩhĩtaga, o na indo ciothe iria mũrutagĩra Jehova na kwĩendera.
• 39. Na rĩrĩ, mũthenya o ro ũcio wa ikũmi na ĩtano wa mweri ũcio wa mũgwanja, hĩndĩ ĩrĩa mũgakorũo mũgethete irio cia bũrũri wanyu-rĩ, mũgakĩigĩra Jehova gĩathĩ mĩthenya mũgwanja; mũthenya wa mbere ũtuĩke wa kũhurũka o kũhurũka ki, o naguo mũthenya wa ĩnana ũtuĩke wa kũhurũka o kũhurũka ki o ro ũguo.
• 40. Naguo mũthenya wa mbere mwĩoere maciaro ma mĩtĩ ĩrĩa mĩega, na mathĩgĩ ma mĩtende, na honge cia mĩtĩ ĩrĩa ĩĩ na mathangũ maingĩ, o na cia ĩrĩa ĩmeraga tũrũũĩ-inĩ, na mũikare mĩthenya mũgwanja mũgĩkenera mbere ya Jehova Ngai wanyu.
• 41. Nakĩo gĩathĩ kĩu mũgĩtue gĩa kũigagĩrũo Jehova mĩthenya mũgwanja o mwaka; naguo ũndũ ũcio ũtuĩke kĩrĩra kĩa watho wa kũrũmĩrĩrũo tene na rene njiaro-inĩ cianyu ciothe. Gĩathĩ kĩu-rĩ, mũgakĩigaga o mweri wa mũgwanja mwaka o mwaka.
• 42. Mũgaikaraga ithũnũ-inĩ mĩthenya ĩo mũgwanja. Thĩinĩ wa Isiraeli-rĩ, andũ othe arĩa maciarĩirũo bũrũri wanyu, magaikaraga ithũnũ-inĩ,
• 43. nĩ getha njiaro cianyu imenyage atĩ nĩndatũmire ciana cia Isiraeli itũũre ithũnũ-inĩ rĩrĩa ndacirutire bũrũri wa Misiri. Niĩ nĩ niĩ Jehova Ngai wanyu.
• 44. Nake Musa agĩkĩhe ciana cia Isiraeli ũhoro wa ciathĩ icio ciaigĩtwo cia Jehova.

Home