Go Back

Maũndũ Ma Alawii Chapter 22

• 1. Ningĩ Jehova akĩarĩria Musa, akĩmwĩra atĩrĩ,
• 2. Arĩria Haruni na ariũ ake ũmere memenyerere ũhoro-inĩ wa indo iria nyamũre cia ciana cia Isiraeli, iria manyamũragĩra, nĩ getha matigathahie rĩĩtwa rĩakwa itheru; niĩ nĩ niĩ Jehova.
• 3. Mere atĩrĩ, Mũndũ o na ũrĩkũ wa mbeũ yanyu yothe, thĩinĩ wa njiaro cianyu, ũrĩa ũgathengerera indo icio nyamũre, o iria ciamũragĩrũo Jehova nĩ ciana cia Isiraeli, hĩndĩ ĩrĩa e na thahu, mũndũ ũcio nĩakaingatwo athengio mbere yakwa; niĩ nĩ niĩ Jehova.
• 4. Mũndũ o na ũrĩkũ wa mbeũ ya Haruni angĩkagwatwo nĩ mangũ, kana mwĩrĩ wake ũkorũo ũkiura nĩ ũndũ wa mũthiori, mũndũ ũcio-rĩ, ndakarĩa indo iria theru, o nginya hĩndĩ ĩrĩa akaninwo thahu ũcio. Na mũndũ o wothe ũrĩa ũkahutia kĩndũ o na kĩ kĩgwatĩtio thahu nĩ kĩimba, kana mũndũ akorũo oimĩtwo nĩ hinya wa arũme,
• 5. kana akahutia nyamũ o na ĩrĩkũ ĩrĩa ĩtambaga thĩ ĩngĩmũgwatia thahu, kana ahutie mũndũ wĩ na ũndũ o na ũrĩkũ ũngĩmũgwatia thahu.
• 6. Mũndũ ũrĩa ũkahutia kĩndũ o na kĩ kĩa mũthemba ũcio-rĩ, agatinda e na thahu nginya o hwaĩ-inĩ, na ndakarĩa kĩndũ o na kĩmwe kĩa indo icio nyamũre, tiga o ethambire mwĩrĩ na maĩ.
• 7. Na rĩrĩ, riũa rĩathũa, mũndũ ũcio nĩagathirũo nĩ thahu; na thutha wa ũguo acoke kũrĩa indo icio nyamũre, nĩ gũkorũo nĩcio irio ciake cia kũmũtũũria.
• 8. Nyamũ ĩkuĩte o ro ũguo, kana ĩrĩa ĩtinangĩtio nĩ nyamũ cia gĩthaka, ndakanamĩrĩe ethahie nayo; niĩ nĩ niĩ Jehova.
• 9. Tondũ ũcio nĩmamenyagĩrĩre maũndũ marĩa ndĩmataarĩte mekage, matigacokererũo nĩ mehia mangĩmathahia, magĩkue nĩ ũndũ wa mehia macio. Niĩ nĩ niĩ Jehova ũrĩa ũmaamũraga ngamatheria.
• 10. Gũtirĩ mũndũ wa kũngĩ o na ũrĩkũ ũtarĩ wa nyũmba ya athĩnjĩri-Ngai ũkarĩa kĩndũ gĩa icio nyamũre; o na mũgeni ũrĩa ũtũũranĩtie na mũthĩnjĩri-Ngai, kana ndungata ya mũcara-rĩ, hatirĩ ũkarĩa kĩndũ gĩa icio nyamũre.
• 11. No rĩrĩ, mũthĩnjĩri-Ngai angĩgũra mũndũ o na ũrĩkũ-rĩ, mũndũ o ro ũcio egũrĩire na mbia ciake mwene, nĩarĩage irio ciake, o nao arĩa maciarĩirũo gwake mũciĩ nĩmacirĩage.
• 12. Na rĩrĩ, mwarĩ wa mũthĩnjĩri-Ngai angĩkahikio nĩ mũndũ ũtarĩ wa nyũmba ya athĩnjĩri-Ngai, ndakarĩa indo iria nyamũre ituĩtwo igongona rĩa kũiyũkio na igũrũ.
• 13. No rĩrĩ, mwarĩ wa mũthĩnjĩri-Ngai angĩgakorũo arĩ wa ndigwa, kana ateetwo nĩ mũrũme, na akorũo atarĩ na mwana, na agakorũo acokete gwa ithe mũciĩ o ta hĩndĩ ĩrĩa aarĩ mũirĩtu, nĩakarĩa irio cia ithe; no rĩrĩ, mũndũ o na ũrĩkũ ũtarĩ wa nyũmba yao ndakarĩa.
• 14. Na rĩrĩ, mũndũ angĩrĩa indo imwe thĩinĩ wa icio nyamũre atekũmenya atĩ nĩ nyamũre-rĩ, ndarĩ hingo atagacokeria mũthĩnjĩri-Ngai indo icio nyamũre, na aciongerere gĩcunjĩ kĩngĩ gĩa gatano gĩacio.
• 15. Athĩnjĩri-Ngai matikanathahie indo iria nyamũre cia ciana cia Isiraeli macithũkie, o iria irutĩire Jehova,
• 16. nĩ getha matikae gũtũma icokererũo nĩ wĩhia ũrĩa ũtũmaga andũ monwo atĩ nĩmahĩtĩtie, ingĩrĩa indo ciacio iria nyamũre; nĩ gũkorũo niĩ nĩ niĩ Jehova ũrĩa ũciamũraga ngacitheria.
• 17. Ningĩ Jehova akĩarĩria Musa, akĩmwĩra atĩrĩ,
• 18. Arĩria Haruni, na ariũ ake, o na andũ othe a ciana cia Isiraeli ũmere ũũ: Mũndũ o wothe wa nyũmba ya Isiraeli, kana wa andũ a kũngĩ arĩa matũũraga thĩinĩ wa Isiraeli, ũrĩa ũkũrutĩra Jehova kĩndũ gĩake, o na kĩngĩkorũo nĩ kĩa ũhoro o na ũrĩkũ wa mĩĩhĩtwa yao, kana kĩa ũhoro wa indo ciao iria marutaga na kwĩendera, o iria marutagĩra Jehova ituĩke ihaki rĩa njino-rĩ,
• 19. nĩarute njamba ĩtarĩ na kaũũgũ thĩinĩ wa ng’ombe, kana thĩinĩ wa ng’ondu, kana thĩinĩ wa mbũri, nĩ getha mwĩtĩkĩrĩke nĩ Jehova.
• 20. No rĩrĩ, nyamũ o yothe ĩrĩa ĩrĩ kaũũgũ, mũtikanamĩrute; nĩ gũkorũo ndĩgetĩkĩrĩka ũhoro-inĩ wanyu.
• 21. Na rĩrĩ, mũndũ o wothe ũrĩa ũkũrutĩra Jehova kĩndũ kĩa igongona rĩa ũiguano nĩ getha ahingie mwĩhĩtwa wake, kana akorũo akĩrutĩte na kwĩendera, o na kĩngĩkorũo kĩrĩ rũũru-inĩ rũa ng’ombe, kana rũa mbũri-rĩ, no mũhaka arute kĩagĩrĩru kũna kũna nĩ getha gĩĩtĩkĩrĩke; na gĩtikanakorũo kĩrĩ na kaũũgũ thĩinĩ wakĩo.
• 22. Gũtirĩ nyamũ ndumumu, kana nyunĩku ihĩndĩ, kana ndinie handũ, kana ĩĩ na ironda mwĩrĩ, kana ĩrũarĩte mũhare, kana nyomboku mwĩrĩ, ĩkarutĩrũo Jehova nĩ inyuĩ, kana mũmĩrutĩre Jehova ihaki rĩa gũcinwo na mwaki kĩgongona-inĩ.
• 23. Nayo ndegwa kana mbũri, ĩrĩa ĩtuĩkĩte kĩũgũ nĩ ũndũ wa kũraiha kĩĩga kĩayo, kana gĩgakuhĩha makĩria, mwahota kũmĩruta ĩtuĩke igongona rĩa kũrutwo na kwĩendera; no rĩrĩ, ha ũhoro wa mwĩhĩtwa ndĩgetĩkĩrĩka.
• 24. Nyamũ ĩrĩa ĩrĩ igũtha nyee-inĩ, kana ĩkamendereka nyee, kana ĩgaatũka, kana ikahakũrũo, mũtikanamĩrutĩre Jehova; nyamũ ta ĩo ndĩkanarutwo igongona bũrũri-inĩ wanyu.
• 25. O na ningĩ mũtikanetĩkĩre kũheo nyamũ o na ĩmwe ya mũthemba ta ũcio nĩ mũndũ wa kũngĩ nĩguo ĩtuĩke irio cia Ngai wanyu; nĩ gũkorũo woru wacio wĩ thĩinĩ wacio, ningĩ irĩ na ũũgũ thĩinĩ wacio. Itigetĩkĩrĩka ũhoro-inĩ wanyu.
• 26. Ningĩ Jehova akĩarĩria Musa, akĩmwĩra atĩrĩ,
• 27. Ndegwa kana ng’ombe ĩngĩciarũo-rĩ, no mũhaka ĩikare na nyina mĩthenya mũgwanja; no rĩrĩ, kuuma mũthenya wa ĩnana, o na thutha waguo, nĩĩgetĩkĩrĩka ĩtuĩke kĩndũ gĩa kũrutĩrũo Jehova ihaki rĩa gũcinwo na mwaki.
• 28. No rĩrĩ, ng’ombe, kana mwatĩ, kana harika, mũtikanacithĩnjanĩrie hamwe na mwana wayo cierĩ, mũthenya o ro ũmwe.
• 29. Ningĩ hĩndĩ ĩrĩa mũkũruta igongona rĩa gũcokeria Ngai ngatho, mũrĩrutage na njĩra ĩrĩa rĩngĩĩtĩkĩrĩka nĩ Jehova ũhoro-inĩ wanyu.
• 30. Igongona rĩu rĩkarĩo mũthenya o ro ũcio rĩarutwo; mũtikanatigarie kĩndũ o na kĩ kĩarĩo kĩraare nginya o rũcinĩ; niĩ nĩ niĩ Jehova.
• 31. Menyagĩrĩrai maathani makwa, na mũmekage; niĩ nĩ niĩ Jehova.
• 32. Na mũtikanathahie rĩĩtwa rĩakwa itheru, no rĩrĩ, nĩ kaba nyonagwo nyamũrĩtwo ngatuwo mũtheru nĩ ciana cia Isiraeli; niĩ nĩ niĩ Jehova ũrĩa ũmwamũraga ngamũtheria,
• 33. na nĩ niĩ ndamũrutire bũrũri wa Misiri, nĩguo nduĩke Ngai wanyu; niĩ nĩ niĩ Jehova.

Home