Go Back

Maũndũ Ma Alawii Chapter 20

• 1. Nake Jehova akĩarĩria Musa, akĩmwĩra atĩrĩ,
• 2. Ningĩ coka wĩre ciana cia Isiraeli ũũ: Mũndũ o wothe wa ciana cia Isiraeli, kana mũndũ wa kũngĩ ũrĩa ũtũũrĩte thĩinĩ wa Isiraeli ũkanengera Moleku mũndũ wa rũciaro rũake, amwamũrĩre-rĩ, ndarĩ hingo atakoragwo; nĩ kũhũrũo akahũrũo na mahiga nyuguto nĩ andũ a bũrũri.
• 3. Niĩ na niĩ-rĩ, nĩndĩrĩhetaga ũthiũ wakwa nĩ ũndũ wa mũndũ ũcio, na nĩngamũingata ndĩmũthengie kũrĩ andũ ao, nĩ ũndũ wa ũrĩa anengerete Moleku mũndũ wa rũciaro rũake, nĩguo athahie handũ hakwa harĩa haamũre, na athahie rĩĩtwa rĩakwa itheru.
• 4. Na rĩrĩ, andũ a bũrũri mangĩhingĩra mũndũ ũcio maitho o na atĩa hĩndĩ ĩrĩa anengerete Moleku mũndũ wa rũciaro rũake, maage kũmũũraga-rĩ,
• 5. niĩ nĩngaheta ũthiũ wakwa nĩ ũndũ wa mũndũ ũcio, o na ũndũ wa andũ a nyũmba yake, na nĩngamũingata, o na andũ othe arĩa meriragĩria kũmũrũmĩrĩra, o na makerirĩria kwagana na Moleku, ndĩmaingate mehere thĩinĩ wa andũ ao.
• 6. O na ningĩ atĩrĩ, mũndũ ũrĩa ũkahũgũkĩra andũ arĩa marĩ na maroho maragũraga, o na arogi, nĩguo eriragĩrie kũmarũmĩrĩra, o nake mũndũ ũcio niĩ nĩngaheta ũthiũ wakwa nĩ ũndũ wake, na nĩngamũingata athengio kũrĩ andũ ao.
• 7. Tondũ ũcio wĩamũrei mwĩtherie, mũtuĩke atheru; nĩ gũkorũo niĩ nĩ niĩ Jehova Ngai wanyu.
• 8. Na mũmenyagĩrĩre irĩra cia watho wakwa wa kũrũmĩrĩrũo, mũcirũmie; niĩ nĩ niĩ Jehova ũrĩa ũmwamũraga ngamũtheria.
• 9. Ningĩ mũndũ o wothe ũrĩa ũkaruma ithe kana nyina, ndarĩ hingo atakoragwo; mũndũ ũcio nĩarumĩte ithe kana nyina, na nĩagacokererũo nĩ thakame yake.
• 10. Na rĩrĩ, mũndũ ũrĩa ũgatharia na mũka wĩ na mũrũme, naguo ũguo nĩ ta kuuga mũndũ ũrĩa ũgatharia na mũka wa mũndũ ũngĩ, mũndũ mũrũme ũcio mũtharania, na mũka ũcio mũthario nake, acio erĩ-rĩ, matirĩ hingo matakoragwo.
• 11. O nake mũndũ ũrĩa ũgakoma na mũka wa ithe nĩ ta kũguũria aguũrĩtie ithe nguo, akamũtiga njaga; andũ acio-rĩ, matirĩ hingo matakoragwo; nĩo magacokererũo nĩ thakame yao o ene.
• 12. Ningĩ mũndũ mũrũme angĩgakoma na iciciarawe-rĩ, acio erĩ matirĩ hingo matakoragwo; andũ acio nĩmekĩte ũndũ wa waga-thoni ũrĩa mũkĩru njano, nao nĩmagacokererũo nĩ thakame yao o ene.
• 13. Na rĩrĩ, mũndũ mũrũme o na ũrĩkũ angĩgakoma na mũndũ mũrũme ũrĩa ũngĩ, ta ũrĩa mũndũ-wa-nja akomagwo nake, andũ acio erĩ nĩmekĩte ũndũ wĩ thahu, nao matirĩ hingo matakoragwo; nĩo magacokererũo nĩ thakame yao o ene.
• 14. Nake mũndũ mũrũme angĩgatwaranĩria mũka na nyina, ũndũ ũcio nĩ wa waganu mũnene; andũ acio, mũndũ mũrũme ũcio o na aka acio, nĩ gũcinwo magacinwo na mwaki; nĩ getha thĩinĩ wanyu gũtikanagĩe waganu.
• 15. Ningĩ mũndũ angĩkagwata nyamũ, ndarĩ hingo atakoragwo, o nayo nyamũ ĩo mũmĩũrage.
• 16. Ningĩ mũndũ-wa-nja angĩgathengerera nyamũ ekomie thĩ, agwatwo nĩyo, nĩ kũũraga mũkoraga mũndũ-wa-nja ũcio, o na nyamũ ĩo, nyamũ ĩo o na mũndũ-wa-nja ũcio matirĩ hingo matakoragwo, na macokererũo nĩ thakame yao o ene.
• 17. Na rĩrĩ, mũndũ angĩgathiĩ na mwarĩ wa ithe, kana mwarĩ wa nyina, nao monane njaga-rĩ, ũndũ ũcio nĩ wa gũconorithania mũno; acio nĩ kũingatwo makaingatwo, ciana cia andũ ao irĩ ho ikĩonaga; mũndũ ũcio nĩaguũrĩtie mwarĩ wa nyina kana wa ithe nguo na nĩagacokererũo nĩ waganu ũcio wake we mwene.
• 18. Ningĩ mũndũ angĩgakoma na mũndũ-wa-nja e mũtune ihinda-inĩ rĩake rĩa mweri, onane nake-rĩ, mũndũ ũcio nĩ gũtũma atũmĩte riurĩro rĩa thakame yake rĩikare njaga, mũndũ-wa-nja ũcio agakĩguũrio riurĩro rĩa thakame yake; andũ acio erĩ-rĩ, nĩ kũingatwo makaingatwo mathengio kũrĩ andũ ao.
• 19. Ningĩ ndũkanaguũrie tataguo, mwarĩ wa nyina na nyũkwa, kana mwarĩ wa nyina na thoguo nguo, nĩ ũndũ mũndũ angĩĩka ũguo, nĩaguũrĩtie mũndũ wa nyũmba yao ũrĩa me rũrĩra nguo; andũ acio nĩmagacokererũo nĩ ũũru wao.
• 20. Nake mũndũ angĩgakoma na mũka wa mamawe, kana mũka wa ithe mũnyinyi kana mũkũrũ, mũndũ ũcio nĩ ta kũguũria aguũrĩtie mamawe ũcio, kana ithe mũnyinyi, kana mũkũrũ, nguo, akamũtiga njaga; andũ arĩa mangĩĩka ũguo nĩmagacokererũo nĩ wĩhia wao, nao magakua o ro ũguo mataciarĩte kaana.
• 21. Nake mũndũ angĩgathiĩ na mũka wa mũrũ wa nyina-rĩ, ũndũ ũcio nĩ mũthũku; nĩ ta kũguũria aguũrĩtie mũrũ wa nyina nguo, akamũtiga njaga, nao acio magatũũra o ro ũguo na maticiare kaana.
• 22. Tondũ ũcio ikaragai mũmenyereire irĩra ciothe cia watho wakwa wa kũrũmĩrĩrũo, o na matuĩro makwa mothe ma cira mũmekage; nĩ getha bũrũri ũrĩa ngũmũtwara mũgatũũre ndũkanamũtahĩke mũwehere.
• 23. Na rĩrĩ, mũtikanathiĩ na mĩthiĩre ĩtwaranĩte na mĩtugo ya rũrĩrĩ rũrĩa ngũingata rũmweherere; nĩ ũndũ andũ aruo matũire mekaga maũndũ macio mothe, na tondũ ũcio ngakĩmathũũra mũno.
• 24. No rĩrĩ, inyuĩ nĩ inyuĩ njĩrĩte ũũ: Atĩrĩrĩ, nĩmũkagaya bũrũri wao, na nĩguo ngamũhe mũwĩgwatĩre ũtuĩke wanyu, naguo nĩ bũrũri wĩ bũthi wa iria o na ũũkĩ; niĩ nĩ niĩ Jehova Ngai wanyu, ũrĩa ũmwamũrĩte ngatũma mũgĩe ngũũrani na andũ arĩa angĩ.
• 25. Tondũ ũcio thuranagiai nyamũ cia magũrũ mana iria itarĩ mũgiro na iria irĩ mũgiro; na mũthuranagie nyamũ cia mathagu iria irĩ mũgiro na iria itarĩ mũgiro; mũtikanegwatie thahu na nyamũ cia magũrũ mana, kana cia mathagu, kana nyamũ o na ĩrĩkũ ĩrĩa ĩtambaga thĩ, o icio ndaamũrire ngĩmũrigithania nacio nĩ ũndũ wa ũrĩa irĩ mũgiro.
• 26. Na inyuĩ no mũhaka mũikarage mũrĩ atheru mwamũrĩirũo niĩ; nĩ gũkorũo niĩ, Jehova, ndĩ mũtheru, na nĩndĩmwamũrĩte ngatũma mũgĩe ngũũrani na ndũrĩrĩ iria ingĩ, nĩ getha mũtuĩke andũ akwa.
• 27. Ningĩ mũndũ mũrũme, kana mũndũ-wa-nja, ũrĩa ũrĩ na roho ũragũraga, kana wĩ mũrogi, andũ ta acio-rĩ, matirĩ hingo matakoragwo; makahũrũo na mahiga nyuguto, nao o ene macokererũo nĩ thakame yao.

Home