Go Back

Maũndũ Ma Alawii Chapter 14

• 1. NINGĨ Jehova akĩarĩria Musa, akĩmwĩra atĩrĩ,
• 2. Watho wa mũndũ ũrĩa ũrũarĩte mangũ mũthenya ũrĩa ekũninwo ng’ũki nĩguo ũyũ, atĩ mũndũ ũcio nĩ gũtwarũo agatwarũo kwĩ mũthĩnjĩri-Ngai;
• 3. nake mũthĩnjĩri-Ngai oimagare oime kĩraaro-inĩ amũbare, na atĩrĩrĩ, mũndũ ũcio ũrarũarĩte mangũ angĩkorũo nĩahonete mũrimũ ũcio wa mangũ-rĩ,
• 4. mũthĩnjĩri-Ngai aathane atĩ tũnyamũ twĩrĩ twa mathagu tũtheru tũrĩ muoyo tuoyũo nĩ ũndũ wa mũndũ ũcio ũkũninwo ng’ũki, o na kamũtĩ ka mũtarakwa, na karigi ka rangi wa gakarakũ, na mũthobi;
• 5. ningĩ mũthĩnjĩri-Ngai aathane atĩ kanyamũ kamwe gatuo gathĩnjwo kaanĩrĩrio na nyũngũ ĩĩ maĩ ma mũtahano thĩinĩ matahĩtwo handũ megũtherera;
• 6. nako kanyamũ kau kangĩ karĩ muoyo akoe, na oe kamũtĩ kau ka mũtarakwa, na karigi kau ka rangi wa gakarakũ, na mũthobi ũcio, acitobokie thakame-inĩ ya kanyamũ kau gathĩnjirũo kaanĩrĩrio na nyũngũ ĩo ĩĩ maĩ ma mũtahano;
• 7. nake aminjaminjĩrie mũndũ ũcio ũkũninwo ng’ũki wa mangũ thakame ĩo maita mũgwanja, na acoke atue atĩ nĩaathirũo nĩ ng’ũki, nako kanyamũ kau ke muoyo areke kombũke gethiĩre werũ.
• 8. Nake mũndũ ũcio ũkũninwo ng’ũki athambie nguo ciake, na enjwo njuĩrĩ yothe, na ethambe na maĩ, nake nĩakonwo e mũtheru, na thutha wa ũguo acoke atonye kĩraaro-inĩ; no rĩrĩ, agaikara mĩthenya mũgwanja na kũu nja ya hema yake na ndakamĩtonye.
• 9. Na nĩgũgakinya atĩrĩ, atĩ mũthenya wa mũgwanja, enjwo njuĩrĩ yake yothe ĩninwo mũtwe, o na nderu, na njuĩrĩ ya maitho, naguo ũguo nĩ ta kuuga enjwo njuĩrĩ ĩrĩa arĩ nayo yothe; na acoke athambie nguo ciake, na ethambe mwĩrĩ na maĩ, athirũo nĩ ng’ũki.
• 10. Ningĩ mũthenya wa ĩnana akoya tũtũrũme twĩrĩ tũtarĩ na kaũũgũ, na kamwatĩ ka mwaka ũmwe gatarĩ na kaũũgũ, o na icunjĩ ithatũ cia ikũmi cia eba ng’ima ya mũtu ũrĩa mũhinyu mũno wa gũtuĩka ihaki rĩa mũtu, ũtukanĩtio na maguta o na kabakũri kagima ka maguta.
• 11. Nake mũthĩnjĩri-Ngai ũrĩa ũkũmũtheria aige mũndũ ũcio ũgũtherio, hamwe na indo icio, mbere ya Jehova, hau mũromo-inĩ wa hema-ya-gũtũnganwo;
• 12. nake mũthĩnjĩri-Ngai acoke oe gatũrũme kamwe ga tũu, akarute gatuĩke igongona rĩa mahĩtia, hamwe na kabakũri kau ka maguta, acithũngũthie ituĩke igongona rĩa gũthũngũthĩrio mbere ya Jehova;
• 13. ningĩ athĩnjĩre gatũrũme kau harĩa mathĩnjagĩra igongona rĩa mehia na ihaki rĩa njino, nja ya handũ hau haamũre; nĩ gũkorũo o ta ũrĩa kĩndũ kĩrĩa kĩrutĩtwo gĩtuĩke igongona rĩa mehia gĩĩ kĩa mũthĩnjĩri-Ngai-rĩ, ũguo noguo kĩu kĩa igongona rĩa mahĩtia gĩĩ gĩake; kĩu nĩ kĩamũre mũno mũno.
• 14. Ningĩ mũthĩnjĩri-Ngai oe thakame ĩmwe ya igongona rĩu rĩa mahĩtia, amĩĩkĩre mũthia-inĩ wa gũtũ kwa ũrĩo kwa mũndũ ũcio ũgũtherio, na mũthia-inĩ wa kĩara kĩrĩa kĩnene gĩa guoko gwake kwa ũrĩo, o na mũthia-inĩ wa kĩara kĩrĩa kĩnene gĩa kũgũrũ gwake kwa ũrĩo;
• 15. ningĩ mũthĩnjĩri-Ngai acoke oe maguta mamwe marĩa me kabakũri kau, amaitĩrĩre rũhĩ rũake we mwene rũa ũmotho;
• 16. ningĩ mũthĩnjĩri-Ngai atobokie kĩara gĩake kĩa muoroto gĩa guoko kwa ũrĩo maguta-inĩ macio me rũhĩ rũake rũa guoko kwa ũmotho, aminjaminje maguta macio na kĩara kĩu gĩake mbere ya Jehova maita mũgwanja;
• 17. namo maguta mamwe marĩa maatigara rũhĩ, mũthĩnjĩri-Ngai amahake mũthia wa gũtũ kwa ũrĩo kwa mũndũ ũcio ũgũtherio, na mũthia wa kĩara kĩrĩa kĩnene gĩa guoko gwake kwa ũrĩo, o na mũthia wa kĩara kĩrĩa kĩnene gĩa kũgũrũ gwake kwa ũrĩo, o hau thakame-inĩ ĩo ya igongona rĩa mahĩtia;
• 18. ningĩ maguta marĩa maatigara rũhĩ, mũthĩnjĩri-Ngai amahake mũtwe wa mũndũ ũcio ũgũtherio; mũthĩnjĩri-Ngai akĩmũhoroherie mbere ya Jehova.
• 19. Nake mũthĩnjĩri-Ngai acoke arute igongona rĩa mehia, ahoroherie mũndũ ũcio ũgũtherio nĩ ũndũ wa ng’ũki ĩrĩa e naguo; na thutha wa ũguo athĩnje nyamũ ya ihaki rĩa njino;
• 20. nake mũthĩnjĩri-Ngai arutĩre ihaki rĩa njino, o na ihaki rĩa mũtu, kĩgongona-inĩ; mũthĩnjĩri-Ngai ũcio akĩmũhoroherie, nake mũndũ ũcio athirũo nĩ ng’ũki.
• 21. Na rĩrĩ, angĩkorũo arĩ mũthĩni, na atuĩke ndangĩhota kuona indo ta icio, hĩndĩ ĩo nĩakoya gatũrũme kamwe gatuĩke igongona rĩa mahĩtia, nĩguo gathũngũthio, ga kũmũhoroheria, na gacunjĩ kamwe ga ikũmi ka eba ng’ima ya mũtu ũrĩa mũhinyu mũno, ũtukanĩtio na maguta, gatuĩke ihaki rĩa mũtu, na kabakũri kagima ka maguta;
• 22. o na ndirahũgĩ igĩrĩ, kana tũtutura twĩrĩ tũtarĩ tũkũrũ, o ta ũrĩa angĩhota kuona; nako kamwe gatuĩke igongona rĩa mehia, nako karĩa kangĩ gatuĩke ihaki rĩa njino.
• 23. Naguo mũthenya wa ĩnana agatũtwarĩra mũthĩnjĩri-Ngai kũu mũromo-inĩ wa hema-ya-gũtũnganwo, mbere ya Jehova, nĩ ũndũ wa gũtherio kũrĩa egũtherio.
• 24. Nake mũthĩnjĩri-Ngai oe gatũrũme kau ka igongona rĩa mahĩtia, na kabakũri kau ka maguta, acithũngũthie ituĩke igongona rĩa gũthũngũthĩrio mbere ya Jehova;
• 25. nake athĩnje gatũrũme kau ka igongona rĩa mahĩtia, acoke oe thakame ĩmwe ya igongona rĩa mahĩtia, amĩĩkĩre mũthia-inĩ wa gũtũ kwa ũrĩo kwa mũndũ ũcio ũgũtherio, o na kĩara kĩrĩa kĩnene gĩa guoko gwake kwa ũrĩo, o na kĩrĩa kĩnene gĩa kũgũrũ gwake kwa ũrĩo;
• 26. nake mũthĩnjĩri-Ngai aitĩrĩre maguta mamwe rũhĩ rũa guoko gwake we mwene kwa ũmotho,
• 27. acoke aminjaminje maguta mamwe marĩa me rũhĩ rũake rũa ũmotho na kĩara gĩake gĩa guoko kwa ũrĩo mbere ya Jehova maita mũgwanja;
• 28. ningĩ mũthĩnjĩri-Ngai ahake maguta mamwe marĩa marĩ rũhĩ mũthia-inĩ wa gũtũ kwa ũrĩo kwa mũndũ ũcio ũgũtherio, o na kĩara-inĩ kĩrĩa kĩnene gĩa guoko gwake kwa ũrĩo, o na kĩrĩa kĩnene gĩa kũgũrũ gwake kwa ũrĩo, o hau thakame-inĩ ĩo ya mahĩtia;
• 29. o namo maguta marĩa maatigara marĩa me rũhĩ rũake, mũthĩnjĩri-Ngai amahake mũtwe wa mũndũ ũcio ũgũtherio, nĩ getha amũhoroherie mbere ya Jehova.
• 30. Ningĩ arute ndirahũgĩ ĩmwe ya icio ndehe, kana gatutura kamwe gatarĩ gakũrũ ga tũtutura tũu tũrehe, o ta ũrĩa angĩhota kuona;
• 31. o ta ũrĩa mũndũ ũcio ahotete kuona-rĩ, kamwe nĩgatuĩke ka igongona rĩa mehia, nako karĩa kangĩ gatuĩke ka ihaki rĩa njino, hamwe na ihaki rĩa mũtu; mũthĩnjĩri-Ngai akĩhoroherie mũndũ ũcio ũgũtherio mbere ya Jehova.
• 32. Ũcio nĩguo watho wa mũndũ ũrĩa wĩ na mũrimũ wa mangũ, ũrĩa ũtangĩĩonera kĩrĩa aagĩrĩirũo nĩ kũruta gĩkoniĩ ũhoro wake wa gũtherio.
• 33. Nake Jehova akĩarĩria Musa na Haruni, akĩmera atĩrĩ,
• 34. Hĩndĩ ĩrĩa mũgakinya bũrũri wa Kanaani, o ũcio ndĩmũheaga ũtuĩke wanyu, na niĩ njĩkĩre mũrimũ wa mangũ thĩinĩ wa nyũmba o na ĩrĩkũ ya bũrũri ũcio ũtuĩkĩte wanyu-rĩ,
• 35. mwene nyũmba ĩo nĩagathiĩ he mũthĩnjĩri-Ngai, amwĩre atĩrĩ, Nĩnguona ta arĩ mũrimũ ũgĩĩte nyũmba yakwa;
• 36. nake mũthĩnjĩri-Ngai aathane atĩ indo ciothe irutwo nyũmba ĩo, o mbere atanathiĩ kũrora mũrimũ ũcio, ĩtigwo ũtheri, nĩ getha indo ciothe iria irĩ nyũmba ĩo itikagwatwo nĩ thahu; na thutha wa ũguo mũthĩnjĩri-Ngai acoke atonye nyũmba ĩo amĩrore.
• 37. Nake akĩrore mũrimũ ũcio, na atĩrĩrĩ, kũngĩkorũo handũ harĩa mũrimũ ũcio ũrĩ nĩũthũkitie thingo cia nyũmba, naho hagaikara ta harĩ tũrima, natuo tũkorũo tũtariĩ ta tũhakĩtwo rangi ta wa nyeki nduru, o na kana rangi mũtune, naguo mũrimũ ũcio ũkĩonwo ũkonagwo ta ũtonyete na thĩinĩ wa rũthingo ũkarũthũkia,
• 38. mũthĩnjĩri-Ngai nĩoime nyũmba ĩo athiĩ mũrango-inĩ wayo, acoke ahinge nyũmba ĩo matukũ mũgwanja;
• 39. ningĩ mũthĩnjĩri-Ngai agacoka akamĩrore mĩthenya ĩo mũgwanja yathira, na atĩrĩrĩ, mũrimũ ũcio ũngĩkorũo nĩ gũthea ũtheete thingo-inĩ cia nyũmba ĩo,
• 40. mũthĩnjĩri-Ngai aathane atĩ andũ matharie mahiga hau mũrimũ ũcio ũrĩ, mamaikie kĩara-inĩ na kũu gĩthaka-inĩ mbarĩ ĩrĩa ĩngĩ ya rũthingo rũa itũũra rĩu;
• 41. acoke aharithie thingo ciothe cia nyũmba ĩo na hari mwena wa na thĩinĩ, athiũrũrũkie, naguo tĩri wa hau haharĩtwo makaũite kĩara-inĩ na kũu gĩthaka-inĩ mbarĩ ĩrĩa ĩngĩ ya rũthingo rũa itũũra rĩu;
• 42. magĩcoke moe mahiga mangĩ, mamekĩre mathenya-inĩ ma mahiga macio mangĩ marute; nake mũthĩnjĩri-Ngai acoke oithie ndaka ĩngĩ athingithie nyũmba ĩo nayo.
• 43. Na rĩrĩ, mũrimũ ũcio ũngĩcoka ũrurumũke, thutha wa aarĩkia kũrutithia maihiga, na thutha wa aaharithia thingo cia nyũmba, o na thutha wa aamĩthingithia-rĩ,
• 44. hĩndĩ ĩo mũthĩnjĩri-Ngai agĩtonye kuo thĩinĩ abare; na atĩrĩ, kũngĩkorũo mũrimũ ũcio nĩ gũthea ũtheete thĩinĩ wa nyũmba ĩo, ũcio nĩ mũrimũ wa mangũ ma mũthemba ũrĩa ũrĩaga indo ũũru mũno ũgwatĩte nyũmba ĩo; nayo nyũmba ĩo ĩĩ na ng’ũki.
• 45. Nake mũthĩnjĩri-Ngai agĩtharithie nyũmba ĩo mahiga mayo, na mĩtĩ yayo, o na tĩri wothe wa nyũmba ĩo; nacio indo icio ciothe acikuuithie, irutwo kũu itũũra-inĩ, itwarũo kĩara-inĩ na kũu gĩthaka-inĩ mbarĩ ĩrĩa ĩngĩ ya rũthingo rũa itũũra rĩu.
• 46. O na ningĩ atĩrĩ, ihinda rĩu rĩothe nyũmba ĩo ĩgakorũo ĩhingĩtwo-rĩ, mũndũ ũrĩa ũkamĩtonya nĩagatinda agwatĩtwo nĩ thahu nginya o hwaĩ-inĩ.
• 47. O nake mũndũ ũrĩa ũgakoma nyũmba ĩo nĩagathambia nguo ciake; ningĩ mũndũ ũrĩa ũkarĩĩra irio nyũmba ĩo nĩagathambia nguo ciake.
• 48. No rĩrĩ, mũthĩnjĩri-Ngai angĩtonya nyũmba ĩo, abare, one atĩ mũrimũ ndũtheete thĩinĩ wa nyũmba ĩo thutha wa yathingwo, nĩagatua ũhoro wa atĩ nĩ theru, nĩ gũkorũo mũrimũ ũcio nĩũthirĩte.
• 49. Hĩndĩ ĩo akĩoe tũnyamũ twĩrĩ tũrĩa tũthiaga na mathagu, na kamũtĩ ka mũtarakwa, na karigi ka rangi wa gakarakũ, na mũthobi, atherie nyũmba ĩo natuo;
• 50. agĩthĩnje kanyamũ kamwe gatuo kaanĩrĩrio na nyũngũ ya rĩũmba ĩĩ maĩ ma mũtahano thĩinĩ matahĩtwo handũ megũtherera;
• 51. acoke oe kamũtĩ kau ka mũtarakwa, na mũthobi ũcio, na karigi kau ka rangi wa gakarakũ, o na kanyamũ kau karĩ muoyo, nacio indo icio acitobokie thakame-inĩ ya kanyamũ karĩa gathĩnjĩtwo, o na maĩ-inĩ macio ma mũtahano, acoke aminjaminjĩrie nyũmba ĩo maita mũgwanja,
• 52. nyũmba ĩo akĩmĩtherie na thakame ya kanyamũ kau gathiaga na mathagu, na maĩ macio ma mũtahano, hamwe na kanyamũ kau kangĩ karĩ muoyo, na kamũtĩ kau ka mũtarakwa, na mũthobi ũcio, o na karigi kau ka rangi wa gakarakũ;
• 53. nako kanyamũ kau karĩ muoyo karekwo kombũke koime itũũra-inĩ rĩu gethiĩre werũ; ũguo nĩguo akahoroheria nyũmba ĩo, nayo nĩĩgacoka kuonwo ĩtarĩ na ng’ũki.
• 54. Ũcio nĩguo watho wa mũrimũ wa mangũ ma mĩthemba yothe, na wa thundo ĩrĩa njũru,
• 55. na wa mangũ ma nguo-inĩ, na wa nyũmba ĩgwatĩtwo nĩ mangũ,
• 56. na wa handũ he haimbu, na wa handũ harĩ thundo ya mũthemba ũngĩ, kana handũ heregethũku;
• 57. nĩguo andũ mamenyithio ũhoro wa ũrĩa mahotaga gũkũũrana harĩa he na ng’ũki, na harĩa hatarĩ na ng’ũki; ũcio nĩguo watho wa mangũ.

Home