Go Back

Maũndũ Ma Alawii Chapter 11

• 1. NAKE Jehova akĩarĩria Musa na Haruni, akĩmera atĩrĩ,
• 2. Arĩriai ciana cia Isiraeli, mũciĩre ũũ: Nyamũ iria irĩ muoyo iria mũrĩrĩaga thĩinĩ wa nyamũ ciothe iria irĩ thĩ, nĩ ici.
• 3. Nĩ nyamũ ĩrĩa yothe ĩrekanĩtie mahũngũ magaatũkanĩra gatagatĩ, na ĩgacokia ithagumia; thĩinĩ wa nyamũ-rĩ, ĩo nĩyo mũrĩrĩaga.
• 4. No rĩrĩ, thĩinĩ wa iria icokagia ithagumia, kana mahũngũ ma cio makarekania, iria mũtakarĩa-rĩ, nĩ ĩci: nĩ ngamĩra, nĩ ũndũ o na harĩa ĩcokagia ithagumia, mahũngũ mayo matirekanĩtie; ĩo ĩrĩ mũgiro harĩ inyuĩ.
• 5. Na gĩkami, nĩ ũndũ o na harĩa gĩcokagia ithagumia, mahũngũ makĩo matirekanĩtie; icio irĩ mũgiro harĩ inyuĩ.
• 6. Na mbũkũ, nĩ ũndũ o na harĩa ĩcokagia ithagumia, mahũngũ mayo matirekanĩtie; ĩo ĩrĩ mũgiro harĩ inyuĩ.
• 7. Na ngũrũe, nĩ ũndũ o na harĩa mahũngũ mayo marekanĩtie, na magaatũkanĩra gatagatĩ, ndĩcokagia ithagumia; ĩo ĩrĩ mũgiro harĩ inyuĩ.
• 8. Mũtikarĩa nyama cia nyamũ icio, o na mũtikahutia ciimba ciacio; icio irĩ mũgiro harĩ inyuĩ.
• 9. Na rĩrĩ, thĩinĩ wa nyamũ ciothe iria itũũraga maĩ-inĩ thĩinĩ-rĩ, iria mũrĩrĩaga nĩ ici: nĩ iria ciothe irĩ na mathagu manyitaine, na iria irĩ tũnyamũ tũtariĩ ta ngaracũ mwĩrĩ, iria irĩ maĩ-inĩ thĩinĩ, na maria-inĩ marĩa manene, o na njũĩ-inĩ thĩinĩ; icio nĩcio mũrĩrĩaga.
• 10. Nacio iria ciothe itarĩ na mathagu manyitaine o na tũnyamũ tũu tũtariĩ ta ngaracũ, iria irĩ maria-inĩ marĩa manene, o na njũĩ-inĩ thĩinĩ, o iria ciothe ithiaga maĩ-inĩ thĩinĩ, na nyamũ ciothe irĩ muoyo maĩ-inĩ thĩinĩ, icio nĩcio irĩ mũgiro harĩ inyuĩ.
• 11. Nacio igũtũũra irĩ mũgiro harĩ inyuĩ; mũtikarĩa nyama ciacio, o na ciimba ciacio igĩage mũgiro harĩ inyuĩ.
• 12. Nyamũ o yothe ĩrĩa itũũraga maĩ-inĩ thĩinĩ ĩtarĩ na mathagu manyitaine kana ĩkagĩa tũnyamũ tũtariĩ ta ngaracũ, ĩo nĩyo ya iria irĩ mũgiro harĩ inyuĩ.
• 13. Ningĩ-rĩ, nyamũ iria irĩgĩaga mũgiro harĩ inyuĩ thĩinĩ wa iria ithiaga na mathagu rĩera-inĩ, na itikanarĩo, tondũ irĩ mũgiro mũno, nĩ ici: nĩ thũmbaina, na ndiyũ, na gĩthũya-meru,
• 14. na hũngũ, na rũĩgĩ o ta ũrĩa kĩruka kĩaruo gĩtariĩ,
• 15. o na ihuru o rĩothe o ta urĩa kĩruka kĩarĩo gĩtariĩ;
• 16. o na nyaga, o na kĩhigoigũ, o na gĩthimambũri, o na karũgũrũ o ta ũrĩa kĩruka gĩako gĩtariĩ;
• 17. na ngoru, o na cua, o na ndundu,
• 18. na thambĩri ĩrĩa nene mũno, o na gakuua-ũrogi, o na nderi;
• 19. o na cũcũ-wa-njoka, o na karogi-ngunũ o ta ũrĩa kĩruka gĩako gĩtariĩ, o na hudihuda, o na rũhuhu.
• 20. O nacio nyamũ ciothe iria irĩ mathagu itambaga thĩ igĩthiĩ na magũrũ mana, icio irĩ mũgiro harĩ inyuĩ.
• 21. No rĩrĩ, thĩinĩ wa nyamũ icio irĩ mathagu itambaga thĩ igĩthiĩ na magũrũ mana-rĩ, iria irĩ mĩthimo ĩrĩ nyunĩro makinya-inĩ ma cio ya kũrũũga thĩ igũrũ nayo mwahota kũrĩa imwe ciacio;
• 22. thĩinĩ wa nyamũ icio-rĩ, iria mũrĩhotaga kũrĩa nĩ ici: nĩ ngigĩ, o ta ũrĩa kĩruka gĩacio gĩtariĩ, na ndararĩki, o ta ũrĩa kĩruka gĩacio gĩtariĩ, na ngiria o ta ũrĩa kĩruka gĩacio gĩtariĩ, na ndahi, o ta ũrĩa kĩruka gĩacio gĩtariĩ.
• 23. No rĩrĩ, nyamũ iria ingĩ ciothe irĩ mathagu itambaga thĩ na magũrũ mana irĩ mũgiro harĩ inyuĩ.
• 24. Na rĩrĩ, nyamũ ici nĩcio ĩgatũmaga mũgwatwo nĩ thahu; mũndũ o wothe ũrĩa ũkahutia kĩimba gĩacio agatinda agwatĩtwo nĩ thahu nginya o hwaĩ-inĩ;
• 25. na mũndũ o wothe ũrĩa ũgakuua gacunjĩ o na karĩkũ ga kĩimba gĩacio nĩagathambia nguo ciake, na atinde agwatĩtwo nĩ thahu nginya o hwaĩ-inĩ.
• 26. Nyamũ o yothe ĩrĩa ĩrekanĩtie mahũngũ, no makaaga gwatũkanĩra kũna gatagatĩ, kana ĩkaaga gũcokia ithagumia-rĩ, ĩo ĩrĩ mũgiro harĩ inyuĩ; na mũndũ o wothe ũrĩa ũkamĩhutia nĩakagwatwo nĩ thahu.
• 27. Ningĩ nyamũ o yothe ĩrĩa ĩthiaga na magũrũ me na ithu thĩinĩ wa nyamũ ciothe iria ithiaga na magũrũ mana, ĩo ĩrĩ mũgiro harĩ inyuĩ; na mũndũ o wothe ũrĩa ũkahutia kĩimba kĩayo agatinda agwatĩtwo nĩ thahu nginya o hwaĩ-inĩ.
• 28. Ningĩ mũndũ ũrĩa ũgakuua kĩimba kĩayo nĩagathambia nguo ciake, na atinde agwatĩtwo nĩ thahu nginya o hwaĩ-inĩ; nyamũ icio irĩ mũgiro harĩ inyuĩ.
• 29. Nacio nyamũ iria irĩ mũgiro harĩ inyuĩ thĩinĩ wa nyamũ ciothe iria itambaga, o iria itambaga gũkũ thĩ, nĩ ici, mũrũngũru, na mbĩa, na kĩng’ang’i o ta ũrĩa kĩruka gĩacio gĩtariĩ;
• 30. na gĩĩthenyũka na kĩgurumũki na njagathi, na gĩcagathi kĩrĩa kĩa ndwaro-inĩ cia mahiga, na kĩĩmbu.
• 31. Icio nĩcio irĩ mũgiro harĩ inyuĩ thĩinĩ wa nyamũ ciothe iria itambaga thĩ; mũndũ o wothe ũrĩa ũgacihutia rĩrĩa irĩ nguũ-rĩ, agatinda agwatĩtwo nĩ thahu nginya o hwaĩ-inĩ.
• 32. Na kĩndũ o gĩothe kĩrĩa gĩkagũĩrũo nĩ nyamũ o na irĩkũ ya icio hĩndĩ ĩo ĩkuĩte, nĩgĩkagĩa mũgiro; o na kĩngĩgakorũo nĩ kĩndũ o na kĩ kĩa mũtĩ, kana nguo, kana rũũa, kana ikũnia, o na kana kĩngĩgakorũo nĩ kĩndũ o na kĩ gĩa kũrutwo wĩra o na ũrĩkũ nakĩo, no mũhaka gĩgatobokio maĩ-inĩ, nakĩo gĩtinde kĩgwatĩtwo nĩ thahu nginya o hwaĩ-inĩ; na thutha wa ũguo gĩcoke gĩtuĩke gĩtheru.
• 33. Nakĩo kĩndũ o gĩothe kĩa rĩũmba kĩrĩa gĩkagũĩrũo thĩinĩ nĩ nyamũ ĩmwe o na ĩrĩkũ ya icio-rĩ, kĩrĩa gĩothe gĩgakorũo thĩinĩ wa kĩndũ kĩu nĩgĩkagĩa mũgiro, nakĩo kĩndũ kĩu kĩa rĩũmba nĩmũgakĩũraga.
• 34. Ningĩ irio ciothe cia mũthemba ũrĩa ũngĩrĩo iria igakorũo kuo thĩinĩ, nacio ikorũo ciĩkĩrĩtwo maĩ-rĩ, nĩikagĩa mũgiro; nakĩo kĩndũ o gĩothe gĩa kũnyuwo kĩngĩgakorũo kĩrĩ nyũngũ-inĩ ta ĩo, nĩgĩkagĩa mũgiro.
• 35. Nakĩo kĩndũ o gĩothe kĩrĩa gĩkagũĩrũo nĩ gĩcunjĩ o na kĩ kĩa nyamũ icio ikuĩte nĩgĩkagĩa mũgiro; o na kĩngĩgakorũo nĩ ndumbĩrĩra kana riiko rĩa kũhagĩra nyũngũ, kĩu nĩgĩkoragangwo; indo icio nĩ ngwate nĩ thahu, na nĩikonagwo irĩ mũgiro harĩ inyuĩ.
• 36. No rĩrĩ, gĩthima, kana irima rĩrĩa rĩarahaga maĩ-rĩ, icio itingĩgwatio thahu; no rĩrĩ, kĩrĩa gĩkahutia kĩimba gĩacio gĩgĩkĩruta kũu maĩ-inĩ-rĩ, nĩgĩkagwatwo nĩ thahu.
• 37. Ningĩ gĩcunjĩ o na kĩrĩkũ gĩa kĩimba gĩacio kĩngĩkagũĩra mbeũ cia kũhandwo, o iria ihaarĩirio cia kũhandwo, mbeũ icio itingĩgwatio thahu.
• 38. No rĩrĩ, mbeũ icio ingĩkorũo irindĩtwo na maĩ, na gĩcunjĩ o na kĩrĩkũ gĩa kĩimba kĩa nyamũ icio gĩcigũĩre, mbeũ icio irĩ thahu harĩ inyuĩ.
• 39. Ningĩ nyamũ o na ĩrĩkũ ya iria itarĩ mũgiro mũkĩrĩa ĩngĩĩũraga yo nyene o ro ũguo-rĩ, mũndũ ũrĩa ũkahutia kĩimba kĩayo nĩakagwatwo nĩ thahu na atinde naguo nginya o hwaĩ-inĩ.
• 40. O nake mũndũ ũrĩa ũkarĩa nyama ya kĩimba kĩu kĩayo nĩagathambia nguo ciake, na atinde agwatĩtwo nĩ thahu nginya o hwaĩ-inĩ; o nake ũrĩa ũgakuua kĩimba kĩu kĩayo nĩagathambia nguo ciake, na atinde agwatĩtwo nĩ thahu nginya o hwaĩ-inĩ.
• 41. Nayo nyamũ o yothe ndambi, ĩrĩa ĩtambaga thĩ, ĩrĩ mũgiro harĩ inyuĩ; ĩo ndĩkanarĩo.
• 42. Ĩrĩa yothe ĩthiaga na nda yayo, na ĩrĩa yothe ĩĩtwaraga na magũrũ mana, kana ĩrĩa yothe ĩrĩ magũrũ maingĩ, naguo ũguo nĩ ta kuuga nyamũ ciothe ndambi iria itambaga thĩ, icio mũtikanarĩe; nĩ gũkorũo icio irĩ mũgiro harĩ inyuĩ.
• 43. Mũtikaneĩkĩre mũgiro na nyamũ o na ĩrĩkũ ndambi ya iria itambaga thĩ, kana mwĩgwatie thahu nacio, atĩ nĩguo mwĩthũkie nacio.
• 44. Nĩ gũkorũo niĩ nĩ niĩ Jehova Ngai wanyu; tondũ ũcio wĩamũrei mwĩtherie, na mũtuĩke atheru, nĩ ũndũ niĩ ndĩ mũtheru; na mũtikanethũkie na nyamũ ndambi ya mũthemba o na ũrĩkũ wa iria ithiangaga gũkũ thĩ.
• 45. Nĩ gũkorũo niĩ nĩ niĩ Jehova ũrĩa wamwambatirie ngĩmũruta bũrũri wa Misiri, nĩguo nduĩke Ngai wanyu; tondũ ũcio wĩtuei atheru, nĩ gũkorũo niĩ ndĩ mũtheru.
• 46. Ũcio nĩguo watho ũkoniĩ nyamũ o yothe ĩrĩa ĩthiaga na magũrũ mana, na ĩrĩa ĩrĩ mathagu, na ĩrĩa yothe ĩrĩ muoyo ĩthiangaga maĩ-inĩ thĩinĩ, na ĩrĩa yothe ĩrĩ muoyo ĩtambaga thĩ,
• 47. nĩguo hagĩage ngũũrani ya nyamũ ĩrĩa ĩrĩ mũgiro na ĩrĩa ĩtarĩ mũgiro, o na kĩndũ kĩrĩa kĩrĩ muoyo kĩngĩrĩo, na kĩrĩa kĩrĩ muoyo gĩtangĩrĩo.

Home