Go Back

Maũndũ Ma Alawii Chapter 10

• 1. Na atĩrĩrĩ, Nadabu na Abihu, ariũ a Haruni, makĩoya ngĩo ciao, mũndũ o mũndũ, magĩciĩkĩra mwaki, magĩkĩigĩrĩra ũbumba igũrũ rĩaguo, magĩgĩtwara mwaki wa handũ hangĩ mbere ya Jehova, ũrĩa ataamaathĩte.
• 2. Hagĩkiumĩra mwaki uumĩte mbere ya Jehova, ũkĩmanina biũ, magĩgĩkuĩra o hau mbere ya Jehova.
• 3. Hĩndĩ ĩo Musa agĩkĩĩra Haruni atĩrĩ, Ũyũ nĩguo ũhoro ũrĩa Jehova aaririe, akiuga atĩrĩ, Ndĩrĩonagwo nyamũrĩtwo ngatuwo mũtheru thĩinĩ wa arĩa manguhagĩrĩria, na nĩndĩrĩnenehagio mbere ya andũ othe. Nake Haruni agĩgĩĩkirĩra ki.
• 4. Nake agĩgĩĩta Mishaeli na Elizafani, ariũ a Uzieli, ithe mũnyinyi wa Haruni, akĩmera atĩrĩ, Kuhĩhĩriai haha, muoe ariũ a ithe wanyu mũmarute mehere handũ haha haamũre, mũmatware na kũu gĩthaka-inĩ mbarĩ ĩrĩa ĩngĩ ya haha kĩraaro-inĩ.
• 5. Tondũ ũcio magĩgĩkuhĩhĩria, makĩmakuua marĩ o na makanjũ mao, makĩmaruta hau kĩraaro-inĩ, o ta ũrĩa Musa oigĩte.
• 6. Ningĩ Musa agĩkĩĩra Haruni, o na Eleazaru na Ithamaru, ariũ a Haruni, atĩrĩ, Mũtikanareke njuĩrĩ cianyu cia mĩtwe ciikare irĩ nguũrie, kana mũtembũrange nguo cianyu, nĩ getha mũtigakue, na ningĩ nĩ getha Jehova ndakarakarĩre kĩrĩndĩ gĩkĩ gĩothe; no rĩrĩ, rekei ariũ a ithe wanyu arĩ o, nao nĩo nyũmba yothe ya Isiraeli, marĩrĩre gũcinana kũu Jehova aakĩirie mwaki.
• 7. No inyuĩ-rĩ, mũtigathiĩ na nja muume mũromo-inĩ wa hema-ya-gũtũnganwo, nĩ getha mũtigakue; nĩ gũkorũo maguta ma gũitanĩrĩrio ma Jehova mũrĩ o namo marĩ igũrũ rĩanyu. Nao magĩgĩĩka o ta ũguo Musa aamerire.
• 8. NAKE Jehova akĩarĩria Haruni, akĩmwĩra atĩrĩ,
• 9. Ndũkananyue ndibei, kana kĩndũ o na kĩ kĩrũrũ kĩrĩa gĩtũmaga andũ marĩwo, wee mwene, kana ariũ aku marĩ hamwe nawe, rĩrĩa mũgũtonya hema-inĩ-ya-gũtũnganwo, nĩ getha mũtigakue; naguo ũndũ ũcio ũtuĩke kĩrĩra kĩa watho wa kũrũmagĩrĩrũo tene na tene njiaro-inĩ cianyu ciothe,
• 10. nĩ getha mwĩkagĩre ngũũrani ya indo iria nyamũre na iria cia ndũire, o na iria irĩ mũgiro na iria itarĩ mũgiro,
• 11. na nĩ getha mũrutage ciana cia Isiraeli irĩra ciothe cia watho wa kũrũmĩrĩrũo iria Jehova aciathĩte na kanua ka Musa.
• 12. Nake Musa akĩarĩria Haruni, me na Eleazaru na Ithamaru, ariũ ake arĩa maatigarĩte, akĩmera atĩrĩ, Oyai mũtu wa ihaki ũrĩa ũtigarĩte magongona-inĩ ma Jehova ma gũcinwo na mwaki, mũũrĩĩre hakuhĩ na kĩgongona, ũtarĩ mũimbie; nĩ gũkorũo nĩ mwamũre mũno mũno;
• 13. mũgakĩũrĩĩra handũ hatheru, nĩ gũkorũo ũcio nĩguo wee wagĩrĩirũo nĩ kũheagwo, na noguo ariũ aku o nao maagĩrĩirũo nĩ kũheagwo, uumĩte indo-inĩ iria irutagĩrũo Jehova cia gũcinwo na mwaki; nĩ gũkorũo ũguo nĩguo njathĩtwo.
• 14. Nakĩo gĩthũri kĩrĩa gĩthũngũthĩtio, o na kĩero kĩrĩa kĩiyũkĩtio na igũrũ, mũgacirĩĩra handũ hatheru, wee mwene, na ariũ aku, o na airĩtu aku hamwe nawe; nĩ gũkorũo indo icio nĩcio mũheetwo ituĩke rũgai rũrĩa mwagĩrĩirũo nĩ kũheagwo, o na rũrĩa rũagĩrĩire kũheagwo ariũ aku, ruumĩte magongona-inĩ marĩa marutagwo ma ũiguano ma ciana cia Isiraeli.
• 15. Kĩero gĩa kũiyũkio na igũrũ, o na gĩthũri gĩa gũthũngũthio-rĩ, nĩitwaranagĩrio na maguta marĩa marutĩtwo matuĩke ihaki rĩa gũcinwo na mwaki, icoke ithũngũthio ituĩke igongona rĩa gũthũngũthĩrio mbere ya Jehova; nakĩo kĩero kĩu na gĩthũri igĩtuĩke ciaku, o na cia ariũ aku hamwe nawe; icio nĩcio rũgai rũrĩa mwagĩrĩirũo nĩ kũheagwo tene na tene, o ta ũrĩa Jehova aathanĩte gwĩkwo.
• 16. Nayo mbũri ya igongona rĩa mehia Musa akĩmĩcaria na kĩyo mũno, na atĩrĩrĩ, agĩkora nĩĩcinĩtwo; agĩkĩrakarĩra Eleazaru na Ithamaru, ariũ a Haruni arĩa maatigarĩte, akĩmera atĩrĩ,
• 17. Nĩ kĩ kĩagiririe mũrĩĩre igongona rĩa mehia o handũ hau haamũre, kuona atĩ rĩkĩrĩ rĩamũre mũno mũno, na ningĩ Jehova aamũheire igongona rĩu nĩ getha mũkuuage ũũru wa kĩrĩndĩ, nĩguo mũkĩhoroherie mbere ya Jehova?
• 18. Atĩrĩrĩ, thakame yarĩo ndĩatwarirũo handũ hau haamũre thĩinĩ; ti-itherũ mũngĩarĩrĩĩrĩire o handũ hau haamũre, o ta ũrĩa ndaathanire.
• 19. Nake Haruni agĩkĩarĩria Musa, akĩmwĩra ũũ: Atĩrĩrĩ, ũmũthĩ nĩguo marutire igongona rĩao rĩa mehia, o na ihaki rĩao rĩa njino, mbere ya Jehova; na maũndũ ta macio nomo mangorete; rĩu-rĩ, ingĩgũkĩrĩĩte igongona rĩa mehia ũmũthĩ-rĩ, ũndũ ũcio nĩũngĩgĩkenirie Jehova?
• 20. Nake Musa aaigua ũhoro ũcio, akĩona atĩ ũguo mekĩte nĩ wega.

Home