Go Back

Hosea Chapter 1

• 1. ŨYŨ NĨGUO ũhoro wa Jehova ũrĩa wakinyĩrĩire Hosea mũrũ wa Beeri, matukũ-inĩ ma Uzia, na Jothamu, na Ahazu, na Hezekia, arĩa maarĩ athamaki a Juda, na matukũ-inĩ ma Jeroboamu mũrũ wa Joashu, ũrĩa warĩ mũthamaki wa Isiraeli.
• 2. Atĩrĩrĩ, rĩrĩa Jehova aaririe na kanua ka Hosea hingo ya mbere-rĩ, we Jehova nĩerire Hosea atĩrĩ, Thiĩ ũkahikie mũtumia wa maraya, na ũkagĩe na twana twa maraya; nĩ ũndũ-rĩ, andũ a bũrũri ũyũ matũire matharanagia na ũmaraya mũnene, magagĩtigana na Jehova.
• 3. Nake agĩgĩthiĩ akĩhikia Gomeri, mwarĩ wa Dibilaimu; nake akĩgĩa ihu akĩmũciarĩra mwana wa kahĩĩ.
• 4. Nake Jehova akĩmwĩra atĩrĩ, Gatue Jezireeli; amu-rĩ, thutha hanini nĩngarĩhia nyũmba ya Jehu thakame ya Jezireeli, na nĩngatũma ũthamaki wa nyũmba ya Isiraeli ũthire.
• 5. Ningĩ mũthenya ũcio-rĩ, nĩgũgatuĩka atĩ nĩngoinĩra ũta wa Isiraeli kĩanda-inĩ kĩa Jezireeli.
• 6. Nake mũtumia ũcio akĩgĩa ihu o rĩngĩ, agĩciara mwana wa kairĩtu. Nake Jehova akĩmwĩra atĩrĩ, Gatue Lo-ruhama, amu niĩ ndigacoka kũiguĩra nyũmba ya Isiraeli tha rĩngĩ, atĩ ndĩmohere atĩa kana atĩa.
• 7. No rĩrĩ, nĩngaiguĩra nyũmba ya Juda tha, ndĩmahonokie na hinya wa Jehova Ngai wao; na ti kũmahonokia ngamahonokia na ũta, kana rũhiũ rũa njora, kana ita, kana mbarathi, kana na thigari iria ihaicĩte mbarathi.
• 8. Na rĩrĩ, mũtumia aatigithia Lo-ruhama kuonga-rĩ, akĩgĩa na ihu rĩngĩ, agĩciara kahĩĩ.
• 9. Nake Jehova akiuga atĩrĩ, Gatue gaka Lo-ammi, amu-rĩ, inyuĩ mũtirĩ andũ akwa, na niĩ ndicoka gũtuĩka Ngai wanyu.
• 10. No rĩrĩ, mũigana wa ciana cia Isiraeli nĩũgatuĩka ta wa mũthanga wa iria rĩrĩa inene, ũrĩa ũtangĩthimĩka kana ũtarĩke nĩ kũingĩha; ningĩ-rĩ, gũgatuĩka atĩ o handũ harĩa merirũo ũũ, Inyuĩ mũtirĩ andũ akwa-rĩ, nĩho makerũo atĩrĩ, Inyuĩ mũrĩ ariũ a Ngai ũrĩa wĩ muoyo.
• 11. Nao ciana cia Juda na ciana cia Isiraeli-rĩ, nĩ gwĩturanĩra mageturanĩra hamwe, na methurĩre mũnene ũmwe agĩe igũrũ rĩao othe, nao nĩmakoima bũrũri-inĩ ũcio matũire ta marĩ ageni; amu mũthenya ũcio wa Jezireeli nĩũgatuĩka mũnene.

Home