Go Back

Danieli Chapter 7

1. Atĩrĩrĩ, mwaka wa mbere ũrĩa Belishazaru aakorirũo athamakĩte kũu bũrũri wa Babuloni-rĩ, Danieli nĩaarotire kĩroto, agĩkĩona cioneki arĩ ũrĩrĩ wake; agĩcoka akĩandĩka ũhoro wa kĩroto kĩu, na akiumbũra ũhoro wakĩo wothe.
2. Danieli agĩkiuga atĩrĩ, Nĩ kũrota ndarotire ũtukũ ngĩona huho inya iria ihurutanaga matu-inĩ ikĩhurutanĩra iria-inĩ rĩrĩa inene igũrũ.
3. Ngĩcoka ngĩona nyamũ nene inya ikiuma iria-inĩ rĩu thĩinĩ, nacio ciothe inya hatirĩ ĩtekũũranĩte na ĩrĩa ĩngĩ.
4. Ya mbere-rĩ, yahaanaga ta mũrũthi, na ĩkagĩa mathagu ta ma ndiyũ; na niĩ ngĩbara o nginya ngĩona mathagu macio mayo makĩmunyũo njoya, nayo ĩgĩcoka ĩkĩoyũo na igũrũ ĩkĩrũgamio na magũrũ mayo merĩ ta arĩ mũndũ, ĩgĩkĩheo ngoro ta ya mũndũ.
5. Nayo nyamũ ĩrĩa ĩngĩ ya kerĩ yahaanaga ta nduba, nayo yaambararĩtie mwena ũmwe wayo na igũrũ, na ĩgĩkorũo ĩrũmĩte mbaru ithatũ na magego ma kanua kayo; ngĩgĩcoka ngĩigua yerũo atĩrĩ, Ũkĩra wĩrĩĩre nyama nyingĩ ũcimerũkie.
6. Ningĩ ngĩcoka ngĩona nyamũ ĩngĩ ĩhaana ta ngarĩ, na ĩkagĩa na mathagu mana mũgongo ta ma nyoni; ningĩ nyamũ ĩo ĩgĩkorũo ĩrĩ na mĩtwe ĩna, na ĩkaheo hinya wa gwathana.
7. Ningĩ thutha wa ũguo ngĩona maũndũ mangĩ na cioneki icio cia ũtukũ, ngĩkĩona nyamũ ĩngĩ ya kana, nayo yarĩ ya kũmakania na ĩgatuana nda mũno nĩ ũrĩa ĩgĩĩte na hinya mũkĩru; ningĩ ĩkagĩa na magego ma kĩgera manene mũno, na ĩgacaranagĩria kĩrĩi, na ikahehenjanaga, nacio irembuĩ ĩgacirangĩrĩria na makinya mayo; ningĩ nyamũ ĩo nĩyekũũranite na nyamũ icio ingĩ ciothe cionekete mbere yayo; na yarĩ na hĩa ikũmi.
8. Niĩ na niĩ ngĩĩcũrania ũhoro wa hĩa icio, na ngĩkĩona atĩ he rũhĩa rũngĩ rũkũmera gatagatĩ-inĩ gacio rũtarĩ rũnene; naruo rũhĩa rũu rũamera-rĩ, hĩa ithatũ thĩinĩ wa icio ciuma ho mbere ikĩmunyũka biũ. Naruo rũhĩa rũu rũgĩkorũo rũĩ na maitho ta ma mũndũ, na rũkagĩa na kanua gekwaria ndeto cia mwĩĩro.
9. Ningĩ ngĩgĩcoka ngĩcũthĩrĩria o nginya ngĩona atĩrĩ, Itĩ-cia-ũnene ciarehirũo ikĩigwo thĩ, nake Ũrĩa-ũtũire-ho-kuuma-o-tene agĩikara thĩ ho. Nacio nguo ciake cierũhĩte o ta ira, na njuĩrĩ ya mũtwe wake ĩkahaana o ta guoya wa ng’ondu mwega mũno. Ningĩ gĩtĩ gĩake kĩa ũnene kĩarĩrĩmbũkaga nĩnĩmbĩ cia mwaki, namo magũrũ makĩo maarĩ ma mwaki ũgwakana mũno;
10. O na ningĩ haarĩ rũũĩ rũa mwaki rũathereraga ruumĩte hau aarĩ. Nake aatungatagĩrũo nĩ ndungata ngiri maita ngiri, na andũ ngiri ikũmi maita ngiri ikũmi makarũgama mbere yake. Nakuo gũgĩitĩka gũcirithanio, namo mabuku ma cira makĩguũrio.
11. Na niĩ ngĩgĩcũthĩrĩria hĩndĩ ĩo, nĩ ũndũ wa mũgambo wa ciugo icio cia mwĩĩro ciaaragio nĩ rũhĩa rũu; ngĩgĩikara o ũguo njũthĩrĩirie, o nginya nyamũ ĩo ĩkĩũragwo, ĩgĩthĩnjwo mwĩrĩ wayo, nayo ĩkĩneanwo ĩikio mwaki-inĩ, ĩhĩĩre kuo.
12. Naho ha ũhoro wa nyamũ icio ingĩ-rĩ, nĩciatunyirũo hinya wacio wa gwathana; no ũhoro wacio wa gũtũũra muoyo ũkĩongerereka ihinda rĩna na kahinda kangĩ.
13. Ningĩ ngĩcoka ngĩkĩona maũndũ mangĩ na cioneki cia ũtukũ, na atĩrĩrĩ, He mũndũ wahaanaga ta mũrũ wa mũndũ wokire na matu ma igũrũ, Nake agĩkinya harĩ Ũrĩa-ũtũire-ho-kuuma-o-tene, na agĩtwaratwarũo hakuhĩ nake.
14. Nake agĩkĩheo wathani, na riri, o na ũthamaki, Nĩ getha andũ a nduka ciothe, na a ndũrĩrĩ ciothe, na a mĩario yothe, mamũtungatagĩre. Naguo wathani ũcio wake nĩ wa mĩndĩ na mĩndĩ, na ndũgathira o rĩ, o rĩ. Naguo ũthamaki ũcio wake ndũkonũhĩka o na atĩa.
15. Naho ha ũhoro wakwa, niĩ Danieli-rĩ, roho wakwa ũgĩtangĩka mũno thĩinĩ wakwa, nacio cioneki icio ndonire ikĩ’nyamaria mũno.
16. Na niĩ ngĩgĩthengerera he mũndũ ũmwe wa acio maarũngiĩ ho, ngĩmũthaitha anyumbũrĩre na ma ũrĩa ũhoro ũcio wothe ũtariĩ; nake agĩkĩndaũrĩra maũndũ macio mothe, akĩnjĩra atĩrĩ,
17. Nyamũ icio nene inya-rĩ, nĩ athamaki ana arĩa marĩcoka kwarahũka gũkũ thĩ.
18. No rĩrĩ, arĩa matĩaine na Ũrĩa-wĩ-Igũrũ-Mũno nĩo makagaĩrũo ũthamaki, mawĩgwatĩre ũtuĩke wao tene na tene, ĩĩ-ni, matũũre naguo mĩndĩ na mĩndĩ.
19. Ndaigua ũguo-rĩ, ngĩenda ’thirũo nĩ nganja cia nyamũ ĩo ya kana, o ĩo yekũũranĩte na icio ingĩ, na ĩgatuĩka ya kũmakania mũno, ningĩ ĩkagĩa na magego ma kĩgera na ndwara cia gĩcango; o ĩo yacaranagĩria kĩrĩi, na ĩkahehenjana, nacio irembuĩ ĩgacirangĩrĩria na makinya mayo.
20. Ningĩ ngĩenda ’thirũo nĩ nganja cia hĩa icio ikũmi yarĩ nacio mũtwe, na cia rũhĩa rũu rũngĩ rũacokire kũmera, o na cia hĩa icio ithatũ ciamunyũkire rũu rũngĩ rũamera, o rũu rũagĩĩte na maitho, o na kanua kaaragia ndeto cia mwĩĩro; ningĩ rũkonagwo ta rũĩ rũnene gũkĩra icio ingĩ.
21. Na ngĩĩroragĩra, ndonire rũtharĩkĩire arĩa matĩaine na Ũrĩa-wĩ-Igũrũ-Mũno, na rũkĩmatoria,
22. o nginya rĩrĩa Ũrĩa-ũtũire-ho-kuuma-o-tene okire, agĩgĩtuĩra arĩa matĩaine na Ũrĩa-wĩ-Igũrũ-Mũno ituĩro rĩa kĩhooto; na gũgĩkinya atĩrĩ, atĩ acio matĩaine nake makĩĩgwatĩra ũthamaki ũcio ũtuĩke wao.
23. Nake agĩkiuga ũũ: Atĩrĩrĩ, nyamũ ĩo ya kana-rĩ, Nĩ ũthamaki ũngĩ wa kana ũrĩa ũkagĩa gũkũ thĩ, Naguo ũgakorũo wĩkũũranĩte na mothamaki marĩa mangĩ mothe, Ningĩ nĩguo ũkaninũkia thĩ yothe, Na ũmĩrangĩrĩrie na thĩ, na ũmĩhehenje.
24. Naho ha ũhoro wa hĩa icio ikũmi-rĩ, Ũthamaki ũcio wa kana nĩũkoima athamaki ikũmi, Na thutha wao nĩhagacoka kũgĩa mũthamaki ũngĩ. Ũcio nĩwe ũgekũũrana na athamaki acio angĩ, Na atorie atatũ ao.
25. Ningĩ nĩakaaria ndeto cia gũcambia Ũrĩa-wĩ-Igũrũ-Mũno, Na ahinyarie arĩa matĩaine na Ũrĩa-wĩ-Igũrũ-Mũno; Na agerie kũgarũra ciathĩ o na mawatho. Ningĩ andũ acio makaneanwo moko-inĩ make, O nginya ihinda rĩmwe rĩambe rĩthire, na mahinda merĩ, o na nuthu ya ihinda.
26. No rĩrĩ, nĩgũgacirithanio, Na thutha wa ũguo acoke atunyũo wathani ũcio wake, O nginya ũninũkio na wanangĩke, ũthirĩrĩkĩre biũ.
27. Nao arĩa matĩaine na Ũrĩa-wĩ-Igũrũ-Mũno nĩo makaheo ũthamaki, na wathani, o na ũnene wa mothamaki mothe ma thĩ; Naguo ũthamaki ũcio wao ũtũũre tene na tene, Nao andũ a mabũrũri mothe mamatungatĩre o makĩmaathĩkagĩra.
28. Ũhoro ũcio ũgĩgĩthirĩra hau. Naho ha ũhoro wakwa, niĩ Danieli-rĩ, maeũrania makwa makĩ’nyamaria mũno, ngĩgĩtuka gĩthiithi nĩ ũndũ wa ũrĩa ndangĩkĩte. No rĩrĩ, maũndũ macio mothe ngĩikara o ngĩmacũranagia na ngoro.

Home