Go Back

Danieli Chapter 5

• 1. Atĩrĩrĩ, mũthamaki ti Belishazaru nĩaarugithĩirie aathani ngiri ĩmwe a bũrũri wake iruga inene, nake agĩkĩnyua ndibei andũ acio othe ngiri ĩmwe marĩ ho.
• 2. Ningĩ Belishazaru ũcio, rĩrĩa aacamaga ndibei ĩo, agĩathana akiuga atĩ indo cia thahabu na cia betha, iria ciatahirũo nĩ ithe Nebukadinezaru, ikĩrutwo hekarũ-inĩ ya Jerusalemu, irehwo, nĩ getha mũthamaki acinyuĩre we mwene, na ningĩ nĩ getha aathani a bũrũri wake, na atumia ake, o na thuriya ciake, othe manyue ndibei nacio.
• 3. Nao magĩkĩrehe indo icio cia thahabu, o icio ciarutĩtwo Jerusalemu hekarũ-inĩ ya Ngai, nake mũthamaki, na aathani a bũrũri wake, na atumia ake, o na thuriya ciake, makĩnyua ndibei nacio.
• 4. Nao makĩnyua ndibei magĩkumagia ngai ciao cia thahabu, na cia betha, na cia gĩcango, na cia igera, na cia mbaũ, o na cia mahiga.
• 5. Na thaa o ro ĩo hagĩkĩoneka ciara cia guoko kwa mũndũ, ikĩandĩka rũthingo-inĩ rũa nyũmba ĩo ya mũthamaki, o harĩa haaringaine na mũtĩ ũrĩa warũgamagia matawa; nake mũthamaki agĩkĩona njara ĩo yaandĩkaga.
• 6. Nake aamĩona, agĩthita gĩthiithi, namo meciria make makĩmũnyamaria; nacio nyangethũ ciake ikĩgethũka, o namo maru make makĩgũthana.
• 7. Nake mũthamaki agĩkĩanĩrĩra akiuga atĩ aragũri, na Akalidei, o na arathi-a-mohoro, marehwo moke harĩ we; nake mũthamaki akĩaria na andũ acio ogĩ a Babuloni, akĩmera ũũ: Atĩrĩrĩ, mũndũ ũrĩa ũrĩhota gũthoma ndemwa ici na anyonie ũrĩa ingĩtaũrũo, nĩekũhumbwo nguo cia rangi wa zambarau, na ekĩrũo kĩrengeri gĩa thahabu ngingo, na atuwo wa gatatũ ũthamaki-inĩ ũyũ.
• 8. Nao andũ acio ogĩ othe a mũthamaki magĩtonya kuo, no makĩremwo nĩ gũthoma ndemwa icio, o na kana kuonia mũthamaki ũrĩa ingĩtaũrũo.
• 9. Nake mũthamaki ũcio ti Belishazaru aaigua ũguo, akĩnyamarĩka mũno makĩria, athitĩte gĩthiithi, nao aathani ake makĩrigwo nĩ ũrĩa mangĩĩka.
• 10. No rĩrĩ, nyina wa mũthamaki aaigua ũrĩa mũthamaki na aathani a bũrũri wake maraaria, agĩtonya hau haanyuagĩrũo ndibei; nake nyina wa mũthamaki agĩgĩitĩka kwaria, akiuga atĩrĩ, Wee mũthamaki, ũrotũũra tene na tene. Tiga kũnyamarĩka nĩ ũndũ wa meciria maku, kana ũthite gĩthiithi;
• 11. tondũ gũkũ bũrũri waku, o ũyũ wathanaga, kwĩ mũndũ wĩ na roho wa ngai iria theru thĩinĩ wake; na rĩrĩa thoguo aathamakaga-rĩ, mũndũ ũcio aakoragwo acaũkĩte ngoro, na akagĩa na ũmenyi na ũũgĩ, o ta ũũgĩ wa ngai cio nyene; ningĩ nĩwe thoguo, mũthamaki Nebukadinezaru aatuire mũnene wa ago othe, na aragũri, na Akalidei, o na arathia-mohoro, rĩrĩa aarĩ mũthamaki; ũguo noguo thoguo ekire, wee mũthamaki ũyũ.
• 12. Nake mũndũ ũcio nĩwe Danieli, ũrĩa mũthamaki ũcio aatuire Beliteshazaru, nake nĩwe ũrĩa wonagwo e na roho mwega, na akagĩa na ũmenyi mũingĩ, na agakorũo arĩ mũkuũku mũno; ningĩ arĩ na ũũgĩ wa gũtaũra iroto, na wa gũthimũra thimo, o na akagĩa na hinya wa kũrogorana. Ta reke Danieli ũcio etwo, nake nĩegũgũtaũrĩra ũhoro ũcio.
• 13. Hĩndĩ ĩo Danieli agĩkĩrehwo he mũthamaki, nake mũthamaki agĩkĩũria Danieli atĩrĩ, Wee nĩwe Danieli ũcio wa ciana cia Juda iria ciarindũrirũo, o iria baba ũrĩa warĩ mũthamaki aatahire kũu Juda?
• 14. Nĩnjiguĩte ngumo yaku, atĩ wĩ na roho wa ngai iria theru thĩinĩ waku, na atĩ ũkoragwo ũcaũkĩte ngoro, na ũkagĩa na ũmenyi o na ũũgĩ mwega.
• 15. Atĩrĩrĩ, andũ othe arĩa ogĩ, o arĩa aragũri, nĩmekũrehetwo mbere yakwa nĩ getha ma’thomere ndemwa ici na manyonie ũrĩa ingĩtaũrũo, nao maaremwo nĩ kuonania ũtaũri wacio.
• 16. No nĩnjiguĩte ngumo yaku, atĩ wahota gũtaũranĩra maũndũ, o na kũrogorana. Rĩu-rĩ, ũngĩkorũo nĩũkũhota gũthoma ndemwa ici, na ũnyonie ũrĩa ingĩtaũrũo, nĩũkũhumbwo nguo cia rangi wa zambarau, na wĩkĩrũo kĩrengeri gĩa thahabu ngingo, na ũtuwo mwathani wa gatatũ ũthamaki-inĩ ũyũ.
• 17. Nake Danieli agĩcokeria mũthamaki akĩmwĩra atĩrĩ, Ikara na iheo ciaku, o nacio ngerenwa ciaku ũhe mũndũ ũngĩ; no nĩngũthomera mũthamaki ndemwa ici, na ndĩmuonie ũtaũri wacio.
• 18. Atĩrĩrĩ, wee mũthamaki, Ngai-Ũrĩa-wĩ-Igũrũ-Mũno nĩwe waheire Nebukadinezaru, thoguo, ũthamaki, o hamwe na ũnene na riri o na ũkaru;
• 19. nake tondũ wa ũnene ũcio aaheetwo, andũ a nduka ciothe, na a ndũrĩrĩ ciothe, na a mĩario yothe, makainainaga me mbere yake na makamwĩtigagĩra. Tondũ nĩoragithagia o arĩa angĩenda kũũragithia, nao arĩa angĩenda gũtũũria muoyo akamatũũria; o na ningĩ akanenehia arĩa angĩenda kũnenehia, na akanyihia arĩa angĩenda kũnyihia.
• 20. No rĩrĩa aaitĩkire gwĩtũũgĩria, na kũũmia ngoro nĩguo eke maũndũ na mwĩĩro-rĩ, nĩaarutirũo gĩtĩ-inĩ gĩake gĩa ũthamaki, na agĩtunyũo ũnene wake;
• 21. agĩcoka akĩrindũrũo agĩthengio thĩinĩ wa andũ, nayo ngoro yake ĩkĩgarũrũo ĩgĩtuĩka ta ya nyamũ, agĩgĩthiĩ gũtũũrania na njagĩ cia werũ-inĩ, akarĩaga nyeki ta ndegwa, naguo mwĩrĩ wake ũkaihũgagio nĩ ime riumĩte igũrũ, o nginya rĩrĩa aamenyire atĩ Ngai Ũrĩa-wĩ-Igũrũ-Mũno nĩwe ũthamakagĩra ciana-cia-Adamu, na atĩ ũthamaki ũcio wake aheaga o ũrĩa angĩenda kũhe.
• 22. Wee nawe, Belishazaru, mũrũwe-rĩ, ndũigana kwĩnyihia ngoro o na hanini, o na watuĩka nĩwamenyete maũndũ macio mothe;
• 23. no nĩ kwĩnenehia weneneheirie Mwathani-wa-Igũrũ, ũgĩkĩrehithie o haha mbere yaku indo iria aarutagĩrũo wĩra nacio nyũmba-inĩ yake thĩinĩ, nawe wee mwene, mwĩ na aathani a bũrũri waku, na atumia aku, o na thuriya ciaku, mũkĩnyua ndibei nacio. O na ningĩ wee nĩũkumĩtie ngai iria cia betha, na cia thahabu, na cia gĩcango, na cia igera, na cia mbaũ, o na cia mahiga, o iria itonaga kana ikaigua, o na kana ikamenya ũndũ o na ũrĩkũ; no ndũigana kũgoocithia Ngai ũrĩa ũkũheaga mĩhũmũ ya muoyo na rũhĩ rũake we mwene, na akamenya mĩthiĩre yaku yothe.
• 24. Na rĩu ũndũ ũcio nĩguo ũtũmĩte arehithie njara io yumĩte harĩ we, nĩguo ndemwa ici ciandĩkwo.
• 25. Nacio ndemwa ici ciandĩkĩtwo ikuuga ũũ: MENE, MENE, TEKEL, UPHARSIN.
• 26. Naguo ũtaũri wa ũhoro ũcio nĩguo ũyũ, MENE nĩ ta kuuga, Ngai nĩatarĩte mĩaka ya ũthamaki waku, na akaũnina.
• 27. TEKEL nĩ ta kuuga, Wee-rĩ, nĩũthimĩtwo na ratiri, ũkonwo ũtarĩ mũkinyu.
• 28. PERES nĩ ta kuuga, Ũthamaki waku nĩũgayũkanĩtio, ũkaheo Amedia na Aperisia.
• 29. Thutha wa ũguo, Belishazaru agĩatha andũ ake, magĩkĩhumba Danieli nguo cia rangi wa zambarau, na agĩĩkĩrũo kĩrengeri gĩa thahabu ngingo, naguo ũhoro wake ũkĩmenyithanio kũndũ guothe atĩ nĩwe ũtuĩtwo mwathani wa gatatũ ũthamaki-inĩ ũcio.
• 30. Na rĩrĩ, ũtukũ o ro ũcio Belishazaru, ũcio mũthamaki wa Akalidei, akĩũragwo
• 31. nake Dario, Mũmedia, akĩĩgwatĩra ũthamaki ũcio; nake Dario ũcio aarĩ ta wa mĩaka mĩrongo ĩtandatũ na ĩĩrĩ.

Home