Go Back

Danieli Chapter 11

1. Na niĩ-rĩ, mwaka wa mbere ũrĩa Dario, ũcio Mũmedia, aakorirũo athamakĩte, nĩ niĩ ndamũrũgamĩrĩire ndĩmũũmĩrĩrie na ndĩmwĩkĩre hinya.
2. Na rĩu nĩngũkuonia maũndũ marĩa matarĩ hingo matakoneka. Atĩrĩrĩ, nĩhakaamba kwarahũka athamaki angĩ atatũ a Perisia; ningĩ hacoke ũngĩ wa kana, nake ũcio wa kana atonge gũkĩra acio angĩ othe. Na rĩrĩa agakorũo agĩĩte na hinya mũnene nĩ ũndũ wa ũtonga ũcio wake, nĩakaarahũra andũ othe nĩguo mokĩrĩre ũthamaki wa Ayunani.
3. Ningĩ nĩgũkaarahũka mũthamaki ũngĩ, na akorũo e njamba nene; na aathanage na wathani wa hinya, na ekanage o ta ũrĩa ekwĩendera.
4. Na rĩrĩ, rĩrĩa agakorũo okĩrĩte ũguo-rĩ, hinya o ro ũcio wa ũthamaki wake nĩũgacoka kũninwo, naguo ũthamaki ũcio ũtuĩkane ta ũhurunjĩirũo mĩena yothe kũrĩa huho iria inya cia matu-inĩ ihurutanagĩra. No andũ a rũciaro rũake tio makarathimĩrũo ũthamaki ũcio, atĩ nĩguo maathanage o ta ũrĩa aratũire aathanaga. No rĩrĩ, ũthamaki ũcio wake nĩ gũthengio ũgathengio uume harĩ o, ũgaĩrũo andũ angĩ.
5. Ningĩ mũthamaki wa bũrũri wa gũthini o nake nĩakagĩa na hinya, no mũnene ũmwe wa bũrũri ũcio wake nĩakamũkĩria hinya, na acoke gwathana na wathani wĩ mũnene makĩria.
6. Na rĩrĩ, mĩaka yathirathira-rĩ, nĩmagacoka kũiguana, nake mwarĩ wa mũthamaki wa bũrũri wa gũthini nĩagoka kwĩ mũthamaki wa bũrũri wa gathigathini nĩ getha arĩkanĩre nake ũhoro wa thayũ. No mũirĩtu ũcio ndagatũũra arũmĩte, o na kana mũthamaki ũcio atũũre e na hinya; tondũ mũirĩtu ũcio nĩagakunyanĩrũo we mwene, na arĩa maamuumagaririe, na mũrũwe, o na ũrĩa wamwĩkagĩra hinya.
7. No mũndũ ũmwe wa rũciaro rũa andũ ao nĩakarũgama ithenya rĩa ithe, na atharĩkĩre ita cia mũthamaki wa gathigathini, na atonye itũũra rĩake rĩrĩa rĩirige, amũtorie.
8. Ningĩ atahe ngai ciao cia mĩhianano, o na mĩhianano yao ya gũtwekio, na atahe indo ciao cia goro cia betha na cia thahabu, agĩcoke nacio Misiri acitahĩte ciothe. Na thutha wa ũguo atige gũcoka gũtharĩkĩra mũthamaki wa bũrũri ũcio wa gathigathini hĩndĩ ya mĩaka mĩingĩ.
9. No rĩrĩ, ũcio nĩagathiĩ akinye bũrũri wa mũthamaki wa gũthini, na thutha wa ũguo ecokere kwao o ro ũguo.
10. No ariũ ake nĩmagethagathaga marũe mbaara, na monganie mbũtũ nyingĩ cia ita; nacio ita icio ciumagare, ciiyũre bũrũri wothe ta arĩ kĩguũ kĩa maĩ, na icoke ihĩtũke ithiĩ kũrĩa cierekeire; ningĩ icoke itware mbaara na mbere o nginya itũũra rĩake rĩrĩa rĩirige.
11. Nake mũthamaki ũcio wa bũrũri wa gũthini nĩagacinwo nĩ marakara mũno nĩ ũndũ ũcio, na acoke oimagarie ita ciake, akahũrane na mũthamaki ũcio wa bũrũri wa gathigathini. Nake ũciorĩ, agakorũo ethagathagĩte na mbũtũ cia ita nyingĩ mũno, no nĩikaneanwo moko-inĩ ma mũthamaki ũcio ũngĩ;
12. nacio itahwo, nayo ngoro ya ũcio mũcitahi ĩĩtũũgĩrie; ningĩ oragithie andũ a cio ngiri makũmi maingĩ; no rĩrĩ, ũhoro ũcio wake wa kũhootana ndũgatũũra mũno.
13. Amu mũthamaki wa bũrũri ũcio wa gathigathini nĩagacoka kũũngania mbũtũ nyingĩ cia ita gũkĩra iria cia mbere; nayo mĩaka yathirathira-rĩ, acoke oimagare na mbũtũ icio nyingĩ ii na indo nyingĩ cia mbaara.
14. Namo matukũ macio andũ aingĩ nĩmagakorũo mehotoreire mũthamaki ũcio wa kũu gũthini. Na ningĩ andũ amwe a rũrĩrĩ rũanyu o nao, arĩa mendaga maũndũ ma ũhinya, nĩmagetũũgĩria, magerie kũhingia maũndũ ma kĩoneki gĩkĩ arĩ o, no nĩmakahĩngithio magũe.
15. Nake mũthamaki ũcio wa bũrũri ũcio wa gathigathini nĩagathiĩ, aitithie ihumbu cia tĩri mũingĩ mũno ihingo-inĩ cia matũũra mamwe marĩa mairige wega, nĩ getha egwatĩre matũũra macio; ningĩ athigari a bũrũri ũcio wa gũthini, me hamwe na njamba ciao iria thure cia ita, matikamwĩtiiria, o na kana hagĩe kahinya o na kanini ga kũmwĩtiiria.
16. No rĩrĩ, ũcio ũkamatharĩkĩra nĩageka o ta ũrĩa ekwĩendera, na gũtikagĩa mũndũ o na ũmwe ũngĩmwĩtiiria; ningĩ nĩakehanda bũrũri-inĩ ũrĩa mũthaka, agwete ũhoro wa kũninana na guoko gwake.
17. Naguo hinya wa ũthamaki wake wothe nĩakawerekeria bũrũri ũcio, arĩkanĩre maũndũ ma kũrehe thayũ, na acoke amahingie; ningĩ agerie kũnina bũrũri ũcio nĩ kũhe mũnene wakuo mwarĩ, amũhikie; no ũhoro ũcio ndũkarĩĩra, o na kana agunĩke nĩguo o na hanini.
18. Ningĩ thutha wa ũguo nĩagacoka erekere harĩ andũ a mabũrũri marĩa me hũgũrũrũ-inĩ cia iria rĩrĩa inene, na atahane kuo mũno; no nĩhagacoka honeke mũnene ũmwe wa gũteithania, na nĩwe ũkanina ũhoro ũcio wake wa kũũgitana, o na atũme irumi ciake imũcokerere we mwene.
19. Hĩndĩ ĩo nĩakahũndũka erekere ihingo-inĩ cia bũrũri wake we mwene; no nĩ kũhĩngwo akahĩngwo, agũe, na ndacoke kuoneka rĩngĩ.
20. Ningĩ ithenya rĩake haarahũke mũndũ ũngĩ, nake ũcio atũme mwĩtia mbia cia igoti atuĩkanĩrie bũrũri ũcio wothe wĩ mwago. No matukũ manyinyi maathira, nĩakoragwo, no ndakoragwo na marakara kana na mbaara.
21. Ningĩ thutha wake hacoke haarahũke mũndũ mũmeneku, ũrĩa ũgakorũo atangĩtĩĩka wa gũtuĩka mwathi wa bũrũri ũcio; no agoka na mbũkĩrĩra, egwatĩre ũthamaki ũcio na wara.
22. Nacio mbũtũ iria akarũa nacio nĩ kũhwererekera ikahwererekera ciũre mbere yake ta itwarĩrĩirio nĩ kĩguũ, ithirĩrĩkĩre ciothe biũ, irĩ hamwe na mũtongoria wacio ũrĩa mũitĩrĩrie maguta.
23. Na rĩrĩ, aarĩkia kũrĩkanĩra ũhoro na andũ akuo, nĩagacoka ahenanie na enenehie makĩria, na acoke agĩe na hinya kũu bũrũri ũcio, o na atarĩ na andũ aingĩ.
24. Ningĩ atĩrĩ, nĩakoimagara akorerere andũ a bũrũri ũcio na mbũkĩrĩra, o arĩa matũire kũndũ kũrĩa kũnoru makĩria, na ekane maũndũ matarĩ mekwo nĩ maithe make, o na kana acũkũrũwe, akĩgayanagĩria andũ indo iria atahĩte, o na iria atunyanĩte, o na ũtonga mũingĩ. Ningĩ athugunde maũndũ na wara, nĩ getha okĩrĩre andũ arĩa matũire matũũra-inĩ marĩa mairige na hinya. No nĩageka ũguo matukũ matarĩ maingĩ.
25. Nake nĩakongania andũ a ita ciake nĩ getha athiĩ na hinya mũingĩ, o na ũcamba, akogite mũthamaki wa bũrũri wa gũthini. Nake mũthamaki ũcio wa bũrũri wa gũthini arũe nake e na andũ a ita aingĩ makĩria, me na hinya mũno, no ndakametiiria, tondũ agakorũo acirĩirũo ekwo maũndũ ma ũrĩa-ng’ũũrũ.
26. Amu-rĩ, andũ arĩa marĩanagĩra nake nĩo makamũkunyanĩra, nao andũ ake a ita mahurunjũke, na aingĩ ao moragwo.
27. Na rĩrĩ, ha ũhoro wa athamaki acio erĩ-rĩ, magakorũo macirĩire na ngoro ciao kũgerana ngero, na maaranĩrie ndeto cia maheni o makĩrĩanagĩra hamwe. No mohoro macio mao matikarĩĩra, tondũ ithirĩro rĩa maũndũ macio rĩgakinya o ihinda rĩrĩa rĩtuĩtwo.
28. Thutha wa ũguo nĩakahũndũka, acoke kwao e na ũtonga mũingĩ, na akorũo omĩirie kĩrĩkanĩro kĩrĩa gĩtheru ngoro yake, na nĩagekana o ta ũrĩa ekwĩendera; na thutha acoke kwao.
29. Ningĩ ihinda rĩrĩa rĩtuĩtwo rĩakinya-rĩ, acoke akinye bũrũri ũcio wa gũthini; no rĩrĩ, ithiĩ rĩu rĩake rĩtigatuĩka ta rĩrĩa aathiĩte mbere,
30. amu andũ a bũrũri wa Kitimu nĩmagoka na marikabu ciao, mamũtharĩkĩre; na nĩ ũndũ wa ũguo akaiguithio guoya ngoro, na ahũndũke, athũgũtĩire kĩrĩkanĩro kĩu gĩtheru, na ekanage o ta ũrĩa ekwĩendera, o na acoke kũiguanĩra ũhoro na andũ arĩa matirikĩte kĩrĩkanĩro kĩu gĩtheru.
31. Nao andũ arĩa mamũteithagia nĩmakaarahũrũo, nao mathahie gĩikaro kĩrĩa kĩamũre, o na handũ harĩa hairigĩtwo na hinya, na ningĩ mathengie mahaki ma njino matige gũcoka gũcinĩrũo ho, ningĩ macoke marehe kĩndũ kĩĩ thahu makĩige ho, kĩrĩa kĩngĩtũma bũrũri ũkire ihooru.
32. Nao andũ arĩa mendaga gũthũkia kĩrĩkanĩro kĩu gĩtheru-rĩ, nĩo agathahia makĩria, amagucĩrĩrie na ndeto cia wara. No rĩrĩ, andũ arĩa magakorũo moyaine na Ngai wao nĩo makagĩa na hinya makĩria, na mekage maũndũ ma ũcamba.
33. Nao andũ arĩa ogĩ a kĩrĩndĩ nĩ makohĩgia andũ aingĩ mũno. No rĩrĩ, nĩmagacoka kũgũithio hĩndĩ ndaya, amwe ao makue moragĩtwo na rũhiũ rũa njora, na angĩ macinwo, na angĩ marindũrũo, o na angĩ macumwo indo ciao cia bata.
34. Na rĩrĩ, o na rĩrĩa mekũgũithio ũguo-rĩ, nĩmakona ateithia matarĩ aingĩ; no andũ aingĩ nĩmakegwatania nao na wara.
35. Ningĩ arĩa ogĩ-rĩ, amwe ao makagũa o ro ũguo moragĩtwo, nĩ getha andũ arĩa angĩ maikare ta makumuthĩtwo magathera, na ta mahuhĩtwo makaninwo mũũngũ, o na merũhio magathirũo nĩ gĩko, nao maikare ũguo o nginya ithirĩro, amu ihinda rĩu rĩtue rĩtirĩ rĩrakinya.
36. No mũthamaki ũcio agekaga o ũrĩa ekwĩendera, na etũũgĩrie mũno, na enenehie gũkĩra ngai ciothe, o na aarĩrĩre Ngai ũrĩa ũkĩrĩte ngai iria ingĩ ciothe na ndeto cia kũmakania; nake nĩagaikara agaacĩire o nginya rĩrĩa mathũgũta marĩa meĩ magakorũo makinyĩte; tondũ gũtirĩ hĩndĩ maũndũ marĩa matuĩtwo matakahingio.
37. Ningĩ ndakarũmbũiya ngai cia maithe make, kana arũmbũiye ngai ĩrĩa ĩĩriragĩrio nĩ andũ-a-nja, o na kana arũmbũiye ũhoro wa ngai o na ĩrĩkũ; tondũ nĩagakorũo aciĩtĩĩire ciothe.
38. No rĩrĩ, e gwake mũciĩ-rĩ, nĩagakumia ngai ĩrĩa ya kũndũ kũrĩa kũirigĩtwo na hinya; o na ngai ĩngĩ ĩrĩa maithe make mataamenyete nĩyo agakumia, na ũndũ wa kũmĩrutĩra mahaki ma thahabu, na betha, na mahiga ma goro, o na indo ingĩ thaka mũno.
39. Ningĩ nĩagatoria matũũra marĩa mairige na hinya mũno makĩria na ũndũ wa gũteithio nĩ andũ arĩa mahoyaga ngai ĩngĩ ya ũgeni-inĩ. Nao andũ othe arĩa magakorũo matĩaine nake-rĩ, nĩagatũma magĩe igweta inene, na amatue aathani a gwatha andũ aingĩ, o nacio ng’ũndũ cia bũrũri ũcio acigayanie acienderie agũri.
40. Na atĩrĩrĩ, ihinda rĩa ithirĩro rĩakinya, mũthamaki ũcio wa bũrũri wa gũthini nĩakamũtharĩkĩra, nake mũthamaki ũcio wa bũrũri wa gathigathini athiĩ akamũũkĩrĩre amwĩhotoreire, amũkore atariĩ ta kĩhuhũkanio kĩa ngoma-cia-aka, amũtharĩkĩre arĩ na ngari cia ita, na andũ arĩa mathiaga mahaicĩte mbarathi, o na marikabu nyingĩ. Nao matonye mabũrũri macio mahaana ta kĩguũ kĩa maĩ, mamatuĩkanie, methiĩre;
41. o na ningĩ atonye bũrũri ũrĩa mũthaka, na andũ aingĩ mũno matorio nĩwe. No rĩrĩ, arĩa makahonokio marutwo moko-inĩ make nĩ andũ a Edomu na Moabi hamwe na anene a ciana cia bũrũri wa Amoni.
42. Ningĩ nĩagatambũrũkia guoko gwake atharĩke mabũrũri maingĩ; o naguo bũrũri wa Misiri ndũkahonoka;
43. no nĩakenyitĩra mĩthithũ ya Misiri na hinya, o mĩthithũ yao ya thahabu na betha, o na indo ciao ciothe cia bata; ningĩ andũ a Kurene na andũ a Kushi maikarage mamuumĩte thutha.
44. No rĩrĩ, njukũ iria akareherũo ciumĩte na mwena wa irathĩro, o na mwena wa gathigathini, nĩikamũmakia, na aaciigua-rĩ, acoke athiĩ e mũthũgũtu, nĩ getha akonũhithanie, na anine andũ aingĩ o kũmanina;
45. nacio hema ciake cia ũnene aciambithie o kũu gatagatĩ-inĩ ka iria rĩrĩa inene na kĩrĩma kĩrĩa kĩamũre, o kĩu gĩthakaru mũno. No rĩrĩ, ihinda rĩake rĩa kũninwo no rĩgakinya, na hatirĩ mũndũ o na ũmwe ũkoneka wa kũmũteithia.

Home